Īmbōmbo Sya Batumịgwa 27

Paulị ịkubūka ku Loma

1Lelo bo sịtụmụlị̄gwe ukuti uswe tụkwịpakaga mụngalaba ukubūka mwa Ịtalịja, po papo Paulị na bapịnyịgwa abāngi balinkubīkịgwa mmaboko ga nsịkali unkulūmba jumo ugwa kilūndilo kya Agusịtị (Kesalị) uju āli jo Jụlịasị īngamụ. 2Po papo tulinkwịpaka mụngalaba ja mụ Atịlamịtị, iji jajaga pakwenda ntwaja twa mụmbali mwa Asịja. Po papo tulinkubūka. 3Kilābo tulinkwakufịka mụ Sịtonị. Lelo umwene Jụlịasị alinkuja nikisa kwa Paulị, alinkummwịtikisya ukubūka kubamanyāni bāke, ukuti bakampege ifị ịkulōnda. 4Tulinkusụmụka ukufụma mụmo, tulinkwenda ndubafụ ndusūngo lwa Kipelị, lo lulinkutusịga ummbelo, namanga ummbelo gwatupīngaga. 5Lelo bo tulobwịke inyanja ja kulubafụ lwa Kịlịkịja na Pamfịlịja tulinkwakufịka mụ Mịla nkisu kya Likija. 6Mo alinkujaga īngalaba ja nsịkali unkulūmba mụ Alịkịsandalịja iji jabukaga mwa Ịtalịja, po papo alinkutupakila mụmo.

7Po papo tulinkwenda mbolambola kukabalilo ka masịku ga mịngị, tulinkwakufịka mụ Nịto nubupalapala. Lelo papo ummbelo gwatupīngaga, po papo tulinkwenda kulusūngo lwa Kịletị, lo lulinkutusịga ummbelo, tulinkwenda pabupị̄pị nulusūngo ulu lusōsomị̄le ulu bịkuti Salịmonị īngamụ. 8Tulinkukīnda nubutolwe fị̄jo tulinkwakufịka pabujo bumo apa bịkuti po pa Mịkụ̄nda Imịnụnụ, apa pāli pị̄pị na kāja ka Laseja.

9Lelo papo akabalilo akatalị kākīndịle, kangi papo īnjila jali mbalapala ịtolo, namanga akabalilo ka kufịpīka ifị̄ndu kākīndịle. Po papo Paulị alinkubasoka alinkuti: 10Bāgwitu, njibwene īnjila iji ukuti jị̄sakuja nulōnāngiko nukujōnga ku kwịngị ndịkubala fyene fị fịtwalo ningalaba, himma, lolị bope na bu būmị bwitu. 11Umwene lolị unsịkali unkulūmba alinkusị̄tika isya mwendesyangalaba nisya mwenenajo, ukukīnda isị ājobaga Paulị. 12Lelo papo bālyagịle kukabagila ukugonamo mwịkụ̄nda lila nkabalilo ka mapepo, bị̄ngị balinkutụmụla ukuti basōkengemo, ko kuti linga sịkwịtika, bakafịkege mụ Fenịke ilị̄kụ̄nda lya mụ Kịletị, ili lịkukēta kwịtōngo kubwakubujōngelo na kulūlu kubwakubujōngelo, ukuti mo bakaje mụmo nkabalilo ka mapepo.

Ummbelo unkali panyānja

13Po papo lelo bo gwịnwịke ummbelo gwa kwịtōngo gụkukụla mbolambola, balinkwịnogona ukuti basyagịle isị balōndaga; po papo balinkufyusya īnyāngula, balinkusụmụka balinkwendesya īngalaba jabo mụmbali mụ Kịletị pabupị̄pị ịtolo nikị̄su. 14Lelo bo pakakīndapo fị̄jo, po papo gulinkukụla ummbelo gwa kafụlafụmbi ukufụma kwịsīlya, ugu bịkuti jo Julakilo īngamụ. 15Ijēne īngalaba jilinkunyakịgwa ịtolo, jilinkutolịgwa ukulwa nummbelo, po papo tulinkujilekesya ukuti jēgịgwege ịtolo. 16Bo tụkukīnda mbibimbibi nkasūngo aka bịkuti jo Kauta īngamụ, aka kātusịgaga ummbelo, tulinkukafyusya akabōtị ka mụngalaba nubutolwe ubukulūmba fị̄jo. 17Lelo bo bakafyusịsye, balinkubōmba isya kujitūla, balinkujipịnya īngwamba namaka. Papo bātị̄laga ukuti babagị̄le ukwịkola mụnsānga ugu bịkuti jo Sịlịtị īngamụ, balinkusụlụsya umwenda gwa panndongotị, po papo balinkwegịgwa ịtolo. 18Lelo bo twagịle tụkukomịgwa fị̄jo nukusāmbuka kwa nyanja, ulwa kilābo balinkwanda ukufịsopa ifịtwalo mmīsi. 19Pị̄sịku lya butatu, balinkutāga ifịbōmbelo fya mụngalaba mụnānja namaboko gābo. 20Lelo bo twagịle ilị̄suba nindōndwa fịtịkuboneka kumasịku mịngị, nukusāmbuka kwa nyanja ku kwịngị ịtolo kutūmīlị̄sye, po papo ulusūbilo lōsa ulwa kuti tụkuponaga lulinkwenda nukujōnga.

21Lelo bo bagonịle amasịku mịngị kisịtakulya ifị̄ndu, po papo Paulị alinkwima pamyabo, alinkubabūla alinkuti: Mwe bāgwitu, linga mwalimbilị̄ke apa nạ̄tigi tungasōkāngamo mụ Kịletị, po angali tuponịle kulonāngiko lululu nukujōnga kukuku. 22Nalilino nikubakasya ukuti mụsangalukege ịtolo mụndụmbụla syinụ, buno najumo mmyinụ uju ubūmị bwake bwịsakujōngaga, lolị jēne ji ngalaba. 23Namanga ikilo kikiki ugwandumị gwa Kyala uju une ndi mụ̄ndu gwake, kangi uju ngummbōmbela, ālyimịle kifụkị nanịne, jo alinkummbūla alinkuti: 24Ungatetemaga gwe Paulị, buno ugwe uli gwakuti ukīmege nkyenị mwa Kesalị, kēta Kyala mwịpyana lyake akupokịle ugwe pamopēne nāba kwenda nabo bōsa. 25Po apa nịkuti amwịkasyege īndụmbụla bāgwitu, namanga une ngunsūbila Kyala ukuti sịsakujaga bo mụmo āmbūlị̄le. 26Lolị tụkwịkolaga palusūngo lumo.

27Lelo pakilo ikya kalōngo na buna, bo tụkwelēla ịtolo mụnyanja ja Atịlịja, pakilo pakāti ababōmbị ba mụngalaba balinkwịnogona ukuti ikị̄su kimo kili kifụkị. 28Po papo balinkupima ubusolofụ bwa mīsi, balinkwaga buli pamịkwamba amalōngo mabili. Bo bēndịlepo panāndi, balinkupima kangi, balinkwaga buli pamịkwamba kalōngo na mịhano. 29Bo tụkupāsya ukuti pamo twịsakwịkịnya mụno sịlịmo īnyālabwe, po papo balinkusopa īnyāngula ịna kumbīngo (kūnyụma kūngalaba); balinkwịpụ̄ta ukuti bukyege. 30Lelo bo ababōmbị ba mụngalaba bikulōnda ukujōnga nukujileka īngalaba, kukipụlo (nkyenị mụngalaba), 31po papo Paulị alinkummbūla unsịkali unkulūmba na basịkali alinkuti: Linga abāndu bababa batịkuja mụngalaba, mụkabagila ukupona. 32Po papo abasịkali balinkubụ̄ta īmbote sya ịbōtị, balinkulileka ukuti lijōngelege mmīsi.

33Bo bụkuja pakukya, po papo Paulị alinkubatēngulila bōsa ukuti balyege ifị̄ndu, alinkuti: Lilino mụlīndịle amasịku kalōngo na mana bo mụkugụ̄lila mụli ninjala mụkalyamo ifị̄ndu nafịmo. 34Po apa lelo nịkubasūma ukuti mụlyege ifị̄ndu, namanga po mwịsakuponaga; namanga najumo nkāti mmyinụ uju ulunywịlị lwa kuntu gwake lwịsakujōngaga. 35Lelo bo ajobịle sịsịsị, alinkwega ikisyesye, alinkugwa ulupị kwa Kyala nkyenị mụli bōsa, alinkumenyanịa, alinkwanda ukulya. 36Po papo bōsa balinkwenda nukwịkasya, balinkulya ifị̄ndu bope. 37Lelo twesa mụno twajīlị̄le mụngalaba, twali twe bāndu bāmịa babili na malōngo mahāno na mabili, na ntandatu (276). 38Lelo bo bị̄kwịte ifị̄ndu, po papo balinkujipepula īngalaba, balinkutāga īnganụ mụnyanja.

Īngalaba jịkwịkola

39Lelo bo bukị̄le, balinkusịta nukukimanya ikị̄su; lolị balinkugwaga unkụ̄nda ugu gwali nubutēngamu, ugu bị̄nogonaga ukujitwalapo īngalaba linga sị̄tikaga. 40Po papo balinkusōsyapo īnāngula, balinkusịleka mụnyanja, bo kuno bịkwabula īngoje isị bāpịnyịle īngafị sya kupīngila; lelo bo bafyusịsye umwenda gwa kukipụlo nukugulabisya kummbelo, po papo balinkujilabisya kubutēngāmụ. 41Lolị abēne balinkwaga bafịkịle pabujo ubu bwa tụndụmēle mụnyanja, po papo īngalaba jilinkwịkịnya papo, jilinkwikola kukipụlo, jilinkusịta nukusụkānịka. Lolị kumbīngo jilinkwanda ukupānguka panōngwa ja maka ga majiga. 42Abēne abasịkali balinkwịtikana ukubagoga abapịnyịgwa, ukuti najumo angōgēlaga nukujōnga. 43Lolị umwene unkulūmba gwa basịkali bo ịkulōnda ukumpoka Paulị, alinkubakānịsya isị bālitikēne, alinkubalagila aba bāmēnye ukōgēla, ukuti batalege ukwịtāga mmīsi nukubūka pị̄sịlya. 44Abāngi aba bāli pamatapwa na ntūndu utūngi twa mụngalaba. Bunobuno bōsa ịtolo balinkwenda nukuponela pị̄sīlya.

Currently Selected:

Īmbōmbo Sya Batumịgwa 27: NYB96

Highlight

Compare

Copy