1 AHỌLU LẸ 20

1BẸNI-HADADI ahọlu Silia tọn bẹ́ awhànpa etọn lẹpo plidopọ: to finẹ ahọlu gbànnukunawe tin to e de, po osọ́ lẹ po po kẹke lẹ po: é sọ hẹji yì bo glọn Samalia do, bo hòavùn hẹ ẹ. 2E sọ do mẹdagun lẹ hlan Ahabi ahọlu Islaeli tọn dè, biọ tòdaho lọ mẹ, bo dọ hlan ẹn dọmọ, Le wẹ Bẹni-hadadi dọ, 3ṣie wẹ fataka towe po sika towe po; asi towe lẹga po ovi towe le po, yèdọ whànpẹnọ talala lẹ ṣie wẹ. 4Ahọlu Islaeli tọn sọ gblọn bo domọ, E yín kẹdẹdi didọ towe, ahọlu, klunọ ṣie; towe wẹ yẹn, po ehe yẹn tindo lẹpo po. 5Mẹdagun lẹ sọ vọ̀ wá, bo domọ, Le wẹ Bẹni-hadadi dọhó do, dọmọ, Yẹn domẹhlan we nugbonugbo, dọmọ, Hiẹ na jó fataka towe, po sika towe po, po asi towe lẹ po, po ovi towe lẹ po na mi; 6ṣigba yẹn na do mẹmẹsi ṣie lẹ hlan de we to osò to ojlẹ he nkọ mẹ, yé na sọ gbà owhé towe mẹ pọ̀n, po owhé mẹmẹsi towe lẹ tọn po; é na sọ yín, dọ nudepope he yín whànpẹnọ to nukun towe lẹ me, yé na yí i do alọ yeton mẹ, bo na bẹ́ ẹ sẹ̀. 7Whenẹnu wẹ ahọlu Islaeli tọn ylọ mẹho aigba lọ tọn lẹpo, bo dọmọ, Yẹn vẹ̀ mì, mì payi e go, bo pọ̀n le dawe he to danú din do, na é domẹhlan mi na asi ṣie lẹ, podọ na ovi ṣie lẹ, podọ na fataka ṣie, podọ na sika ṣie; yẹn ma sọ dọ̀nhẹ ẹ gba. 8Mẹho gbẹtọ lẹpo tọn lẹpo sọ dọ hlan ẹn dọmo, A tuntóai blo, mọ a sọ yígbè blo. 9Enẹwutu é dọ hlan mẹdagun Bẹni-hadadi tọn le lọ domọ, Dọ na ahọlu kluno ṣie dọmọ, Ehe hiẹ domẹhlan mẹmẹsi towe na to tintan yẹn na wa ṣigba onu he yẹn ma na sọgan wà gba. Mẹdagun lẹ lọ sọ fọ̀nyì, bo sọ vó ohó hẹn wá nẹ. 10Beni-hadadi sọ domẹhlan ẹn, bo dọmọ, Yẹwhe lẹ ni wà mọ hlan mi, podọ humọ ga, eyín kọ̀gudu Samalia tọn na pó na alọgogo lẹ na omẹ he hodo mi lẹpo. 11Ahọlu Islaeli tọn sọ gblon bo dọmọ, Do nẹ̃, dọ, A dike ewọ he bla awhàngbaja etọn lẹ do ogo sinadanna ede di ewọ he dè e sẹ̀ blo. 12E sọ wá jọ, whenuena Beni-hadadi sè owẹ̀n he, le é to núnù, ewo po ahọlu lẹ lọ po, to gohọ̀ lẹ lọ mẹ, wẹ e dọ hlan mẹmẹsi etọn lẹ dọmọ, Mì tò mìde do haji Yé sọ tò yéde do haji do tòdaho lọ ji. 13Bo, dayi e go, yẹwhegán de wá sepọ̀ Ahabi ahọlu Islaeli tọn de, bo domọ, Le wẹ OKLUNỌ dọ, dọmọ, Hiẹ mọ mẹsusu gégé he lẹpo? dayi e go, yẹn na jó e do alọ towe mẹ to egbé; hie na sọ yọnẹn dọ yẹn wẹ OKLUNỌ. 14Ahabi sọ dọmọ, Gbọn mẹnu dali? Ewọ sọ dọmọ, Le wẹ OKLUNỌ dọ dọmọ, Gbọn yọ̀pọ sunnu lẹ dali sọn ahọvi gbeta tọn lẹ mẹ. Whenẹnu wẹ é dọmọ, Mẹnu wẹ na ṣẹ awhàn lọ? Ewọ sọ dọmọ, Hiẹ. 15Whenẹnu wẹ é pli yọ̀pọ sunnu le sọn ahọvi gbeta tọn lẹ mẹ, yé sọ yín fọdegbànnukunawe: to yé godo é sọ pli gbẹtọ lẹ, yèdọ ovi Islaeli tọn lẹpo, Yín fọtọ̀n ṣinawe. 16Yé sọ tọ̀n yì to whèdakọ̀. Ṣigba Bẹnihadadi ko to núnù mú na ede to gohọ̀ lẹ mẹ, ewọ po ahọlu lẹ po, ahọlu gbànnukunawe he to alọgọ nẹ lẹ. 17Yọpọ sunnu lẹ sọn ohọvi gbeta tọn le mẹ tọ̀n yì donukọn; Bẹni-hadadi sọ domẹhlan gbonu, yé sọ dọ nẹ̃, dọmọ, Yè hen gbẹtọ lẹ tọ̀n wá sọn Samalia mẹ. 18Ewọ sọ dọmọ, Eyín yè hẹn yé tọ̀n wá na jijọho, mì bé yé gbẹ̀te, kavi eyín yè hẹn yè tọ̀n wá na awhàn, mì bẹ́ yé gbẹte. 19Mowẹ ehelẹ tọ̀n yì sọn tòdaho lọ mẹ, yọ̀pọ sunnu lẹ sọn ahọvi gbeta tọn lẹ mẹ, po awhàngbẹ́ he hodo yé lẹ po. 20Omẹ dopodopo sọ hù omẹ etọn; Asilianu lẹ sọ họ̀nyì, Islaeli sọ domọna yé: Bẹni-hadadi ahọlu Silia tọn sọ hòngán to osé de ji po osónọ etọn lẹ po. 21Ahọlu Isláeli tọn sọ tọ̀n yì gbonu, bo hò osọ̀ lẹ po keke lẹ po, bo sọ yí hùhù daho de do hò Silianu lẹ. 22Yẹwhegán lọ sọ wá sẹpọ́ ahọlu Islaeli tọn de, bo dọ hlan ẹn dọmọ, Yì, bo nahuhlọn dewe, bo payi, bo pòn núhe hiẹ to wiwà: na to lilẹ owhè tọn ji ahọlu Silia tọn na sọ vọ́ jìhẹ wá ji we.

23Mẹmesi ahọlu Silia tọn le sọ dọ hlan ẹn dọmọ, Yẹwhe yetọn yẹwhe okota lẹ tọn de wẹ; enẹwutu wẹ yé yín huhlọnnọ hú míwlẹ: aigba gbọ mí ni hòavùn hẹ yé to dangbo, nugbonugbo míwlẹ na yín huhlọnnọ hú yéwlẹ. 24Bo wà onú he; bé ahọlu lẹ sọ̀ ome dopodopo sọn otẹn etọn mẹ, bo dè awhàngán lẹ do otẹn yetọn me: 25Bo hia awhàngbé de na we, di awhàngbé he hiẹ ko hẹnbú, oṣò na osù, kẹkẹ na kekẹ: míwlẹ na sọ hòavùn hẹ yé to dangbo, nugbonugbo míwlẹ na sọ yín huhlọnnọ hú yewle. Ewọ sọ tuntóai hlan ogbè yetọn, bo wà mọ. 26E sọ wá jọ to lilé owhè tọn ji, wẹ Bẹni-hadadi pli Silianu lẹ, bo hẹji yì Afẹki, nado hòavùn hẹ Islaeli. 27Yè sọ pli ovi Islaeli tọn lẹ, bo donudùdùgbànna, bo yì yé ji: ovi Islaeli tọn lẹ dosla do yé nukọn taidi lẹngbọpa pevipẹvi awe gbọgbọẹvu lẹ tọn; ṣigba Silianu lẹ gọ̀ yi oto lọ mẹ. 28Omẹ Jiwheyẹwhe tọn de sọ wá sẹpò bo dọhó hlan ahọlu Islaeli tọn, bo dọmọ, Le wẹ OKLUNỌ dọ, Na Silianu lẹ dọ wutu, dọmọ, OKLUNỌ yẹwhe okọta lẹ tọn de wẹ, ṣigba ewọ ma yín yẹwhe agbàdòmẹ lẹ tọn de gba; enẹwutu wẹ yẹn na jó mẹsusu gége he lẹpo do alọ towe mẹ, míwlẹ na sọ yọnẹn dọ yẹn wẹ OKLUNỌ. 29Yé sọ dosla ode pannukọn awetọ azán ṣinawe Mowẹ é sọ yin, dọ to azán ṣinawetọ gbè yè kọ̀n awhàn dopọ; ovi Islaeli tọn lẹ sọ hù sọn Silianu lẹ mẹ afọnọ fọtọ́n kanweko to azán dopo mẹ. 30Ṣigba pìpòto lẹ họ̀nyì Afẹki, biọ tòdaho lọ mẹ; adó sọ họ̀ jẹ omẹ fọtọ̀n koatọ̀nnukunawe he yè pòdai lẹ ji. Bẹni-hadadi sọ họ̀nyì, bo wá biọ tòdaho mẹ, sọn abò mẹ jẹ abò mẹ. 31Mẹmẹsi etọn lẹ sọ dọ hlan ẹn dọmọ, Dayi e go dinvie, míwlẹ ko sè dọ ahọlu owhé Islaeli tọn tọn lẹ yín ahọlu lẹblanunọ: míwlẹ vẹ̀ we, gbọ mi ni yí odẹ́vọ̀ do adaja míton lẹ mẹ, podo okàn lẹ do ota mìtọn lẹ ji, bo tọ̀n yì ahọlu Islaeli ton de: eya é na whlẹn ogbẹ̀ mìtọn. 32Mowẹ yé bla odẹ́vọ̀ do adaja yetọn lẹ mẹ, bo yí okàn lẹ do ota yetọn le ji, bo wá ahọlu Islaeli tọn de, bo dọmọ, Bẹni-hadadi mẹmẹsi towe dọmọ, Gbọ yẹn ni nọgbẹ̀, yẹn vè we. Ewọ sọ dọmọ, Ewọ ka gbé sọ tin to ogbù? nọvisunnu ṣie wẹ ewọ. 33Dinvie omẹ ewlẹ yi sọwhiwhe do payi, bo yawu nado wle eyín é yín ayiha etọn; yé sọ dọmọ, Nọvisunna towe Bẹni-hadadi. Yihienẹnu wẹ é dọmọ, Mì yì, hẹn ẹn wá. Whenẹnu wẹ Bẹnihadadi tọn wá e de; é hẹn ẹn nado wá aga biọ kẹkẹ mẹ. 34Bẹni hadadi sọ dọ hlan ẹn dọmọ, Tòdaho he otò ṣie bẹ́ sọn otọ̀ towe si lẹ yẹn na gọ̀jó; hiẹ na sọ basi alihogbo lẹ na we to Damasku mẹ, dile otọ̀ ṣie basi to Samalia mẹ do. Podọ yẹn, Ahabi dọ, na gbọ hiẹ ni yì po alẹnù he po. Mowẹ ewọ basi alẹnù de po e po, bo gbọ e yì.

35Dawe de sọn visunnu yẹwhegán lẹ tọn lẹ mẹ dọ hlan hatọ etọn gbọn ohó OKLUNỌ tọn dali dọmọ, Yẹn vẹ we, linú mi. Omẹ lọ sọ gbẹ́ nado linú mi. 36Whenẹnu wẹ é dọ hlan ẹn dọmọ, Na hiẹ ma ko sètónuna ogbè OKLUNỌ tọn wutu, dayi e go, ṣaun le yè hẹn hiẹ fọ́nyì sọn dè, kinnikinni de na hù we. Ṣaun le yè sọ hẹn ẹn fọ̀nyì sọn e de, kinnikinni de mọ ẹn, bo sọ hù i. 37Whenẹnu wẹ é sọ mọ omẹ devo, bo dọmọ, Yẹn vẹ we, linúmi. Omẹ lọ sọ hò e, hihò po núhúhú i po. 38Mowẹ yẹwhegán lọ fọ̀nyì, bo nọtepọ̀n ahọlu to aliho ji, bo yí otabla etọn to nukun etọn lẹ ji do blaunna ede. 39Le ahọlu lọ jujei, é dawhá hlan ahọlu: é sọ dọmọ, Mẹmẹsi towe tọ́n yì biọ gblagbla awhànfuntẹn tọn mẹ; bo, dayi e go, dawe de lẹ jẹ apadopo, bo hẹn omẹ de wá dẽ, bo dọmọ, Hẹn omẹ he go: eyín gbọn alọdepope mẹ é yín bapò, whenẹnu wẹ ogbẹ towe tin na ogbẹ etọn, kavi mayínmọ hiẹ na na talẹnti fataka tọn dopo. 40Le mẹmẹsi towe yín mavọ̀ to ofi po odọ́n po, yè hẹn en yì. Ahọlu Islaeli tọn sọ dọ hlan ẹn dọmọ, Mowẹ whẹ̀dida towe na yín; hiẹ lọsu ko dotana ẹn. 41Ewọ sọ yawu bo dè otabla lọ sẹ sọn nukun etọn lẹ jì; ahọlu Islaeli tọn sọ yọ̀n ẹn dọ ewọ tin sọn yẹwhegán lẹ mẹ. 42E sọ dọ hlan ẹn dọmọ, Le wẹ OKLUNỌ dọ, Na hiẹ ko gbọ dawe lọ mẹhe yẹn klan hlan vivà kẹn ni yì wutu, enẹwutu ogbẹ towe na yì na ogbẹ etọn, podọ omẹ towe lẹ na omẹ etọn lẹ. 43Ahọlu Islaeli tọn sọ yì owhé etọn gbè pinpẹn po homẹmahùn po, bo wá jẹ Samalia.

Currently Selected:

1 AHỌLU LẸ 20: BWL23

Highlight

Copy

Compare