JẸLEMIA 2
2
1HUGANMỌ ohó OKLUNỌ tọn sọ wá dè, dọmọ, 2Yl bo dawhá to otọ́ Jelusalẹm tọn lẹ mẹ, dọmọ, Le wẹ OKLUNỌ dọ; Yẹn flinnujẹ ogo we, dagbewà ovuwhenu towe tọn, owanyi alọwle towe lẹ tọn, whenuena hiẹ hodo mi to zùngbo mẹ, to aigba he yè ma pò ji. 3Islaeli yín wiwe hlan OKLUNỌ, po sinsẹ́ntintan sudeji etọn tọn lẹ po: yé omẹ he tlẹn ẹn dù lẹpo na yín whẹ́ylantọ; oylan na wá yé ji, wẹ OKLUNỌ dọ.
4Mì sè ohó OKLUNỌ tọn, mì owhé Jakob tọn emi, po mì hẹnnumẹ whédo Islaeli tọn tọn lẹ po emi: 5Le wẹ OKLUNỌ dọ, Ylando tẹ́ otọ́ towe lẹ mọ to yẹn mẹ, bọ yè do hẹn yé yì dẹn sọn dè, bo ko do zinzọnlin hodo ylando, bo do lẹzùn ovó? 6Mọ yé ma dọmọ, Fie wẹ OKLUNỌ he hẹn mí hẹji sọn aigba Egipti tọn ji te, he do mí gbọn zùngbo mẹ, gbọn aigba zunkan tọn lẹ po odò tọn lẹ po mẹ, gbọn aigba akú tọn de, po oyẹ́ okú tọn de po ji, gbọn aigba he ji omẹ de ma gbọn, fie omẹ de ma nọnọ̀? 7Bọ yẹn hẹn mì biọ otò ojijẹ tọn de mẹ, nado dù sinsẹ́n finẹtọn po nudagbe finẹtọn po; ṣigba whenuena mì biọ e mẹ, mì fiu aigba ṣie, bo sọ hẹn ogúigba ṣie zùn osùnú de. 8Yẹwhenọ lẹ ma dọmọ, Fie wẹ OKLUNỌ te gba? podọ yé he hẹn osén go lẹ ma yón mi: nukọntọ lẹ ga to ylanwà do mi, yẹwhegán lẹ to yẹwhehódọ gbọn Baali dali, bo sọ to zọnlinzin hodo onú he ma doale lẹ. 9Enẹwutu yẹn na hoavùn hẹ mí, wẹ OKLUNỌ dọ, podọ ovivi mitọn lẹ wẹ yẹn na hoavùn hẹ. 10Na jugbọn lopo Ṣitimi tọn lẹ ji, bo pọ́n; bo domẹhlan Keda, bo whèsọ do lẹnpọ́n, bo pọ́n eyín onú mọtọnnkọ de tin. 11Akọta de ko diọ yẹwhe yetọn lẹ, he ma ko yín yẹwhe de lẹ? aigba omẹ ṣie lẹ ko diọ gigo na enẹ he ma doale. 12Yín awujihọ na ehe, mì olọn lẹ, bo sọ yín avosatọ badabada, mì ni yín whéto patapata, wẹ OKLUNỌ dọ. 13Na omẹ ṣie lẹ ko wá oylan awe; yé ko gbẹ́ yẹn asisa osìn ogbẹ́ tọn lẹ dai, bo dè otándò lẹ na yéde, otándò gbigbà lẹ he ma sọgan hẹn osìn de. 14Devi de wẹ Islaeli? jidowhé de we ewọ? etẹwutu wẹ yè gbà ẹ? 15Kinnikinni ovu lẹ to lili do e ji bo to gbigbó, yé sọ hẹn aigba etọn jẹ̀vọ: otò dahodaho etọn lẹ yín mimẹ̀ matin otòmẹnu de. 16Ovi Nọfi po Tahapanesi po tọn lẹ ko gbà ojẹgbakun ota towe tọn ga. 17Hiẹ ma ko kẹalọyi ehe hlan dewe, to ehe mẹ hiẹ ko gbẹ́ OKLUNỌ Jiwheyẹwhe towe dai, whenuena é do we gbọn aliho? 18Dinvie eté hiẹ tindo nado wà to aliho Egipti tọn mẹ, nado nù osìn Siholi tọn lẹ? kavi etẹ́ hiẹ tindo nado wà to aliho Àsylia tọn mẹ, nado nù osìn fotò lọ tọn lẹ? 19Oylankan hiẹ lọsu tọn na do mẹplọnlọ ogo we, podọ agọ̀joyìgodo towe lẹ na dèdòna we: enẹwutu yọnẹn bo sọ mọ dọ onú ylankan vivẹ́ wẹ, bọ hiẹ ko do gbẹ́ OKLUNỌ Jiwheyẹwhe towe dai, podọ osí ṣie ma tin to homẹ na we, wẹ OKLUNỌ Jiwheyẹwhe awhànpa lẹ tọn dọ. 20Na sọn hóhó whenu gbọn yẹn ko wẹ́n zógó towe, bo Kija mẹdogàn towe lẹ; hiẹ sọ dọmọ, Yẹn ma to na gbàsẹ́n gba; whenuena hiẹ to dindanpé to okọta, he ylaga dopodopo jí podọ to atin mú dopodopo glọ, to ogà gbé. 21Ganso yẹn ko dó we ovẹ̃n yẹyinọ de, okún dagbe pete: nawẹ yè gbọn diọ we zùn nudido agò ovẹ̃n alọpadẽvo tọn hlan mi? 22Na eyín hiẹ tlẹ yí lie do Lawu, bo sọ yí adí susu, gãnṣo ylando towe yín nudohia to nukọn ṣie, wẹ OKLUNỌ JIWHEYẸWHE dọ. 23Nawẹ hiẹ sọgan dọ do, dọ, Yè ma hẹn mi flu gba, yẹn ma sọ hodo Baalimi gba? pọ́n aliho towe to agbadò mẹ, yón núhe hiẹ ko wà: kanklosọpóawenọ afọyatọ de wẹ hiẹ he to asado aliho etọn lẹ; 24kẹtẹkẹtẹ gbẹ́mẹ tọn de he zùngbomẹ ko họawuna, he to jẹhọn fú daga to homẹhùnhùn etọn mẹ; to ojlo etọn mẹ mẹnu wẹ sọgan diọkọ nẹ̃? omẹ he to dindin in ma na hẹnnusikọna yéde; to osùn etọn mẹ yé na din in mọ. 25Hẹn afọ towe dote sọn afọpamado mẹ, podọ végo towe sọn sìnnugbla mẹ: aigba hiẹ dọmọ, Otódido de ma tin: lala; na yẹn ko yiwanna ojonọ lẹ wutu, podọ yé wẹ yẹn na nọ hodo yì. 26Le winyan nọ hù ajotọ do whenuena yè wle e, mọwẹ winyanhù owhé Islaeli tọn do; yé, ahọlu yetọn le, ahọvi yetọn lẹ, po yẹwhenọ yetọn lẹ po, po yẹwhegán yetọn lẹ po, 27didọ hlan atin de dọ, Hiẹ wẹ otọ́ ṣie; podọ hlan zannu de dọ, Hiẹ wẹ ko hẹn mi jẹgbonu: na yé ko lẹ́ godo yetọn hlan mi, é ma yín nukunmẹ yetọn gba: ṣigba to ojlẹ tukla yetọn tọn mẹ yé na dọmọ, Tite, bo whlẹn mí 28Ṣigba fie wẹ vodun towe lẹ te he hiẹ ko basi na dewe? gbọ yé ni tite, eyín yé sọgan whlẹn we to ojlẹ tukla towe tọn mẹ: na kẹdẹdi sọha otò dahodaho towe lẹ tọn wẹ vodun towe lẹ te, Hiẹ Juda È.
29Etẹwutu mìwlẹ na yíhódọ hẹ mi? mì mẹpo wẹ ko wàylan do ogó e, wẹ OKLUNỌ dọ. 30Ovọ́ mẹ wẹ yẹn linú ovi towe lẹ; yé ma yí oplọnlọ de, ohi mitọn lọsu ko dù yẹwhegán mitọn le, taidi kinnikinni mẹsúdotọ de. 31Owhẹndo E, mì ni mọ ohó OKLUNỌ tọn. Yẹn ko yín zùngbo de hlan Islaeli la? aigba zinvlu tọn de? etẹwutu wẹ omẹ ṣie lẹ to didọmọ, Míwlẹ yín gbigbà kija; míwlẹ ma sọ ja de we ba? 32Yọnnuasiwhe sọgan wọnji asọdonu etọn lẹ go, kavi yọnnuyọ́yọ́ otabla etọn? gãnṣo omẹ ṣie lẹ ko wọnji ogo e azán susu matin sọha. 33Etẹ wutu hiẹ to aliho towe dè nado din owanyi towe? enẹwutu yèdọ wẹ hiẹ ko plọn aliho towe lẹ yọnnu ylankan lẹ. 34To avọ̀tó towe lẹ mẹ wẹ yè mọ ohùn gbigbọ ayiha wamọnọ homẹvọnọ lẹ tọn tọn tè: hiẹ ma ko mò en to òten gbigbà biọwhégbè tọn mẹ gba, ṣigba to ehe lẹpo ji. 35Gãnṣo hiẹ didọmọ, Na yẹn yín homẹvọnọ wutu, nugbonugbo yè hẹn homẹgble etọn lẹ́ sọn dẽ. Dayi e go, yen na yíhódọ hẹ we, na hiẹ dọmọ, Yẹn ma ko wàylando de wutu. 36Etẹwutu hiẹ lẹ́pe sọmọ nado diọ aliho towe? Yè na hẹn winyan Egipti tọn hù we ga, dile winyan Asylia tọn hù we do. 37Nugbo, hiẹ na jẹgbonu yì sọn e de, po alọ towe lẹ po to ota towe: na OKLUNỌ ko gbẹ́ tùdodomẹgo towe lẹ, podọ hiẹ ma na wàdagbe to yé mẹ gba.
Currently Selected:
JẸLEMIA 2: BWL23
Highlight
Copy
Compare
Share
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
