OWALỌ APỌSTELI LẸ TỌN 19
19
1E SỌ wá jọ, dọ whenuena Apọlo tin to Kọlinti, bọ Paulu jugbọn agbègbè aga tọn ji wá Efesu: bo mọ nuplọntọ delẹ, 2é dọ hlan yé, dọmọ, Mìwlẹ ko mọ Gbigbọ Wiwe yí sọn whenu mì ko yise? Yé sọ dọ hlan ẹn, dọ, Mìwlẹ ma ko sè jẹ mọ dọ Gbigbọ Wiwé de tin. 3E sọ dọ hlan yé, dọ, Etẹ mẹ wẹ yè ka baptizi mi do? Yé sọ dọ hlan ẹn, dọ, Do baptẹm Johanu tọn mẹ. 4Whenẹnu wẹ Paulu dọmọ, Nugbo Johanu yí baptẹm lẹnvọjọ tọn do baptizi, bo sọ dọ hlan gbẹtọ lẹ dọ yé ni yí ewọ he ja to godo ewọ tọn se, enẹ wẹ, Jesu. 5Whenuena yé sè ehe, yè baptizi yé to oyín Jesu Oklunọ tọn mẹ. 6Whenuena Paulu sọ dealọ do yé ji, Gbigbọ Wiwe wá yé ji; yé ogbè devo do do to hódọ, bo sọ to didọdai. 7Yé gbẹtọ lẹpo yì sunnusi wiawe nkọ.
8E sọ yì sinagọgu mẹ, bo sọ yí tudido do dọhó hò osùn atọ̀n, é to hóyídohójlẹ, bo sọ to mẹhẹn gò do onú he yín ahọludu Jiwheyẹwhe tọn tọn kòn. 9Ṣigba whenuena omẹ delẹ to yé mẹ yín sinsinyẹn, tólivẹtọ bo to danu dọ do aliho lọ go to agùndaho lọ nukọn, é yì sọn yé de, bo klán nuplọntọ lẹ dovò, bo sọ to hóyíjlẹdohógo egbésọegbésọ to owehọ omẹ he yè nọ ylọ Tilannusi tọn de mẹ. 10Ehe to yìyì hò owhè awe nkọ; sọmọ bọ omẹ he tin to Asia lẹpo sè ohó Jesu Oklunọ tọn, Ju lẹ po Gleki lẹ po. 11Jiwheyẹwhe sọ gbọn alọ Paulu tọn mẹ wà azọnjawu he gbọnvò susu. 12Sọmọ bọ yè to duku kavi ovantẹ yí sọn agbasa etọn go wá azòntọ lẹ de, azọ̀n to yìyì sọn yé go, gbigbọ ylankan lẹ sọ to tintan sọn yé go. 13Whenẹnu wẹ Ju dudlutọ delẹ, gbigbọylankanyantọ lẹ, yí do yéde ji nado ylọ oyín Jesu Oklunọ tọn do omẹ he tindo gbigbọ lẹgba tọn lẹ ji, dọmọ, Mìwlẹ yí oyín Jesu he Paulu to yẹwheho etọn dọ tọn do hodẹdo mì. 14Omẹ ṣinawe delẹ tin, ovi omẹ he yè nọ ylọ Skeva de tọn, Ju, ogán yẹwhenọ lẹ tọn, mẹhe wà mọ lẹ. 15Gbigbọ ylankan lọ gblọn bo dọmọ, Yẹn yón Jesu, yẹn sọ yón Paulu; ṣigba mẹnu wẹ mìwlẹ? 16Dawe mẹhe Homẹ gbigbọ ylankan lọ tin te lón tó do yé go, bo doflu yé, bo gbà yé do, sọmọ bọ yé hòntón sọn ohò mẹ to omé podọ to awugble mẹ. 17Ehe sọ zùn yinyọnẹn pé hlan Ju lẹpo po Gleki lẹpo po ga he nọnọ̀ Efesu lẹ; obu jẹ yé omẹ pó ji, oyín Jesu Oklunọ tọn sọ zun kiklo. 18Susu ga sọn omẹ he yise lẹ mẹ wá, yé to gbeyí, bo sọ to owalọ yetọn lẹ dohia. 19Susu yetọn ga he nọ zán anà hunkọhunkọ bé owé yetọn lẹ plidopọ, bo mé yé to gbẹtọ lẹpo nukọn: yé lẹn akuẹ yetọn, yé mọ ẹn, é yín fatakakuẹ fọtọ́n-fọtọ́n kadeao. 20Mowẹ ohó Jiwheyẹwhe tọn to whinwhẹn do e ji, bo sọ to aihẹn.
21Ehegodo onú helẹ pó donù vò, Paulu lẹn dote to ayiha mẹ, whenuena é ko dán gbọn Makedonia po Akaia po, nado yì Jelusalẹm, dọmọ, Ehegodo yẹn jẹ fìnẹ, yẹn ma na nọma mọ Lomu ga. 22Mọwẹ é do omẹ awe to lizọnyítọ etọn lẹ mẹ hlan Makedonia, Timoti po Elastu po; ṣigba ewlọsu nọte to Asia na whenu de.
23To ojlẹ nẹ mẹ pẹvide ma wẹ zingidi he fọ́n na aliho lọ tọn wutu gba. 24Na dawe de he nọ yín Demetliu, fatakayawàtọ, he basi fatakahò Diana tọn, nọ hẹn ale susu wá na asiàwàtọ lẹ: 25yé omẹ he é ylọ plidopọ po anà mọtọnnkọ wàtọ lẹ po, bo dọmọ, Mẹho emi, mì yọnẹn dọ gbọn anà he dali wẹ mí tindo adọkunji mìtọn. 26Humọ mì mọ bo sọ sè, dọ é ma yín Efesu kẹdẹ, ṣigba bla yín Asia lẹpo lédo, wẹ Paulu he to alọtúndo bo sọ to omẹ susu diọ, bo to didọmọ onú he yè yí alọ do basi lẹ ma yín yẹwhe de gba: 27sọmọ é ma yín asiàzón mìtọn he kẹdẹ wẹ tin to owu mẹ nado hẹn zùn ovó gba; ṣigba dọ tẹmpli Diana vodunasi daho tọn na zùn vivlẹ ga, yẹyidáho etọn na zùn hẹngble, mẹhe Asia lẹpo po aihọn po to taliaina 28Whenuena yé sè ohó helẹ, yé gó na adi, bo sọ dawhá daga, dọmọ, Daho wẹ Diana Efesunu lẹ tọn. 29Otòdaho lẹpo sọ gó na zingidi: le yé wlé Gaiu po Álistaku po, Makedoniatọ lẹ, ogbé Paulu tọn lẹ to whẹntóngbé mẹ, yé yí ayiha dopo do họbiọ aihunhò mẹ. 30Whenuena Paiìlu sọ jlo nado biọ ohò mẹ yì gbẹtọ lẹ de, nuplọntọ lẹ ma dike nẹ̃. 31Ogán Asia tọn delẹ, he yín họ́ntọn etọn, do omẹ hlan ẹn, bo vè ẹ dọ é do ede owu mẹ to aihunhò mẹ blo. 32Omẹ delẹ to awhádo dọ onú de, omẹ delẹ to onú devo dọ: na agùndido lọ tin wuwlu me; omẹ susu yetọn wẹ ma yón onú he ye hohúdopọ na. 33Yé sọ dòn Alẹkzandlé tón sọn agùndaho lọ mẹ, Ju lẹ sọ ẹ do nukọn. Alẹkzandlé mì alọ hlan, ewọ ko sọ jlo nado dọ etọn hlan gbẹtọ lẹ. 34Ṣigba whenuena yé yọnẹn dọ Ju wẹ ewọ, yé omẹ pó yí ogbè dopo do dawhá hò ojlẹ awe nkọ dọ, Daho wẹ Diana Efesunu lẹ tọn. 35Whenuena tòwekantọ ko hòhuwhẹ agùndaho lọ, é dọmọ, Mì omẹ Efesu tọn emi, gbẹtọ tẹwẹ tin bo ma yón le otòdaho Efesunu lẹ tọn yín Diana vodunasi daho sẹ̀ntọ do, po bosiọ he flẹ́ sọn Jupiteli de po tọn? 36Le yè ma sọgan mọ onú de dọ do onú helẹ go nẹ, é jẹ dọ mì ni nabọẹ, mì sọ yí sọmawhe do wà nude blo. 37Na mì hẹn omẹ helẹ wá ofi, yé ma yín ajotọ to ohó yẹwhe tọn lẹ mẹ, yé ma tlẹ sọ yín omẹ he zánnù do vodunasi mìtọn go. 38Enẹwutu eyín Demetliu po asiàwatọ he gó nẹ̃ lẹ po, tindo owhẹhó do omẹ depope go, whẹdọtẹn to nuvò, whẹdatọ lẹ sọ tin: mì gbọ yé ni yì jẹwhè yénọzo tọn. 39Ṣigba eyín mì sọ kàn onú de se gbọn owhẹhó devo dali, yè na dotana ẹn to opli he jẹ na osén ton mẹ 40Na mìwlẹ tin to owu mẹ nado ylọ kanhóbiọ na awhá egbé tọn he wutu, na onú he mí na mọ dọ gbọn zingìdi egbé he tọn dali de ma tin. 41Whenuena é dọ le pó, é kija opli lọ.
Currently Selected:
OWALỌ APỌSTELI LẸ TỌN 19: BWL23
Highlight
Share
Compare
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
