1 AHỌLU LẸ 17

1ELIJA Tisibinu lọ, mẹhe tin sọn wásinu Gileadi tọn lẹ mẹ, dọ hlan Ahabi dọmọ, Le: OKLUNỌ, Jiwheyẹwhe Islaeli tọn, to ogbẹ́, mẹhe nukọn yẹn ṣite te, ahún ma na tin kavi jikun to owhè helẹ mẹ, adavo kẹdẹdi ohó ṣie. 2Ohó OKLUNỌ tọn sọ wá e de, dọmọ, 3hẹn we yì sọnfì, bo gò we hlan whèzẹtẹn dali, bo whla dewe hlan tọ́pẹsọ Ẹeliti dali ehe tin to Jọdani nukọn. 4E na sọ yín, dọ hiẹ na nù sọn tọ̀pẹsẹ lọ mẹ; Yẹn ko sọ degbèna ohọ́n le nado to yìnyìn we to finẹ. 5Mowẹ é yì bo sọ wà do kẹdẹdi ohó OKLUNỌ tọn: na ewọ yì bo sọ nò tòpẹsẹ Sehti lọdali, he tin to Jọdani nukọn 6Ohón lẹ sọ to akla po olàn po hẹn wá nè to afọnnu, podọ akla po olàn po to whèjai; ewọ sọ to tòpẹsẹ lọ nù. 7E sọ wá jọ to ojlẹ de godo, wẹ tòpẹsẹ lọ hú, na jikun de ma tin to aigba lọ ji wutu.

8Ohó OKLUNỌ tọn sọ wá e de, dọmọ, 9Tite, hẹn we jẹ Zalefati, he yín Zidọni tọn, bo nò finẹ: dayi e go, yen ko degbèna nawe asúsiọsi de to fine nado gọalọna we 10Mowẹ é tite bo yì jẹ Zalefati; whenuena é wá hòngbo todaho lọ tọn ji, dayi e go, nawe asúṣiọsi de tin to finẹ to nakeyẹyẹ lẹ sinyan: é sọ ylọ hlan ẹn, bo dọmọ, Yẹn vẹ́ we, hẹnwá na mi osìn vude do nuzinzán de mẹ, na yẹn nido nù. 11Podọ le ewọ sọ jei nado hẹn ẹn wá, é sọ ylọ hlan ẹn, bo dọmọ, Hẹnwá na mi, yẹn vẹ̀ we, nudo akla tọn de to alọ tòwe mẹ. 12Ewọ sọ dọmo, Le OKLUNỌ Jiwheyẹwhe towe to ogbẹ́, yẹn ma tin aklahihi de gba, adavo alọgogo linfin tọn de to odla lọ mẹ, po ami vude po to aboun lọ mẹ: bo, dayi e go, yẹn to nakeyẹyẹ awe de ṣinyan, na yẹn nido yì whégbe bo dà ẹ na mi po visunnu ṣie po, dọ mí nido dù i, bo kú. 13Elija sọ dọ hlan ẹn dọmọ, A dibu blo; yì bo wà do le a ko dọ do: ṣigba basi na mi sọn finẹtọn mẹ aklahihi de whẹ, bo hẹn ẹn wá dẽ, to enẹgodo basi na we podọ na visunnu towe. 14Na le wẹ OKLUNỌ, Jiwheyẹwhe Islaeli tọn dọ, Odla linfin tọn lọ ma to na jẹvó, mọ aboun ami tọn lọ ma sọ to na hú, kaka jẹ azán lọ gbè he OKLUNỌ do jikun hlan aigba lọ ji. 15E sọ yì bo wà kẹdẹdi didọ Elija tọn: ewọ, po e po, po owhé etọn po to dùdù azán susu. 16Odla linfin tọn lọ ma jẹvọ́, kavi aboun ami tọn lọ, kẹdẹdi ohó OKLUNỌ tọn, he é dọ gbọn Elija de. 17E sọ wá jọ to onú helẹ godo, wẹ visunnu nawe he tọn, asidaho owhé lọ tọn, to awutujẹ; awutujijẹ etọn yín awufiẹ sọmọ, bọ yè ma hẹn gbọfufu de pòai to e hòmẹ gba. 18E sọ dọ hlan Elija dọmọ, Etẹ́ yẹn tindo nado wà po hiẹ po, hiẹ omẹ Jiwheyẹwhe tọn È? yè hẹn we wá dẽ nado hẹn ylando ṣie wá hlan oflin, podọ nado hù visunnu ṣie!

19Ewọ sọ dọ hlan ẹn dọmọ, Na visunnu towe mi, Ewọ sọ zé e sọn akọ́n etọn mẹ, bo hẹn ẹn heaga biọ abo lọ mẹ, fie ewo nọ nọ, bo té ẹ do adozán etọn titi ji. 20Ewo sọ dawhá hlan OKLUNỌ, bo dọmọ, OKLUNỌ Ẹ Jiwheyẹwhe ṣie, hiẹ ko hẹn oylan wá ga do asúsiọsi lọ ji mẹhe de yẹn wáwási te, gbọn visunnu etọn hùhù dali? 21E sọ dlẹn ede do ovi lọ ji whlatọ̀n, bo dawhá hlan OKLUNỌ, bo dọmọ, OKLUNỌ É Jiwheyẹwhe ṣie, yẹn vẹ̀ we, gbọ alindọn ovi he tọn ni sọ gọ́ wá biọ ewọ mẹ. 22OKLUNỌ sọ tuntóai hlan ogbè Elija tọn; alindọn ovi lọ tọn sọ gọ́ wá biọ ewo mẹ, bọ é sọ yín. 23Elija sọ zé ovi lọ, bo hẹn ẹn jẹte sọn abo lọ mẹ biọ ohọ̀ mẹ, bo jó e hlan onọ etọn: Elija sọ dọmọ, Pọ́n, visunnu towe to ogbẹ̀. 24Nawe lọ sọ dọ hlan Elija dọmọ, Yẹn yọnẹn lò dọ omẹ Jiwheyẹwhe tọn de wẹ hiẹ, podọ ohó OKLUNỌ tọn to onù towe mẹ nugbo wẹ.

Currently Selected:

1 AHỌLU LẸ 17: BWL23

Highlight

Copy

Compare