Chhut Âi-khi̍p Ki 31

Hí Sṳn-chong-phùng

(Chhut Âi-khi̍p Ki 35:30–36:1)

1Song-chú tui Mô-sî kóng: 2“Ngài yí-kîn tui Yù-thai kî-chhu̍k sién-chhut Fu-ngí ke sûn-é, Vû-li ke lai-é Pí-sat-lie̍t. 3Ngài ke Lìn yí-kîn chhûng-mân kì; Ngài yû su-pûn kì chhûng-mìn, chhòi-nèn, kî-su̍t, voi-cho kok-yong sú-ngi, 4chhiong sat-kie thù-on, yung kîm, ngiùn, thùng chṳ-chho kok-chúng yung-phín; 5voi khat oi siông ke pó-sa̍k; nèn khat su-é; hàn-voi khì-thâ kok-yong khì-kháu ke sú-ngi. 6Ngài yu tui Tan kî-chhu̍k chṳ́-phai Â-hî-sat-mat ke lai-é Â-hò-li-â-pak cho kì ke chhu-sú. Ke-têu yû khì-kháu kî-su̍t ke ngìn, Ngài ya-yû su-pûn kì-têu chhòi-nèn, sṳ́ kì-têu voi cho Ngài só fûn-fu ke kok-chúng yung-phín: 7chhiu-he sṳn-chong-phùng, yok-khui, yok-khui táng-kô su̍k-chhui ke koi-é, sṳn-chong-phùng ke só-yû yung-phín, 8kiûng-chok lâu só-yû ke yung-phín, sùn-kîm ke tên-thòi lâu só-yû ke yung-phín, hiông-thàn, 9hien sêu-fa-chi ke thàn lâu só-yû ke yung-phín, sé-thông-phùn lâu phùn-chho, 10sú-kûng tông-yu ke chi-sṳ̂ sṳn-fu̍k — Â-lùn lâu kì ke-têu lai-é chṳp-hàng chi-sṳ̂ chṳt-vu ke sṳ̀ só-chok ke sṳn-fu̍k, 11sṳn-yù, lâu sṳn-só só yung ke tông-hiông ke hiông. Liá yit-chhiet kì-têu yit-thin oi chhiòn-phu cheu Ngài só fûn-fu ke hi-cho.”

Sú Ôn-sit-ngit

12Song-chú fûn-fu Mô-sî chón-ko Yî-set-lie̍t-ngìn, kóng: 13“Ngì-têu yit-thin oi sú Ngài ke ôn-sit-ngit; yîn-vi liá he ngì-têu lâu Ngài chûng-kiên yún-yén ke chṳn-kí, péu-sṳ Ngài — Song-chú kién-sién ngì-têu cho Ngài sṳn-kiet ke chṳ́-mìn. 14Ngì-têu oi sú ôn-sit-ngit, yîn-vi liá-ngit he sṳn-ngit. Só-yû m̀ chûn-sú, chhai liá-ngit cheu-sòng hi kûng-chok ke ngìn yit-thin oi chhú sí-hìn. 15Ngì-têu liuk-ngit cho-tet kûng-chok, chúng-he thi-chhit ngit he ôn-sit sṳn-ngit, he hien-pûn Ngài ke; só-yû chhai ôn-sit-ngit kûng-chok ke ngìn yit-thin oi chhú sí-hìn. 16Yî-set-lie̍t-ngìn oi sṳ-sṳ thoi-thoi chûn-sú ôn-sit-ngit, cho yún-yén ke yok. 17Liá he Yî-set-lie̍t-ngìn lâu Ngài chûng-kiên yún-yén ke chṳn-kí; yîn-vi Ngài — Song-chú chhai liuk-ngit nui chhóng-chho thiên-thi, chhai thi-chhit ngit thìn-kûng hiet-khun.”

18Song-ti chhai Sî-nai-sân táng tui Mô-sî kóng liá-têu fa yî-heu, chhiu chiông lióng-te sa̍k-pán kâu-pûn kì; Song-ti yung sú-chṳ́ chhai sa̍k-pán táng siá-hâ Kì ke kie-min.

Currently Selected:

Chhut Âi-khi̍p Ki 31: THV12Rdb

Highlight

Copy