OWALỌ APỌSTELI LẸ TỌN 17
17
1WHENUENA yé ko dán gbọn Amfipoli po Apolonia po, yé wá Tẹsalonika, to ofi he sinagọgu Ju lẹ tọn dẹ̃ te: 2Paulu dile jijọ etọn te, é biọ hòmẹ yì yé de, na gbọjezán atọ̀n é yí oho do to ohó jlẹ na yé sọn Owe wiwe lẹ mẹ, 3é to hùnhùn, bo sọ to lila hlan yé dọ, Klisti ma sọgan nọma jiya, bo sọ fọ́n sọn osiọ le mẹ; podọ Jesu he, mẹhe yẹn to yẹwheho etọn dọ hlan mì, wẹ Kksti lọ. 4Adade to yé mẹ yise, bo sọ to zinzọn hẹ Paulu po Sila po; podọ Gleki ayihawiwenọ lẹ susugege, po yọnnusi yẹyinọ lẹ po é ma yín vude. 5Ṣigba Ju he ma yise lẹ yí awuwhan do sadi, bo sọ dòn mẹvọnu lẹ sọn mẹhe jọgblewà lẹ mẹ do yéde de, bo sọ sinyan ogbé plidopọ, bo sọ hẹn otòdaho lẹpo wlu, bo sọ hozinjẹ owhé Jasoni tọn ji, bo to aliho din nado hẹn yé jẹgbonu wá gbẹtọ le de. 6Whenuena yé ma mọ yé, yé dòn Jasoni po mẹmẹsunnu delẹ po wá otògán otodaho lọ tọn de, bo to awhádo dọ, Omẹ helẹ he to tasọdòna aihọn wá ofìle ga; 7mehe Jasoni yíhen: podọ ehelẹ pó wẹ to núagò wà do osén Sesali tọn go, dọmọ, Ahọlu devo de tin, Jesu de. 8Yé sọ domagbọjẹna agùndaho lọ, po ogán otòdaho lọ tọn lẹ po, whenuena yé sè onú helẹ. 9Whenuena yé yí alọyitọ Jasoni tọn, po omẹ he pò lẹ po tọn, yé jo yé do yé ni yì.
10To tẹndoponemẹ mẹmẹsunnu lẹ yí Paulu po Sila po dohlan Belea to ozán mẹ: whenuena yé sọ jẹ finẹ, yé biọ sinagogu Ju lẹ tọn me. 11Ehelẹ yín yẹyinọ hú Tẹsalonika tọn lẹ, na yé kọnayiha dai do yí ohó lọ, bo nọ to Owé wiwe lẹ din egbésọegbésọ, eyín mọ wẹ onú nẹlẹ yín. 12Enẹwutu susu yetọn yise; podọ to Gleki yọnnusi yẹyinọ lẹ mẹ, podọ to sunnusi lẹ mẹ, é ma yín vude. 13Ṣigba whenuena Ju Tẹsalonika tọn lẹ sè linlin dọ Paulu to yẹwheho ohó Jiwheyẹwhe tọn tọn dọ to Belea, yé wá finẹ, bo sọ fọ́nadan agùndaho lọ lẹ. 14Whenẹnu to tẹndoponẹmẹ, mẹmẹsunnu lẹ yí Paulu dohlan yí dẹn sọ ohùta: ṣigba Sila po Timoti po nọte to finẹ lọ. 15Mẹhe plan Paulu yì lẹ hẹn ẹn wá Atẹni, whenuena yé yí owẹn sọn e de yì Sila po Timoti po de dọ, yé ni yawu wá é de, yé yì.
16Whenuena Paulu sitepòn yé to Atẹni, ayiha etọn fònadan to ohò etọn mẹ, whenuena é mọ dọ otòdaho lọ gò na ovodun lẹ. 17Enẹwutu é to ohó yí do to hójlẹ to sinagọgu mẹ hẹ Ju lẹ, podọ hẹ gbẹtọ ayihawiwenọ lẹ, podọ to ahi mẹ egbésọegbésọ hẹ omẹ he dukosọ nẹ̃ lẹ. 18Whenẹnu wẹ nuyonẹntọ delẹ to Nuvividùtọ le mẹ, podọ to Stoiki lẹ mẹ to pipehe ẹ. Mẹdelẹ to didọmọ, Etẹ wẹ hówladọtọ he to jijlo na dọ? Omẹ devo lẹ dọmọ, E di omẹ he na yín yẹwhe jonọ dadaitọ: na é dọyẹwheho Jesu tọn po fọ́nsọnku po tọn hlan yé wutu. 19Yé sọ hẹn e go bo hen ẹn wá okọta Malsi tọn nukọn, bo dọmọ, Mìwlẹ sọgan yòn onú he oplòn yóyò he hiẹ to ohó etọn dọ yín? 20Na hiẹ hẹn onú jonọ wá otọ́ mìtọn mẹ: enẹwutu mi jlo na yòn onú he ehelẹ yín. 21(Na Atẹnitọ lẹpo, podọ jonọ he wáwási to finẹ lẹpo ma nọ zán ojlẹ yetọn to nude mẹ hú nado to didọ, kavi nado to onú yọ́yọ́ sè.) 22Paulu sọ fọ́nsite to gblagbla Alẹọpagu tọn mẹ, bo dọmọ, Mì omẹ Atẹni tọn emi, yẹn mọhlan dọ to onú lẹpo mẹ hùnsentọ alọpade to onú lẹpo mẹ wẹ mì 23Na le yẹn juwajei bo sọ pọ́n nudoai sinsẹ́n mìtọn tọn lẹ, yen mọ agbà de ga po wéwinwlan he po, HLAN JIWHEYẸWHE MAYỌNẸN de. Enẹwutu mẹhe mì to sinsẹ̀n to wunvi mẹ, ewọ lọ wẹ yẹn to lila hlan mì. 24Jiwheyẹwhe he basi aihọn po onú he tin to e me lẹpo po, ewọ he yín Oklunọ olọn po aihọn po tọn, ma nọnọ̀ tẹmpli he yè yí alọ do basi lẹ mẹ gba; 25mọ yè ma nọ yí alọ gbẹtọ tọn do sẹ̀n ẹn, di ewọ to nude jlo, na ewọ wẹ ogbe na omẹ pó, po gbọfufu po, po onu lẹpo po; 26e sọ yí ohùn dopodo da akọta gbẹtọ lẹpo tọn na nado nò aigba nukunmẹ lẹpo ji, bo ko sọ dotana osã didè yetọn lẹ, podọ dògbo ninò yetọn lẹ tọn, 27na yé nido nọ din Jiwheyẹwhe, eyín vlavo ayiha yetọn sọgan dòn do e go, bo sọ din in mọ, mọ é ma tlẹ dẹn sọn dopodopo mìtọn de gba: 28na ewọ mẹ wẹ mìwlẹ togbè te, bo to whinwhan, bo sọ tindo tintin mìton; dile Yèdọ aziza mítọn lọsu delẹ ko do ga, dọmọ, Ovi etọn ga wẹ mìwlẹ. 29Whenẹnu yín yìn ovi Jiwheyẹwhe tọn, mìwlẹ ma sọ jẹ nado len dọ, enẹ he yín Yẹwhe tin jijlẹ hlan sika, kavi fataka, kavi ozannu, he yè kòn gbọn anà po linlẹn gbẹtọ tọn po dali gba. 30Enẹwutu ojlẹ wunvi tọn lẹ go we Jiwheyẹwhe denukunsè sọn; ṣigba to dinvie é degbèna gbẹtọ lẹ to ofi popo dọ yé do lẹnvọjọ: 31sọle ewọ ko dè azán de, ehe mẹ ewọ na dawhèna aihọn to dódó mẹ to dawe he ewọ ko do de mẹ; ehetọn é ko na adọgbigbó hlan gbeto lẹpo, to ehe mẹ é ko fọ́n ẹn sọn osiọ le mẹ.
32Dinvie whenuena yé sè fọ́nsọnku osiọ lẹ tọn tọn, medelẹ to vivlè: medelẹ dọmọ, Mí na vọ onú he sè to onù towe. 33Le wẹ Paulu tónyì sọn yé ṣẹnṣẹn do. 34Ṣigba dawe delẹ dọn do e de, bo sọ yise: mẹhe mẹ Dionìsiu Aleopagutọ te, po nawe de po he nọ yín Damali, podọ omẹ devo delẹ po yé po.
Currently Selected:
OWALỌ APỌSTELI LẸ TỌN 17: BWL23
Highlight
Share
Compare
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
