1 AHỌLU LẸ 16

1OHÓ OKLUNỌ tọn sọ wá Jehu visunnu Hanani tọn de do Baaṣa go, dọmọ, 2Sọle yẹn zé we daga son kọgudu mẹ, bo yí we do basi ahọvi to Islaeli omẹ ṣie lẹ ji; bọ hiẹ ko sọ zinzọnlin to aliho Jeloboami tọn mẹ, bo ko sọ hen Islaeli omẹ ṣie lẹ nado wàylando, nado yi ylando yetọn lẹ do hẹnhomẹgble mi hlan adi; 3dayi e go, yẹn na zà Baaṣa sẹ̀ gbidigbidi po owhé etọn po; yẹn na sọ basi owhé towe taidi owhé Jeloboami visunnu Nebati tọn tọn. 4Ewọ he kú sọn Baaṣa mẹ tò tòdaho mẹ wẹ avún lẹ na dù; podọ ewọ he sọ kú na ede to danji we ohẹ̀ aga tọn lẹ na dù. 5Dinvie pipòtọ owàlọ Baaṣa tọn tọn lẹ, po núhe é ko wà po, po hlọnhlọn etọn po, yè ma ka wlan yé to owé otànnugbo lẹ ahọlu Islaeli tọn lẹ tọn lẹ mẹ? 6Baaṣa sọ damlọn po otọ́ etọn lẹ po, yè sọ di i to Tilza mẹ; Ela visunnu etọn sọ dùahọlu to otẹn etọn mẹ 7Podọ humọ gbọn alọ yẹwhegán Jehu visunnu Hanani tọn tọn mẹ wẹ ohọ́ OKLUNỌ tọn sọ wá Baaṣa ji, po owhé etọn po ji, awelẹ na oylan he é kò wà tọn wutu to nukun OKLUNỌ tọn mẹ, nado yí azọ́n alọ etọn lẹ tọn do gblehomẹna ẹn hlan adi, to tintin mẹ taidi owhé Jeloboami tọn, podọ na é hò e wutu.

8To owhè koatọ́nnukundopotọ Asa ahọlu Juda tọn tọn mẹ Ela visunnu Baaṣa tọn sẹ́ nado dùahọlu to Islaeli ji to Tilza mẹ, bo sọ dùahọlu owhè awe. 9Mẹmẹsi etọn Zimli, awhàngán odá kẹkẹ etọn lẹ tọn, ṣiatẹ hẹ ẹ: dinvie ewọ tin to Tilza mẹ, nùnù mú ededenu to ohò Alza tọn mẹ, he tin to owhédo ji to Tilza mẹ: 10Zimli sọ yì hòmẹ bo hò e, bo hù i, to owhè koatọ́nnukunawetọ Asa ahọlu Juda tọn tọn mẹ, bo sọ dùahọlu to otẹn etọn me 11E so wá jọ, whenuena é sè nado dùahọlu, saun le é sín ofìn ji, wẹ é hò owhé Baaṣa tọn lẹpo: é ma po ovi visunnu dopo de dai nẹ gba, hẹnnu etọn lẹ de tọn, kavi họntọn etọn lẹ tọn. 12Le wẹ Zimli và owhé Baaṣa tọn lẹpo do, kẹdẹdi ohó OKLUNỌ tọn, he é dọ do Baaṣa go gbọn Jehu yẹwhegán lọ dali, 13na ylando Baaṣa tọn lepo, po ylando Ela visunnu etọn tọn lẹ po, he yé do wàylando, po ehe yé yí do hẹn Islaeli nado waylando po, nado yí ovọ́ yetọn lẹ do henhomẹgble OKLUNỌ, Jiwheyẹwhe Islaeli tọn hlan adi 14Dinvie pipòtọ owàlọ Ela tọn tọn lẹ, po ehe é ko wà lẹpo po, yè ma ka wlan yé to owé otànnugbo lẹ tọn ahọlu Islaeli tọn le tọn lẹ tọn mẹ?

15To owhè koatọ́nnukunaweto Asa ahọlu Juda tọn tọn mẹ wẹ Zimli dùahọlu azán ṣinawe tò Tilza mẹ. Dinvie yè hẹn gbẹtọ lẹ dosla do Gibbẹtoni ji, he yín Filistini lẹ tọn. 16Gbẹtọ he yè hẹn dosla lẹ sọ sè dọ, Zimli to atẹsi, bo ko sọ hò ahọlu lọ ga: enẹwutu Islaeli lẹpo yí Omli, awhàngán awhànpa lọ tọn do doahọlu do Islaeli ji to azán nẹ gbè to osla me. 17Omli sọ hẹji yì sọn Gibbẹtoni, podọ Islaeli lẹpo po e po, yé sọ glọn Tilza do. 18E sọ wá jọ, whenuena Zimli mọ dọ yè yí tòdaho lọ, wẹ é yì biọ whéhla owhé ahọlu tọn tọn mẹ, bo yí miyọn do mẹ́ ohọ̀ ahọlu tọn to e ji, bo ku, 19na ylando etọn lẹ he é ko do wàylando to wiwà enẹ mẹ he yín oylan to nukun OKLUNỌ tọn mẹ, to zọnlinzinzin mẹ to aliho Jeloboami tọn mẹ, podọ to ylando etọn mẹ he é ko wà, nado hẹn Islaeli nado wàylando. 20Dinvie pipòtọ owàlọ Zimli tọn tọn lẹ, po atẹsi he é basi po, yè ma ka wlan yé to owé otànnugbo ahọlu Islaeli tọn lẹ tọn lẹ mẹ?

21Whenẹnu wẹ yè má omẹ Islaeli tọn lẹ do ogbẹ́ awe mẹ: odá omẹ ewlẹ tọn tọn to Tibni visunnu Gìnati tọn hodo, nado yí i do doahọlu; odá sọ to Omli hodo. 22Ṣigba omẹ he to Omli hodo lẹ gbawhàn omẹ he to Tibni visunnu Ginati tọn hodo lẹ tọn: mọwẹ Tibni kú, bọ Omli sọ dùahọlu. 23To owhè gbànnu kundopotọ Asa ahọlu Juda tọn tọn mẹ, wẹ Omli sẹ́ nado dùahọlu to Islàeli ji, bo sọ dùahọlu owhè wiawe: owhè ṣidopo é do dùahọlu to Tilza mẹ. 24E sọ hò okota Samalia Ṣẹmeli tọn na talẹnti awe fataka tọn; é sọ dótò do okọta lọ ji, bo sọ yí oyín Sẹmeli tọn, onúnọ akọta lọ tọn, Samalia, do ylọ tòdaho he é dó lọ. 25Omli sọ wà enẹ he yín oylan to nukun OKLUNỌ tọn me, bo yí kanylan do zán hú mẹhe tin to nukọn nẹ lẹpo. 26Na é ko zinzọnlin to aliho Jeloboami visunnu Nebati tọn tọn lẹpo mẹ, podọ to ylando etọn lẹ mẹ, ehe é yí do hẹn Islaeli nado wàylando, nado yi ovọ́ yetọn lẹ do henhomẹgble OKLUNỌ, Jiwheyẹwhe Islaeli tọn, hlan adi. 27Dinvie pipòtọ owàlọ Omli ton tọn lẹ he é ko wà, po hlọnhlọn etọn po he é ko dohia, yè ma ka wlan yé to owé otànnugbo ahọlu Islaeli tọn lẹ tọn lẹ tọn mẹ? 28Mowẹ Omli damlọn po otọ́ etọn lẹ po, yè sọ di i to Samalia mẹ: Ahabi visunnu etọn sọ dùahọlu to otẹn etọn mẹ.

29To owhè gbàntọ́nnukunatọ̀ntọ Asa ahọlu Juda tọn tọn mẹ wẹ Ahabi visunnu Omli tọn ṣẹ̀ nado dùahọlu to Islaeli ji: Ahabi visunnu Omli tọn sọ dùahọlu to Islaeli ji to Samalia mẹ owhè konukunawe. 30Ahabi visunnu Omli tọn sọ wà enẹ he yín oylan to nukun OKLUNỌ tọn mẹ hú mẹhe ko tin to nukọn nẹ lẹpo. 31E sọ wá jọ, di eyín é ko yín onu fua de na ẹn nado nọ to zọnlinzin to ylando Jeloboami visunnu Nebati tọn tọn lẹ mẹ, wẹ é do yí Jẹzebẹli viyọnnu Etibaali ahọlu Zidoninu lẹ tọn tọn hlan asi, bo yì bo to Baali: sẹ̀n, bo sọ to taliaina ẹn. 32E sọ té agbà de na Baali to ohò Baali tọn mẹ, he é ko dó to Samalia mẹ. 33Ahabi sọ basi Asela; Ahabi sọ vọ́ wàhú nado hẹnhomẹgble OKLUNỌ, Jiwheyẹwhe Islaeli tọn hlan adi hú ahọlu Islaeli tọn lẹpo he ko tin to nukọn nẹ. 34To azán etọn lẹ mẹ wẹ Hlẹli Bẹtielinu lọ dó Jẹliko: é do dòdo etọn lọ ai po hẹnbú Abilami plọnji etọn tọn po, bo sọ zé hòngbo etọn lẹ dote po hẹnbú Sẹgubi visunnu ojivò etọn tọn po; kẹdẹdi ohó OKLUNỌ tọn, he é dọ gbọn alọ Jọṣua visunnu Nuni tọn tọn mẹ.

Currently Selected:

1 AHỌLU LẸ 16: BWL23

Highlight

Copy

Compare