1 AHỌLU LẸ 14

1TO ojlẹ nẹ mẹ Abija visunnu Jeloboami tọn jai awutunọ. 2Jeloboami sọ dọ hlan asi etọn dọmọ, Yẹn vẹ we, tite, bo diọunmẹna dewe, bọ yè ma na do yón we nado yín asi Jeloboami tọn gba: bo hẹn we yì Ṣilo; dayi e go, Ahija yẹwhegán tin to finẹ, he dọhó gbọn yẹn tọn dali dọ yẹn do yín ahọlu to gbẹtọ he lẹ ji. 3Bo yí akla mimlin ao po hiẹ po, po aklahúhú lẹ po, po ogò owín ton dopo po, bo yì e de: é na dọ na we núhe na gbọngodona ovi lọ tọn 4Asi Jeloboami tọn sọ wà mọ, bo tite, bo yì Ṣilo, bo wá owhé Ahija tọn gbè. Dinvie Ahija ma sọgan mọnú gba; na yè hẹn nukun etọn lẹ míọn gbọn whinwhẹn etọn dali. 5OKLUNỌ sọ dọ hlan Ahija dọmọ, Dayi e go, asi Jeloboami tọn ja nado kanbiọ sọn de we gbọn ovi etọn tọn dali; na ewọ yín awutunọ: le po le po wẹ hiẹ na dọ hlan ẹn: na é na yín, whenuena ewọ wá whégbe, wẹ ewọ na diọunna ede nado yín yọnnu devo. 6E sọ yín mọ, whenuena Ahija sè ogbè afọ etọn tọn, le é wá whégbe to ohòn ji, wẹ é dọmọ, Wá whégbe, hiẹ asi Jeloboami tọn; etẹwutu wẹ hiẹ diọunna dewe nado yín mẹdevo? na yè do mi hlan wẹ po owẹn pinpẹn po. 7Yì, dọ na Jeloboami dọ, Le wẹ OKLUNỌ dọ Jiwheyẹwhe Islaeli tọn: Sọle yẹn zé we daga sọn gbẹtọ le ṣẹnṣẹn, bo yí we do basi ahọvi do Islaeli omẹ ṣie lẹ ji, 8Bo tlẹn ahọludu lọ sọn owhé Davidi tọn gbè, bo yí i na we: gãnṣo hiẹ ma yín Davidi mẹmẹsi ṣie, mẹhe yìn gbèdide ṣie lẹ, mẹhe yi ayiha etọn lẹpo do hodo mi, nado wà enẹ kẹdẹ he yín jlọjlọ to nukun ṣie lẹ mẹ; 9ṣigba bo ko wà oylan hugan mẹhe tin to nukọn towe lẹpo, bo ko sọ yì bo basi yẹwhe devo lẹ na we, po bosiọ kinkòn lẹ po, nado hẹn mi gblehomẹ hlan adi, bo ko sọ ze mi dlan godo towe: 10Enẹwutu, dayi e go, yẹn na hẹn oylan wá owhé Jeloboami tọn ji, bo na sọ sán ovi sunnu lẹpo sè sọn Jeloboami de, ewọ he yè súdohòmẹ po ewọ he yè jódai do ote to Islaeli mẹ po, bo na zà owhé Jeloboami tọn sẹ̀ gbidi-gbidi, dile omẹ de nọ zà ogbó sẹ̀ do, kaka yè do hẹn popo yì. 11Ewọ he kú sọn Jeloboami mẹ to tòdaho me wẹ avún lẹ na dù; podọ ewọ he kú to odanji wẹ ohè aga tọn lẹ na dù: na OKLUNỌ wẹ ko dọ ẹ. 12Enẹwutu hiẹ ni tite, hẹn we yì owhé towe gbè, whenuena afọ towe biọ tòdaho lọ mẹ, ovi lọ na kú. 13Islaeli lẹpo na sọ blawu na ẹn, bo di i; na ewọ dopokẹdẹ sọn Jeloboami mẹ wẹ na wá oyọ̀do kòn: na to ewọ mẹ yè mọ onú dagbe vude wutu hlan OKLUNỌ dali, Jiwheyẹwhe Islaeli tọn, to owhé Jeloboami tọn gbè. 14Humọ OKLUNỌ na zétite nè ahọlu de do Islaeli ji, mẹhe na sán owhé Jeloboami tọn sè to azán nẹ̃ gbè: ṣigba etẹwẹ? yèdọ dinvie. 15Na OKLUNỌ na hò Islaeli, dile yè nọ whàn ofán to osìn mẹ do; ewọ na sọ họ̀nadọna Islaeli sọn aigba dagbe he ji, he é na hlan otọ́ yetọn lọ, bo na vúnvún yé jẹ̀ Otò lọ gododọ̃n; na yé ko basi Aṣelimi yetọn, do to homẹhẹngble OKLUNỌ hlan adi wutu. 16Ewọ na sọ jó Islaeli do na ylando Jeloboami tọn lẹ tọn wutu, he ewọ ko do wàylando, podọ ehe ewọ do hẹn Islaeli nado wàylando 17Asi Jeloboami tọn sọ tite, bo fọ́nyì, bo wá Tilza: podọ le ewọ wá vẹ̃nlitẹn owhé lọ tọn kón, ovi lọ kú. 18Islaeli lẹpo sọ di i, bo blawu na ẹn; kẹdẹdi ohó OKLUNỌ tọn, he é dọ gbọn alọ Ahija yẹwhegán mẹmẹsi etọn tọn mẹ. 19Pipòtọ owàlọ Jeloboami tọn tọn lọ, le é funawhàn do, po le é dùahọlu do po, dayi e go, yè wlan yé do owé otànnugbo ahọlu Islaeli tọn lẹ tọn lẹ mẹ. 20Azán lẹ he Jeloboami do dùahọlu yín owhè konukunawe: ewọ sọ damlọn po otọ́ etọn lẹ po, Nadabi visunnu etọn sọ dùahọlu to otẹn etọn mẹ.

21Lehoboami visunnu Sọlọmọni tọn sọ dùahọlu to Juda me. Lehoboami yín omẹ owhè kandenukundopo mẹho whenuena é sẹ nado dùahọlu, é sọ dùahọlu owhè fọtọ̀nnukunawe to Jelusalẹm mẹ, tòdaho he OKLUNỌ ko dè sọn whẹndo Islaeli tọn lẹpo mẹ nado yí oyín etọn do finẹ: oyín onọ etọn tọn wẹ Ntima Ammọlitmu yọnnu. 22Juda sọ wà enẹ he yín oylan to nukun OKLUNỌ tọn mẹ; yé sọ yí ylando yetọn lẹ he yé ko wà do hẹnhomẹgble e hlan awuwhan, hugan ehe otọ́ yetọn lẹ ko wà lẹpo. 23Na yéwlẹ ga sọ dó na yé otẹn yìaga lẹ, po dòtin lẹ po, po Aṣelimi po, to okọta yìaga lẹpo ji, podọ to atin mu lẹpo glọ; 24Sọdọminu lẹ ga sọ tin to finẹ to aigba lọ ji: yé to wiwà kẹdẹdi osùnú akọta lẹ tọn lẹpo he OKLUNỌ yàn jẹgbonu to ovi Islaeli tọn lẹ nukọn. 25E sọ wá jọ to owhè atóntọ ahọlu Lehoboami tọn mẹ, wẹ Ṣisaki ahọlu Egipti tọn hẹji wá Jelusalẹm ji: 26E sọ bé adọkunnuvivẹ ohọ̀ OKLUNỌ tọn tọn lẹ yì, po adọkunnuvivẹ ohọ̀ ahọlu tọn tọn lẹ po; yèdọ ewọ bẹ́ popo yì: é sọ bẹ̀ awọ̀yinu sika tọn he Sọlọmọni basi lẹ yì. 27Ahọlu Lehoboami sọ basi awọ̀yínu gànvẹ̃ tọn lẹ do otẹn yetọn mẹ, bo jó yé do alọ awhàngán núhọtọ lọ tọn tọn lẹ tọn mẹ, he to ohọ̀n owhé ahọlu tọn tọn hó. 28E sọ yín mọ, dọ whedepopenu ahọlu biọ ohò OKLUNỌ tọn mẹ jei núhọtọ nọ hẹn yé, bo sọ nọ hẹn yé gọ̀ wá bìọ abọ̀ núhọtọ tọn lọ mẹ. 29Dinvie pipòtọ owàlọ Lehoboami tọn tọn lẹ, po ehe é wà lẹpo po, yè ma ka wlan yé to owé otànnugbo ahọlu Juda tọn lẹ tọn tọn mẹ? 30Awhàn sọ tin to Lehoboami po Jeloboami po ṣẹnṣẹn jeijei. 31Lehoboami sọ damlọn po otọ́ etọn lẹ po, yè sọ di i po otọ́ etọn lẹ po to tòdaho Davidi tọn mẹ: oyín onọ etọn tọn wẹ Naama Ammọninuyọnnu. Abija visunnu etọn sọ dùahọlu to otẹn etọn mẹ.

Currently Selected:

1 AHỌLU LẸ 14: BWL23

Highlight

Copy

Compare