1 AHỌLU LẸ 18

1E sọ wá jọ to azán susu godo, wẹ ohó OKLUNỌ tọn wá Elija de, to owhè atọ̀ntọ mẹ, dọmọ, Yì, do dewe hia hlan Ahabi; yẹn na sọ do jikun hlan aigba lọ ji. 2Elija sọ yì nado do ede hia hlan Ahabi. Ohùvẹ lọ sọ yín awuvẹ́ to Samalia mẹ. 3Ahabi sọ ylọ Obadia, he tin to whédo lọ ji. (Dinvie Obadia dibusi OKLUNỌ talala: 4na é yín mọ, whenuena Jẹzebẹli to yẹwhegán OKLUNỌ tọn lẹ sán sẹ̀ wẹ Obadia bẹ́ yẹwhegán kanweko bo whla yé kandeao kandeao to aigbaslo de mẹ, bo yí akla po osìn po do to yé yìn.) 5Ahabi sọ dọ hlan Obadia dọmọ, Yi gbọn aigba lẹpo ji pé, jẹ asìsa osìn tọn lẹpo kọ̀n, podọ jẹ tọ̀pẹsẹ lẹpo kọ̀n: eya mí sọgan mọ ogbẹ́ bo whlẹn osọ́ lẹ po otlo lẹ po do ogbẹ̀, bọ mí ma na do bú okanlin lẹpo gba. 6Mowẹ yé má aigba lọ to yé ṣẹnṣẹn nado gbọn e ji lẹdopé: Ahabi gbọn aliho de yì na ede, Obadia sọ gbọn aliho devo yì na ede. 7Le Obadia tin to aliho lọ ji, dayi e go, Elija pé e; é sọ yọ́n ẹn, bo ṣinyọn nukunmẹ etọn ji, bo dọmọ, Hiẹ klunọ ṣie, Elija, wẹ? 8Ewọ sọ gblọnna ẹn dọmọ, Yẹn ewọ wẹ: yì, dọ na klunọ towe, dọ, Dayi e go, Elija tin to ofi. 9Ewọ sọ dọmọ, Etẹ́mẹ yẹn ko wàylando te, bọ hiẹ na do jó mẹmẹsi towe do alọ Ahabi tọn mẹ, nado hù mi? 10Le OKLUNỌ jiwheyẹwhe towe to ogbẹ̀, akọta de ma tin to finẹ kavi ahọludù, fie klunọ ṣie ma ko domẹhlan nado din we mọ: whenuena yé sọ dọmọ, Ewọ ma tin to ofi gba, ewọ nọ yí owhle ahọludu po akọta tọn de po, dọ yé ma din we mọ gba. 11Dinvie hiẹ dọmọ, Yì, dọ na klunọ tòwe dọ, Dayi e go, Elija tin to ofi. 12E na sọ wá jọ, plaun le yè hẹn yẹn yì sọn de we, wẹ gbigbọ OKLUNỌ tọn na zé we yì fie yẹn ma yọnẹn; mọ whenuena yẹn wá bo dọ na Ahabi, bọ ewọ ma sọgan mọ we, ewọ na hù mi: ṣigba yẹn mẹmẹsi towe dibusi OKLUNỌ sọn ovu ṣie, 13Yè ma ka dọ ẹ na klunọ ṣie, núhe yẹn ko wà whenuena Jẹzebẹli to yẹwhegán OKLUNỌ tọn lẹ hù, le yẹn whla omẹ kanweko sọn yẹwhegán OKLUNỌ tọn lẹ mẹ do kandeao kandeao to aigbaslo de mẹ, bo yí akla po osìn po do yìn yé? 14Dinvie hiẹ sọ dọmọ, Yì, dọ na klunọ towe dọ, Dayi e go, Elija tin to ofi: ewọ bo na sọ hù mi. 15Elija sọ dọmọ, Le OKLUNỌ awhànpa lẹ tọn to ogbẹ̀, mẹhe nukọn yẹn site te, nugbonugbo yẹn na do dẽ hia hlan ẹn to egbé. 16Mowẹ Obádia yì nado pé Ahabi, bo sọ dọ nẹ: Ahabi sọ yì nado pé Elija. 17E sọ wá jọ, whenuena Ahabi mọ Elija, wẹ Ahabi dọ hlan ẹn dọ, Hiẹ wẹ ewọ, hiẹ tukladomẹtọ sọn Islaeli mẹ? 18Ewọ sọ gblọn dọ, Yẹn ma tuklado Islaeli gba; adavo hiẹ, po owhé otọ́ towe tọn po, to ehe mẹ mìwlẹ ko gbẹ́ gbèdide OKLUNỌ tọn lẹ dai, bọ hiẹ sọ to Baalimi hodo. 19Enẹwutu dinvie domẹhlan, bo pli Islaeli lẹpo do dẽ do osé Kalmẹli kòn, po yẹwhegán fọ̀wekandeao Baali tọn lẹ po, po yẹwhegán fowe Asela tọn lẹ po, he nọ dù to tafo Jẹzebẹli tọn kọ̀n. 20Mowẹ Ahabi domẹhlan ovi Islaeli tọn lẹpo, bo pli yẹwhegán lẹ dopọ do osé Kalmẹli kòn. 21Elija sọ wá sẹpọ́ gbẹtọ lẹpo de, bo dọmọ, Nawẹ míwlẹ gbẹ́zọ̀n linlẹn awe ṣẹnṣẹn dẹn sọ le? Eyín OKLUNỌ yín Jiwheyẹwhe, mì hodo e: ṣigba é sọ yín Baali, bé mì bo to hihodo e. Gbẹtọ lẹ ma sọ gblọn ohó de nọ̀ gba. 22Whenẹnu wẹ Elija dọ hlan gbẹtọ ewlẹ dọmọ, Yẹn, yèdọ yẹn ṣọkẹdẹ, wẹ pò yín yẹwhegán OKLUNỌ tọn de; ṣigba yẹwhegán Baali tọn lẹ yín sunnusi fowekandeao. 23Enẹwutu gbọ yé ni na oyìnsisá awe mí; bo sọ gbọ yé ni dè oyìnsisá dopo na yéde, bo já ẹ do flinflin, bo tẹ́ ẹ do nake ji, ma yí miyọn de do oglọ: Yẹn na sọ basi oyìnsisá awetọ lọ, bo té ẹ do nake ji, bo ma sọ yí miyọn de do oglọ. 24Míwlẹ ni bo dawhá ylọ oyín yẹwhe mìtọn tọn, yẹn na sọ dawhá ylọ oyín OKLUNỌ tọn: Jiwheyẹwhe he siọ gbọn miyọn dali, gbọ ewọ ni yín Jiwheyẹwhe. Gbẹtọ lẹpo sọ gblọn bo dọmọ, Yè dọ ẹ dagbe. 25Élija sọ dọ hlan yẹwhegán Baali tọn lẹ dọmọ, Mì dè oyìnsisá dopo na mìde, bo basi i whẹ́; na mẹsusu wẹ mìwlẹ: bo dawhá ylọ oyín yẹwhe mìtọn tọn, ṣigba mì yí miyọn de do oglọ blo. 26Yé sọ yí oyìnsisá lọ he yè na yé, yé sọ basi i, bo to awhádo ylọ oyín Baali tọn sọn afọnnu yèdọ kakajẹ whèdakọ̀, dọmọ, Baali È, siọ mí. Ṣigba ogbè de ma tin to finẹ, mọ mẹdepope ma siọ. Yé sọ tòasla lédo agbà he yè tẹ́ lọ. 27E sọ wá jọ to whèdakọ̀ jlẹmẹ, wẹ Elija to yé vlẹ, bo dọmọ, Mì dawhá gángán: na yẹwhe de wẹ ewọ; eyá nulẹnpọ́n é te, kavi yè hẹn ẹn yì apadopo, kavi é tin to gbéjizọnlin de ji, kavi eya é to amlọndọ, bo mananọma yín finfọ́n gba. 28Yé sọ dawhá gángán, bo sọ yí awhànnọhi lẹ po owhán lẹ po do to awugblena yéde di owàlọ yetọn, kaka ohùn do to kinkán tọ́n to yé go. 29E sọ yín mọ, whenuena yè hẹn whèdakọ̀ jù, wẹ yé to dọdaidọ kakajẹ ojlẹ avọ́ nunina avọ́ whèjai tọn tọn mẹ; ṣigba ogbè de ma tin, mẹdepope ma siọ, mọ mẹdepope ma hòpón. 30Elija sọ dọ hlan gbẹtọ ewlẹpó dọmọ, Mì wá sẹpọ́ dè; gbẹtọ ewlẹpó sọ wá sẹpọ́ ẹ. Ewọ sọ vó agbà OKLUNỌ tọn lọ he yè ko họ́ liai jlado. 31Elija sọ yí zannu wiawe kẹdẹdi osọha whẹndo visunnu Jakobu tọn lẹ tọn lẹ tọn, mẹhe de ohó OKLUNỌ tọn wá, dọmọ, Islaeli wẹ oyín towe na nọ yín. 32Zannu lẹ lọ wẹ é yí do dó agbà de to oyín OKLUNỌ tọn mẹ; é sọ basi avúndoe de lẹ́do agbà lọ, klo sọ na do hẹn ojlẹ okun tọn awe. 33E sọ to nake do tẹnmẹtẹnmẹ, bo já oyìnsisá lọ do fiinflin, bo tẹ́ ẹ do nake lọ ji. E sọ dọmọ, Mì yi osìn do gọ́ odla ẹnẹ, bo túntún in do avọ́ nunina mimẹ̀ lọ ji, podọ do nake lọ ji. 34E sọ dọmọ, Mì wà ẹ whlawetọ; yé sọ wà ẹ whlawetọ. E sọ dọmọ, Mì wà ẹ whlatọntọ; yé sọ wà ẹ whlatòntọ 35Osìn lọ sọ to sisà lédo agbà lọ pé, é sọ yí osìn do gọ́ avúndoe lọ ga 36E sọ wá jọ to ojlẹ nina avọ́ whèjai tọn tọn mẹ, wẹ Elija yẹwhegán lọ wá sẹpọ́, bo dọmọ, OKLUNỌ È, Jiwheyẹwhe Ablaham tọn, Isaki tọn, po Islaeli po tọn, gbọ é ni yín yinyọnẹn to egbé dọ hiẹ wẹ Jiwheyẹwhe to Islaeli mẹ, podọ mẹmẹsi towe wẹ yẹn, podọ yẹn to onú helẹpó wà to oho towe ji. 37OKLUNỌ È, siọ mi, siọ mi, na omẹ he lẹ nido yọnẹn dọ hiẹ, OKLUNỌ, wẹ Jiwheyẹwhe, podọ hiẹ ko sọ vó ayiha yetọn lẹ́ gọ̀ do godo. 38Whenẹnu wẹ miyọn OKLUNỌ tọn flẹ́, bo fiọ avọ́ nunina mimẹ̀ lọ, po nake lọ po, po zannu lẹ po, po kọgudu lọ po, bo sọ didọ osìn he tin to avúndoe lọ mẹ. 39Whenuena gbẹtọ lepo mọ ẹn, yé ṣinyọn nukunmẹ yetọn lẹ ji: yé sọ dọmọ, OKLUNỌ lọ, ewọ wẹ Jiwheyẹwhe, OKLUNỌ lọ, ewọ wẹ Jiwheyẹwhe 40Elija sọ dọ hlan yé dọmọ, Mì bẹ́ yẹwhegán Baali tọn lẹ; mì dike ode sọn yé me hòngán blo. Yé sọ bẹ́ yé: Elija sọ hẹn yé jẹte wá tòpẹsẹ Kisoni kọ̀n, bo hù yé to finẹ. 41Eiija sọ dọ hlan Ahabi dọmọ, Hẹn we hẹji yì, dù bo sọ nù; na gbèlili ogégé jikun tọn tin to finẹ. 42Mọwe Ahabi yì aga nado dù podọ nado nù. Elija sọ hẹaga yì adadanu Kalmẹli tọn; é sọ dẹ́ ede dodò to aigba ji, bo yí nukunmẹ etọn do okligo etọn lẹ ṣẹnṣẹn. 43E sọ dọ hlan mẹmẹsi etọn dọmọ, Hẹaga yì dinvie, pọ́n hlan ohù dali. Ewọ sọ hẹaga yì, bo pọ́n, bo dọmọ, Núde ma tin to finẹ gba. Ewọ sọ dọmọ, Sọ vọ́ yì whla ṣinawe. 44E sọ wá jọ to whla ṣinawetọ ji, wẹ é dọmọ, Dayi e go, aslọ de tite sọn ohù mẹ to finẹ, bo whè sọ alọ gbẹtọ de tọn. Ewọ sọ dọmọ, Hẹaga yì, dọ hlan Ahabi dọmọ, Wleawu kẹkẹ towe tọn dote, bo hẹn we jete, na jikun ma na do glọn we gba. 45E sọ wá jọ tọ osã vude mẹ, wẹ olọn yí aslọ lẹ po jẹhọn po do sú yu, jikun daho de sọ tin finẹ. Ahabi sọ dókẹkẹ, bo yì Jezleẹli. 46Alọ OKLUNỌ tọn sọ tin to Elija go; é sọ gbàn adaja mẹ etọn lẹ, bo sọ to wezundo to Ahabi nukọn jẹ bibiọ Jezleẹli tọn mẹ.

Currently Selected:

1 AHỌLU LẸ 18: BWL23

Highlight

Copy

Compare