1 AHỌLU LẸ 22

1YE sọ nọte owhè atón matin awhàn to Silia po Islaeli po ṣẹnṣẹn. 2E sọ wá jọ to owhè atọ̀ntọ mẹ, wẹ Jehọṣafati ahọlu Juda tọn jẹte wá ahọlu Islaeli tọn de. 3Ahọlu Islaeli tọn sọ dọ hlan mẹmẹsi etọn lẹ dọmọ, Míwlẹ yọnẹn dọ mìtọn wẹ Lamọti-gileadi, mí sọ tin abọẹ, bo ma sọ yí i sọn alọ ahọlu Silia tọn tọn mẹ gba? 4E sọ dọ hlan Jehọṣafati dọmọ, Hiẹ na yì po yẹn po jẹ awhànfuntẹn jẹ Lamọti-gileadi? Jehọṣafati sọ dọ hlan ahọlu Islaeli tọn dọmọ, Yẹn tin dile hiẹ te, omẹ ṣie lẹ di omẹ towe lẹ, osé ṣie lẹ di osé towe lọ. 5Jehọṣafati sọ dọ hlan ahọlu Islaeli tọn dọmọ, Yẹn vẹ́ we, kanbiọ, to ohó OKLUNỌ tọn de to egbé. 6Whenẹnu wẹ ahọlu Islaeli tọn pli yẹwhegán lẹ dopọ, sunnusi fowe nkọ, bo dọ hlan yé dọmọ, Yẹn nayì Lamọti gileadi ji nado funawhàn kavi yẹn na jódo? Yé sọ dọmọ, Hẹji yì; na OKLUNỌ na jó e do alọ ahọlu tọn mẹ. 7Ṣigba Jehọṣafati dọmọ, Yẹwhegán OKLUNỌ tọn de ma sọ tin to ofi dogọ́, na nido kanbiọ sọn e de? 8Ahọlu Islaeli tọn sọ dọ hlan Jehọṣafati dọmọ, Omẹ dopo de gbẹ́ sọ tin gbọn mẹhe dali míwlẹ sọgan kanbiọ sọn OKLUNỌ de, Mikaia visunnu Imla tọn: ṣigba yẹn gbẹwanna ẹn; na ewọ ma nọ dọdai dagbe gbọn dali ṣie gba, adavo oylan. Jehọṣafati sọ dọmọ, A dike ahọlu dọ mọ blo. 9Whenẹnu wẹ ahọlu Islaeli tọn ylọ ogán de, bo dọmọ, Hẹn Mikaia visunnu Imla tọn wá plaun. 10Dinvie ahọlu Islaeli tọn po Jehọṣafati ahọlu Juda tọn po sinai dopodopo to ofìn etọn ji, vivàsọ to otewu yetọn lẹ mẹ, to otẹn gbangba de mẹ to bibiọ hòngbo Samalia tọn mẹ ji; yẹwhegán lẹpo sọ to didọdai toyé nukọn. 11Zẹdekia visunnu? enaana tọn sọ basi azò ogànyù tọn lẹ nẹ̀, bo dọmọ, Le wẹ OKLUNỌ dọ, dọmọ, Ehe wẹ hiẹ yí do sisẹ Silianu lẹ, kaka yè na do và yé. 12Yẹwhegán lẹpo sọ to didọdai mọ, dọmọ, Hẹji yì Lamọti-gileadi, bo wàyọnna: na OKLUNỌ na jó e do alọ ahọlu tọn mẹ. 13Mẹdagun he yì nado ylọ Mikaia dọhó hlan ẹn, dọmọ, Dayi e go dinvie, ohó yẹwhegán lẹ tọn lẹ dọ dagbe hlan ahọlu po onù dopo po: yẹn vẹ́ we, gbọ ohó towe, ni tin di ohó dopo sọn yé mẹ tọn, hiẹ ni bo sọ dọhó dagbe 14Mikaia sọ dọmọ, Le OKLUNỌ to ogbẹ́, núhe OKLUNỌ dọ hlan mì, enẹ wẹ yẹn na dọ. 15Whenuena yè hẹn ẹn wá, ahọlu de, ahọlu dọ hlan ẹn dọmọ, Mikaia, mí na yì Lamọti-gileadi nado funawhàn, kavi mí ni jódo? Ewọ sọ gblọn nẹ dọmọ, Hẹji yì, bo wàyọnna; OKLUNỌ na sọ jó e do alọ ahọlu tọn mẹ. 16Ahọlu sọ dọ hlan ẹn dọmọ, Whla nẹmu wẹ yẹn na sànùsù do ogo we dọ hie dọ núde hlán mì blo adavo nugbo to oyín OKLUNỌ tọn mẹ? 17Ewọ sọ dọmọ, Yẹn mọ Islaeli lẹpo gbàpé to òsó lẹ ji, di lengbọ le he ma tindo lẹngbọhọtọ de: OKLUNỌ sọ domọ, Ehelẹ ma tindo mẹmẹnu de; gbọ yé omẹ dopodopo ni gò do owhé etọn gbè to jijọho mẹ. 18Ahọlu Islaeli tọn sọ dọ hlan Jehọṣafati dọmọ, Yẹn ma dọ na we dọ ewọ ma nọ dọdọdai dagbe gbon yẹn dali, adavo oylan? 19Ewọ sọ dọmọ, Enẹwutu hiẹ ni sè ohó OKLUNỌ tọn: Yẹn mọ OKLUNỌ to aisínsin to ofìn etọn ji, awhànpa olọn tọn lẹpo site to e de to alọ adusi etọn ji podọ to amiyọn etọn ji. 20OKLUNỌ sọ domọ, Mẹnu wẹ na do Ahabi, na é nido hẹji yì bo jai to Lamọtigileadi? Ode dọ do le nkọ ji; mẹdevo sọ dọ do enẹ nkọ ji. 21Gbigbọ de sọ tón wá finẹ, bo site to OKLUNỌ nukọn, bo dọmọ, Yẹn na do e. 22OKLUNỌ sọ dọ hlan ẹn dọmọ, Gbọnna? Ewọ sọ dọmọ, Yẹn na tón yì, bo sọ yín gbigbọ-lalo de to onù yẹwhegán etọn lepo tọn mẹ. Ewọ sọ dọmọ, Hiẹ wẹ na do e, bo na sọ glónu ga: tón yì, bo wà mọ. 23Enewutu dinvie, dayi e go, OKLUNỌ ko yí gbigbọlalo de do onù yẹwhegán towe helẹ lẹpo tọn mẹ; OKLUNỌ ko sọ, dọ oylan gbọn hiẹ tọn dali. 24Whenẹnu wẹ, Zẹdekia visunnu Ṣenaana tọn wá sẹpọ́, bo hò Mikaia sọn alaka go, bo dọmọ, Aliho tẹwẹ gbigbọ OKLUNỌ tọn gbọn yì sọn dẽ nado dọhó hlan we? 25Mikaia sọ dọmọ, Dayi e go, hie na mọ to azán nẹ gbè, whenuena hiẹ na yì biọ abò homẹnukọn de mẹ yì nado whla dewe. 26Ahọlu Islaeli tọn sọ dọmọ, Mì wle Mikaia, bo hẹn ẹn gò do Amọni otògán tòdaho lọ tọn de, bo dọ hlan Joaṣi visunnu ahọlu tọn; 27bo dọmọ, Le wẹ ahọlu dọ dọmọ, Yí núhe do gànhòmẹ, bo yí akla nukunbia tọn po osìn nukunbia tọn po do to yìnyìn in, kaka yẹn na do gó jijọho mẹ. 28Mikaia sọ dọmọ, Gigọ̀ eyín hiẹ gò jijọhọ mẹ, bé OKLUNỌ ma dọhó gbón dẽ gba. Ewọ sọ dọmọ, Sè, mì gbẹtọ lẹ, popo mì tọn.

29Mọwẹ ahọlu Islaeli tọn po Jehọṣafati ahọlu Juda tọn po hẹji yì Lamọti-gileadi. 30Ahọlu Islaeli tọn sọ dọ hlan Jehọṣafati dọmọ, Yẹn ha diọunna dẽ, bo yì biọ awhànfuntẹn mẹ; ṣigba hiẹ ni yí otewu towe lẹ do ógo. Ahọlu Islaeli tọn sọ diounna ede, bo yì biọ awhànfuntẹn mẹ. 31Dinvie ahọlu Silia tọn ko degbèna awhàngán gbànnukunawe kẹkẹ etọn lẹ tọn lẹ, dọmọ, Mì hòavùn hẹ pẹvi kavi daho blo, adavo hẹ ahọlu Islaeli tọn kedẹ. 32E sọ wá jọ, whenuena awhàngán kẹkẹ lẹ tọn lẹ mọ Jehọṣafati, wẹ yé dọmọ, Ahọlu Islaeli tọn wẹ ehe nugbonugbo; yé sọ lẹ́ dapadopo nado hòavùn hẹ ẹ: Jehọṣafati sọ dawhá lélé. 33E sọ wá jọ, whenuena awhàngán kẹkẹ lẹ tọn lẹ mọ dọ ahọlu Islaeli tọn ma wẹ ewọ gba, wẹ yé gọ̀ do godo sọn mọdona ẹn mẹ. 34Dawe de sọ dòn ogá etọn madodego de, bo hò ahọlu íslàeli tọn to opétẹn ogànwu tọn lẹ ṣẹnṣẹn: enẹwutu é dọ hlan kẹkẹdotọ kẹkẹ etọn tọn lọ dọmọ, Lé alọ towe bo hẹn mi tón sọn awhànpa lọ mẹ; na yè dalán ogo na mi badabada. 35Awhàn lọ sọ sinyẹn to azán nẹ gbè: yè sọ hẹn ahọlu dote to kẹkẹ etọn mẹ do Silianu lẹ ji, bo sọ kú to whèjai: ohùn sọ sà tón sọn alán lọ mẹ biọ oglọ kekẹ lọ tọn. 36Awhá de sọ yì lédo awhànpa lọ to finẹ to yìyì odò owhè tọn jlẹmẹ, dọmọ, Omẹ dopodopo do tòdaho etọn mẹ, podọ omẹ dopodopo do otò etọn mẹ. 37Mowẹ ahọlu kú, yè sọ hẹn ẹn wá Samalia; yé sọdi ahọlu to Samalia mẹ. 38Yé sọ klọ kekẹ lọ to tándò Samalia tọn tó; avún lẹ sọ didọ ohùn lọ; (dinvie galọtọ lẹ to awúlẹ̀ to finẹ); kẹdẹdi ohó OKLUNỌ tọn he é dọ. 39Dinvie pipòtọ owàlọ Ahabi ton tọn lẹ, po ehe é wà lẹpo po, podọ ohò ajlankúdu tọn he é dó, po tòdaho he é dó lẹpo po, yè ma ka wlan to owé otànnugbo ahọlu Islaeli tọn lẹ tọn mẹ? 40Mowẹ Ahabi damlọn po otóetọn lẹ po; Ahazia visunnu etọn sọ dùahọlu to otẹn etọn mẹ.

41Jehọṣafati visunnu Asa tọn ṣẹ̀ nado dùahọlu to Juda ji to owhè ẹnẹtọ Ahabi ahọlu Islaeli tọn tọn mẹ. 42Jehọṣafati yín owhè gbànatọ́n mẹho whenuena é ṣẹ̀ nado dùahọlu; é sọ dùahọlu owhè koatọ́n to Jelusalẹm mẹ. Oyín onọ etọn tọn wẹ Azuba viyọnnu Ṣilhi tọn. 43E sọ zin zọnlin to aliho Asa otò etọn tọn lẹpo mẹ; é ma lé dapadopo sọn e mẹ gba, wiwà enẹ he yín jlọjlọ to nukun OKLUNỌ tọn lẹ mẹ: ṣogàn yè ma bẹ́ otẹn yìaga lẹ sẹ̀ gba; gbẹtọ lẹ gbé sọ to avọ́sán bo to nuyọnwán mẹ̀ to otẹn yìaga lẹ mẹ. 44Jehọṣafati sọ basi jijọho po ahọlu Islaeli tọn po. 45Dinvie pipòtọ owàlọ Jehọṣafati tọn tọn lẹ, po hlọnhlọn etọn he é dohia po, po le é funawhàn do po, yè ma ka wlan yé to owé otànnugbo ahọlu Juda tọn lẹ tọn lẹ mẹ? 46Pipòtọ sọn sọdọminu lẹ mẹ, he pò to azán Asa otọ́ etọn tọn lẹ mẹ, é dè yé tòn sọn aigba lọ ji. 47Ahọlu de ma sọ tin to Edomi me: whépọ̀ntọ de wẹ yín ahọlu. 48Jehọṣafati basi ohún Talsisi tọn lẹ nado nọ yì Ofili na sika: ṣigba yé ma nọ yì gba; na yè gbà ohún lẹ lọ to Eziọn-gẹbeli. 49Whẹnenu wẹ Ahazia visunnu Ahabi tọn dọ hlan Jehọṣafati dọmọ, Gbọ mẹmẹsi ṣie lẹ ni nọ yì po mẹmẹsi towe lẹ po to ohún lẹ lọ mẹ. Ṣigba Jehọṣafati ma jlo gba. 50Jehọṣafati sọ damlọn po otò etọn lẹ po, yè sọ di i po otọ̀ etọn lẹ po to tòdaho Davidi otọ̀ etọn tọn mẹ: Jolami visunnu etọn sọ dùahọlu to otẹn etọn mẹ.

51Ahazia visunnu Ahabi tọn sọ ṣẹ̀ nado dùahọlu to Islaeli ji to Samalia mẹ to owhè fọtọ̀nnukunawetọ Jehọṣafati ahọlu Juda tọn tọn mẹ, é sọ dùahọlu owhè awe to Islaeli ji 52Ewọ sọ wà enẹ he yín oylan to nukun OKLUNỌ tọn mẹ, bo to zọnlinzin to aliho otọ́ etọn tọn mẹ, podọ to aliho onọ etọn tọn mẹ, podọ to aliho Jeloboami visunnu Nebati tọn tọn mẹ, ehe mẹ é hẹn Islaeli nado wàylando te. 53E sọ nọ to Baali sẹ̀n, bo sọ to taliai nẹ, bo henhomẹgble OKLUNỌ, Jiwheyẹwhe Islaeli tọn hlan adi, kẹdẹdi ehe otọ̀ etọn ko wà lẹpo.

Currently Selected:

1 AHỌLU LẸ 22: BWL23

Highlight

Copy

Compare