Īmbōmbo Sya Batumịgwa 28

Paulị mụ Molịta

1Lelo bo tuponịle, tulinkulumanya ulusūngo lulūlu ukuti lo ulu bịkuti Molịta īngamụ. 2Po papo abenekị̄su ba mụmo, balinkutwambilila nubolōlo fị̄jo ubu umụ̄ndu atịkubwagamo bwịla. Balinkutukokesya umōto, nukutwambilila twesa panōngwa ja fụla iji jatịmịle na panōngwa ja īmbepo. 3Lelo bo Paulị abūngēnịe akakose ka tubabu abīkịle mmōto, po papo īnjoka jilinkusōka panōngwa ja mōto, jilinkukinịemba ikiboko kya Paulị. 4Lolị abenekị̄su bo bajibwene īnjoka bo jịkusyụta pakiboko kyake, balinkubūlana balinkuti: Kisịta kwịlāmwa umụ̄ndu uju nngogị napapo āponịle kunyanja, lolị ugwa lubụkisyo atịkunndeka ukuti ajege mūmị. 5Lolị umwene Paulị alinkujisanyandila mmōto, sịlinkusịta nukummwaga nasịmo īmbị̄bị. 6Abēne lolị balinkusūbila ukuti ịkwịsulaga, pamo ịkugwaga nukufwa nakalīnga. Lelo bo bagụ̄lịle akabalilo akatalị, bāgịle sịtịkummbonekela nasịmo īmbalapala, po papo balinkusanụka ịtolo, balinkuti: Jo Kyala.

7Lelo kifụkị nubujo bula, fyālipo ifị̄su fya nkulūmba gwa lusūngo lula, uju īngamụ jake āli jo Pubili; jo alinkutwambilila nukutuswila kanụnụ amasịku matatu. 8Umwene ugwịse gwa Pubili ālāmbalēle, akāmandanị̄gwe nīsekema nulwa kumwanya. Po papo Paulị alinkwịngila mụmo āli, alinkwịpụ̄ta nukummbīkapo amaboko; po papo alinkummbumbulusya. 9Lelo bo sịbonị̄ke sịsịsị, po papo bōsa ababịne abāngi abā palusūngo papo balinkwịsa bope, balinkubūmbulusịgwa. 10Po papo balinkutwimika ulwimiko lu lwịngị fị̄jo; bo tụkusụmụka balinkutupakilila mụngalaba ifị twalyagị̄lwe.

Ukufụma mụ Molịta ukubūka mụ Loma

11Bo gikīndịle imyesị mịtatu, tulinkwịpaka mụngalaba ja mwa Alịkịsandalịja, iji jagonaga palusūngo mmapepo. Jāli nikifwanị kya bị̄pasya. 12Tulinkwakufịka mụ Sịlakusị, mo tulinkulinda amasịku matatu. 13Ukufụma mụmo tulinkusụmụka tulinkusyungūtila tulinkwakufịka mụ Legịjo. Lelo bo likīndịle ilị̄sịku limo, ummbelo gwa kwịtōngo gulinkwanda ukukula. Po papo pị̄sịku lya bubili tulinkwakufịka mụ Putyelị. 14Mo tulinkubāga abāmyitu, abēne balinkututengulila ukuti tugonepo nabo amasịku mahāno na mabili; po papo tulinkwenda nukwakufịka mụ Loma. 15Abēne abāmyitu ba mụmo bo bapilị̄ke, balinkwịsa kukutwambilila pa Apị Folụmụ na pa Inyụmba ịtatu isya bahēsya. Umwene Paulị bo ababwene alinkugwa ulupị kwa Kyala, alinkwenda nukusangamuka ịtolo.

Paulị mụ Loma

16Lelo bo tufịkịle mụ Loma, po papo Paulị alinkwịtikisịgwa ukuja mwene ịtolo pamopēne nunsịkali gwa kunndindilila.

17Lelo bo gakīndịle amasịku matatu, Paulị alinkubabilikila abalōngosị ba Bajụ̄ta. Abēne bo babūngēne, alinkubabūla alinkuti: Mwe bāmyitu, napapo une ngabōmbamo nasịmo isya kubaliga abā kikolo kyitu, pamo īnyị̄ho isya bị̄sukulu bītu, mbịnyị̄gwe ukufụma mụ Jelụsalemụ, mbīkị̄gwe mmaboko ga Balōma. 18Abēne bo bajēnēsịsye īnōngwa jangu, bālōndaga ukūnyābula, namanga bakājagịlemo najimo īnōngwa mmyangu ija kūngogela. 19Lelo bo Abajụ̄ta bamo bikukāna, sịlinkūmbelela ukuti ngīnde kwa Kesalị, napapo ngāli nasyo nasịmo isya kukilōnga ikikolo kyangu. 20Syo isi mbabilikilị̄le nukuti njobe nanụmwe; namanga panōngwa ja lusūbilo lwa Ịsịlaelị po apa mfwele unnyololo ugu. 21Lolị abēne balinkummwamụla Paulị balinkuti: Tukāmbililamo kalata ugwa nōngwa syako ukufụma mụ Jụtaị; kangi akị̄samo najumo mbanyitu ugwa kutubūla, pamo ugwa kukujoba ububibi 22Loli tụkulōnda ukupilika kumyako isị kwịnogona ugwe; namanga isya kapānga kakaka syo tumēnye mosamosa ịtolo bịkulwa nako.

23Lelo bo bị̄tikēne ilị̄sịku lya kwaganịla nagwe, po papo ba bị̄ngị ịtolo balinkubūka kuno āgonaga. Bo alinkubalinganịa nukubasịsịmikisya isya kitāngālala kya Kyala, ukufụma nulubūnju ukwakufịka namajolo, alinkugela ukubakwaba ukuti bị̄tikege isya Jesụ bo ịkulīngānịa ukwendela ndulagilo lwa Mose na mwa bakalata babakụ̄ngụlụka. 24Bamo sịlinkubakola isị ājobaga, lolị abāngi balinkusịta nukwịtika. 25Abēne bo bāgịle batịkupilikisanịa bābo batupu, balinkubalanịla bo Paulị ajobịle ilịsyu limolyene ilya Kuti: Ātalwịsye Mbepo Mwịkemo, apa ajobịle na ba mbukūlu bīnụ mwa Jesaja unkụ̄ngụlụka apa ạ̄tigi:

26Būkaga kubāndu bababa ukababūlege ukatigi:

Ukupilika ko mụkupilikaga,

lolị mụtịkusyaganịaga;

ukukēta ko mụkukētaga,

lolị mụtịkusịbonaga.

27Namanga īndụmbụla sya bāndu aba sị̄pelịle sịto,

īmbulukutu syabo sịli namapuli,

sịtịkupilika,

kangi amāso gābo gasịsị̄lịle;

ukuti bangakētaga namāso gābo,

bangapilikaga nimbulukutu syabo;

bangasyaganịaga nindụmbụla,

bangapīndukaga,

ko kuti nịse mbabumbulusyege.

28Po papo Paulị alinkumalisya ukujoba alinkuti: Syo mụsịmanyege lelo ukuti, ubupokị bwa Kyala ubu, butumịgwe kubāpānja, abēne bo bịsakupilikaga. [ 29Lelo bo ajobịle lilīli, po papo Abajụ̄ta balinkubūka, balinkukanịkana fị̄jo bābo batupu.]

30Umwene Paulị alinkugona ifyinja fịbili nnyụ̄mba jake, iji ahōmbelaga īndalama, alinkubalumbilila bōsa aba bị̄saga kumyake. 31Alinkufụmụsya ubutwa bwa Kyala, nukumanyịsya īnōngwa sya NTWA Jesụ Kilisịtị pabwelụ ịtolo kisịta kupīngịgwa.

Currently Selected:

Īmbōmbo Sya Batumịgwa 28: NYB96

Highlight

Compare

Copy