1 AHỌLU LẸ 15

1DINVIE to owhè fọtọ̀nnukunatọntọ Jeloboami ahọlu yisunnu Nebati tọn tọn mẹ wẹ Abijami ṣẹ̀ nado dùahọlu to Islaeli ji. 2Owhè atọ̀n wẹ é do dùahọlu to Jelusalẹm mẹ: oyín onọ etọn tọn wẹ Maaka viyọnnu Àblẹalomi tọn. 3Ewọ sọ zinzọnlin to ylando otọ́ etọn tọn lẹpo mẹ, he ewọ ko wà to nukọn etọn: ayiha etọn ma sọ yín pipé po OKLUNỌ Jiwheyẹwhe etọn po gba, di ayiha Davidi otọ́ etọn tọn gba. 4Ṣogàn na Davidi tọn wutu OKLUNỌ Jiwheyẹwhe etọn na zògbán de e to Jelusalẹm mẹ, nado zé visunnu etọn daga to godo etọn, podọ nado hẹn Jelusalẹm lódo: 5na Davidi wà enẹ he yín jlọjlọ to nukun OKLUNỌ tọn lẹ mẹ wutu, bo ma lẹ́ do apadopo sọn onú depope he ewọ degbèna ẹn depope mẹ to azán ogbẹ́ etọn tọn lẹpo mẹ, adavo to whẹ́hó Ulia Hitinu lọ tọn kẹdẹ mẹ. 6Dinvie awhàn sọ tin to Lehoboami po Jeloboami po ṣẹnṣẹn to azán ogbẹ́ etọn tọn lẹpo mẹ. 7Pipòtọ owàlọ Abijami tọn tọn lẹ, po ehe é ko wà lẹpo po, yè ma ka wlan yé to owé otànnugbo ahọlu Juda tọn lẹ tọn tọn mẹ? Awhàn sọ tin to finẹ to Abijami po Jeloboami po ṣẹnṣẹn. 8Abijami sọ damlọn po otọ́ eton lẹ po; yé sọ di i to tòdaho Davidi tọn mẹ: Asa visunnu etọn sọ dùahọlu to otẹn etọn mẹ.

9To owhé okotọ Jeloboami ahọlu Islaeli tọn tọn mẹ wẹ Asa ṣẹ́ nado dùahọlu to Juda ji. 10Owhè kandenukundopo wẹ é do dùahọlu to Jelusalẹm mẹ: oyín onọ etọn tọn wẹ Maaka viyọnnu Abisalọmi tọn. 11Asa sọ wà enẹ he yín jlọjlọ to nukun OKLUNỌ tọn lẹ mẹ, dile Davidi otọ́ etọn wà do. 12Ewọ bẹ́ sọdọminu lẹ jẹgbonu sọn aigba lọ ji, bo sọ dè boṣiọ he otọ́ etọn ko basi lẹpo sẹ́. 13Podọ ga é sọ dè Maaka onọ etọn sọn ahọlu onọ yínyín mẹ, na ewọ ko basi boṣiọ osùnọ de na Asela; Asa sọ sán bosiọ etọn liai, bo mó ẹn to tòpẹsẹ Kidlọnì kòn. 14Ṣigba yè ma bẹ́ otẹn yìaga lẹ sẹ́ gba: ṣogàn ayiha Asa tọn yín pipé po OKLUNỌ po to azán etọn lẹpo mẹ. 15Ewọ hẹn onú he otọ́ etọn ko klandowiwe lẹ wá biọ ohọ̀ OKLUNỌ tọn mẹ, po onú he ewlọsu ko klandowiwe lẹ po, fataka, po sika po, po núnùnú lẹ po. 16Awhàn sọ tin to finẹ to Asa po Baaṣa ahọlu Islaeli tọn po ṣẹnṣẹn to azán yetọn lẹpo mẹ. 17Baaṣa ahọlu Islaeli tọn sọ hẹji yì Juda ji, bo dó Lama, na é ma na do dikena mẹdepope nado jẹgbonu yì kavi wá whégbe to Asa ahọlu Juda tọn de. 18Whenẹnu wẹ Asa bẹ́ fataka po sika lẹpo po he yè jódai do adọkunnuvivẹ ohọ̀ OKLUNỌ tọn mẹ lẹ tọn, po adọkunnuvivẹ ohọ̀ ahọlu tọn mẹ tọn lẹ po, bo jó yé do alọ mẹmẹsi etọn lẹ tọn mẹ; Asa ahọlu sọ do yé hlan Bẹnhadadi de, visunnu Tablimmọni tọn, visunnu Heziọni tọn, ahọlu Silia tọn, he nọ nọ̀ Damasku, dọmọ, 19họntọ̀nji de tin to yẹn po hiẹ po ṣẹnṣẹn, to otọ́ ṣie po otọ́ towe po ṣẹnṣẹn: dayi e go, yẹn ko do nunina fataka po sika po tọn de hlan we; yì, gbà họntònji towe to Baaṣa ahọlu Islaeli tọn de, na é nido fọ́nyì sọn dẽ. 20Bẹnhadadi tuntóai hlan Asa ahọlu, bo do awhàngán awhàn etọn lẹ tọn lẹ hlan tòdaho Islaeli tọn lẹ ji, bo hò Ijọni, po Dani po, po Abẹl-bẹt-maaka po, po Ṣinnelọti lẹpo po, po aigba Naftali tọn lẹpo po. 21E sọ wá jọ, whenuena Baaṣa sè e tọn, wẹ é jó didó Lama tọn dai, bo nọ nọ̀ Tilza mẹ. 22Whenẹnu wẹ Asa ahọlu basi mìsẽlu de hlan Juda lẹpo; yè ma dè ode hlan: yé sọ bẹ́ zánnu Lama tọn lẹpo yì, po whlẹtlitli e tọn po, ehe Baaṣa ko yí do to didó; Asa ahọlu sọ yí do dó Geba Bẹnjamini tọn po Mizpa po. 23Dinvie pipòtọ owàlọ Asa tọn tọn lẹpo tọn, po hlọnhlọn etọn lẹpo po, po ehe é ko wà lẹpo po, po tòdaho he é ko dó lẹ po, yè ma ka wlan yé do owé otànnugbo lẹ ahọlu Juda tọn tọn lẹ tọn mẹ? Ṣigba to ojlẹ yọ́nho etọn tọn mẹ yè doazọ̀n ẹn to afọ etọn lẹ mẹ. 24Asa sọ damlọn po otọ́ etọn lẹ po, yè sọ di i po otọ́ eton lẹ po to tòdaho Davidi otọ́ etọn tọn mẹ: Jehọṣafati visunnu etọn sọ dùahọlu to otẹn etọn mẹ.

25Nadabi visunnu Jeloboami tọn ṣẹ́ nado dùahọlu to Islaeli ji to owhè awetọ Asa ahọlu Juda tọn tọn mẹ, é sọ dùahọlu to Islaeli ji owhè awe. 26Ewọ sọ wà enẹ he yín oylan to nukun OKLUNỌ tọn mẹ, bo to zọnlinzin to aliho otọ́ etọn tọn mẹ, podọ to ylando etọn mẹ ehe é yí do hẹn Islaeli nado wàylando. 27Baaṣa visunnu Ahija tọn sọn owhé Isakali tọn gbè sọ ṣiatẹ hẹ ẹ; Baaṣa sọ họ̀ e to Gibbẹtoni, ehe yín Filistini lẹ tọn; na Nadabi po Islaeli lẹpo po ko to oglọndo té hlan Gibbẹtoni dali 28Yèdọ to owhè atọ̀ntọ Asa ahọlu Juda tọn tọn mẹ wẹ Baaṣa hù i, bo sọ dùahọlu to otẹn etọn mẹ. 29E sọ wá jọ dọ, saun, le é yín ahọlu, wẹ é hò owhé Jeloboami tọn lepo; é ma pòdai hlan Jeloboami depope he to gbigbọ, kaka é ko do và ẹ; kẹdẹdi didọ OKLUNỌ tọn, he é dọ gbọn alọ mẹmẹsi etọn Ahija Ṣiloninu lọ tọn mẹ: 30na ylando Jeloboami tọn lẹ heódo wàylando, podọ ehe é yí do hẹn Islaeli nado wàylando; na homẹhẹngblenamẹ etọn wutu ehe é yí do henhomẹgblena OKLUNỌ, Jiwheyẹwhe Islaeli tọn, nado sadi. 31Dinvie pipòtọ owàlọ Nadabi tọn lẹ tọn, po ehe é wà lepo po, yè ma ka wlan yé to owé otànnugbo lẹ ahọlu Islaeli tọn lẹ tọn lẹ mẹ? 32Awhàn sọ tin to Asa po Baaṣa ahọlu Islaeli tọn po ṣẹnṣẹn to azán yetọn lẹpo mẹ.

33To owhè atọ̀ntọ Asa ahọlu Juda tọn tọn mẹ wẹ Baaṣa visunnu Ahija tọn ṣẹ́ nado dùahọlu to Islaeli lẹpo ji to Tilza mẹ, bo sọ dùahọlu owhè konukunẹnẹ. 34Ewọ sọ wà enẹ he yín oylan to nukun OKLUNỌ ton mẹ, bo sọ to zọnlinzin to aliho Jeloboami tọn mẹ, podọ to ylando etọn mẹ ehe é yí do hẹn Islaeli nado wàylando.

Currently Selected:

1 AHỌLU LẸ 15: BWL23

Highlight

Copy

Compare