Abalōma 10
10
1Mwe bāmyitu ngunyonywa fị̄jo ni ndụmbụla jangu jōsa ukuti linga abāndụ bāngu bāpokịgwaga. Ngubị̄pụ̄tila fị̄jo kwa Kyala. 2Mbagị̄le ukusịsịmịkisya ukuti bịkunndōnda fị̄jo Kyala ukwịnị̄nga kwabo bakakwaganịa bunụnụ. 3Bakajimanya injila mụno Kyala ịkumanyanịla na bāndu, bịkulōnda ukusyimịka sị syabo bakị̄nị̄nga kubugolofụ bwa Kyala. 4Buno Kilisịtị jo bumalikilo bwa ngomēlesyo, ukuti gwesa uju alinulwịtiko akabēge ubugolofụ.
Ubupokị bwa bāndu bōsa
5Mose āsịmbịle ukuti umụ̄ndu uju ịkubōmba isyabugolofụ ubu bwịtotị̄ke mụngomēlesyo joịsakukabilaga mụmo ubūmị. 6Lolị ubugolofụ bwa ndwịtiko bukuti: Komma ukujoba mụ̄nda mmyako ukuti: Kali jwanị uju ịsakufyukaga kumwanya? 7(Kokuti, ukunsụlụsya pāsi Kilisịtị); kangi komma ukuti: Jwanị uju ịsakusulukaga mpaka kubusyuka (Kokuti kukuntwala Kilisịtị ukufụma mmbafwe.) 8Ubusị̄mbe ubwịkemo bukuti: Īndumị̄ ja Kyala jili pabupị̄pị nanụngwe, jili nkanwa mmyako jili mụndụmbụla jako, ngubala īndumị jalwịtiko iji tụkujifụmụsya. 9Linga kujoba pabwelụ kuti Jesụ jo NTWA nukwịtika ukuti Kyala ālinsyusị̄sye mmbafwe, po kwịsakụponaga. 10Namanga ndwịtiko lwitu momụno tụkukabila ubugolofụ kwa Kyala; ukwịlāta kwitu kokuno kụkutupelela ukupokịgwa. 11Ilịsyu lya Kyala lịkuti: Gwesa uju ịkummwịtika atịsakusūsịgwaga, 12sịsịsị sya mụ̄ndụ gwesa, namanga Abajụ̄ta nabapanja bakakīndana; Kyala jo ju NTWA jūjo gwa bōsa ịkubasaja fị̄jo aba bịkummbilikila. 13Bo apa ubusị̄mbe ubwịkemo bukuti: Umụ̄ndụ gwesa uju ịkusūmila mụngamụ ja NTWA, jo ịsakuponaga.
14Lolị kali po bansūmege bulebule uju batịkummwịtika? Kangi kali po bị̄tikege bulebule linga bakapilika ku nndumbililị. 15Kangi abāndu babagị̄le ukulūmbilila bulebule linga bakatumịgwa? Bo apa lisị̄mbị̄gwe mwaKalata ili lịkuti: Bo bunụnụ bukị ukwịsa kwa batumịgwa aba bịkutwala īnōngwa īnụnụ. 16Lolị bakasyambilila bōsa Īnōngwa Īnụnụ. Jesaja ālālūsị̄sye ātịle: Gwe NTWA jwanị uju ị̄tị̄ke isị apilị̄ke kumyitu? 17Bunobuno lelo ulwịtiko lụkufụmila nkupilika īndumị, īndumị jikwịsila nkulūmbilila kwa Kilisịtị.
18Lolị lelo ngulālūsya nguti: Kali syanalolị ukuti bakapilika īndumị? Sịli pabwelụ ukuti bapilị̄ke namanga ubusị̄mbe bwa ịsyu lya Kyala bukuti:
Akōgo ka ịsyu lyabo kabalanị̄le nkisu kyosa;
amasyu gābo gafịkịle mụmbafụ syosa sya kị̄su.
19Ngulālūsya kangi nguti: Bule abany'Ịsịlaelị bakāsyagēnịe? Mose jūjo jo gwakwanda ukwamụla ātịle:
Umwe nịkubapelelaga ukuja nubūfị kukikolo iki
kikaja kikolo kyene;
kangi nikubapelelaga ubukalale
ukwendela nkikolo kya basịta mahala.
20Umwene Jesaja jo nkịfụ akīndilị̄le apa ịkujoba ịkuti:
Bālinyāgịle aba bakāndōndaga;
nābonị̄ke kuli aba bakālālūsyaga isyangu.
21Lolị isya Ịsịlaelị ịkuti: Umụ̄sị gōsa mbagolokịsye amaboko gangu ukubāmbilila abāndu bāngu abasịtakupilika, kangi abālukānị.
Currently Selected:
Abalōma 10: NYB96
Highlight
Share
Compare
Copy
Want to have your highlights saved across all your devices? Sign up or sign in
Nyakyusa Bible © Bible Society of Tanzania, 1996.
