Īmbōmbo Sya Batumịgwa 25

Paulị ịkukīnda īnōngwa kwa Kesalị

1Umwene Fesịtị bo ịsịle mbulindililị bwake, bo gakīndịle amasịku matatu po papo alinkufyuka ukubūka mụ Jelụsalemụ ukufụma mụ Kesalịja. 2Po papo abapụ̄tị abakulūmba na balōngosi ba Bajụ̄ta balinkusịtwala nkyenị mmyake īnōngwa sya Paulị, balinnkumpyelesya Fesịtị, 3balinnkunsūma ukuti abīmilege, ammbilikilege Paulị ukuti ị̄sege mụ Jelụsalemụ; abēne bo bị̄tikēne unkunsịgila panjila nukunngoga. 4Umwene Fesịtị lolị alinkwamụla alinkuti: Paulị ịkulindililịgwa mụ Kesalịja, nanịne ndi pị̄pị ukubūka. 5Kangi alinkuti: Amụbaleke abalōngosị bīnụ bo babūkege nanịne ukuti bo bakanndōngege īmbị̄bị isị ali nasyo umụ̄ndu jujuju.

6Lelo Fesịtị bo agonịlemo amasịku lwele pamo kalōngo, po papo alinkusụlụka ukubūka mụ Kesalịja. Ulwa kilābo, alinkutūgasya pakikota kya bulōngelo, alinkulagila ukuti bantwalege Paulị. 7Lelo bo Paulị ịsịle, po papo Abajụ̄ta aba bāfụmịle ku Jelụsalemụ balinkunsyungūtila, balinkummōhēla īnōngwa īsịto sị nyịngị, isị bakābagị̄le nukusịsịmikisya. 8Umwene Paulị ukwịnokesya alinkuti: Ngatulamo īnōngwa najimo kululagilo lwa Bajụ̄ta, nalīnga ko ku nyụ̄mba ja kwịpụ̄tilamo, nalīnga ko kwa Kesalị. 9Umwene Fesịtị bo ịkulōnda ukuti bannjobēge ubunụnụ Abajụ̄ta, alinkummwamụla Paulị alinkuti: Bule kulōnda ukuti afyukege ukubūka ku Jelụsalemụ, ukuti mo ngalōngelege īnōngwa syako sịsịsị? 10Umwene Paulị alinkuti: Une nīmịle nkyenị nkikota kya bulōngị bwa Kesalị, po fịkuti ndōngelịgwege pāpo. Ngabaligamo nasịmo Abajụ̄ta, bo apa nanụngwe usịmēnye fị̄jo. 11Apēne lolị linga ndi ntulanōngwa, linga mbōmbịle sịmo isị sịmbagị̄le ukufwa, une ndịkukāna ukufwa. Lolị linga sịkajamo nasịmo isya nalolị mụli isị bịkundwalila pabulōngị bababa, po najumo akabagila ukumbīka mmaboko gāko. Ngusūma ukukīnda kwa Kesalị. 12Po papo Fesịtị bo ajobịle nabatūlị bāke, alinkwamụla alinkuti: Utịle nịkukīndaga kwa Kesalị, po papo kubūkaga ku kwa Kesalị.

Paulị nkyenị mwa Agịlịpa na Belenịke

13Lelo bo pagonịlepo, po papo umalafyale Agịlịpa na Belenịke balinkubūka mụ Kesalịja kukumponịa Fesịtị. 14Lelo papo bāgonịlemo mụmo amasịku mịngị, po papo Fesịtị alinkumpāngila umalafyale īnōngwa ja Paulị, alinkummbūla alinkuti: Ālịpo umụ̄ndu jumo uju Felịkị ālinndekịle mụnnyololo, 15uju bo une ndi mụ Jelụsalemụ, abapụ̄tị abakulūmba na bakulu ba Bajụ̄ta bāsịtwele īnōngwa syake kumyangu nukusūma ukuti nunndōngege nukumfụ̄nda: 16Abēne bo ndinkubāmụla ndinkuti: Lukaja lwịho lwa Balōma ukubābulila umụ̄ndu gwesa ugwa nōngwa, bo akāli ukwaganịla nabānōngwa jake, ukuti akāgege akabalilo ka kwịnokesya īnōngwa jake iji bantwalị̄le pabulōngị. 17Lelo bo babūngēne papapa, po ndinkusịta nukuhābapo, kilābo kyake ndinkutūgasya pakikota kya bulōngị, Ndinkubalagila ukuti bantwale umụ̄ndu jula. 18Lelo bo bīmịle abānōngwa jake, balinkusịta nukutwala nasịmo īnongwa īmbị̄bị bo mụmo bịnogonelaga. 19Lolị ndinkwaga masyu gamo ga lukānị ịtolo panōngwa ja kwịpụ̄ta kwabo, nisya mụndu jumo Jesụ uju āfwịle, lolị uju Paulị ịkuti mūmị ịtolo. 20Lelo bo ndolị̄gwe ukusyaganịa īnōngwa sịsịsị, po papo ndinkunndālūsya Paulị linga ālōndaga ukubūka mụ Jelụsalemụ, ukuti mo sịkalōngelịgwege syosa sịsịsị. 21Lelo Paulị bo asūmịle ukuti alindililịgwege ukufịka papo ịsakutụmụlaga īnōngwa Kesalị, po papo ndinkulagila ukuti alindililịgwege ukufịka papo nịsakuntumaga kwa Kesalị. 22Po papo Agịlịpa alinkummbūla Fesịtị alinkuti: Nịne nālōndaga ukumpilikisya umụ̄ndu jujuju. Umwene Fesịtị alinkuti: kumpilikisyaga kilābo.

23Lelo nulubūnju, Agịlịpa na Belenịke balinkwịsa nubusịsya ubukulūmba, balinkwịngila mbulōngelo īnōngwa, pamopēne na balōngōsị ba basịkali, abakulūmba ba kāja. Lelo bo Fesịtị alagị̄le, po papo balinkuntwala Paulị. 24Po papo Fesịtị alinkujoba alinkuti: Gwe Malafyale Agịlịpa, na mwesa mwe banyāmbala mwe mụli papapa, mụkummbona umụ̄ndu uju, jo uju ikilūndilo kyosa kya Bajụ̄ta mụnomụno na mụ Jelụsalemụ kyasūmaga kumyangu, kilinkujwega ukuti: Umụ̄ndu jujuju, akabagila ukuti ajēngeko kubūmị. 25Lelo une nāgịle akabōmba nasịmo isya kumpelela ukugogịgwa. Umwene lolị bo asūmịle ukukīnda kwa Kesalị, po papo ndinkutụmụla isya kuti nịkuntumaga. 26Lelo une ngaja nasyo nasịmo mmụ̄ndu uju isya bwanalōlị, isya kunsị̄mbila umalafyale; fyobēne nuntwele kumyinụ, fịjo kumyako gwe Malafyale Agịlịpa, ukuti po tunndālūsyege sịmo isya kusị̄mba. 27Namanga une nịkuti sịkujaga sya bukonyofụ ịtolo ukuntuma umpịnyịgwa, kisịta kusị̄mba īnongwa isị ịkulōngịgwa.

Currently Selected:

Īmbōmbo Sya Batumịgwa 25: NYB96

Highlight

Copy