Chhut Âi-khi̍p Ki 15

Mô-sî ke Kô

1Ke-sṳ̀, Mô-sî lâu Yî-set-lie̍t ngìn-mìn hiong Song-chú chhong-kô:

Ngài oi chhong-kô siung-chan Song-chú,

yîn-vi Kì tet-tó kông-yùng ke sṳn-li;

Kì chiông chan-mâ lâu khì-pîn te̍p-lo̍k hói-tú.

2Song-chú he ngài ke li̍t-liong, ngài ke sṳ̂-kô;

Kì chṳ́n-kiu ngài.

Kì he ngài ke Song-ti, ngài oi siung-chan Kì;

Kì he ngâ-pâ ke Song-ti, ngài oi chan-mî Kì.

3Song-chú he chan-sṳ;

Song-chú he Kì ke miàng.

4Kì chiông Âi-khi̍p-vòng ke chan-chhâ lâu kiûn-chhui te̍p-lo̍k hói-tú,

chiông thi̍t-sién ke kiûn-kôn chim-sí chhai Fùng-hói tî-poi.

5Chhṳ̂m-hói thûn-thet kì-têu;

kì-têu chhiong sa̍k-thèu chhṳ̀m-lo̍k hói-tái.

6Song-chú â, Ngì ke yu-sú hién-chhut yùng-yeu lâu thai-nèn;

Song-chú â, Ngì ke yu-sú chiông thi̍t-ngìn tá-to mièn-mièn.

7Ngì vù-pí ke vî-ngiàm chṳ̂n-fu̍k sù-thi̍t;

Ngì ke nu-hi sêu-thet kì-têu, chhiong sêu vò-kón.

8Ngì hiong hói-yòng phùn-hi, súi chhiu tôi hí-lòi,

thai-súi chhiong chhiòng-piak khî-to tèn-tèn;

hói-chûng ke chhṳ̂m-súi pien-cho châu-thi.

9Sù-thi̍t kóng: ‘Ngài oi kiuk kì-têu, chok-tó kì-têu;

ngài oi pûn kì-têu ke chhòi-sán, yù-chhai ngài chhióng.

Ngài oi pâng-chhut tô-kiam, chhîn-sú lòi-me̍t kì-têu.’

10Chúng-he Song-chú â, Ngì phùn yit-héu hi,

hói chhiu chiông kì-têu thûn-thet;

kì-têu chhiong yèn-thiet, chhṳ̀m-to chhṳ̂m-súi chûng.

11Song-chú â! Án-tô sṳ̀n-mìn tông-chûng, nai-yû chhiong Ngì ke?

Nai-yû chhiong Ngì án sṳ̀n-sṳn án-yû vî-ngiàm ke?

Nai-yû chhiong Ngì án tet-ngìn-kiâng án yû kông-yùng ke?

Nai-yû chhiong Ngì án-voi hàng sṳ̀n-chiak khì-sṳ ke?

12Ngì chhûn-chhut yu-sú,

thai-thi chhiu thûn-me̍t sù-thi̍t.

13Ngì yung put-pien ke chhṳ̀-oi thu Ngì só chṳ́n-kiu ke chṳ́-mìn;

Ngì yung thai-nèn tai kì-têu to Ngì ke sṳn-só.

14Van-koet thâng-tó, kiâng-to pi̍t-pi̍t-chhat;

Fî-li-sṳ-ngìn sèu-to mò kat-sat.

15Yî-tûng ke liâng-chhiu chho̍k-kiâng,

Mô-ap ke yîn-hiùng pi̍t-pi̍t-chhat,

Kâ-nàm-ngìn ke tám tû hak-lan.

16Khiúng-pu lâu chho̍k-kiâng lìm-to kì-têu!

Song-chú â, kì-têu khon-tó Ngì ke thai-nèn;

kì-têu kiâng-to chhiong sa̍k-thèu m̀-kám thîn-thûng,

chhṳ̍t-to Ngì ke chṳ́-mìn ko-hi,

chhṳ̍t-to Ngì só kiu-su̍k ke chṳ́-mìn hàng ko-hi.

17Ngì tai kì-têu ngi̍p Ngì ke sân, chhai ke-vi châi-phì kì-têu;

ke-vi he Ngì — Song-chú sién-lòi he̍t ke thi-fông,

chhiu-he Ngì chhṳ-kâ só-hí ke sṳn-só.

18Song-chú tit-khok voi cho-vòng,

chhṳ̍t-to yún-yún yén-yén!

Mî-li-ôn ke Kô

19Yî-set-lie̍t-ngìn hàng châu-thi ko-hói; chúng-he Âi-khi̍p-vòng ke chan-mâ, chan-chhâ, lâu khì-pîn chin-ngi̍p hói-tú ke sṳ̀, Song-chú sṳ́ hói-súi kap hí-lòi, chiông kì-têu chhiòn-phu chim-sí.

20Â-lùn ke â-chí ńg siên-tî Mî-li-ôn sú nâ-tén lìn-kú, chhin-tô fu-ńg thèn-tén kì, kín tá-kú, kín thiau-vú, 21Mî-li-ôn chhong-kô lâu kì-têu fò-sâng:

“Oi chhong-kô siung-chan Song-chú,

yîn-vi Kì tet-tó kông-yùng ke sṳn-li;

Kì chiông chan-mâ lâu khì-pîn te̍p-lo̍k hói-tú.”

Fú-súi

22Heu-lòi, Mô-sî thu Yî-set-lie̍t ngìn-mìn lì-khôi Fùng-hói, lòi-to Sû-ngí khóng-yâ, chhai khóng-yâ chûng hàng sâm-ngit kiú, chhìm m̀-tó súi hó-sṳ̍t. 23Kì-têu lòi-to Mâ-lâ; ke-vi ke súi he fú ke, sṳ̍t m̀-tet. (Yîn-vi án-ngiòng, ke thi-fông chang ôn-to Mâ-lâ#15:23 “Mâ-lâ” Hî-pak-lòi-fa ke yi-sṳ he “fú”..) 24Ngìn-mìn mài-yen Mô-sî, mun kì kóng: “Ngài-têu oi lîm má-ke nè?” 25Mô-sî pet-chhiet chhai Song-chú mien-chhièn khì-khiù; Song-chú chṳ́-pûn kì khon yit-chak su-thèu. Kì chiông su-thèu te̍p-ngi̍p súi tî-poi, súi chhiu pien-cho kâm-thiàm ke súi.

Song-chú chhai ke thi-fông vi kì-têu thin fap-li̍t, yu chhai ke-vi kháu-ngiam kì-têu. 26Kì kóng: “Na-he ngì-têu vàn-chhiòn sun-chhiùng Ngài — Song-chú ngì-têu ke Song-ti — cho Ngài ngin-vì chho̍k ke sṳ, thâng Ngài ke min-lin, chûn-sú Ngài yit-chhiet ke fap-li̍t, Ngài chhiu m̀-voi yung chit-fa̍t Âi-khi̍p-ngìn ke phiang-thung lòi chit-fa̍t ngì-têu; yîn-vi Ngài he yî-chhṳ ngì-têu ke Song-chú.”

27Heu-lòi kì-têu to Yî-lìm; ke-vi yû sṳ̍p-ngi fut chhièn-súi lâu chhit-sṳ̍p thèu chûng-su. Kì-têu chhiu chhai súi-piên ôn-yàng.

Currently Selected:

Chhut Âi-khi̍p Ki 15: THV12Rdb

Highlight

Copy