Chhut Âi-khi̍p Ki 30

Sêu-hiông ke Thàn

(Chhut Âi-khi̍p Ki 37:25-28)

1“Ngì oi yung kîm-ha̍p-fôn-muk chho yit-chho sêu-hiông ke thàn. 2Thàn he si-fông ke, chhòng si-sṳ̍p-ńg kûng-fûn, fat si-sṳ̍p-ńg kûng-fûn, kô kiú-sṳ̍p kûng-fûn. Liá-thàn ke si-chak kok oi lâu thàn lièn-cho kûi-te. 3Oi yung sùn-kîm pâu-tén thàn ke táng-kô, si-piên, lâu si-kok, chû-vì siông chhṳ́-hìn kîm-piên. 4Oi chho lióng-chak yung-lòi kông-thàn ke kîm khiên-é, ôn chhai thàn lióng-phién kîm-piên hâ-poi, pûn kông-thàn ke kong-é chhôn ko-hi. 5Oi yung kîm-ha̍p-fôn-muk chho kong-é, yung kîm pâu-tén. 6Hiông-thàn oi piong chhai yok-khui chhièn ke chong-man ngoi, mien tui-tén yok-khui táng-kô su̍k-chhui ke koi-é, chhiu-he Ngài oi lâu ngì siông-fi ke thi-fông. 7Tak-ngit chêu-sṳ̀n, Â-lùn lòi chṳ́n-lî tên-chán ke sṳ̀, oi chhai thàn-táng sêu tông-hiông ke hiông. 8Lìm-am-é tiám tên-fó ke sṳ̀, kì ya yit-thin oi sêu-hiông. Sṳ-sṳ thoi-thoi oi ki-siu̍k chhai Ngài — Song-chú mien-chhièn án-ngiòng hien-hiông, cho-m̀-tet thìn. 9Cho-m̀-tet chhai liá-thàn táng sêu mò ha̍p kûi-thin ke hiông, ya-he hien sêu-fa-chi ya-he su-chi, ya cho-m̀-tet chhai táng-kô hien chi-chiú. 10Mî-ngièn yit-pái, Â-lùn oi hàng kiet-chhiang ke lî-ngì#30:10 “kiet-chhiang ke lî-ngì” ya-he yi̍t-cho “su̍k-chhui ke lî-ngì”., yung su̍k-chhui chi-sên ke hiet kò chhai thàn ke si-kok táng. Sṳ-sṳ thoi-thoi oi chûn-hàng liá lî-ngì. Liá-thàn oi vàn-chhiòn fûn-phe̍t vì-sṳn, fung-hien pûn Ngài — Song-chú.”

Sṳn-chong-phùng ke Vì-fu Fi-yung

11Song-chú tui Mô-sî kóng: 12“Ngì thiàu-chhà Yî-set-lie̍t ngìn-khiéu ke sṳ̀, tak-sà ngìn chhiòn-phu oi hiong Ngài hien su̍k-miang-kîm, thiàu-chhà khì-kiên kì chhiu m̀-voi tù-tó má-ke châi-fo. 13Su thiàu-chhà ke ngìn yit-thin oi cheu sṳn-só kûi-thin ke phêu-chún na̍p ku-thin ke chhièn-ngiak, cho hien-pûn Ngài ke lî-vu̍t. 14Mî-yit ke tên-ki ke ngìn, chhiu-he ngi-sṳ̍p se yî-song ke nàm-ngìn, chhiòn-phu oi na̍p liá chhièn-ngiak. 15Na̍p su̍k-miang-kîm mò-pûn phìn-fu; yû-chhièn ngìn m̀-sṳ́ kâ-na̍p, khiùng-ngìn ya cho-m̀-tet séu-na̍p. 16Ngì oi tui Yî-set-lie̍t ngìn-mìn sû liá su̍k-miang-kîm, nâ-hi cho sṳn-chong-phùng ke vì-fu fi-yung. Liá he kì-têu vi chhṳ-kâ ke sâng-miang fu-chhut ke kiên-hien; Ngài — Song-chú voi yîn-vi án-ngiòng ki-tet pó-fu kì-têu.”

Thùng-phùn

17Song-chú tui Mô-sî kóng: 18“Ngì oi chho yit-ke sé-thông yung ke thùng-phùn lâu yit-ke phùn-chho, nâ-lòi piong chhai sṳn-chong-phùng lâu chi-thàn chûng-kiên. Phùn-tú oi chông-súi. 19Â-lùn lâu kì ke-têu lai-é chin-ngi̍p sṳn-chong-phùng, ya-he hàng-khiûn chi-thàn hi hien fó-chi pûn Ngài yî-chhièn, oi yung liá phùn-tú ke súi sé-sú, sé-kiok. 20Án-ngiòng kì-têu chhiu m̀-voi sí; 21kì-têu yit-thin oi sé-sú, sé-kiok chang m̀-voi sí. Liá he kì-têu lâu kì-têu ke chṳ́-sûn yún-yén oi chûn-sú ke li-kûi.”

Sṳn-yù ke Chṳ-chho lâu Yung-thù

22Song-chú tui Mô-sî kóng: 23“Oi nâ song-tén ke hiông-liau: liù-chṳt ke mu̍t-yo̍k liuk kûng-kîn, hiông ngiuk-kui sâm kûng-kîn, hiông chhông-phù sâm kûng-kîn, 24lâu liuk kûng-kîn ke kui-phì (chhiòn-phu cheu sṳn-só kûi-thin ke phêu-chún lòi-chhṳn), kâ-song si kûng-sṳ̂n ke kám-lám-yù, 25yung chho hiông-súi ke fông-fap lòi chṳ-chho sṳn-yù. 26Oi yung liá sṳn-yù kò-mat Ngài ke sṳn-chong-phùng, yok-khui, 27kiûng-chok lâu chok-táng ke só-yû yung-phín, tên-thòi lâu só-yû ke yung-phín, hiông-thàn, 28hien sêu-fa-chi ke thàn lâu só-yû yung-phín, hàn-yû sé-thông-phùn lâu phùn-chho. 29Liá yit-chhiet oi yung liá fông-fap lòi fung-hien, sṳ́ kì-têu vàn-chhiòn fûn-phe̍t vì-sṳn; só-yû pen-tó ke ngìn ya-he tûng-sî chhiòn-phu voi fûn-phe̍t vì-sṳn#30:29 Khon Chhut Âi-khi̍p Ki 29:37.. 30Oi vi Â-lùn lâu kì ke-têu lai-é kò sṳn-yù, li̍p kì-têu cho chi-sṳ̂ sṳ-fung Ngài. 31Ngì oi lâu Yî-set-lie̍t-ngìn kóng: ‘Sṳ-sṳ thoi-thoi, ngì-têu oi chhai sṳ-fung Ngài ke sṳ̀, yung liá sṳn-yù. 32Cho-m̀-tet chiông sṳn-yù tó chhai phû-thûng ngìn sṳ̂n-song, ya cho-m̀-tet yung liá phi-fông nang-ngoi cho khì-thâ siông-chhiong ke yù. Liá-yù he sṳn ke; ngì-têu yit-thin oi chiông kì khon-cho sṳn-vu̍t. 33Na-yû khì-thâ ke ngìn chṳ-chho chhiong liá-chúng yù, ya-he yung liá-yù lòi-kò chi-sṳ̂ yî-ngoi ke ngìn, yit-thin oi chiông kì tui Ngài ke chṳ́-mìn chûng chhù-thet.’ ”

Hiông ke Chṳ-chho lâu Yung-thù

34Song-chú tui Mô-sî kóng: “Oi nâ hâ-poi kok-yong tông-hiông ke hiông-liau: sû-ha̍p-hiông, hiông-lò, pha̍k-chhiùng-hiông, lâu sùn-nen-hiông, phiàng-chhûng ke liong, 35yung chho hiông-súi ke fông-fap lòi chṳ-chho, kâ-têu sùn-yàm; yèn-heu chiông kì fûn-phe̍t vì-sṳn. 36Oi nâ yit phu-fun lòi, chûng-to pien yu-fún, tai-to Ngài ke sṳn-chong-phùng, piong chhai yok-khui thèu-chhièn — chhiu-he Ngài oi lâu ngì siông-fi ke thi-fông. Liá-hiông he chṳ-sṳn ke tûng-sî. 37Cho-m̀-tet yung khiung-yong ke phi-fông vi chhṳ-kâ chṳ-chho khiung-yong ke hiông; yîn-vi kì he hien-pûn Ngài ke sṳn-vu̍t. 38Na-yû khì-thâ ke ngìn chṳ-chho chhiong liá-chúng hiông, chhṳ-kâ hióng-su hiông-mi, yit-thin oi chiông kì tui Ngài ke chṳ́-mìn chûng chhù-thet.”

Currently Selected:

Chhut Âi-khi̍p Ki 30: THV12Rdb

Highlight

Copy