ISAIA 65

1YÈ din mì gbọn yé he ma kàn mi biọ lẹ de; yè sọ mọ mi to yé he ma din mi lẹ de: yẹn dọ hlan akọta he yè ma ylọ gbọn oyín ṣie dali dọ. Pọ́n mi, pọ́n mi. 2To azán lẹpo mẹ wẹ yẹn dlẹn alọ ṣie hlan gbẹtọ atẹnọ, he to zọnlinzin to aliho he ma yọ́n ji, to linlẹn yéde tọn mẹ. 3Gbẹtọ he to adìdohòmẹna mi to whepoponu; he to avọ́san to ojipa mẹ, bọ yé sọ to nuwhẹnkun mẹ̀ to agbà bliki tọn ji. 4Ehe sọ pò to ṣẹnṣẹn yọ̀do tọn, bo sọ nọnọ̀ atọ̀họ mẹ, he nọ dù olàn ohàn tọn, jaja onú osùnú lẹ sọ tin to núzinzán yetọn lẹ mẹ. 5He dọmọ, Nọte na dewe, a sẹ̀pọ́ mi blo; na yẹn yín wiwe hú hiẹ. Azọ̀ to awọ̀ntin ṣie mẹ wẹ ehelẹ, mìyọn he to jiji to azán lẹpo gbè. 6Dayi e go, yè ko wlan to nukọn ṣie; yẹn ma na do onù abọẹ, ṣigba yẹn na yí ahọsu, yèdọ ahọsu to akón yetọn nu. 7Ylankan mitọn, po ylankan otọ́ mitọn lẹ tọn po dopọ́, wẹ OKLUNỌ dọ, yé he mẹ̀ nuwhẹnkun to osó lẹ ji, bo to yẹyi ṣie dèpò to okọta lẹ ji: enẹwutu wẹ yẹn na jlẹ azọ́n hóhó yetọn do akọ́n yetọn nu.

8Le wẹ OKLUNỌ dọ, dile yè nọ mọ vẹ̃nhàn yọ́yọ́ to ohín mẹ, bọ yè sọ nọ dọmọ, a hẹn ẹn gble blo; na dona tin to e mẹ, mọwẹ yẹn na basi do na devi ṣie lẹ wutu, na yẹn ma na do hù yé omẹ pó súdo. 9Yẹn na hẹn okún de jẹgbonu sọn Jakob mẹ, podọ whédutọ osó ṣie tọn de sọn Juda: mẹvivẹ́ ṣie na dugú etọn, devi ṣie lẹ wẹ na sọ nọnọ̀ finẹ. 10Ṣalọni na lẹzùn adọ́tẹn lẹngbọ lẹ tọn, agbàdo Akoli tọn ofi de na kanlinpa lẹ nado nọ mlọnai do é mẹ, na omẹ ṣie he din mi lẹ. 11Ṣigba mì he gbẹ́ OKLUNỌ dai lẹ, he wònji osó wiwe ṣie go, he wleawu tafo de tọn dai na Gadi, bo sọ yí nunina nùnù na Meni. 12Enẹwutu wẹ yẹn na hia mì hlan ohi, mì omẹ pó na sọ dẹ́ hlan hùhù: na whenuena yẹn ylọ, mì ma siọ; whenuena yẹn dọhó, mì ma sè; ṣigba mì wàylan to nukọn ṣie, bo sọ dè onú he go home ṣie ma hùn do.

13Enẹwutu le wẹ OKLUNỌ JIWHEYẸWHE dọ, dayi e go, devi ṣie lẹ na dùnú, ṣigba hùvé na hù míwlẹ: dayi e go, devi ṣie lẹ na nù, ṣigba nugbla na hù míwlẹ: dayi e go, devi ṣie lẹ na jaya, ṣigba winyan na hù mìwlẹ. 14Dayi e go, devi ṣie lẹ na jihàn na homẹvivi ayiha tọn, ṣigba mìwlẹ na dawhá na awubla ayiha tọn, bo sọ wẹnhùn na awubla gbigbọ tọn. 15Mì na jo oyín mitọn dai hlan dẹhodo de na mẹdidè ṣie lẹ: na OKLUNỌ Jiwheyẹwhe na hù we, bo sọ ylọ devi etọn lẹ gbọn oyín dẽvo mẹ. 16Na mẹhe dona ede tó aihọn mẹ, na dona ede to Jiwheyẹwhe nugbo tọn mẹ; mẹhe sọ to whiwhle to aihọn mẹ na whle gbọn Jiwheyẹwhe nugbo tọn dali; na yè wọ̀nji tukla hóhó tọn lẹ go, podọ yè yí yé whla sọn nukun ṣie mẹ 17Sa pọ́n yẹn na da olọn yọ́yọ́ lẹ po aigba de po: yè ma na flin hóhó tọn, mọ yé ma na wá linlẹn mẹ. 18Ṣigba homẹ mitọn ni hùn, na mì ni sọ to ayajẹ̀ kakadoi to enẹ he yẹn da mẹ: na dayi e go, yẹn da Jelusalẹm homẹvivi de, podọ gbẹtọ etọn lẹ ayajijẹ de. 19Yẹn na jaya to Jelusalẹm mẹ, yẹn na sọ jaya to omẹ ṣie lẹ mẹ: yè ma na sọ sè ogbè avi tọn to e mẹ ba, kavi ogbè awhá tọn. 20Yọ̀pọ he azán etọn ma na dẹn de ma na tin to e mẹ, mẹho he azán etọn ma gọ́ de: na yọ̀pọ na kú to whenuena é sọ̀ owhè kanweko-mẹho; ṣigba ylandonọ owhè kànwekonọ na zùn dẹ̀hòdonọ. 21Yé na gbá ohọ̀, bo sọ nọnọ̀ yé mẹ, yé na do vẹ̃ngle, bo sọ dù sinsén yetọn 22Yé ma na gbá ohọ̀ bọ mẹdẹ̃vo na nọ̀ e mẹ; yé ma na do bọ mẹdẹ̃vo na dù: na dile azán atin tọn te wẹ azán omẹ ṣie lẹ tọn na te, omẹ ṣie lẹ na dugbẹ̀ azọ́n alọ yetọn mẹ tọn dẹn. 23Yé ma na wàza nyáyá, yé ma na jivi na tukla; na yé wẹ okún donanọ OKLUNỌ tọn, podọ ovi yetọn po yé po. 24E na sọ wá jọ, na whẹpo yé na ylọ, yẹn na siọ, podọ le yé to hódọ to alọnu, yẹn na sè. 25Ohia po lẹngbọvu po na dùnú dopọ́, kinnikinni na dù amà di oyín asú, kọ́gudu na yín nùdùdù odàn tọn. Yé ma na gbleawuna omẹ, kavi hùsúdo to osó wiwe ṣie lẹpo ji, wẹ OKLUNỌ dọ.

Currently Selected:

ISAIA 65: BWL23

Highlight

Compare

Copy