JẸLEMIA 1

1OHÓ Jẹlemia ovi Hilkia tọn lẹ, sọn Yẹwhenọ he ko tin to Anatoti mẹ lẹ mẹ to aigba Bẹnjamini tọn ji. 2Mẹhe de ohó OKLUNỌ tọn wá to azán Josia ovi Amọni tọn ahọlu Juda tọn lẹ mẹ, to owhè wiatọ̀ntọ ahọlududu etọn tọn mẹ. 3Ehe sọ wá ga to azán Jehoiakim ovi Josia tọn ahọlu Juda tọn lẹ mẹ, kaka jẹ opòdo, owhè widopotọ Zẹdekia ovi Josia tọn ahọlu Juda tọn, kaka jẹ bibẹ́ yì kanlinmọgbénu Jelusalẹm tọn to osùn atóntọ mẹ.

4Whenẹnu wẹ ohó OKLUNỌ tọn wá dẽ, dọmọ, 5whẹpo yẹn do do we to ohò mẹ yẹn ko yọ́n we; podọ whẹpo hiẹ do tọ́n jẹgbonu sọn adọ̀ mẹ yẹn ko lẹ́ we wé, podọ yẹn ko yí we do dè yẹwhegán de hlan akọta lẹ lọ. 6Whenẹnu wẹ yẹn dọmọ, Jé, OKLUNỌ Jiwheyẹwhe dayi e go, yẹn ma sọgan dọhó: na yẹn yín yọpọvu wutu. 7Ṣigba OKLUNỌ dọ hlan mi dọ, A dọ, yẹn yín yọpọvu blo: na hiẹ na yì mẹpopo he de yẹn na do we hlan, podọ nudepope yẹn na degbèna we hiẹ na dọ. 8A dibu na nukunmẹ yetọn lẹ blo; na yẹn tin de we nado whlẹn we, wẹ OKLUNỌ dọ. 9Whenẹnu wẹ OKLUNỌ dè alọ etọn jẹgbonu bo sọ́ onù ṣie. OKLUNỌ sọ dọ hlan mi dọ, Dayi e go, yẹn ko yí ohó ṣie lẹ do onù towe mẹ. 10Pọ́n, yẹn ko dè we do akọta lẹ ji to egbé, podọ do ahọludu lẹ ji, nado hònadòna jẹgbonu podọ nado tùn liai, podọ nado súdo, podọ nado sisẹ́ liai, nado bépli, podọ nado dó.

11Huganmọ ohó OKLUNỌ tọn sọ wá dẽ, dọmọ, Jẹlemia, etẹ́ hiẹ mọ? Yẹn sọ dọmọ, Yẹn mọ opò de atin almọndi tọn whinwhàn de. 12Whenẹnu wẹ OKLUNỌ dọ hlan mi dọ, Hiẹ ko mọ dagbedagbe na yẹn na hẹn ohó ṣie yawu nado basi i. 13Ohó OKLUNỌ tọn sọ wá dẽ whlawetọ, dọmọ, Etẹ́ hiẹ mọ? Yẹn bo sọ dọmọ, Yẹn mọ ozẹ́n fifiẹ de; nukunmẹ finẹtọn tin pannukọn agéwaji. 14Whenẹnu wẹ OKLUNỌ dọ hlan mi dọ, Sọn agéwaji oylan de na gbà jẹgbonu do tòmẹnu aigba lọ tọn lẹ ji. 15Na, dayi e go, Yẹn na ylọ hẹnnumẹ ahọludu agéwaji tọn lẹ, wẹ OKLUNỌ dọ; yé bo na sọ wá, dopodopo yé tọn na zé ofìn etọn de pannukọn họngbo Jelusalẹm tọn lẹ, podọ jagò do adó finẹtọn lẹ go lẹ́do, podọ jagó do otò dahodaho Juda tọn lọ go. 16Bọ Yẹn na sọ dọ whẹ̀dida lọ do yé go gbọn okanylan yetọn lẹ dali, ehe mẹ yé ko gbẹ́ mi dai te, bo ko mẹ́ nuwhẹnkún hlan yẹwhe dẽvo lẹ, bo ko litaina azón alọ yetọn titi mẹ tọn lẹ. 17Enẹwutu hiẹ ni blagbajana adaja towe lẹ, bo fọ́nsite, bo dọhó hlan yé he yẹn degbèna we lẹpo: a dibuna nukunmẹ yetọn lẹ blo, yẹn nikã flu we to yé nukọn. 18Na, dayi e go, Yẹn ko basi na we to egbé otò dòkọnọ de, po odòtin ogàn tọn po, adó gànvẹ̃ tọn lẹ jagò do aigba lọ lẹ go, do ahọlu Juda tọn lẹ go, do ahọvi finẹtọn lẹ go, podọ do gbẹtọ aigba tọn lẹ lọ go. 19Bọ yé na sọ hoavùn hẹ we: ṣigba yé ma na pé ogo we gba; na yẹn tin de we, wẹ OKLUNỌ dọ, nado whlẹn we.

Currently Selected:

JẸLEMIA 1: BWL23

Highlight

Copy

Compare