1 JOHANU 3
3
1DO ayi e go, owanyi he hunkọ Otọ́ kòn do mí ji, dọ yè nido ylọ mí ovi Jiwheyẹwhe tọn lẹ: enẹwutu aihọn ma yọn mí, na é ma yọ́n ewọ wutu. 2Mẹyiwanna emi, dinvie ovi Jiwheyẹwhe tọn wẹ mí, é ma ko sọ sọawúhia le mí na te: sigba mí yọnẹn dọ, whenuena ewọ na sọawúhia, mìwlẹ na di ewọlọsu; na mí na mọ ẹn dole é te. 3Mẹdepope he tindo tódido he to e ji, é klọ́ ede wé dile ewọ wé do. 4Mẹdepope he wàylan, jẹ osén mẹ ga; na ylando wẹ osẹ́n mẹ jijẹ. 5Mìwlẹ sọ yọnẹn dọ, ewọ ko sọawúhia nado bẹ́ ylando mítọn sẹ̀: podọ ylando de ma tin to ewọ mẹ 6Mẹdepope he nọnọ̀ ewọ mẹ ma wàylan: mẹdepope he wàylan ma mọ ẹn, mọ é ma sọ yọ́n ẹn. 7Mì yọ̀pọ emi, mì dike mẹde klọ mì blo: ewọ he to dódó wà, wẹ dódónọ, kẹdẹdile ewọ yín dódónọ do. 8Ewọ he wàylan, lẹgba de é jọ̀ sọn; na lẹgba ko wàylan sọn whẹ́whẹ́whenu. Na ehe wutu wẹ Ovi Jiwheyẹwhe tọn sọawúhia, na é nido gbà azọn lẹgba tọn súdo. 9Mẹdepope he yè dètọ́n sọn Jiwheyẹwhe mẹ ma nọ wàylan, na okún etọn to ninò e mẹ: ewọ ma sọ sọgan wàylan, na Jiwheyẹwhe de wẹ yè dè e tọ́n sọn wutu. 10Ehe mẹ wẹ yè to ovi Jiwheyẹwhe tọn lẹ sọhia te, po ovi lẹgba tọn lẹ po: mẹdepope he ma wà dódó, é ma jò sọn Jiwheyẹwhe de gba, kavi ewọ he ma yiwanna mẹmẹsunnu etọn. 11Na ehe wẹ owẹn he mì sè sọn whẹ́whẹ́whenu, dọ mí ni yiwanna mìnọzo. 12E ma yín taidi Kaini, he jọ̀ sọn mẹylankan lọ de, bo hù nọvisunnu etọn gba. Etẹwutu wẹ é hù i? Na azọ́n etọn lẹ yín oylan wutu, bọ nọvisunnu etọn tọn yín dódó. 13Awuji mì blo, mẹmẹsunnu ṣie emi, eyín aihọn gbẹwanna mì. 14Mìwlẹ yọnẹn dọ mí ko tọ́n sọn okú mẹ biọ ogbẹ̀ mẹ, na mìwlẹ yiwanna mẹmẹsunnu lẹ wutu. Mẹdepope he ma yiwanna mẹmẹsunnu etọn, é tin to okú mẹ. 15Mẹdepope he gbẹwanna mẹmẹsunnu etọn mẹhùtọ de wẹ; mì sọ yọnẹn dọ ogbẹ̀ madopodo ma na nọhẹ mẹhùtọ gba. 16Ehe mẹ wẹ mí yọ́n owanyi Jiwheyẹwhe tọn te, na é yí gbigbọ etọn bọdai na mí wutu: é jẹ dọ mìwlẹ ni yí gbigbọ mítọn bọdai na mẹmẹsunnu lẹ ga. 17Ṣigba mẹhe tindo adọkunnu aihọn he tọn, bo mọ mẹmẹsunnu etọn to ohẹn mẹ, bo sọ glọn lẹblanu homẹ etọn tọn sọn e de, nawẹ owanyi Jiwheyẹwhe tọn na nọhẹ omẹ lọ do? 18Mì yọ̀pọ ṣie emi, mì dike mí yí onù tata do basi owanyi blo, kavi po odé po blo; adavo to wiwà po nugbo po mẹ. 19Podọ ehe mẹ wẹ mí yọnẹn te dọ, mìwlẹ jò sọn nugbo lọ de, bo nasọ hẹn ayiha mítọn diun to nukọn etọn. 20Na eyín ayiha mitọn gblewhẹdo mí, Jiwheyẹwhe klo hú ayiha mítọn bo sọ yọ́n onú popo. 21Mì mẹyiwanna emi, eyín ayiha mitọn ma gblewhẹdo mí gba, mìwlẹ tindo tudido hlan Jiwheyẹwhe de. 22Onú depope mí kanbiọ, mí mọyi to e de; na mí yin osén etọn wutu, bo sọ to onú he yín jijlọ to nukọn etọn lẹ wà. 23Ehe wẹ osén etọn, Dọ mí ni yí oyín Jesu Klisti Ovi etọn tọn se, bo sọ yiwanna mìnọzo yèdọ dile ewọ na osẹ́n mí do. 24Ewọ he yìn osén etọn, to ninọ̀ ewọ mẹ. Ehe mẹ wẹ mí yọnen te dọ, ewọ to ninọ̀ mí mẹ, gbọn Gbigbọ he é na mí dali.
Currently Selected:
1 JOHANU 3: BWL23
Highlight
Copy
Compare
Share
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
