Chhut Âi-khi̍p Ki 29

Sat-li̍p Â-lùn lâu Kì ke Chṳ́-sûn Cho Chi-sṳ̂ ke Thiàu-li

(Li-vi Ki 8:1-36)

1“Ngì su sṳn-chṳt pûn Â-lùn lâu kì ke-têu lai-é, sat-li̍p kì-têu cho chi-sṳ̂ sṳ-fung Ngài, oi án-ngiòng cho: Oi chok yit-chak se ngiù-kú lâu lióng-chak mò khiet-tiám ke mièn-yòng-kú; 2yung chui-hó ke mien-fún hi-cho vù-kau-piáng, yû-têu kiâu-yù cho, yû-têu mò kiâu-yù cho, yû-têu kò-yù cho vù-kau ke pho̍k-piáng. 3Chiông liá-têu piáng chông chhai làm-è tú, chhai ngì hien se ngiù-kú lâu lióng-chak mièn-yòng-kú ke sṳ̀ tai-lòi hien-pûn Ngài.

4“Ngì oi chiông Â-lùn lâu kì ke-têu lai-é tai-to sṳn-chong-phùng mùn-héu lòi, fûn-fu kì-têu sé-sṳ̂n. 5Yèn-heu oi pûn Â-lùn chok chi-sṳ̂ ke sṳn-fu̍k — nui-sâm, koa-tén yî-fut-tet ke chhòng-sâm, hiûng-phài, lâu sú-kûng chhiak ke tai-é. 6Chiông mo-é tai chhai kì ke thèu-nà táng, chiông khat-tén ‘Kûi Song-chú vì-sṳn’ ke sṳn-phài kiê chhai mo-é táng-kô, 7chui-heu nâ sṳn-yù tó chhai kì thèu-nà táng lòi sat-li̍p kì.

8“Ngì oi chiông kì ke-têu lai-é tai-lòi, lâu kì-têu chok nui-sâm, 9kiê yêu-tai, tai mo-é. Liá chhiu-he su sṳn-chṳt pûn Â-lùn lâu kì ke-têu lai-é ke thiàu-li. Kì-têu lâu kì-têu ke heu-thoi oi yún-yén cho chi-sṳ̂ sṳ-fung Ngài.

10“Ngì oi chiông ngiù-kú khiên-to sṳn-chong-phùng chhièn, fûn-fu Â-lùn lâu kì ke-têu lai-é on-sú chhai ngiù ke thèu-nà táng. 11Chhiu chhai sṳn-chong-phùng mùn-héu, chhai Ngài — Song-chú mien-chhièn, chiông ngiù-kú chhṳ̀-thet. 12Oi nâ-têu ngiù-hiet, yung sú-chṳ́ kò chhai chi-thàn si-chak kok-táng; chiông chhûn-tó ke hiet tó chhai thàn-kiok. 13Yèn-heu chiông ke pâu-tén puk-nui ke yù, kôn ke chui-hó phu-fun, lâu tai-yù ke lióng-chak yêu-é, chhai chi-thàn táng-kô sêu, lòi hien-pûn Ngài. 14Chúng-he ngiù-kú ke ngiuk, phì, lâu chhòng oi chhai yàng-ngoi sêu. Liá he chi-sṳ̂ ke su̍k-chhui-chi.

15“Ngì oi khiên yit-chak mièn-yòng-kú lòi, fûn-fu Â-lùn lâu kì ke-têu lai-é on-sú chhai yòng ke thèu-nà táng. 16Chiông mièn-yòng-kú chhṳ̀-thet, yu-oi nâ yòng-hiet hia chhai chi-thàn ke si chû-vì. 17Ngì oi chiông mièn-yòng-kú chhiet-cho yit-te yit-te; sé-chhiang puk-nui lâu heu-thúi, piong chhai thèu-nà lâu khì-thâ sui-ngiuk táng-kô. 18Oi chiông kûi-chak mièn-yòng-kú piong chhai chi-thàn táng sêu, cho sêu-fa-chi hien-pûn Ngài — Song-chú. Liá fó-chi ke hiông-mi he Ngài fôn-hí ke.

19“Ngì oi khiên nang-ngoi yit-chak mièn-yòng-kú lòi, fûn-fu Â-lùn lâu kì ke-têu lai-é on-sú chhai yòng ke thèu-nà táng. 20Oi chiông mièn-yòng-kú chhṳ̀-thet, yèn-heu nâ-têu yòng-hiet kò chhai Â-lùn lâu kì ke-têu lai-é ke yu ngí-thò, ya kò chhai kì-têu yu sú-chṳ́-kûng lâu yu kiok-chṳ́-kûng. Khì-thâ ke hiet oi hia chhai chi-thàn ke si chû-vì. 21Oi nâ yit-si̍t-é chi-thàn táng-kô ke hiet lâu yit-si̍t-é sṳn-yù fin chhai Â-lùn lâu kì ke sâm-fu, ya fin chhai Â-lùn ke-têu lai-é lâu kì-têu ke sâm-fu. Án-ngiòng, kì, kì ke-têu lai-é, lâu kì-têu ke sâm-fu chhiu chhiòn-phu fûn-phe̍t vì-sṳn.

22“Ngì oi kot-hâ mièn-yòng-kú ke yù, mî, pâu-tén puk-nui ke yù, kôn ke chui-hó phu-fun, lióng-chak tai-yù ke yêu-é, lâu yu-thúi. (Liá he su sṳn-chṳt pûn chi-sṳ̂ só hien ke mièn-yòng-kú.) 23Tui fung-hien pûn Ngài ke piong vù-kau-piáng ke làm-tú nâ yit-te piáng, yit-te kiâu-yù cho ke piáng, lâu yit-te pho̍k-piáng. 24Chiông liá-têu sṳ̍t-vu̍t chhiòn-phu piong chhai Â-lùn lâu kì ke-têu lai-é sú-hong, yèu kí-ha cho yèu-chi hien-pûn Ngài. 25Yèn-heu ngì oi tui kì-têu sú-chûng chiông sṳ̍t-vu̍t chiap ko-lòi, piong chhai chi-thàn táng-kô sêu, cho sêu-fa-chi hien-pûn Ngài — Song-chú. Liá fó-chi ke hiông-mi he Ngài fôn-hí ke.

26“Ngì oi nâ Â-lùn sṳ̀n-chiap sṳn-chṳt só hien mièn-yòng-kú ke hiûng-phù-ngiuk yèu kí-ha, cho yèu-chi hien-pûn Ngài. Liá-fun chi-ngiuk chhiu-he ngì ke.

27“Su sṳn-chṳt pûn chi-sṳ̂ ke sṳ̀, ke-têu yung-ko ke mièn-yòng-kú ke hiûng-phù-ngiuk lâu yu-thúi, chhiòn-phu oi fûn-phe̍t vì-sṳn, cho yèu-chi kûi-pûn Ngài, yèn-heu kâu-pûn ke-têu chi-sṳ̂. 28Liá he Ngài m̀-voi kói-pien ke thin-li: Yî-set-lie̍t-ngìn hien phìn-ôn-chi ke sṳ̀, thèu-sâng ke hiûng-phù-ngiuk lâu yu-thúi oi pûn ke-têu chi-sṳ̂; ke-he Ngài ke chṳ́-mìn hien-pûn Ngài — Song-chú ke thi̍t-phe̍t chi-vu̍t.

29“Â-lùn sí-heu, kì ke sṳn-fu̍k oi chhòn-pûn kì ke chṳ́-sûn, pûn kì-têu chiap-su sṳn-chṳt ke sṳ̀ hó chok. 30Ke sṳ̀n-chiap Â-lùn cho chi-sṳ̂ ke chṳ́-sûn, kì lòi-to sṳn-chong-phùng tú, chhai sṳn-só sṳ-fung Ngài ke sṳ̀, oi chok liá sṳn-fu̍k chhit-ngit.

31“Â-lùn lâu kì ke-têu lai-é chiap-su sṳn-chṳt ke sṳ̀, yung-ko ke mièn-yòng-kú ke ngiuk, ngì oi nâ to yit-ke sṳn-kiet ke só-chhai hi-chú. 32Kì-têu oi chhai sṳn-chong-phùng mùn-héu sṳ̍t liá yòng-ngiuk lâu làm-è tú ke piáng. 33Chiap-su sṳn-chṳt ke sa-chhui-lî yung-ko ke sṳ̍t-vu̍t, kì-têu ya oi sṳ̍t. Chṳ́-yû chi-sṳ̂ chang cho-tet sṳ̍t, yîn-vi liá sṳ̍t-vu̍t he sṳn ke. 34Na-he yû-ngiuk ya-he piáng to thi-ngi ngit chêu-sṳ̀n hàn-màng sṳ̍t-thet, chhiu-oi sêu-thet, m̀-hó chai sṳ̍t, yîn-vi liá sṳ̍t-vu̍t he sṳn ke.

35“Ngì oi cheu Ngài só fûn-fu ke yit-chhiet, vi Â-lùn lâu kì ke-têu lai-é kí-hàng chiap-su sṳn-chṳt ke tién-lî chhit-ngit. 36Tak-ngit ngì yit-thin oi hien-song yit-chak ngiù-kú cho su̍k-chhui-chi, sṳ́ chi-thàn kiet-chhiang, ya oi yung kám-lám-yù kò chi-thàn, sṳ́ kì fûn-phe̍t vì-sṳn. 37Ngì oi tak-ngit án-ngiòng cho, lièn-tén chhit-ngit, sṳ́ chi-thàn vàn-chhiòn fûn-phe̍t vì-sṳn. Só-yû pen-tó chi-thàn ke ngìn ya-he tûng-sî chhiòn-phu voi fûn-phe̍t vì-sṳn#29:37 “fûn-phe̍t vì-sṳn” ya-he yi̍t-cho “pûn sṳ̀n-sṳn ke li̍t-liong sông-tó”..

Tak-ngit oi Hien ke Chi

(Mìn-su Ki 28:1-8)

38“Ngì tak-ngit oi hien lióng-chak yit-se thai ke se-yòng chhai chi-thàn táng, cho-m̀-tet thìn; 39chêu-sṳ̀n hien yit-chak, lìm-am-é hien nang-ngoi yit-chak. 40Hien thi-yit chak yòng ke sṳ̀ oi thùng-sṳ̀ hien yit kûng-kîn yu-mien-fún, kiâu yit kûng-sṳ̂n sùn ke kám-lám-yù, nang-ngoi hien yit kûng-sṳ̂n ke chi-chiú. 41Lìm-am-é hien thi-ngi chak yòng ke sṳ̀, ngì oi cheu chêu-sṳ̀n án-ngiòng chiông su-chi lâu chi-chiú hien-pûn Ngài — Song-chú. Liá fó-chi ke hiông-mi he Ngài fôn-hí ke. 42Sṳ-sṳ thoi-thoi, liá sêu-fa-chi oi chhai Ngài mien-chhièn, chhai sṳn-chong-phùng mùn-héu hien; ke sṳn-chong-phùng chhiu-he Ngài oi lâu ngì-têu siông-fi, lâu ngì kóng-fa ke thi-fông. 43Ngài oi lâu Yî-set-lie̍t ngìn-mìn chhai ke-vi siông-fi. Ngài ke yùng-yeu voi chiông ke-thi fûn-phe̍t vì-sṳn. 44Ngài oi sṳ́ sṳn-chong-phùng lâu chi-thàn sṳ̀n-sṳn, oi chiông Â-lùn lâu kì ke-têu lai-é fûn-phe̍t chhut-lòi, cho chi-sṳ̂ sṳ-fung Ngài. 45Ngài oi he̍t chhai Yî-set-lie̍t ngìn-mìn tông-chûng, oi-cho kì-têu ke Song-ti. 46Kì-têu voi tî Ngài he Song-chú — kì-têu ke Song-ti; Ngài tui Âi-khi̍p chiông kì-têu thu chhut-lòi, he vi-tó oi he̍t chhai kì-têu tông-chûng. Ngài he Song-chú — kì-têu ke Song-ti.”

Currently Selected:

Chhut Âi-khi̍p Ki 29: THV12Rdb

Highlight

Copy