Abalōma 16

Uluponịo lwake jūjo

1Nịkummbīka mmaboko gīnụ ulịlūmbu gwitu Foibe uju ịkubōmba nkipānga kya Kenkịleja. 2Mụmmwambililege mụ̄ngamụ ja NTWA, bo mụno kubabagị̄le ukubōmba abāndu bā Kyala, mụntūlege mụli syosa isị ịkulōnda ukuntūla umwe; namanga umwene amanyēne na bāndu bị̄ngị kangi nanịne mmanyānị gwangu.

3Mụmbonekesye Pịlịsịka na Akwila ababōmbị bị̄nāngu mwa Kilisịtị Jesụ, 4aba bakabupākisya ubūmị bwabo kunōngwa ja kumboka une, ngaja jo une nịmwene ne nguti ndaga lolị nifịpānga fyosa fya bapānja fyope fịkubagwila ulupị. 5Mumbonekesyege na Epenetị uju āli jo gwakwanda ukummwịtika Kilisịtị mw'Asịja. 6Mumbonekesya na Malịja uju ịjūlịle fị̄jo ukubabōmbela umwe. 7Mumbonekesye bope bā Andịlonịka na Jụnịja, Abajụ̄ta bị̄nāngu aba nāpịnyị̄gwe nabo mụnnyololo; abēne bafụmụke fịjo mmbatumịgwa; bo aba bātalịle na kumyangu ukummwịtika Kilisịtị. 8Mumbonekesye na Ampịlyāti ummanyānị gwangu fị̄jo mbunyamụ̄ndu bwa mwa Kilisịtị. 9Mụmbonekesye na Ulibanị, ummbōmbanịsị mwịnītu mụmbōmbo ja Kilisịtị, na ju Sịtakị umwịnāngu fị̄jo. 10Mụ̄mbonekesye na Apele uju abonị̄ke ukwịtoteka mwa Kilisịtị; mụmbonekesye nabany'Alisịtobuli. 11Mumbonekesya na Jelotịjo, Unnjụ̄ta mwịnāngu, mụmbonekesye na banyamụ̄ndu mwa Kilisịtị aba nnyụ̄mba ja Nalịsịsa.

12Mụmbonekesye na Tịlịfena na Tịlịfosa aba bali pambōmbo ja NTWA. Mụmbonekesye nu nnganịgwa gwangu Pelịsị, uju abōmbịle fị̄jo īmbōmbo ja NTWA. 13Ngutuma uluponịo na kwa Lụfụ ummbōmbị umfụmụke mụmbōmbo ja NTWA; mụmponịege jope nunna uju nanịne jo jūba. 14Mụmbonekesye na ba Asịnkịlịta, Fịlego, Helịmị, Patịloba na Helịmana bakamụ mwa Kilisịtị bōsa aba bali pamopēne nabo. 15Mụmbonekesye Fịlologa na Jụlịja, Neleju nuịlūmbu, Olịmpa nabị̄kemo aba bali nagwe pamopēne. 16Mụponanịege mwe bābo batupu bo mụkolēne amaboko mbwịkemo. Ifịpānga fya Kilisịtị fyosa fịkubaponịa.

Imanyịsyo syakumalīkisya

17Nịkubasūma mwe bāmyitu mụje māso naba bịkutwala īndapukano bịkōnānga ulwịtiko lwa bāndu, bịkupīnga isi mụmanyịsīgwe; mụngōngānaga nabo. 18Namanga aba bịkubōmba isya buno buno batịkummbōmbela Kilisịtị UNTWA gwitu, lolị kukwịkuta kwabo kwene. Abēne bịkusisyoba īndụmbụla sya aba bakasịmanya īmbị̄bi; bịkubasyobela mmasyu gābo amanụnụ aga gịkukōfya ịtolo. 19Ukufụmụka kwinụ ukuti mụkukōnga ilịsyu lya Kyala kubalanị̄le mōsa. Mụnōngwa sịsịsị mụmbelị̄le une ukusekela. Ngulōnda ukuti mụjege na mahala kū nụnụ, lolị mụjege bēlụ kubutulanōngwa. 20Umwene Kyala, īnyị̄buko jītu ja lutēngāno, atịsakuhābaga ukuntakanịa setano kūsi kunjajo syinụ. Ilị̄pyana lya NTWA Jesụ lijege nanụmwe.

21Tịmotị ummbōmbị mwịnāngu, ịkubaponịa; bope ba Lusyu na Jasonị na Sosịpatelị, aba ndi kikolo kimo nabo bịkubaponịa.

22Nanịne Telịtị, ne nịkunsị̄mbila Paulị kalata uju, nịkubaponekesya mwa Kilisịtị.

23Gajị uju ātwambilị̄le nnyụ̄mba jake une nikipānga kyosa jope ịkubaponịa umwe. Elasịtị ummbīkandalama sya kāja, na Kwalịtị unkilisịtị mwịnītu, bịkubaponịa. [ 24Ilị̄pyana lya NTWA gwitu Jesụ Kilisịtị lijege nanụmwe mwesa. Amenị.]

Ulwịpụ̄to lwa kuntụ̄fya Kyala ulwa kubumalikilo

25Tuntụ̄fyege Kyala. Uju amēnye ukubakasya umwe ndwịtiko lwinụ ukukōngana nindumị īnụnụ ja Jesụ Kilisịtị iji nikulūmbilila kangi ukukōngana nukụkị̄ngulịgwa isyanalōlị sya kubutị̄tu isị syafịsị̄gwe ifyinja fịngị ntubalilo utu tukīndịle. 26Loli lilino, isyanalōlị sịsakulị̄gwe pabwelụ mwabakālata ba bakụngụlụka; kangi Kyala uju alịko bwịla alagị̄le ukuti sịfụmụsịgwege kubāpānja bōsa ukuti bammwịtikege nukunkōnga.

27Ulwimiko lujeko kwa Kyala uju ali mwene, uju mwene ịtolo jo gwamahala gōsa mwa Jesụ Kilisịtị kisịta kumalika sịku. Amenị.

Currently Selected:

Abalōma 16: NYB96

Highlight

Compare

Copy