Īmbōmbo Sya Batumịgwa 26

Paulị ịkujoba nkyenị mwa Agịlịpa

1Po papo Agịlịpa alinkummbūla Paulị alinkuti: Gwịtikisị̄gwe ukwịjobela gwịmwene. Po papo Paulị alinkugolosya ikiboko, alinkujoba alinkuti: 2Ngwịbona ukuja nulusako, gwe Malafyale Agịlịpa, papo umụsyugu nguja pakwịlongela nkyenị mmyako, syosa isị bịkūnjoba Abajụ̄ta. 3Namanga ugwe ukīndilịle ukusịmanya syosa īnyị̄ho ningānị sya Bajụ̄ta, po apa nịkukusūma ukuti ūmbilikisyege nulwịfị̄mbilisyo. 4Abajụ̄ta bakamēnye akajīlo kāngu ukufụma mụ mbukeke, papo ukufụma pabwandilo, ngulị̄le mụ nkikolo kyangu mụ Jelụsalemụ. 5Bāmēnye fị̄jo ukufụma liịjolo linga bị̄ganịle ukusịsịmịkisya ukuti une nāli gwa nkapānga ka aba bakīndilịle ịtolo ukwịjūmika ndwịtiko lwitu nāli mfalịsaị. 6Lolị lilino nīmịle apa ngulōngịgwa panōngwa ja lusūbilo lwa lufị̄ngo, ulu Kyala āfị̄ngēne nabisukulu bītu. 7Ulufị̄ngo ulu ifịkolo fyitu kalōngo na fịbili fịkusūbila ukulwaga, bo fịkwịjūla ukūmbōmbela Kyala pamụ̄si na pakilo; lo lusūbilo ulu bịkūndōnga Abajụ̄ta, gwe Malafyale. 8Fịkị umwe mụkwaga pakafụ fị̄jo ukwịtika isya kuti Kyala ịkubasyusya abafwe?

9Nanịne nị̄nogonaga ukuti sịmbagị̄le mbōmbēge sị nyịngị isị sịkīndēne ni ngamụ ja Jesụ gwa mụ Nasaletị. 10Syo isị nāsịbōmbịle mụ Jelụsalemụ, nābị̄galilaga abāndu ba Kyala ba bị̄ngị mụnnyololo, bo abapụ̄tị abakulūmba bāmbēle amaka, kangi bo bịkugogịgwa ndinkwịtikila ịtolo. 11Na nnyụ̄mba syabo sya kwịpụ̄tilamo ndịkubafụ̄nda kabili kabili, ndịkubafịmbilisya ukutuka amahēlụ; ndinkufwana mbakimbilị̄le ikigili ukubafwima, ndinkwakufịka na ntwaja twa bāpānja.

Paulị ịkulīngānịa isya lupīnduko lwake

(Batu. 9:1-19; 22:6-16)

12Po papo lelo bo ngubōmba sịsịsị, ndinkubūka mụ Ndamasịka mmaka na mụ̄ndagilo sya bapụ̄tị abakulūmba. 13Po papo lelo gwe Malafyale, pakabalilo ka pamụ̄si bo lili pantu, bo ngwenda mụnjila, ndinkulubona ulumụlị ulukulūmba lufụmịle kumwanya, lụkumụlika ukukīnda niịsuba, lulinkumụlika ukūsyungūtila une pamopēne nāba nāli nabo. 14Bo twesa tugwịle pāsi, po papo ndinkupilika ilịsyu lịkujoba nanịne Nkihịbuli lịkuti: Gwe Saulị, gwe Saulị, kūfwima fịkị? Kwịfụlasya jujugwe apa kugubāja unndụ̄nda. 15Lolị une ndinkulālūsya ndinkuti: gwanị gwe NTWA? Umwene UNTWA alinkwamụla alinkuti: Jo une Jesụ ne kūfwima. 16Lolị sụmụkaga gwimege namalūndi gāko, namanga jo nōngwa iji ngusetukị̄le, ukuti ngwimikege ugwe ukuja mmbōmbị gwangu kangi nkētị gwa syosa isị usịbwene, na isị nịsakwịbonesyangamo mmyabo. 17Nịsakukupokaga kubāndu bababa, na kubāpānja kuno ngukutuma lilino, 18ukuti ukabị̄gulege amāso gābo, ko kuti basōkengeko kūngị̄sị, bị̄sege ndumụlị; basōkeko kubutwa bwa Setano, bị̄sege kwa Kyala; nukuti bo bị̄tị̄ke bāmbililege ubuswe bwa nōngwa, nikilīngo nkāti mụli aba bị̄pelịle bị̄kemo ndwịtiko ulu luli mmyangu.

Paulị ịkulīngānịa isya mbōmbo jake

19Po papo lelo gwe Malafyale Agịlịpa, ngākị̄lịle ikisetuka kya kumwanya kikịki. 20Lolị ndinkutala ukulūmbilila kubāndu ba mụ Ndamasịka na mụ Jelụsalemụ, na nkị̄su kyosa ikya mụ Jụtaị, kangi na kubapānja bōsa ukuti bapindukege nukugomokela kwa Kyala, babōmbēge īmbōmbo isị sịkunāngisyaga ukuti bapīndwịke. 21Panōngwa jijiji, Abajụ̄ta balinkūngola nnyụ̄mba ja kwịpụ̄tilamo, balinkugela ukuti bangoge. 22Lelo papo Kyala ānyị̄mị̄le une ukwịsakufịka kulilino kuno, po apa nīmịle nịkusịsịmikisya kubanāndi na kubakulūmba. Isị nịkujoba syo isị abakụ̄ngụlụka na Mose bạ̄tigi sịsakubonekaga, 23isya kuti Kilisịtị jo āli gwakukubilwa, āli gwakuja jo ntasị pakusyuka kubafwe, ukuti afụmụsyege isya kuti ulumụlị lwa bupokị lụkubabalila abāndu bōsa lilino, Abajụ̄ta na bapānja.

24Lelo Paulị bo afịkịle pali sịsịsị isya kwịnokesya, Fesịtị alinkwịnula ilịsyu lyake alinkujoba alinkuti: Gwe Paulị, ukīmbị̄le ikigili; ubumanyị ubu umanyị̄le fị̄jo bụkukīmbị̄sye ikigili. 25Umwene Paulị alinkwamụla alinkuti: Gwe mwimikịgwa Fesịtị ngakīmbila ikigili; lolị amasyu aga ngujoba gānalōlị kangi ga mahala. 26Ugwe gwe Malafyale usịmēnye syosa sịsịsị, po apa nịkujobaga nkyenị mmyabo kisịta kutị̄la, namanga Mmēnye ukuti sịkajako nasịmo isị sịndegēnịe; buno sịsịsị sịkābōmbị̄gwe mbutị̄tu. 27Gwe Malafyale Agịlịpa, kubị̄tika abakụ̄ngụlụka? Mmēnye ukuti kubị̄tika. 28Po papo Agịlịpa alinkummwamụla Paulị alinkuti: Kukabalilo akapị̄mba ịtolo kulōnda ukūmbela ukuja Nkilisịtị! 29Umwene Paulị alinkummwamụla alinkuti: Nalīnga kabalilo kapị̄mba, nalinga katalị, nansūmaga Kyala ukuti, bōsa aba bịkūmbilikisya, umụsyugu bajege bo jujune lolị kwene ku kupịnyịgwa ko bangafwanaga nanịne.

30Po papo umalafyale alinkusụmụka pamopēne nundindililakị̄su na Belenịke na bōsa aba bātūgasēnịe nabo. 31Lelo bo basōkịlepo balinkubūlana balinkuti: Umụ̄ndu jujuju atịkubōmba nasịmo isị sịbagị̄le ukugogịgwa pamo ukupịnyịgwa. 32Umwene Agịlịpa alinkummbūla Fesịtị alinkuti: Umụ̄ndu jujuju angali ābulị̄gwe, linga akājobịle ukuti ịkukīnda kwa Kesalị.

Currently Selected:

Īmbōmbo Sya Batumịgwa 26: NYB96

Highlight

Compare

Copy