OWALỌ APỌSTELI LẸ TỌN 20
20
1EHEGODO zingidi lọ huwhé, Paulu dowẹn ylọ nuplọntọ lẹ do ede de, bo dòn yé do ogo, bo fọ́nyi na nado yì biọ Makedonia. 2Whenuena é ko yì lédo awà nẹlẹ pó ji, bo sọ dọhó homẹjlado tọn susu hlan yé, é wá aigba Gleki lẹ tọn ji. 3E nò finẹ hò osùn atọ̀n. Whenuena Ju lẹ tọwù do aliho nẹ̃, le é to linlẹn nado gbọn ohún mẹ yì Silia, é lẹn nado lẹ́gọ̀ gbọn Makedonia. 4Sopateli Belea tọn plan ẹn yì jẹ Asia; to Tẹsalonikanu lẹ mẹ, Alistaku po Sekundu po; Gaiu Delbe tọn, po Timoti po; podọ to Asiatọ lẹ mẹ, Tikiku po Tlofimu po. 5Ehelẹ to yìyì; to nukọn, bo sọ sitepón mí to Tloa. 6Mí sọ súnhún sọn Filippi to azán akla madotón tọn lẹ godo, bo sọ wá yé de to Tloa to azán atón mẹ; ofì he mí nò hò azán ṣinawe.
7Azán tintan awlẹn tọn gbè, whenuena nuplọntọ lẹ plidopọ nado kán akla, Paulu dọyẹwheho hlan yé, bo wleawu nado fọ́nyi to osò; é dón ohó etọn dite kaka jẹ ozánhomẹ. 8Miyọngbán susu wẹ to abò aga tọn lọ mẹ, to ofi he mí plidopọ te. 9Visunnu dẹpẹ de he yè nọ ylọ dọ Eutiku sinai to vẹsẹnu, amlọn biọ lanmẹ nẹ: le Paulu dẹn to yẹwhehódọ mẹ, é fló to amlọn mẹ, bo jai sọn aga atọ̀ntọ wá odò, yè sọ zé e do zé oṣiọ. 10Paulu sọ jẹte yì odò, bo pavàvá do e ji, bo dòn ẹn do ogo bo dọmọ, Mì dotukla mìde blo; na gbigbọ etọn tin to ohò etọn mẹ. 11Enẹwuw whenuena é gò wà aga, bo kán akla, bo dù, bo sọ dọhó dẹn, yèdọ kaka jẹ afọnnu, mọwẹ é fọ́nyi. 12Yé sọ hẹn visunnu dẹpẹ lọ gò to ogbe, é ma yín vude wẹ homẹ yetọn vivi gba.
13Mìwlẹ jẹnukọn yì ohún mẹ, bo súnhún wá Asso, finẹ mí to linlẹn nado yí Paulu do vàtlẹ lọ mẹ te: na mọwẹ é ko magbè etọn do, é jlo nado gbọn afọ na ede. 14Whenuena é pla mí to Asso, mí yí i do ohún mẹ, bo wá Mitilene. 15Mí sọ súnhún sọn finẹ, to azán awetọ gbè, mí wá Kio jlẹji; to azán etọn awetọ gbè mí jẹ Samo, bo sọ nọte to Tlogiliu; to azán awetọ gbè, mí wá Miletu. 16Na Paulu ko sọ magbè etọn nado dohún gbọn Efesu dali, na éwọ ma to na zán ojlẹ lọ to Asia wutu: na é to plapla ji, eyín é sọgan yín wiwà nẹ̃, nado tin to Jelusalẹm to azán Pẹntikọsti tọn gbè.
17E do omẹ hlan Efesu sọn Miletu, nado ylọ mẹho agùn tọn lẹ wá. 18Whenuena yé wá e de, é dọ hlan yé, dọmọ, Mìwlẹ yọnẹn, sọn azán tintan he gbè yẹn wá Asia, alọ he ji yẹn nò po mì po to ojlẹ lẹpo mẹ. 19Le yẹn yí hùwhẹ ayiha tọn lẹpo do tó Oklunọ sén do, po dasìn lẹ po, po whlepón lẹ po, he pla mi gbọn owùtọnamẹ Ju lẹ tọn dali: 20podọ le yẹn ma gbòawupò sọn lilá nude he yín ale hlan mì mẹ, ṣigba yẹn ko dọ hlan mì, bo sọ plón mì to gbangba, podọ sọn whégbè jẹ whégbè, 21bo to didọ hlan Ju lẹ podọ hlan Glẹki lẹ ga, lẹnvọjọ hlan Jiwheyẹwhe de, po yise po hlan Jesu Klisti Oklunọ mìtọn de. 22Dinvie mì dayi e go gbigbọ ṣie didé do Jelusalẹm yìyì ji, yẹn ma sọ yón onú he na pla mi to finẹ, 23adavo dọ Gbigbọ Wiwe kunnude hlan mi to otòdaho dopodopo mẹ dọ, ogàn po nukunbibia lẹ po tin to nukọn ṣie. 24Ṣigba dopo to onú helẹ mẹ ma hẹn mi sẹtẹn gba, mọ yẹn ma sọ lẹn gbigbọ ṣie di nuvivé hlan dẽ, sọmọ dọ yẹn nido yí ayajẹ do hẹn ali ṣie jẹ pòdo, po devizón he yẹn yí sọn Jesu Oklunọ de po, nado nọ la wẹndagbe ojọmiọn Jiwheyẹwhe tọn tọn. 25Dinvie mì dayi e go, yẹn yọnẹn dọ mì omẹ pó, mẹhe mẹ yẹn ko to dindan gbọn do to yẹwheho ahọludu lọ tọn dọ te, ma sọ to nukunme ṣie na mọ ba. 26Enẹwutu yẹn ylọ mì nado dekunnu to egbé, dọ yẹn wé sọn ohùn gbẹtọ lẹpo tọn mẹ. 27Na yẹn ma gboawupò nado la linlẹn Jiwheyẹwhe tọn hlan mí 28Enẹwutu mì payi mìde go, po apó he Gbigbọ Wiwe yí mì do basi nugopọntọ na lẹpo po, nado nọ yìn agùn Jiwheyẹwhe tọn, he é yí ohùn ede ton do họ́. 29Na yen yón ehe dọ, to yìyì ṣie godo, ohla he dobu na biọ mì mẹ, mapò apó yìnte. 30Podọ to mìlọsu mẹ wẹ sunnusi lẹ na fọ́n sọn bo na to onú agò dọ, nado dòn nuplọntọ lẹ do godo yetọn 31Enewutu mì payi bo sọ nọ flin dọ, owhè atọ̀n nkọ wẹ yẹn ma gbòawupò nado to dasìn yí do to hókóna mì omẹ dopodopo to ozán po okle po. 32Be dinvie, mẹmẹsunnu emi, yẹn jo mì do alọ Jiwheyẹwhe tọn mẹ, podọ do ohó ojomiọn etọn tọn mẹ, he sọgan hẹn mì do ote, bo sọ na ogú mì to mẹhe yè hẹn zùn wiwe lẹpo mẹ. 33Yẹn ma donukunkẹn do fataka omẹ de tọn go, kavi sika, kavi avọ̀. 34Mìlọsu yọnẹn dọ alọ helẹ wẹ wàzón hlan númananọmatindo ṣie lẹ, podọ hlan mẹhe tin to dẽ lẹ ga. 35Yẹn ko yí onú lẹpo hia mì, dọ to azọnwiwà mọ mẹ é jẹ dọ mì nado nọ gọalọna omẹ awumasinyẹnna le, podọ nado nọ flin ohó Jesu Oklunọ tọn lẹ, le ewlọsu dọ do, dọmọ Nado namẹ do dona hú nado mọyi.
36Whenuena é dọhó dole pó, é jẹklo, bo hodó hẹ yé omẹ pó. 37Yé omẹ pó sọ viavi susu, bo té do okò Paulu tọn go, bo donùnùgo nẹ, 38lẹblanu wà yé húgan popo lẹpo na ohó he é dọ lẹ, dọ yé ma to na mọ nukunmọ etọn ba. Yé sọ plan ẹn yì vàtlẹ lọ mẹ.
Currently Selected:
OWALỌ APỌSTELI LẸ TỌN 20: BWL23
Highlight
Share
Compare
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
