Levitiku 25

1OKLUNỌ lọ sọ doho hlan Moṣe to osé Sinai mẹ, dọmọ, 2Dọhó hlan ovi Islaeli tọn lẹ lọ, bo dọ hlan ye dọ, Whenuena mì wá aigba he yẹn na mì lọ mẹ, whenẹnu wẹ aigba lọ na payi gbọjẹzán de go hlan OKLUNỌ lọ. 3Owhè ṣidopo hiẹ na do ogle towe họ̀, podọ owhè ṣidopo hiẹ na dèalana ovẹ̃npa towe họ̀, bo sọ bẹ́ sinsẹ́n etọn lẹ pli do whegbè; 4ṣigba owhè sinawetọ mẹ gbọjẹzán ogboje ayidego tọn de na tin to e mẹ na aigba lọ, gbọjẹzán de hlan OKLUNỌ lọ: hiẹ ma na do ogle towe, kavi dèalana ovẹ̃npa towe gba. 5Enẹ he wú sọn ede mẹ sọn ojijẹ towe mẹ hiẹ ma na gbẹ́n gba, podọ vẹnsinsén sọn vẹntin madèalọna towe lẹ me hiẹ ma na bépli gba: é na yín owhè ogbọje ayidego tọn de na aigba lọ. 6Podọ gbọjẹzán aigba lọ tọn lọ na yín na núdùdù na mì; na we, podọ na devisunnu towe podọ na deviyọnnu towe, podọ na ogbànumẹ towe podọ na ojónọ towe he wáwási to de we; 7podọ na kanlinyìnyìn towe, podọ na kanlin lẹ lọ he tin to aigba towe ji, wẹ ojideji etọn lẹpo na yín núdùdù na.

8Hiẹ na hia gbọjẹzán ṣinawe sọn owhè lẹ mẹ hlan dewe, owhè ṣinawe donu ṣinawe; podọ azán gbọjẹzán ṣinawe tọn sọn owhè le me nasọ tin fìne hlan we, yèdọ owhè kandesinẹnnẹ. 9Whenẹnu wẹ hiẹ na do ogbè lélé opèn lọ tọn hlan gbonu to azán aotọ osùn sinawetọ tọn gbè; to azán ovẹ̀se tọn lọ mẹ wẹ hiẹ na do opèn lọ hlan gbonu gbọn whẹndo mìtọn lẹpo mẹ. 10Mìwlẹ bo nasọ hiọ owhè fọtọ̀ntọ lọ, bo sọ lá mẹdekanjẹ gbon aigba lọ ji jẹ tòmẹnù etọn lẹpo de: é na yín jubile de hlan mì; mìlẹ bo nasọ lẹ́gọ̀ ome dopodopo hlan nutindo etọn kòn, podọ mì nasọ lẹ́gọ̀ ome dopodopo hlan whédo etọn dé. 11Jubile de wẹ owhè kandeaotọ nẹ na yín hlan mì: mìlẹ ma na dó, mọ mì ma na gbèn enẹ he wú sọn ede mẹ tó e mẹ, kavi bé ovónsinsén lẹ pli to e mẹ sọn ovẹ̃ntin madèalọna lẹ lọ mẹ 12Na jubile de wẹ; é na yín wiwe hlan mì: mì na dù ojideji etọn sọn ogle lọ mẹ. 13To owhè jubile tọn he mẹ wẹ mì omẹ dopodopo na lẹ́gọ̀ hlan nútindo etọn kọn. 14Podọ eyín hie sà onúde hlan komẹnu towe, kavi hò sọn alọ komenu towe tọn mẹ, mìwlẹ ma na wàgo do minozo gba. 15Kẹdẹdi osọha owhè lẹ ton to jubile lọ godo wẹ hiẹ na do hò son komẹnu towe si, podọ kẹdẹdi osọha owhè ojije lẹ tọn lọ tọn ewọ na do sà hlan we. 16Kẹdẹdi ogégé owhè lẹ lọ tọn wẹ hiẹ na do hẹn akuẹta etọn sudẹji podọ kedẹdi whiwhe owhè lẹ tọn wẹ hiẹ na do hẹn akuẹta etọn dèpo; na osọha ojijẹ lẹ tọn we ewọ do sà hlan we. 17Mìwlẹ ma na wàgò do mínọzo gba; ṣigba hiẹ na dibusi Jiwheyẹwhe towe: na yẹn wẹ OKLUNỌ lọ Jiwheyẹwhe towe. 18Enẹwutu mìwlẹ na payi asẹdai ṣie lẹ go, bo sọ payi whẹ̀dida ṣie lẹ go bo basi yé: mìlẹ bo nasọ nọ aigba lọ ji mahanu. 19Aigba lọ nasọ nọ jó sinsen eton, mìwlẹ nasọ dù dùgóhò mìtọn, bo sọ nọ nò e me mahanu. 20Podọ eyín mìwlẹ na dọmọ, Etẹ wẹ mí na dù to owhè sinawetọ lọ mẹ, dayi e go, mìwlẹ ma na do, kavi be jideji mítọn pli do whegbè gba: 21whenenu yen na degbèna odona ṣie to mì ji to owhè sidopotọ lọ mẹ, é bo na hẹn einsén tón wá na owhè atọ̀n lẹ lọ. 22Mìwlẹ bo nasọ do to owhè sinatòntọ lọ mẹ, bo sọ to dùdù sọn sinsẹ́n lẹ lọ mẹ, ózínhò hóhó lọ; kakajẹ owhè ṣinẹnnẹtọ lọ mẹ, kaka sinsẹ́n etọn lẹ wá whégbè, ozínhò hóhó wẹ mì na to dùdù. 23Aigba lọ ma na yín sisà do madopodo mẹ gba; na ṣie wẹ aigba lọ: na ojónọ wẹ mìwlẹ podọ wásinu to dẽ 24Podọ to aigba nútindo mìtọn tọn lọ mẹ mì na nọ jó ofligọ̀ de na aigba lọ.

25Eyín mẹmẹsunnu towe yín hinhẹn lẹzun wamọnọ, bo sà adade sọn nútindo etọn mẹ, whenẹnu wẹ: hẹnnumẹ etọn he tin sèpọ hlan e de na wá, bo na fli enẹ he mẹmẹsunnu etọn ko sà. 26Podọ eyín omẹ de ma tindo mẹde nado fli i gba, bọ ewọ yín hinhẹn lẹzun adọkunnọ bo sọ mọ sùpé nado fli i; 27whenẹnu gbọ é ni hia owhè sisà etọn tọn lẹ lọ, bo gọ̀ linlán lọ jó hlan omẹ he é sà ẹ hlan lọ; ewọ bo nasọ lẹ́gọ̀ do nútindo etọn kọ̀n. 28Ṣigba eyín ewọ ma tin sọgan nado hẹn en gọ̀ na ede gba, whenẹnu enẹ he ewọ ko sà na gbọsi alọ ewọ he ko hò ẹ tọn mẹ kakajẹ owhè jubile tọn lọ me: podọ to jubile lọ mẹ é na jẹgbonu yì, ewọ bó na lẹ́gọ̀ do nútindo etọn kọ̀n.

29Podọ eyín omẹ de sà ohọ̀ adó tọn de to tòdaho dòkọnọ de mẹ, whenẹnu é sọgan fli i to owhè dopo pete mẹ he godo é ko yín sisà; na owhè dopo gigọ́ wẹ é na tindo ojlojẹ ofligọ̀ tọn lọ te. 30Podọ eyín é ma yín fifii to ojlẹ owhè dopo gigọ́ lọ tọn mẹ gba, whenẹnu ohó he tin to tòdaho dòkọnọ lọ mẹ lọ na yín hinhẹn tin to madopodo mẹ hlan ewọ he họ́ ẹ, gbọn whẹndo etọn lẹ mẹ: é ma na jẹgbonu yì to jubile lọ mẹ gba. 31Ṣigba ohò tòpẹvipẹvi he ma tindo adó lẹ́do yé lẹ tọn lẹ na yín linlẹn dogọ́ oglè otò lọ tọn lẹ: yé sọgan yín Mi, yé bo nasọ jẹgbonu yì to jubile lọ mẹ. 32Adavo tòdáhò Levinu lẹ tọn lẹ, ohò tòdaho nútindo yetọn tọn le, Levinu lẹ sọgan fli to ojlẹ depope mẹ. 33Podọ eyín omẹ de fli sọn Levinu lẹ si, whenẹnu ohọ̀ he yè sà lọ, po tòdaho nutindo etọn tọn lọ po, na jẹgbonu yì to jubile lọ mẹ: na ohọ̀ todaho Levinu lẹ tọn tọn lẹ wẹ nútindo yetọn to ovi Islaeli tọn lẹ lọ ṣẹnṣẹn. 34Ṣigba oglè whépakẹ tòdaho yetọn lẹ tọn lọ ma sọgan yín sisà gba; na nútindo yetọn madopodo wẹ.

35Podọ eyín mẹmẹsunnu towe yín hinhẹn lẹzun wamọnọ bọ alọ etọn yìdò to de we; whenẹnu hiẹ na jlọ ẹ dote: di ojónọ de podọ di wásinu de wẹ é na do nò de we. 36A yí alemasénmẹ sọn ewọ si blo kavi ojideji; ṣigba dibusi Jiwheyẹwhe towe: na mẹmẹsunnu towe nido nọ̀ de we. 37Hiẹ ma na yi akuẹ towe nẹ́ to alemasénmẹ ji, kavi yí núdúdù towe nẹ́ na ojideji gba. 38Yen wẹ OKLUNỌ lọ Jiwheyẹwhe mìtọn, he hẹn mì tón jẹgbonu sọn aigba Egipti tọn lọ ji wá, nado na aigba Kananinu tọn lọ mì, nado yín Jiwheyẹwhe mìtọn.

39Podọ eyín mẹmẹsunnu towe yín hinhẹn lẹzun wamọnọ to de we, bo sà ede hlan we; hiẹ ma na hẹn ẹn nado sẹ́n di afànumẹ sunnu de gba 40di gbanumẹ de, podọ di wásinu de, ewọ na do tin to de we; é na sèn to de we jẹ owhè jubile lọ tọn: 41whenẹnu wẹ é na jẹgbonu yì sọn de we, ewọ po ovi etọn lẹ po po e po, bo na lẹ́gọ̀ do whẹ́do etọn titi de, podọ do nútindo otọ́ etọn lẹ-tòn kọ́n wẹ ewọ na légọ́ do. 42Na devi ṣie wẹ yé, he yẹn hẹn tón jẹgbonu sọn aigba Egipti tọn lọ ji wá: yé ma na yín sisà di afànumẹ lẹ gba. 43Hiẹ ma na dùgán do e ji po kàndùdù po gba; ṣigba bo na dibusi Jiwheyẹwhe towe. 44Podọ na afànumẹ sunnu towe lẹ tọn, po afànumẹ yọnnu towe lẹ po, he hiẹ tindo; sọn akọta he tin lẹ́do mì lẹ mẹ, yé mẹ wẹ míwlẹ na nọ hò afànumẹ sunnu lẹ po afanumẹ yọnnu lẹ po sọn 45Humọ sọn ovi ojónọ lẹ ton lẹ mẹ he wáwási to mì ṣẹnṣẹn, ye mẹ mì na hò sọn, podọ sọn whédo yetọn lẹ mẹ he tin to mì de, he yé ko dètọ́n to aigba mìtọn ji: yé nasọ yín nútindo mìtọn 46Mìwlẹ nasọ hẹn yé zùn ogú de na ovi mìtọn lẹ to godo mìtọn, nado yíhẹn na nútindo de; yé mẹ wẹ mì na nọ yí afànume sunnu mìtọn lẹ sọn kakadoi: ṣigba mẹmẹsunnu mìtọn ovi Islaeli tọn lẹ ji wẹ mì ma na dùgan do, ode do awetọ ji po kándùdù po gba.

47Podọ eyín ojónọ de kavi wáṣinu to de we yín hinhẹn lẹzun adọkunnọ, bọ mẹmẹsunnu towe yín hinhẹn lẹzun wamọnọ to e dali, bo sọ sà ede hlan ojónọ lọ kavi wáṣinu to de we, kavi hlan otógbó whédo ojónọ lọ tọn tọn: 48godo he yè ko sà ẹ é sọgan yín fifli; dopo sọn mẹmẹsunnu etọn lẹ mẹ sọgan fli i: 49kavi otavé etọn, kavi visunnu otavó etọn tọn, sọgan fli i, kavi mẹdepope he yín osẹpọ hẹnnumẹ tọn hlan ẹn sọn whédo etọn mẹ sọgan fli i; kavi eyín ewọ yín hinhẹn lezun adọkunnọ, ewọ sọgan fli ede. 50Ewọ nasọ lẹn hẹ ewọ he họ́ ẹ sọn owhè lọ mẹ he ewọ sà ede hlan ẹn te jẹ owhè jubile tọn lọ mẹ: podọ akuẹta sisà etọn tọn na yín kẹdedi osọha owhè lẹ tọn lọ; kẹdẹdi ojlẹ gbanumẹ de tọn wẹ ewọ na do tin to e de. 51Eyín owhè susu gbé sọ tin to finẹ, kẹdẹdi yé wẹ é na gò akuẹta ofligò etọn tọn jó sọn akuẹ he yè do hò ẹ lọ mẹ. 52Podọ eyín owhè pẹde wẹ pò finẹ jẹ owhè jubile tọn lọ, whenẹnu ewọ na lẹ̀n po e po; kẹdẹdi owhè etọn lẹ wẹ ewọ na gọ̀ akuẹta ofligò etọn tọn jó. 53Di gbanumẹ whèmẹwhèmẹ ewọ na do tin to e de: ewọ ma na dùgán to e ji po kàndùdù po to nukun towe mẹ gba. 54Eyín ewọ ma yin fifli to owhè helẹ mẹ gba, whenẹnu ewọ na jẹgbonu yi to owhè jubile lọ tọn mẹ, ewọ po ovi etọn lẹ po po e po. 55Na ovi Islaeli tọn lẹ devi wẹ yé hlan mi; devi ṣie wẹ yé mẹhe yẹn hẹn jẹgbonu sọn aigba Egipti tọn lọ ji wá: yẹn wẹ OKLUNỌ lọ Jiwheyẹwhe mìtọn.

Currently Selected:

Levitiku 25: BWL23

Highlight

Copy