1 AHỌLU LẸ 21

1E sọ wá jọ to onú helẹ godo, wẹ Naboti Jẹzleẹlinu lọ tindo vẹ̃npa de, he tin to Jezleẹli mẹ, sẹpọ̀ ohẹnmẹ Ahabi ahọlu Samalia tọn tọn whiwhi. 2Ahabi sọ dọhó hlan Naboti dọmọ, Na vẹ̃npa towe mi, yẹn nido tindo e na ojipa omá lẹ tọn de, na é tin sẹpọ́ ohẹ ṣie wutu; yẹn na sọ na vẹ̃npa yọ̀nwhanpẹ hú i de wẹ nẹ: kavi, eyín é sọawuhia dagbe hlan we, yẹn na na ahidona etọn we to akuẹ mẹ. 3Naboti sọ dọ hlan Ahabi dọmọ, OKLUNỌ ni pa ẹ na mi, bọ yẹn na do na ogú otọ̀ ṣie lẹ tọn hlan we. 4Ahabi sọ yì biọ ohò etọn mẹ pìnpọ̀n po homẹmahùn po na ohó Naboti Jẹzleẹlinu lọ tọn wutu he é dọ hlan ẹn: na ewọ ko dọmọ, yẹn ma na na ogú otọ ṣie lẹ tọn we gba. E sọ tẹ ede mlọnai to adọzan etọn ji, bo lé nukunmẹ etọn sẹ, bo ma sọ jlo dù akla de. 5Ṣigba Jẹzebẹli asi etọn wá e de, bo dọ hlan ẹn dọmọ, Etẹwutu gbigbọ towe yín awublanọ do mọ, bọ hiẹ ma do dù akla de? 6Ewọ sọ dọ hlan ẹn dọmọ, Na yẹn dọhó hlan Naboti Jẹzleẹlinu lọ wutu, bo dọ hlan ẹn dọmọ, Na vẹ̃npa towe mi na akuẹ; kavi mayínmọ, eyín é hùnhomẹ we, yẹn na na vẹ̃npa devo we nẹ̃: bọ ewọ sọ gblọn dọmọ, Yẹn ma na na vẹ̃npa ṣie we gba. 7Jẹzebẹli asi etọn sọ dọ hlan ẹn dọmọ, Hiẹ ma ka dùgánna ahọludu Islaeli tọn dinvie? Tite, bo dù akla, bo gbọ ayiha towe ni yín homẹhùnnọ: yẹn na na vẹ̃npa Naboti Jẹzleẹlinu lọ tọn we. 8Mowẹ é kàn ohówé lẹ to oyín Ahabi tọn mẹ, bo yí ohia etọn do tlẹ yé, bo sọ do ohówé lẹ lọ hlan mẹho lẹ podọ hlan mẹgbògbo he tin to tòdaho etọn mẹ lẹ, po he nọ nò Naboti de lẹ po. 9E sọ wlan to ohówé lẹ lọ mẹ, dọmọ, Mì lé nùbibla de, bo zé Naboti do fiyìaga de ji to gbẹtọ lẹ ṣẹnṣẹn: 10bo dè sunnusi awe, visunnu Beliali tọn lẹ, do e nukọn, bo gbọ yé ni dekunnu do okọ̀ nẹ, dọmọ, Hiẹ gbẹ́ Jiwheyẹwhe po ahọlu po. Whenẹnu mì ni hẹn ẹn jẹgbonu, bo dlan zannu in, na é ni kú. 11Omẹ tòdaho etọn mẹ tọn lẹ, yedọ mẹho lẹ po mẹgbògbo he nọ nọ̀ tòdaho etọn mẹ lẹ po, wà dole Jẹzebẹli domẹhlan yé do, kẹdẹdi le yè wlan ẹn to ohówé he é dohlan yé mẹ. 12Yé lá nùbibla de bo zé Naboti do fiyìaga ji to gbẹtọ lẹ ṣẹnṣẹn. 13Omẹ awe ewlẹ, visunnu Beliali tọn lẹ wá hẹmọ bo sín nukọn nẹ: omẹ Beliali tọn lẹ lọ sọ dekunnu do okọ̀ nẹ̃, yédọ do Naboti kẹ, to nukọn gbẹtọ lẹ tọn, dọmọ, Naboti gbẹ́ Jiwheyẹwhe po ahọlu po. Whenẹnu wẹ yé hẹn ẹn tọn jẹgbonu sọn tòdaho lọ mẹ, bo yí zannu lẹ do dlanzannu do e bọ é kú. 14Whenẹnu wẹ yé domẹhlan Jẹzebẹli de, dọmọ, Yè ko dlanzannu do Naboti, é sọ yín oṣiọ. 15E sọ wá jọ, whenuena Jẹzebẹli sè dọ yè ko dlanzannu do Naboti, bo sọ yín oṣiọ, wẹ Jẹzebẹli dọ hlan Ahabi dọmọ, Tite, yi nutindo vẹ̃npa Naboti Jẹzleẹlinu lọ tọn tọn, he é gbẹ́ nado na we na akuẹ: na Naboti ma sọ tin to ogbẹ́ gba, ṣigba oṣiọ we. 16E sọ wá jọ, whenuena Ahabi sè dọ Naboti yín oṣiọ, wẹ Ahabi tite nado jẹte yì vẹ̃npa Naboti Jẹzleẹlinu lọ tọn mẹ, nado yí nutindo e tọn.

17Ohó OKLUNỌ tọn sọ wá Elija Tiṣbinu lọ de, dọmọ, 18Tite, jẹte yì nado pé Ahabi ahọlu Islaeli tọn, he nọ nọ́ Samalia mẹ: dayi e go, ewọ tin to vẹ̃npa Naboti tọn mẹ, fie yè hẹn ewọ jẹte jei nado yí nutindo e tọn. 19Hiẹ na sọ dọhó hlan ẹn, dọmọ, Le wẹ OKLUNỌ dọ dọmọ, Hiẹ ko hù, bo ko sọ yi nutindo? podọ hiẹ na sọ dọhó hlan ẹn, dọmọ, Le wẹ OKLUNỌ dọ, dọmọ, To otẹn fie avún lẹ didọ ohùn Naboti tọn te wẹ avún lẹ na sọ didọ ohùn towe te, yèdọ towe. 20Ahabi sọ dọ hlan Elija dọmọ, Hiẹ ko mọ mi wẹ, kẹ̀ntọ ṣie È? Ewọ sọ gblọn dọmọ, Yẹn ko mọ we: na hiẹ ko sà dewe nado wà enẹ he yín oylan to nukun OKLUNỌ tọn mẹ wutu. 21Dayi e go, yẹn na hẹn oylan wá oji we, bo na zà we sẹ̀ gbidigbidi, bo na sán ovi sunnu dopodopo sẹ sọn Ahabi de, ewọ he yè glọndo hòmẹ po ewọ he yè pòdai do gbangba to Islaeli mẹ po: 22Yẹn na sọ basi owhé towe di owhé Jeloboami visunnu Nebati tọn tọn, podọ di owhé Baaṣa visunnu Ahija tọn tọn, na homẹgblenamẹ he hiẹ ko yí do hẹnhomẹgble mi hlan adi, bo ko sọ hẹn Islaeli nado wàylando. 23OKLUNỌ sọ dọhó Jẹzebẹli tọn ga, dọmọ, Avún lẹ na dù Jẹzebẹli to odòkó Jezleẹli tọn dali. 24Ewọ he kú sọn Ahabi mẹ to tòdaho lọ mẹ avún lẹ na dù; podọ ewọ he kú to danji ohọ́ aga tọn lẹ na dù. 25(Ṣigba mẹde ma tin jijlẹ do Ahabi go, he sà ede nado wà enẹ he yín oylan to nukun OKLUNỌ tọn mẹ, mẹhe Jẹzebẹli asi etọn nọ to dido. 26E sọ yí osù daho do wà to hihodo boṣiọ lẹ mẹ, kẹdẹdi ehe Amọlinu lẹ wà lẹpo, mẹhe OKLUNỌ tùn hlan gbonu to ovi Islaeli tọn lẹ nukọn.) 27E sọ wá jọ, whenuena Ahabi sè ohó helẹ, wẹ é tlẹn avọ̀ etọn lẹ, bo yí odẹ́vọ̀ do agbasalan etọn go, bo blanù bo mlọn odóvó mẹ, bo sọ viavi badabada. 28Ohó OKLUNỌ tọn sọ wá Elija Tlẹbinu lọ de, dọmọ, 29Hiẹ mọ le Ahabi huwhẹ́ ede do to nukọn ṣie? na ewọ huwhẹ́ ede to nukọn ṣie wutu, yẹn ma na hẹn oylan lọ wá to azán etọn lẹ mẹ gba: aigba to azán visunnu etọn lẹ tọn lẹ mẹ wẹ yẹn na hẹn oylan lọ wá owhé etọn ji.

Currently Selected:

1 AHỌLU LẸ 21: BWL23

Highlight

Copy

Compare