1 JOHANU 2
2
1MI yọ̀pọ ṣie lẹ emi, owé onú helẹ tọn wẹ yẹn wlan hlan mì, na mì ma na do wàylan. Eyín mẹdepope wàylan, mí tindo whẹyidọtọ de to, Otọ́ de, Jesu Klisti dódónọ lọ: 2Ewọ sọ wẹ oyẹ́su na ylando mítọn: é ma yín mítọn kẹdẹ, ṣigba na ylando aihọn lẹpo tọn ga. 3Gbọn ehe mẹ wẹ mí yọnẹn dọ mí yón ẹn, eyín mí to osén etọn yìn. 4Mẹhe dọ, Yẹn yón ẹn, bo ma yìn osén etọn, lalonọ de wẹ, nugbo lọ ma sọ tin to ewọ mẹ. 5Ṣigba mẹdepope he yìn ohó etọn, e go we owanyi Jiwheyẹwhe tọn sọgbè te nugbonugbo: ehe mẹ wẹ mìwlẹ yọnẹn te dọ mí tin to ewọ mẹ. 6Mẹhe dọmọ ewọ tin to e mẹ, é jẹ ewọ ga ni nọ zìnzọnlin do mọkẹdẹ dile ewọ to zọnlinzin do.
7Mì mẹmẹsunnu emi, yẹn ma wlan osén yọ́yọ́ de hlan mì gba, adavo osén hóhó de he mí ko tindo sọn whéwhéwhenu. Osén hóhó lọ wẹ ohó he mì ko sè sọn whẹ́whẹ́whenu. 8Podọ, osẹ́n yọ́yọ́ de wẹ yẹn so wlan hlan mì, onú he yín nugbo to ewọ mẹ podọ to mì mẹ: na zinvlu to ju juwayì, bọ hinhọ́n nugbo sọ to vivẹ́ to dinvie wutu. 9Mẹhe dọmọ é tin to hinhọ́n mẹ, bo sọ gbẹwanna mẹmẹsunnu etọn, ewọ tin to zinvlu mẹ kaka jẹ dinvie. 10Ewọ he yiwanna mẹmẹsunnu etọn, é nọte to hinhọ́n mẹ, ahlidanu de ma sọ tin to e mẹ. 11Ṣigba ewọ he gbẹwanna mẹmẹsunnu etọn ewọ tin to zinvlu mẹ, bo sọ to zọnlinzin to zinvlu mẹ, é ma yọ́n fie é jei, na zinvlu ko tọnnukun nẹ̃.
12Yẹn wlanwe hlan mì, yọ̀pọ ṣie lẹ emi, na yè jo ylando mìtọn na mì na oyín etọn tọn wutu. 13Yẹn wlanwe hlan mì, otọ́ emi, na mìwlẹ ko yọ́n ewọ he ko tin sọn whéwhéwhenu wutu. Yẹn wlanwe hlan mì, dẹpẹ lẹ emi, na mì ko gbawhàn mẹylankan lọ tọn wutu. Yẹn ko wlanwe hlan mì, yọ̀pọ lẹ, na mì yọ́n Otọ́ wutu. 14Yẹn ko wlanwe hlan mì, otọ́ lẹ, na mìwlẹ ko yọ́n ewọ he tin sọn whẹ́whẹ́whẹ́nu wutu. Yẹn ko wlanwe hlanmì, dẹpẹ lẹ, na mì tindo huhlọn, bọ ohó Jiwheyẹwhe tọn sọ nọte to mì mẹ, bọ mì sọ gbawhàn mẹylankan lọ tọn wutu. 15Mì yiwanna aihọn blo, kavi onú he tin to aihọn mẹ. Eyín mẹde yiwanna aihọn, owanyi Otọ́ tọn ma tin to ewọ mẹ gba. 16Na onú he tin to aihọn mẹ lẹpo, wantúntún agbasalan tọn, wantúntún nukun tọn, po gigovọ ogbé tọn po, é ma tin to Otọ́ tọn mẹ gba, ṣigba aihọn tọn wẹ. 17Aihọn sọ to juju jei po wantúntún etọn po: ṣigba ewọ he to ojlo Jiwheyẹwhe tọn wà wẹ na nọte kakadoi.
18Mì yọ̀pọ lẹ emi, ojlẹ godomẹ tọn wẹ: le mì ko sè dọ agòjẹdo-Klistigotọ ja, yèdọ dinvie agòjẹdo-Klistigotọ susu wẹ tin; ehe mẹ mìwlẹ yọnẹn te dọ ojlẹ godomẹ tọn lọ wẹ. 19Yé tọ́n sọn mí de jẹgbọnu, ṣigba yé ma tin to mí mẹ gba; na eyín yé ko tin to mí mẹ, matinnudọn yé do nọte po mi po: ṣigba yé tọ́n yì na yè nido sọ yé hia dọ yé omẹ pó ma sọn mí mẹ gba. 20Ṣigba mì tindo amisisa de sọn Mẹwiwe lọ de, mì sọ yọ́n onú lẹpo. 21Yẹn ma ko wlanwe hlan mì na mì ma yọ́n nugbo lọ wutu gba, ṣigba dọ mì yọ́n ẹn wutu, podọ lalo ma só sọn nugbo mẹ wutu. 22Mẹnu wẹ lalonọ, adavo ewọ he món dọ Jesu wẹ Klisti? Ewọ wẹ agọ̀jẹdo-Klistigotọ, he món Otọ́ po Ovi po. 23Mẹdepope he mọ́n Ovi, ewọ lọ wẹ ma tindo Otọ́: ṣigba, ewọ he yígbe Ovi tọn, é tindo Otọ́ ga. 24Enẹwutu na enẹ ni nọte to mì mẹ, ehe mì ko sè sọn whẹ́whẹ́whenu. Eyín ehe mì ko sè sọn whẹ́whẹ́whenu nọte to mì mẹ, mìwlẹ ga na nọte to Ovi mẹ, podọ to Otọ́ mẹ. 25Ehe sọ wẹ opagbe lọ he é ko do na mí, yèdọ ogbẹ́ madopodo. 26Onú helẹ wẹ yẹn wlanwe etọn hlan mì gbọn yé he to mì klọ lẹ tọn dali. 27Ṣigba amisisa he mì ko yi to e de nọte to mì mẹ, mì ma sọ din dọ mẹde ni plọ́n mì gba; ṣigba le amisisa lọ to mì plọ́n gbọn onú lẹpo tọn dali, bọ é sọ yín nugbo do, bo ma yín lalo, kẹdẹdile é plọ́n mì do, mìwlẹ ni sọ nọte to e mẹ. 28Podọ dinvie, mì yọ̀pọ emi, mì nọte to ewọ mẹ; na, whenuena é na sọawúhia, mí nido tindo tudido, bo ma nasọ kuwinyan to nukọn etọn to gigòwà etọn whenu. 29Eyín mì yọ́n ẹn dọ ewọ yín dódónọ, mì yọnẹn dọ yè dè mẹhe wà dódó lẹpo tọ́n sọn ewọ mẹ.
Currently Selected:
1 JOHANU 2: BWL23
Highlight
Copy
Compare
Share
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
