Chhut Âi-khi̍p Ki 16

Mâ-nâ lâu Êm-thùn

1Yî-set-lie̍t só-yû ke ngìn-mìn lì-khôi Yî-lìm. Chhai lì-khôi Âi-khi̍p heu thi-ngi chak ngie̍t ke sṳ̍p-ńg, kì-têu lòi-to Yî-lìm lâu Sî-nai chûng-kiên Sun ke khóng-yâ. 2Chhai khóng-yâ chûng, Yî-set-lie̍t só-yû ke ngìn-mìn mài-yen Mô-sî lâu Â-lùn, 3tui kì-têu kóng: “Ngài-têu chhai Âi-khi̍p chhiu sí chhai Song-chú ke sú-chûng hàn-kha yàng! Chhai Âi-khi̍p, ngài-têu chṳ-séu hàn-yû khó-nèn vì-tén vo̍k-é sṳ̍t-ngiuk, ya-yû khì-thâ sṳ̍t-vu̍t hó sṳ̍t-to páu-páu; chúng-he ngì-têu chiông ngài-têu tai-to liá khóng-yâ lòi, hoi ngài-têu chhai liá-vi ngo-sí.”

4Song-chú tui Mô-sî kóng: “Ngài oi tui thiên-táng kong-hâ liòng-sṳ̍t. Ngìn-mìn tak-ngit yit-thin oi chhut-hi ngiâm ke-ngit só sî-yeu ke liòng-sṳ̍t. Ngài án-ngiòng cho, he-oi sṳ-ngiam kì-têu, khon kì-têu voi chûn-sú Ngài ke chṳ́-sṳ mò. 5To thi-liuk ngit, kì-têu yit-thin oi kâ-ngiâm yit-ngit fun lòi-cho chún-phi, chhiu-he oi ngiâm lióng-ngit ke liòng-sṳ̍t.”

6Mô-sî lâu Â-lùn tui Yî-set-lie̍t-ngìn kóng: “Kîm-am-pû, ngì-têu chhiu-voi tî thu ngì-têu chhut Âi-khi̍p ke chhiu-he Song-chú. 7Thiên-kông chêu-sṳ̀n, ngì-têu voi khon-tó Song-chú ke yùng-kông. Kì yí-kîn thâng-tó ngì-têu ke mài-yen lé; ngài-têu son má-ke, ngì-têu ke mài-yen khì-sṳ̍t he tui Song-chú fat ke.” 8Mô-sî yu kóng: “Song-chú am-pû-thèu oi pûn ngì-têu yû-ngiuk hó sṳ̍t, chêu-sṳ̀n-thèu oi pûn ngì-têu yû la-ngiak ke sṳ̍t-vu̍t, yîn-vi Kì yí-kîn thâng-tó ngì-têu tui Kì ke yen-ngièn. Ngì-têu koai-yen ngài-têu, khì-sṳ̍t chhiu-he koai-yen Song-chú!”

9Mô-sî tui Â-lùn kóng: “Hi ham Yî-set-lie̍t ngìn-mìn lûng-chúng lòi-khî chhai Song-chú mien-chhièn, yîn-vi Kì yí-kîn thâng-tó kì-têu ke yen-ngièn.” 10Chhai Â-lùn tui Yî-set-lie̍t só-yû ke ngìn-mìn kóng-fa ke sṳ̀, kì-têu hiong khóng-yâ khon, fut-yèn khon-tó Song-chú ke yùng-kông hién-hien chhai yùn ke chûng-kiên. 11Song-chú tui Mô-sî kóng: 12“Ngài yí-kîn thâng-tó Yî-set-lie̍t-ngìn ke yen-ngièn. Ngì oi lâu kì-têu kóng: ‘Chhai lìm-am-é, ngì-têu voi yû-ngiuk hó-sṳ̍t; chhai chêu-sṳ̀n-thèu, ngì-têu voi yû sṳ̍t-vu̍t hó sṳ̍t-páu. Án-ngiòng, ngì-têu chhiu-voi tî Ngài he Song-chú, he ngì-têu ke Song-ti.’ ”

13Lìm-am-é, yit thai-khiùn êm-thùn pî-lòi, tô-to chiông chhiòn-yàng lûng-chúng châ-thet. Thiên yit-kông, yàng ke si-vì chhiòn-phu he lu-súi; 14lu-súi yit châu-thet, chhai khóng-yâ ke thi-mien song yû yit-chhèn pho̍k-pho̍k chhiong sông ke tûng-sî. 15Yî-set-lie̍t-ngìn khon-tó liá tûng-sî, m̀-tî he má-ke, chhiu mun-lòi mun-hi kóng: “Liá he má-ke tûng-sî?”

Mô-sî tui kì-têu kóng: “Liá chhiu-he Song-chú pûn ngì-têu ke sṳ̍t-vu̍t. 16Song-chú sṳt fûn-fu: Tak-sà oi cheu chhṳ-kâ ke sṳ̍t-liong lòi ngiâm, cheu chong-phùng tú ke ngìn-su, tak-sà cho-tet ngiâm lióng kûng-sṳ̂n.”

17Yî-set-lie̍t-ngìn cheu fûn-fu hi-cho, yû-têu ngìn ngiâm kha-tô, yû-têu ngìn ngiâm kha-séu. 18Cheu sṳ̂n-téu liòng ke sṳ̀, ngiâm kha-tô ke mò hó-chhûn, ngiâm kha-séu ke ya mò khiam; tak-ke ngìn só-ngiâm ke tú-hó he kì só sî-yeu ke. 19Mô-sî tui kì-têu kóng: “Cho-m̀-tet yû-ngìn chiông sṳ̍t-vu̍t liù-to thi-ngi chêu-sṳ̀n.” 20Chúng-he yû-têu ngìn m̀-thâng Mô-sî ke fa, liù-têu hâ-lòi. To thi-ngi chêu-sṳ̀n, liá-têu liù hâ-lòi ke chhiòn-phu pot-chhùng, chhu-thet. Mô-sî tui kì-têu fat-khién. 21Tak-ngit chêu-sṳ̀n, tak-sà chhiòn-phu chhut-hi ngiâm chhṳ-kâ só sî-yeu ke sṳ̍t-liong; ngit-thèu fat-chhut ngie̍t-hi ke sṳ̀, sṳ̍t-vu̍t chhiu yùng-thet.

22To thi-liuk ngit, kì-têu ngiâm sûng-phi ke sṳ̍t-vu̍t, tak-sà si kûng-sṳ̂n. Mìn-kiên só-yû ke liâng-chhiu lòi tui Mô-sî po-ko liá-khien sṳ. 23Mô-sî tui kì-têu kóng: “Song-chú yí-kîn fûn-fu ko, thiên-kông-ngit he ôn-sit sṳn-ngit, yin-kôi hien-pûn Song-chú. Kîm-pû-ngit ngì-têu oi cheu phìn-sòng án-ngiòng phoi, án-ngiòng chú; chhûn-tó ke liù-to thi-ngi chêu-sṳ̀n chang lòi sṳ̍t.” 24Kì-têu cheu Mô-sî ke fûn-fu, chiông chhûn-tó ke sṳ̍t-vu̍t liù-to thi-ngi chêu-sṳ̀n; liá-têu sṳ̍t-vu̍t mò pot-chhùng, ya-mò chhu-thet. 25Mô-sî kóng: “Ngì-têu chhiu sṳ̍t liù hâ-lòi ke sṳ̍t-vu̍t! Yîn-vi kîm-pû-ngit he hien-pûn Song-chú ke ôn-sit-ngit; kîm-pû-ngit ngì-têu chhai yàng-ngoi chhìm m̀-tó yit-si̍t-é sṳ̍t-vu̍t. 26Ngì-têu oi chhai liuk-ngit nui ngiâm sṳ̍t-vu̍t, chúng-he thi-chhit ngit he ôn-sit-ngit, yit-thin chhìm m̀-tó.”

27To thi-chhit ngit, yû-têu ngìn hàn-he chhut-hi chhìm sṳ̍t-vu̍t, chúng-he yit-si̍t-é ya chhìm m̀-tó. 28Song-chú tui Mô-sî kóng: “Ngì-têu m̀ chûn-sú Ngài ke min-lin lâu fap-li̍t, oi to kí-sṳ̀ nè? 29Oi ki-tet, Ngài he Song-chú; ôn-sit-ngit he Ngài pûn ngì-têu hiet-khun ke; só-yî Ngài chhai thi-liuk ngit pûn ngì-têu lióng-ngit ke sṳ̍t-vu̍t; to thi-chhit ngit, tak-sà yit-thin oi liù chhai vuk-hâ, cho-m̀-tet chhut-hi.” 30Só-yî Yî-set-lie̍t-ngìn chhai thi-chhit ngit hiet-khun.

31Yî-set-lie̍t-ngìn chiông liá sṳ̍t-vu̍t ôn-to mâ-nâ#16:31 “mâ-nâ” lâu Hî-pak-lòi-fa “liá he má-ke” fat-yîm siông-khiun (khon 16:15).. Kì chhiong yèn-sûi-é, he pha̍k-set ke, sṳ̍t hí-lòi chhiong yung phûng-thòng cho ke piáng. 32Mô-sî kóng: “Song-chú min-lin ngài-têu liù-hâ lióng kûng-sṳ̂n chiuk-chiuk ke mâ-nâ pûn ngài-têu ke chṳ́-sûn, hó pûn kì-têu khon Song-chú tui Âi-khi̍p thu ngài-têu chhut-lòi ke sṳ̀, chhai khóng-yâ só su-pûn ngài-têu ke sṳ̍t-vu̍t.” 33Mô-sî tui Â-lùn kóng: “Nâ yit-chak kon-é, chông lióng kûng-sṳ̂n mâ-nâ chhai kon-é tî-poi, piong chhai Song-chú mien-chhièn; liá he vi ngài-têu ke chṳ́-sûn liù hâ-lòi ke.” 34Song-chú ngióng-pân fûn-fu Mô-sî, Â-lùn chhiu cheu án-ngiòng cho. Kì chiông kon-é piong chhai yok-khui thèu-chhièn, pó-chhùn hí-lòi. 35Yî-set-lie̍t-ngìn sṳ̍t mâ-nâ yit-khiung si-sṳ̍p ngièn, chhṳ̍t-to kì-têu to Kâ-nàm thin-kî hâ-lòi. 36(Tông-sṳ̀ phêu-chún liòng-hi ke tân-vi he ngi-sṳ̍p kûng-sṳ̂n.)

Currently Selected:

Chhut Âi-khi̍p Ki 16: THV12Rdb

Highlight

Copy