OWALỌ APỌSTELI LẸ TỌN 21
21
1WHENUENA é sọ wá jọ, to ehe godo mí yì sọn yé de, mí súnhún, bo gbọn aliho titegbe wá Koọsi, to azán awetọ gbè, mí wá Lodu, bo sọ sọn finẹ yì Patala. 2Whenuena mí sọ mọ ohún he juwajei Fenike de, mí do vàtlẹ de, bo sọ sún. 3Whenuena mi mọ Kiplu to aganu, bo sọ lé ẹ do amiyọn mẹ, mí súnhún yì Silia, bo jlẹhún to Tile: na finẹ wẹ vàtlẹ lọ to agbàn na bókọndai te. 4Le mí mọ nuplọntọ lẹ, mí nọte to finẹ hò azán ṣinawe: mẹhe dọ hlan Paulu gbọn alọ Gbigbọ tọn mẹ, dọ é yi Jelusalẹm blo. 5Whenuena azán nẹlẹ ko pé, mi tọ́n bo sọ jẹ ali mitọn ji; ye omẹ pó sọ do mí je aliho mìtọn ji, yọnnu po yọ̀pọ po kaka mí do tón sọn otòdaho lọ mẹ: mí sọ jẹklo to ohùtó bo hode. 6Whenuena mí dọ é zùngbede na minọzo, mí biọ vàtlẹ lọ mẹ; yewlẹ sọ lé gò yì owhé.
7Whenuena mí hẹn ali mìtọn jẹ pòdo sọn Tile, mí wá Ptolẹmai, mí dọnúdo mẹ-mẹsunnu lẹ, bo sọ nóhẹ yé azán dopo. 8To azán awetọ gbè, mí mẹhe yín ogbé Paulu tọn lẹ tón bo sọ wá Sesalea: mí sọ biọ ohò Filipi evangelisti tọn mẹ, he yín dopo to omẹ ṣinawe lẹ mẹ; bo sọ nòhe ẹ. 9Dawe lọ tindo oviyọnnu ẹnẹ, awhli, he nọ dọdọdai. 10Le mi nọte to finẹ hò azán susu, yẹwhegán de he nọ yín Agabu jẹte sọn Judé wá. 11Whenuena é wá mí de, é yí homẹbla Paulu tọn, bo bla alọ po afọ po na ede, bo dọmọ, Le wẹ Gbigbọ Wiwe dọ, Le wẹ Ju he tin to Jelusalẹm lẹ na bla mẹhe tindo homẹbla he do, bo nasọ jó e do alọ Kosi lẹ tọn mẹ. 12Whenuena mí sè onú helẹ, mí po omẹ finẹ tọn lẹ po vó ẹ ma nado hẹji yì Jelusalẹm. 13Whenẹnu wẹ Paulu gblọn dọmọ, Etẹ wẹ mì to wiwà nado to avivi, podọ nado to homẹhẹngblena mi? nayẹn wleawu é ma yín na bibla kẹdẹ, ṣigba nado kú ga to Jelusalẹm na oyín Jesu Oklunọ tọn. 14Whenuena yè ma sọgan diọ ayiha etọn, mí nabọẹ, bo dọmọ, Ojlo Jiwheyẹwhe tọn ni yín wiwà.
15To azán nẹlẹ godo, mí bé agbàn mìtọn lẹ, bo hẹji yì Jelusalẹm. 16Nu plọntọ Sesalea tọn delẹ hodo mí yì ga, bo sọ hẹn Mnasọni Kiplu tọn de po yé po, nuplọntọ hóhó de, mẹhe de mí na jẹ.
17Whenuena mí wá Jelusalẹm, mẹ mẹsunnu lẹ yí homẹhùnhùn do yí mí. 18To azán awetọ gbè, Paulu biọ ohò mẹ po mí po yì Jakobu de; mẹho lẹpo sọ tin to finẹ. 19Whenuena é ko dọnúdo yé, é dọ whinnuwhinnu azón onú he tọn Jiwheyẹwhe wà to Kosi lẹ mẹ gbọn devizón etọn dali lẹ na yé 20Whenuena yé sè, yé pagigona Oklunọ, bo sọ dọ hlan ẹn, dọmọ, Mẹmẹsunnu, hiẹ mọ, fọtónfọtón sọha Ju lẹ tọn he yise; yé omẹ pó sọ wẹ vivẹnunọ osén tọn: 21yè ko dọ hlan yé gbọn hiẹ tọn dali dọ, hiẹ to Ju he tin to Kosi lẹ mẹ lẹpo plón nado gbé Moṣe dai, bo to didọ na yé ma nado gbowhena ovi yetọn lẹ, mọ ma nado zinzọnlin gbọn owalọ lọ ji. 22Be enẹwutu etẹ wẹ? jé na sè nugbo dọ hiẹ gò. 23Enẹwutu ehe mí dọ hlan we he wẹ hiẹ ni wà: Mìwlẹ tindo sunnusi ẹnẹ he tindo opadido lo yé ji; 24yí yé, bo yìn dewe po je po, bo sọ nọ whle akuẹ hẹ yé, na yé nido lùn òda yetọn: yé omẹ pó na sọ yọnẹn dọ onú nẹlẹ, ehe ton yè dọ na yé gbọn dali towe, ma yín nugbo gba; ṣigba dọ hiẹlọsu to zọnlinzin titegbe, bo sọ to osén lọ yín. 25Gbon Kosi he yise lẹ tọn dali, mí ko dowenhlan bo sọ magbè dọ, yé dayi onú mọtọnnkọ go blo, ṣigba dọ yé ni whlá yede sọn onú he yè yí do sánvọ́ hlan bosiọ lẹ kòn, podọ sọn ohùn kòn, sọn nuslokòna kọn, podọ son gàlilọ kòn. 26Whenẹnu wẹ Paulu yi ome ewlẹ, to azán awetọ gbè, whenuena é yìn ede po yé po, é biọ tẹmpli mẹ, nado basi ohia pipé azán awuyinyìn tọn kaka yè na do sánvò na omẹ dopodopo yetọn.
27Whenuena azán sìnawetọ ko bla pé, le Ju Asia tọn lẹ mọ ẹn to tẹmpli mẹ, yé fònadan agùndaho lẹpo, bo dealọ wlé e, 28bo to awhádo dọmọ, Mì gọalọ, mì omẹ Islaeli tọn emi: Ehe wẹ dawe lọ he to omẹ plọn to ofì popo do gbẹtọ lẹ go, do osén go, podọ do ofi he go: humọ é to Gleki lẹ hẹn wá templi mẹ ga, bo sọ to ofi wiwe he hẹn flu. 29(Na yé ko mọ Tlofimu Efesunu lọ to e de dai to otòdaho lọ mẹ, mẹhe ye len dọ Paulu hẹn biọ tẹmpli mẹ.) 30Otodaho lepo yè whàngona, gbẹtọ lẹ sọ họnwezun plidopọ; yé wlé Paulu, bo dòn ẹn tòn sọn tẹmpli mẹ; tẹndoponẹmẹ ohòn sọ sú. 31Le yé sọ to dindin nado hù i, owẹn wá awhangándabo awhanpa tọn de dọ, awhá to didi to Jelusalẹm lẹpo 32Mẹhe yí awhanvipẹ po mekanwekowhangán po to tendoponemẹ, bo họnwezun jẹte yì yé de: whenuena yé mọ awhangándaho po awhanvipe lẹ po, yé gbọ sọn nuli Paulu go. 33Whenẹnu wẹ awhangándaho sẹ́wá, bo yi i, bo sọ dọmọ, yè ni yí ogàn awe do sín in: é sọ to mehe é, yín, po onú he é wà po kanbiọ. 34Omẹ delẹ to awhádo dọ onú de, ome dele sọ to devo dọ to agùn mẹ: whenuena o ma yón nugbo zingidi lọ tọn, é degbè dọ yè ni hẹn ẹn biọ síngbo mẹ. 35Whenuena ewọ jẹ ayila ji, awhanvipẹ lẹ ze e do aga na huhlọn gbẹtọ lẹ tọn wutu. 36Na agùndaho gbẹtọ lẹ tọn to hihodo e, bo sọ to awhádo dọ, Mì dè e sẹ.
37Le yè to na hẹn Paulu biọ síngbo mẹ, é dọ hlan awhangándaho, dọ, Yẹn sọgan ha dọhó hẹ we? Mẹhe gblọn dọmọ, Hiẹ sè ogbè Gleki tọn? 38E ma yín hiẹ wẹ Egiptitọ lọ, jẹnukọn na azán helẹ, he sàtẹ, bo sọ plan gbẹtọ degbade he yín hlọnhutọ biọ ozùn mẹ? 39Paulu sọ dọmọ, Ju de wẹ yẹn, Talsu tọn tọ Silisia mẹ, otòvi he ma yín otodaho wamọnọ de: yẹn vẹ̀ we, gbọ yen ni dọhó hlan gbẹtọ lẹ. 40Whenuena é dike nè, Paulu site to ayila ji, bo mìalọ hlan gbẹtọ lẹ. Whenuena yé nabọẹ gùn, é dọhó hlan yé to ogbè Heblu tọn mẹ.
Currently Selected:
OWALỌ APỌSTELI LẸ TỌN 21: BWL23
Highlight
Share
Compare
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
