OWALỌ APỌSTELI LẸ TỌN 16
16
1WHENẸNU wẹ é wá Delbe po Listla po: bo dayi e go, nuplọntọ de tin to finẹ, bọ yè nọ ylọ dọ Timoti, ovi nawe he yin Ju de tọn, he yise; ṣigba Gleki wẹ otọ etọn: 2mẹhe mẹmẹsunnu he tin to Listla po Ikonioni po lẹ to dagbe etọn dọ. 3Ewọ wẹ Paulu jlo nado yí hẹn yì po e po; é sọ yí i bo gbowhẹ nẹ̃ na Ju he tin to finẹ dali lẹ tọn wutu: na yé omẹ pó wẹ yọnẹn dọ Gleki wẹ otọ́ eton 4Le yé to dindan gbọn otòdaho le mẹ, yé yí aṣe lọ na yé nado to yìnyìn, he yè ko doai sọn apọsteli lẹ po meho he tin to Jelusalẹm lẹ po de. 5Mọwẹ yè to agùn lẹ hẹn li to yise mẹ, bo sọ to hinhẹnsu do e ji egbésọegbésọ.
6Whenuena yé dán gbọn Fligia lẹpo, po awà Galatia tọn lẹpo po ji, bọ yè kó na yé sọn Gbigbọ Wiwe de nado dọyẹwheho ohó lọ tọn to Asia, 7whenuena yé wá Misia, yé zé e pọ́n nado yì Bitinia: ṣigba Gbigbọ ma dikena yé gba. 8Yé sọ gbọn Misia jẹte wá Tloa 9Númimọ de sọ tón do Paulu ji to ozán mẹ; Dawe Makedoniatọ de ṣite, bo to vivé adọ̀, Juwá Makedonia, bo gọalọna mí. 10Whenuena é ko mọ númimọ he, afọdoponẹji mí wleawu nado yì Makedonia, mí lẹn ẹn pọ́n dọ Oklunọ wẹ ylọ mí na nado dọyẹwheho wẹndagbe tọn hlan yé.
11Enẹwutu whenuena mí súnhún sọn Tloa, mí gbọn aliho jijlọ ji wá Samotlaki, to azán awetọ gbè mí jọ Neapoli. 12Podọ sọn finẹ jẹ Filippi, he yín otòdaho Makedonia tọn de, tintan ahọlutò lọ tọn, tòyíyí Lomu tọn de: mí sọ tin to tòdaho he mẹ hò azán sọha de. 13To gbọjẹzángbè mí tón yì sọn otòdaho lọ mẹ gbọn otò de tó, ofi he yè nọ hodó te; mí sọ sinai bo dọhó hlan yọnnusi he wá finẹ lẹ. 14Nawe de he oyín etọn nọ yín Lidia, ogefunwunmẹ satọ, sọn otòdaho Tiatila tọn mẹ, mẹhe to Jiwheyẹwhe sèn, sè ohó mìtọn: ayiha mẹhetọn Oklunọ hùn, nado joawu hlan onú he yè todidọ sọn onù Paulu tọn mẹ. 15Whenuena yè baptizi i po whédo etọn po, é ve mí dọmọ, Eyín mì yón mi yín nugbonọ hlan Oklunọ, mì bo wá owhe ṣie gbè, na mì ni nọnọ̀ finẹ. E sọ ve mí.
16E sọ wá jọ, le mí jei ode ji, oviyọnnu he tindo gbigbọ odọse tọn de pó mi, mẹhe nọ yí odọse do hẹn ale susu wá na klunọ etọn lẹ: 17ewọ lọ wẹ hodo Paulu, po mìwlẹ po, é to awhádo dọmọ, Omẹ helẹ wẹ mẹmẹglọ Jiwheyẹwhe Gigogan tọn, he to aliho whlẹngan tọn dè dohia hlan mì 18Ewọ sọ wà ehe hò azán susu. Ṣigba homẹ Paulu tọn gble, é sọ lé bo dọ hlan gbigbọ lọ, dọmọ, Yẹn dègbèdo we to oyín Jesu Klisti tọn mẹ nado tọn sọn e go. E sọ tón to ojlẹ doponẹ mẹ.
19Whenuena klunọ etọn lẹ mọ dọ tódido ale yetọn tọn yì, yé wlé Paulu po Sila po, bo dòn yé yì ogán lẹ de to ahi me, 20bo hẹn yé wá otogán lẹ de, bo dọmọ, Dawe helẹ, he yín Ju to tuklado otodaho mìtọn gbahugbahu, 21bo sọ to owalọ he ma biọ osén mẹ na mí mẹhe yín Lomunu lẹ, nado yí Kavi nado do ayi e go. 22Agùndaho lọ sọ fọ́n do yé ji; otògán lẹ sọ hẹn avọ̀ yetọn tlẹn, bo degbè nado yí opò do linu yé. 23Whenuena yé ko hò obá susu yé, yé zé yé dlẹn ogánhọ mẹ, bo nasó gankọnnọtọ nado whlá yé dagbedagbe. 24Whenuena ewọ sè ohógbè mọtọn hunkọ, é sisó yé do ogànhọ ṣẹnṣẹn tọn mẹ, bo sọ yí afọ yetọn ján do osopò mẹ 25To ozánhomẹ, Paulu po Sila po hodè, bo sọ jihan pipa tọn hlan Jiwheyẹwhe: ogàntọ lẹ sọ sè ogbè yetọn. 26Ajiji aigba whinwhan daho de tin, sọmọ bọ kódòdo ogànhọ tọn whàn gigi: tẹndoponẹmẹ ohòn lepo hùn, ogàn omẹ dopodopo tọn sọ dè kọnyinai. 27Whenuena gankọnnọtọ fọ́n sọn amlọn mẹ bo mọ ohòn ogànhọ tọn lẹ to nuvo, é dòn ohi etọn sún, ewọ do ko hù ede, na é lẹn dọ ogàntọ lẹ ko wò yì. 28Ṣigba Paulu yi ogbè lélé do dawhá dọ, a gbleawuna dewe blo: na mí omẹ pó tin to ofi. 29Whenẹnu wẹ é biọ miọngban, bo lón biọ ohò mẹ, bo to sisọsiso, bo ṣinyọnai to Paulu po Sila po nukọn, 30é hẹn yé jẹgbonu wá, bo dọmọ, Mẹho emi, etẹ wẹ yẹn do wà nado yín whinwhlengan? 31Yé sọ dọmọ, Yí Jesu Klisti Oklunọ se, yè nasọ whlẹn we po whédo towe po. 32Yé sọ dọ ohó Oklunọ tọn hlan ẹn, po hlan omẹ he tin to owhe etọn gbè lẹpo po. 33E sọ bó yé to ojlẹ doponẹ mẹ to ozán mẹ, bo kló bápa yetọn; yè sọ baptizi i po omẹ etọn lẹpo po to tẹndoponẹmẹ. 34Whenuena é hẹn yé wá owhe etọn gbè, é zé núdùdù do yé nukọn, é to ayajẹ, bo sọ yí Jiwheyẹwhe se po whédo etọn lẹpo po.
35Whenuena ai hón, otògán lẹ do pònọgán lẹ hlan nado dọ, dọmọ, Gbọ dawe nẹlẹ ni yì; 36Gankọnnọtọ do owẹn he Paulu, dọmọ, Otògán lẹ ko dowen hlan nado gbọ mì ni yì: be dinvie enẹwutu mì tọn, bo yì jijọho. 37Ṣigba Paulu dọ hlan yé, dọmọ, Yé ko linu mí to gbangba mahuwhè de, mí mẹhe yín Lomunu, bo ko sọ zé mí dlọn ogànhọ mẹ; dinvie yé tùn mi jẹgbonu to nuglọ? lala nugbo; ṣigba gbo yé lọsu ni wá bo hẹn mí jẹgbonu. 38Ponọgán lẹ dọ ohó helẹ hlan otogán lẹ: yé sọ dibu, whenuena yé sè dọ Lomunu wẹ yé. 39Yé sọ wá, bo vẹvèna yé, bo hẹn yé jẹgbonu, bo vè yé nado yì sọn otòdaho yetọn mẹ. 40Yé sọ tòn sọn ogànhọ mẹ, bo biọ owhé Lidia tọn gbè: whenuena yé mọ mẹmẹsunnu lẹ, yé miọnhomẹna yé, bo sọ tòn yì.
Currently Selected:
OWALỌ APỌSTELI LẸ TỌN 16: BWL23
Highlight
Share
Compare
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
