OWALỌ APỌSTELI LẸ TỌN 12
12
1TO ojlẹ ne mẹ wẹ ahọlu Hẹlọdi dlẹn alọ etọn nado dinaklọn to ome delẹ nu to agùn lọ mẹ. 2E sọ yí ohi do hù Jakobu nọvisunnu Johanu ton. 3Whenuena é mọ dọ e vivi na Ju lọ, e jei nado wlé Pita ga. (Enẹlẹ wẹ azán akla madoton ton lẹ.) 4Whenuena é wlé e, e yí i do oganhọ me, bo yi i do alọ me na meẹnewhanpa awhanvipe lẹ tọn nado to hihó ẹ bo sọ to linlẹn na dè e tón wá gbeto le de to juwayì godo. 5Yè yí Pita whla do ogànhọ mẹ: ṣigba agùn to dèho hian Jiwheyẹwhe nẹ̃ magbọjẹ 6Whenuena Hẹlọdi do dè e jẹgbonu, to ozán dopone mẹ Pita to amlọndọ to awhanvipe awe ṣẹnṣẹn, to ogan awe mẹ: awhanvipe lẹ sọ tin to họngboji bo to oganhọ họ́. 7Bo dayi e go, angẹli Oklunọ tọn de site jlọ do e ji, hinhọ́n so họ́n to oganhọ mẹ: é linu Pita sọn adaja mẹ, bo ze e tite, bo dọmọ, Pọ́n site plaun. Ogàn etọn lẹ sọ dè konyinai sọn alọ etọn. 8Angeli lọ sọ do hlan ẹn, dọ, Blagbajẹ, bo sìn oyìnyìntọfọpa towe. E sọ basi mọ. E sọ dọ hlan ẹn, dọ, Yí avọ̀ towe yìnkò, bo to hihodo mi 9Ewọ sọ tọn, bo hodo e; é ma sọ yọnẹn dọ nugbo we onú he yè wà gbọn angẹli lọ dali gba: ṣigba é lẹn dọ onúmimọ de wẹ. 10Whenuena ye zè hihọten tintan po awetọ po go, yé jẹ ohòngbo ogàn tọn ji, ehe tón jẹ otò mẹ; bo sọ hùn ededenu hlan yé: whenuena yé jẹgbonu, yé gbọn aligbo dopo ji to yìyì; to afọdoponẹji angẹli lọ yì sọn e de. 11Whenuena nukun Pita tọn wai, é dọmọ, Dinvie wẹ yẹn yọnẹn nugbo, dọ Oklunọ do angeli etọn hlan, bo sọ whlen mi sọn alọ Hẹlọdi tọn mẹ, podọ sọn tódido ome Ju lẹ tọn tọn lẹpo mẹ. 12Whenuena e sọ lẹn onú lọ pọn, éyì owhé Malia onọ Johanu tọn tọn gbè, he oyíngb etọn yín Malku; ofì he ome susu pli do, bo to dèho. 13Le Pita húhú hòngbo, oviyọnnu de he yè nọ ylọ Lode, wá kanbiọ. 14Whenuena é yón ogbè Pita tọn, é ma hùn ohòn na ayaje, ṣigba é họnwezun biọ owhe gbè, bo dọ, dọ, Pita site to hòngboji 15Yé sọ dọ hlan ẹn, dọ, Hiẹ to nulu Ṣigba, óto didọ janwẹ, do mọwẹ, Yé sọ dọmọ, Angẹli etọn wẹ 16Ṣigba Pita to hènhúhú jánwẹ: whenuena yé hùn ohòn, yé mọ ẹn, bo sọ yin awujinọ. 17Ṣigba é to alọ mì hlan yé nado nabọẹ, é dọ odò etọn lẹpo hlan yé le Oklunọ hẹn ẹn jẹgbonu sọn ogànhọ mẹ wá do. E sọ dọmọ, Mì dọ onú hele hlan Jakobu, podọ hlan mẹmẹsunnu lẹ E fonyì, bo sọ yì ofi devo. 18Whenuena é zùn afọnnu, jugblaju he tin to awhanvipẹ lẹ mẹ ma yin pevide, dọ, fie wẹ Pita te. 19Whenuena Helọdi din in pé, bo ma mọ ẹn, é dindona hihọtọ le, bo dọmọ, yè ni hù yé. E sọ jẹte sọn Judé yì Sesalea, bo sinai to ofinẹ.
20Hẹlọdi sọ to homegble do omẹ Tile po Sidọni tọn lẹ po go susu: ṣigba yé yí ayiha dopo do wá e de, whenuena yé yí Blastu ojọ ahọlu tọn do jihọntọn, yé to whẹgbigbọ biọ; na otò ahọlu tọn mẹ we yè nọ hẹn núdùdù sọn wá na oto yetọn wutu. 21E sọ zùn azán ayidego tọn de gbè, Helọdi dasọ, bo sinai to ofìn ji, bo to hódọ hlan yé. 22Gbetọ le sọ dabobo, dọmọ, Ogbè yẹwhe de tọn we, e ma yín gbẹtọ tọn gba. 23To tendoponẹmẹ angẹli Oklunọ ton de linu in, na é ma na gigo Jiwheyẹwhe wutu: é jiwé, bo sọ kú.
24Ṣigba ohó Jiwheyẹwhe tọn whinwhẹn, bo sọ to susu do e ji.
25Balnaba po Saulu po sọ lẹgò wá Jelusalẹm, whenuena yé dotana devizón yetọn, yé hẹn Johanu wá po yé po, oyíngọ mẹhetọn nọ yín Malku.
Currently Selected:
OWALỌ APỌSTELI LẸ TỌN 12: BWL23
Highlight
Share
Compare
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
