ISAIA 66

1LE wẹ OKLUNỌ dọ, olọn wẹ ofìn ṣie, aigba wẹ tokloafọligbé ṣie tọn: fie wẹ ohọ̀ he mì gbá na mi te? fie wẹ otẹn gbọjẹ ṣie tọn te. 2Na alọ ṣie wẹ basi onú helẹpó, onú helẹpó ko tin to ai, wẹ OKLUNỌ dọ: ṣigba ehe wẹ yẹn na pọ́n, yèdọ agbatọnọ po gbigbọ whiwhẹnọ po, he to sisọsisọ na ohó ṣie. 3Ewọ he hù oyìnsú, tin dile ewọ he hù gbẹtọ de te; ewọ he yí lẹngbọvu de do sánvọ́, tin dile ewọ he wẹ́n okọ̀ avún de tọn te, ewọ he sánvọ avọ́ nunina tọn de, tin dile ewọ heyí ohùn ohàn tọn do sánvọ te; ewọ he mè nuwhẹnkun, tin dile ewọ he dona vodun te. Nugbo yé ko dè aliho yéde tọn, ayiha yetọn sọ vivi to osùnú yetọn lẹ mẹ. 4Yẹn ga na dè oklọ yetọn, bo sọ hẹn ehe yé dibuna wá yé ji; na whenuena yẹn ylọ, mẹde ma siọ; whenuena yẹn dọhó, yé ma sè; ṣigba yé wà ylankan to nukọn ṣie, bo sọ dè onú he go homẹ ṣie ma hùn do.

5Mi sè ohó OKLUNỌ tọn, mi he to sisọsisọ na ohó etọn; mẹmẹsunnu mitọn he gbẹwanna mi lọ, he tùn mi hlan na oyín ṣie wutu lọ, ko dọmọ, Mì gbọ yè ni pagigona OKLUNỌ: ṣigba ewọ na sọ awuhia na ayajijẹ mitọn, winyan na sọ hù yéwlẹ. 6Ogbè awhá tọn sọn otò mẹ, ogbè sọn tẹmpli mẹ, ogbè OKLUNỌ tọn he yiahọsu to kẹ̀ntọ etọn lẹ go. 7Whẹpo é jẹ ajipanu, é ko jivi; whẹpo awufiẹsa etọn wá, é ko ji ovisunnu de. 8Mẹnu wẹ sè onú he hunkọ? mẹnu wẹ mọ onú he hunkọ? Bé yè na hẹn aigba wú onú jẹgbonu to azán dopo mẹ? Kavi yè sọgan ji akọta to whladopo? na le Ziọni jẹ ajipanu gẽ wẹ é ji ovi etọn lẹ. 9Bé yẹn na hẹn wá ajipanu, bo ma hẹn jivi gba? wẹ OKLUNỌ dọ: bé yẹn na hẹn omẹ jivi, bo sọ sú adọ̀? wẹ Jiwheyẹwhe towe dọ.

10Mì jaya hẹ Jelusalẹm, homẹ mitọn ni vivi hẹ ẹ, mì he yiwan nẹ̃ lẹpo, mi jaya na homẹhùnhùn hẹ ẹ, mì omẹ he to awubla na etọn wutu lọ. 11Na mì nido nọ́ anọ́, na yè ni yi anọ́ homọjlado etọn tọn do pékọna mì; na mì ni fìnyọn yìnnó, na homẹ mitọn nido hùn to sudeji gigo etọn tọn mẹ. 12Na le wẹ OKLUNỌ dọ, Dayi e go, yẹn na dlẹn jijọho hlan ẹn di otọ̀, podọ gigo Kosi lẹ tọn di tọ̀sìsa: whenẹnu wẹ mì na nọ́ anó, yè na yàn mi do adà etọn mẹ, yè na zé mì dowèna to oklo etọn ji. 13Di mẹhe onọ etọn to homẹmiọnna de, mọkẹdẹ wẹ yẹn na miọnhomẹna mì do; yè na sọ miọnhomẹna mì to Jelusalẹm mẹ. 14Whenuena míwlẹ mọ ehe, ayiha mitọn na jaya, ohú mitọn na sọ wú jẹgbonu di omá: yè na sọ yón alọ OKLUNỌ tọn to devi etọn lẹ go, podọ homẹgble etọn to kẹ̀ntọ etọn lẹ go. 15Na dayi e go, OKLUNỌ na wá po mìyọn po, podọ kẹkẹ etọn lẹ di ahizi, nado yí adi etọn do suahọ na homẹfiọ po wọhẹ etọn po to alọ miyọn tọn mẹ. 16Na OKLUNỌ na yí mìyọn po ohi po do dawhẹ́ agbasalan lẹpo tọn: osiọ OKLUNỌ tọn lẹ na yín susu. 17Yé he hẹn yéde zùn wiwe lẹ, bo sọ hẹn yéde zùn wiwe nado yì ojipa lẹ mẹ to atin dopo godo to ṣẹnṣẹn, bo to olàn ohàn tọn dù po osùnú lọ po, po ajaka po, wẹ yè na súdo dopọ́, wẹ OKLUNỌ dọ. 18Na yẹn yọ́n azọ́n yetọn po linlẹn yetọn po: ojlẹ lọ na wá nado bẹ́ akọta po odẹ́ lẹpo po pli; yé na wá bo sọ mọ gigo ṣie 19Yẹn na yi ohia de do ṣẹnṣẹn yetọn yẹn na sọ do yé he họ̀ngán to yé mẹ lẹ hlan akọta lẹ hlan Talṣisi, Tuli po Ludi po, he to ogá dọ́n lẹ, hlan Tubali, po Javani po, hlan olopo he dẹn boboe, e ma ko sè lìnlìn ṣie, kavi ma ko mọ gigo ṣie; yé na dọhó gigo ṣie tọn to ṣẹnṣẹn Kosi lẹ tọn. 20Yé na hẹn mẹmẹsunnu mitọn lẹpo sọn akọta lẹpo mẹ wá na avọ́ de hlan OKLUNỌ, to osọ́ lẹ ji, to kẹkẹ lẹ mẹ, to owhlẹ lẹ ji, to otlò lẹ ji, to kanlin yawu lẹ ji, wá osó wiwe ṣie Jelusalẹm kọ̀n, wẹ OKLUNỌ dọ, kẹdẹdile ovi Islaeli tọn lẹ nọ hẹn nunina to nazinzán wiwe mẹ wá ohọ̀ OKLUNỌ tọn mẹ do. 21Yé mẹ wẹ yẹn na dè te na yẹwhenọ lẹ podọ na Leviti lẹ ga, wẹ OKLUNỌ dọ. 22Na dile olọn yọ́yọ́ po aihọn yọ́yọ́ he yẹn na basi lẹ po na nọte to nukọn ṣie, mọwẹ okún towe po oyín towe po na nọte do, wẹ OKLUNỌ dọ. 23E na sọ wá jọ, agbasalan lẹpo wẹ na wá litai to nukọn ṣie, sọn osùn yọ́yọ́ de mẹ kaka jẹ dẽvo mẹ, podọ sọn azán gbọjẹ tọn de mẹ kaka jẹ dẽvo mẹ, wẹ OKLUNỌ dọ. 24Yé na tọ́n jẹgbonu, bo pọ́n osiọ gbẹtọ he ko ṣatẹ do ogo e lẹ tọn; na owé yetọn ma na kú, mọ mìyọn yetọn ma na ṣi; yé na sọ yín núgbẹ́wanna de hlan agbasalan lẹpo.

Currently Selected:

ISAIA 66: BWL23

Highlight

Compare

Copy