Levitiku 26

1MIWLẸ ma na basi ovòdún lẹ de gba, mọ mì ma na zé boṣio pipa de dote, kavi odòtin de, mọ mì ma na dotẹnna zannu winwlan depope to aigba mìtọn mẹ gba, nado nọ dó hlan ẹn: na yẹn wẹ OKLUNỌ lọ Jiwheyẹwhe mìtọn. 2Míwlẹ na payi gbọjezán ṣie lẹ go, bo sọ nọ gbògbena fiwiwe ṣie: yẹn wẹ OKLUNỌ lọ.

3Eyín mìwlẹ zinzọnlin to aṣedai ṣie lẹ mẹ, bo sọ payi gbèdide ṣie lẹ go, bo nọ basi yé: 4whenẹnu yẹn na na ojikun mìtọn lẹ to osã yetọn mẹ, aigba lọ nasọ na ojideji etọn, atin oglè mẹ tọn lẹ nasọ na ṣinṣán yetọn. 5Podọ ovẹ̃ngbà mìtọn na jẹ ojijẹ ovẹ̃n tọn lọ kọ̀n, podọ ojije lọ nasọ jẹ ojlẹ dido tọn mẹ: mìwlẹ nasọ dù akla mìtọn jẹ hogigọ, bo sọ nọ nọ aigba mìtọn ji mahẹnu. 6Yẹn bo nasọ na jijọho to aigba lọ me, mìwlẹ na mlọn ai, mẹde ma na hẹn mì savo po lọ yẹn na hẹn okanlin ylankan nado gbodo sọn aigba lọ ji, mọ ohi lọ ma na gbọn aigba mìtọn mẹ luntón gba. 7Podọ mìwlẹ na domọna kentọ mìtọn le, ye bo na jai gbọn ohi lọ dali to mì nukọn. 8Atón sọn mì me na domọna kanweko de, podọ kanweko de sọn mì mẹ na domọna fọtọ́n ao: kẹ̀ntọ mìtọn lẹ bo nasọ jai gbon ohi lọ dali to mì nukọn. 9Yẹn bo nasọ tindo yẹyiwlenamẹ hlan mì bo sọ hẹn mi yín sinsẹ́nnọ, bo hẹn mì sudeji; bo na hẹn alènu ṣie lódo to mì de. 10Mìwlẹ na nọ dù ozínhò hóhó he yè sẹdo azán dindẹn, mìwlẹ nasọ nọ hẹn hóho; lọ jẹgbonu wá sọn yoyó lọ nukọn. 11Yẹn bo na zé gohọtúntún ṣie do mì ṣẹnṣẹn: alindọn ṣie ma sọ to na gbẹwanna mì gba. 12Yẹn bo nasọ nọ zinzọnlin to mì ṣẹnṣẹn, bo yín Jiwheyẹwhe mìtọn, mìwlẹ bo nasọ yín omẹ ṣie lẹ. 13Yẹn wẹ OKLUNỌ lọ Jiwheyẹwhe mìtọn, he hẹn mì tón jẹgbonu wá sọn aigba Egipti tọn lọ-ji, na mì ma na do yín afànumẹ yetọn lẹ gba, yẹn bo ko sọ wén opatin oglèpọnu mìtọn tọn lẹ, bo hẹn mì to yìyì jijlọ.

14Ṣigba eyín míwlẹ ma na tùntóai hlan mi, bo ma na basi gbèdide ṣie he lẹpo gba; 15podọ eyín mìwlẹ na gbẹ́ asẹdai ṣie lẹ dai, podọ eyín alindọn mìtọn gbẹwanna whẹ̀dida ṣie lẹ, sọmọ bọ mìwlẹ ma na basi gbèdide ṣie lẹpo gba, ṣigba gbà alẹ̀nu ṣie; 16yẹn ga na wà ehe hlan mì; yẹn na dè obudaho do mì ji, yèdọ azónjẹmẹji po avivọha po, he na và nukun lẹ, bo sọ hẹn alindọn lọ nado gbadó: miwlẹ na do okún mìtọn lẹ to ovọ́ mẹ, nu kontọ mìtọn lẹ wẹ na dù i. 17Yẹn na zé nukunmẹ ṣie do mi ji, míwlẹ nasọ yín hihò to kẹ̀ntọ mìtọn lẹ nukọn: yé he gbẹwanna mì lẹ na dùgán to mì ji, mìwlẹ nasọ to hinhọnyì whenuena mẹde ma to mọdona mì. 18Pọdọ eyin mìwlẹ to onú helẹ me ma na tùntóai hlan mi jãnwẹ, whenẹnu yẹn na doyana mì whla ṣinawe dogó na ylando mìtọn lẹ 19Yẹn na wẹ́n sakla huhlọn mìtọn tọn; Yẹn bo na hẹn olọn mìtọn zùn ogànyu, podọ aigba mìtọn zùn ogànvẹ̃: 20podọ huhlọn mìtọn nasọ yín zinzán to ovọ́ mẹ na aigba mìtọn ma na jó ojideji etọn, mọ atin aigba lọ tọn lẹ ma na jó sinsẹ̀n yetọn gba. 21Podọ eyín mìlẹ zinzọnlin jagọ̀ hlan mi, bo ma na tùntóai hlan mi gba; yẹn na hẹn azóndème whla ṣinawe dogọ́ wá mì ji gbọn ylando mìtọn lẹ dali. 22Yẹn na do kanlin danji tọn lẹ hlan mì ṣẹnṣẹn, he na nọ bé ovi mìtọn lẹ bo sọ nọ và kanlinyìnyìn mìtọn lẹ, bo sọ hẹn mì yín vude to osọha mẹ; ali mìtọn lẹ nasọ yín ovọ́jẹ. 23Podọ eyín gbon onú helẹ dali miwlẹ ma na yidiọdo gbọn dali ṣie gba, ṣigba bo na nọ zinzọnlin jagò hlan mi; 24whenẹnu wẹ yen ga na zinzọnlin jagò hlan mì; yen bo nasọ họ̀ mì, yèdọ yẹn, whla ṣinawe na ylando mìtọn lẹ 25Yẹn bo nasọ hẹn ohi de wá mì ji, he na yí ahọsu alènu lọ tọn; mìwlẹ nasọ yín bibépli dopọ do tòdaho mìtọn lẹ mẹ: yẹn bo nasọ do azònylankan lọ hlan mì ṣẹnṣẹn; mì bo nasọ yín jijó do alọ kèntọ lọ tọn mẹ. 26Whenuena yẹn wẹ́n opò akla mìtọn tọn, yọnnusi ao na sọ̀ akla mìtọn to aklasọdò dopo mẹ, yé na sọ nọ gọ̀ akla mìtọn jó gbọn ojlẹnú dali: mìwlẹ na dù, bo ma na dopékọ̀ gba.

27Podọ eyín mìlẹ na onú helẹ pó ma na tùntóai hlan mi gba, ṣigba zinzọnlin jagò hlan mi; 28whenẹnu yẹn nasọ zinzọnlin jagò hlan mì to adánjijẹ mẹ; podọ yẹn ga na doyana mì whla ṣinawe na ylando mìtọn lẹ. 29Mìwlẹ bo nasọ dù olàn visunnu mìtọn lẹ tọn, podọ olàn viyọnnu mìtọn lẹ tọn wẹ mìwlẹ na nọ dù. 30Podọ yẹn na và ofi yìji mìtọn lẹ, bo sọ sán whèbosiọ mìtọn lẹ liai, bo zé oṣiọ mìtọn lẹ li oṣiọ boṣiọ yetọn lẹ tọn ji; alindọn ṣie nasọ gbẹwanna mì. 31Yẹn nasọ hẹn tòdaho mìtọn lẹ zùn gbògbé de, bo hẹn fìwiwe mìtọn lẹ wá ovọ́jẹ mẹ, yẹn ma nasọ whlẹ́n owán vivi owán mìtọn lẹ tọn pọ́n gba. 32Yẹn bo nasọ hẹn aigba lọ wá ovọ́jẹ mẹ: podọ kẹ̀ntọ mìtọn he nọ̀ nó e mẹ lẹ na yín osíjọtọ nẹ̃. 33Mì wẹ yẹn nasọ vúnvún do akọta lẹ lọ ṣẹnṣẹn, yẹn bo nasọ dòn ohi lọ jẹgbonu to mì godo: aigba mìtọn bo nasọ yin ovójẹ de, tòdaho mìtọn lẹ nasọ yín gbògbé de. 34Whenẹnu wẹ aigba lọ na dùgbẹ̀ gbọjẹzán etọn lẹ tọn, sọle é mlọnai dẹn to ovọ́jẹ mẹ do, bọ mìlẹ sọ tin to alọ kẹ̀ntọ mìtọn lẹ tọn mẹ; yédọ whenẹnu wẹ aigba lọ na gbọjẹ, bo dùgbẹ̀ gbọjẹzán etọn lẹ tọn. 35Sọle é mlọnai dẹn to ovọ́jẹ do wẹ é na tindo ogbọjẹ do; yèdọ ogbọjẹ he e ma ko tindo to gbọjẹzán mìtọn lẹ mẹ, whenuena mìwlẹ to ninò e ji 36Podọ na yé he yè jodai sọn mì mẹ lẹ tọn, yẹn na do awu kúkú de hlan ayiha yetọn mẹ to aigba kèntọ yetọn lẹ tọn lẹ mẹ: ogbè whinwhàn amà tọn de na domọna yé; yé nasọ họ̀nyì, dile mẹde nọ họ̀nyì sọn ohi nu do; yé bo nasọ jai whenuena mẹde ma to mọyanna yé gba. 37Yé na dahli ode jẹ awetọ ji, di to ohi lọ nukọn wẹ, whenuena mẹde ma to mọyanna gba: mìwlẹ ma nasọ tindo huhlọn de nado ṣite to kẹ̀ntọ mìtọn lẹ nukọn gba. 38Mìwlẹ nasọ dọ̀n tò akọta lẹ lọ ṣẹnṣẹn, aigba kèntọ mìtọn lẹ tọn lọ bo nasọ zé mì dù. 39Podọ yé he yè jódai sọn mì mẹ lẹ na lùnpò to ylankan yetọn lẹ mẹ to aigba kẹ̀ntọ yetọn lẹ tọn lẹ mẹ; podọ to ylankan otọ́ yetọn lẹ tọn le mẹ wẹ yé na lùnpò po yé po te. 40Yé nasọ yígbè ylankan yetọn tọn, po ylankan otọ́ yetọn lẹ tọn po, to ylanwà yetọn he mẹ ye ko wàylan do mi te, podọ ga na yé ko zinzọnlin jagò hlan mi wutu, 41yẹn ga zinzọnlin jagò hlan yé, bo hẹn yé biọ aigba kẹ̀ntọ yetọn lẹ tọn mẹ wá: whenẹnu eyín ayiha magbowhẹnọ yetọn yín huwhẹnọ, bọ yé sọ kẹalọyi whenẹnu sọn oyà ylankan yetọn tọn lọ mẹ; 42whenẹnu wẹ yẹn na flin alẹ̀nu ṣie hẹ Jákobu; podọ, alẹ̀nu ṣie ga hẹ Isaki, podọ alẹ̀nu ṣie ga hẹ Ablaham wẹ yẹn na flin; yẹn bo nasọ, flin aigba lọ. 43Aigba lọ ga na yín jijódai sọn yé mẹ, bo nasọ dùgbẹ̀ gbọjẹzán etọn lẹ tọn, whenuena é mlọnai ovọ́jẹ matin yé; yé bo nasọ kẹalọyí sọn oyà yetọn le tọn mẹ: na, yèdọ na yé gbẹ̀ whẹ̀dida ṣie lẹ dai wutu, bọ alindọn yetọn gbẹwanna asẹdai ṣie lẹ. 44Podọ gãnṣo na enẹ lẹpo, whenuena yé tin to aigba kẹ̀ntọ yetọn lẹ tọn lẹ ji, yẹn ma na gbẹ̀ yé dai gba, mọ yẹn ma na gbẹwanna yé, nado sú yé do gbidigbidì, podọ nado gbà alẹ̀nu ṣie po yé po gba: na yẹn wẹ OKLUNỌ lọ Jiwheyẹwhe yetọn: 45ṣigba na yétọn wutu yẹn na flin alẹ̀nu Otogbó yetọn lẹ tọn lọ, mẹhe yẹn hẹn tón jẹgbonu sọn aigba Egipti tọn lọ ji wá to nukun akọta lẹ lọ tọn mẹ, na yẹn nido yín Jiwheyẹwhe yetọn: yẹn wẹ OKLUNỌ lọ.

46Ehelẹ wẹ asẹdai lẹ lọ po whẹ̀dida lẹ po po osén lẹ po, he OKLUNỌ lọ basi to ṣẹnṣẹn ewọ po ovi Islaeli tọn lẹ po tọn to osé Sinai mẹ gbọn alọ Moṣe tọn lọ mẹ.

Currently Selected:

Levitiku 26: BWL23

Highlight

Compare

Copy