Īmbōmbo Sya Batumịgwa 24

Paulị ịkutwalịgwa pabulōngị na Bajụ̄ta

1Lelo bo gakīndịle amasịku mahāno, po papo umpụ̄tị unkulūmba Ananịja alinkubūka na bakulu bamo, pamopēne nunjobanōngwa jumo uju āli jo Telịtula īngamụ. Bo balinkumpāngila unndindililakị̄su isị bālintwalị̄le pabulōngị Paulị. 2Umwene Paulị bo abilikilịgwe, po papo Telịtula alinkwanda ukunsịtāka alinkuti:

Gwe mwimikịgwa Felịkị, ubulōngosị bwako ubunụnụ butwele ulutengano ulukulūmba, kangi isị sịkulōndịgwa ukwandula nukusịtendekesya panōngwa ja kikolo kyitu, 3mụnjila syosa na mōsamōsa, po papo lelo tụkusyambilila nukugwa ulupị fijo. 4Lolị kisịta kukukabisya, nịkupyelesya ukuti nkisa kyako utupilikisyege bo tụkusịnyaka ịtolo īnōngwa sịsịsị. 5Namanga tummwagịle umụ̄ndu jujuju ukuti ị̄pelịle mbūngo ja kilalīlali ịtolo, ịkupasyula Mbajụ̄ta nkị̄su kyosa. Jo nndōngosị gwa kibụgụtila kya Banasaletị. 6Kangi āgelaga nukujinyasya īnyụ̄mba ja kwịpụ̄tilamo; po papo tulinkunkola. [Twalōndaga ukunndōnga ukukōngana nululagilo lwitu. 7Lolị Lịsịja unkulūmba gwa basịkali alinkwịsa nukunsōsyamo mmaboko gītu kumaka, 8alinkubalagila aba nōngwa jake ukuti bị̄sege kumyako.] Nanungwe lelo linga kummwanịa jūjo, po ubagị̄le ukusyaga syosa sịsyo twanndōngaga. 9Bope na Bajụ̄ta balinkōngāna nagwe pakummōhela, ukuti nalolị bo sịli isị bịkunndōnga.

Paulị ịkwịnokesya nkyenị mwa Felịkị

10Po papo unndindililakị̄su alinkusosōla Paulị nikiboko ukuti ajobēge. Umwene Paulị alinkwamụla alinkuti: Ndinulusekelo ukwịnokesya nkyenị mmyako, papo Mmēnye ukuti ugwe uli nndōngị gwa kikolo kikīki ifyinja fị fị̄ngị. 11Nanụngwe linga utịle nānịege, kwịsakwaga ukuti gakakīndapo amasịku kalōngo na mabili, ukufụma apa nābūkịle mụ Jelụsalemụ nkwịpụ̄ta. 12Kangi bakānyāgamo mụnyụ̄mba ja kwịpụ̄tilamo bo nịkukānịkana nagwe jumo, kōpe nkutwala īmbasyulo nkilūndilo kya bāndu ngapasyulamo, nalīnga mụjẹ mo nnyụ̄mba ja kwịpụ̄tilamo pamo nkāja. 13Syope nisị bịkundwalila pabulōngị papapa, bakabagila ukusịsịmịkisya. 14Lolị isị mbagị̄le ukwịtika kumyako syo sya kuti une ngwịpụ̄ta kwa Kyala ugwa bị̄sukulu bītu ngukōnga injila iji abēne bịkuti ko kapāngo ịtolo, une nịkusịtika isị sịsị̄mbị̄gwe mwa bakalata ba ndagilo na mbakụ̄ngụlụka. 15Ndi nulusūbilo mwa Kyala, bo lulo bope bịkulwịtika, ulwa kuti kwịsakujako ukusyuka kwa bāndu bōsa, abagolofụ na batulanōngwa. 16Po apa nanịne nịkwịjūla ukuti īnyịbonelo syangu sịngajaga niịbabye nalịmo nkyenị mwa Kyala, na nkyenị mmbāndu utubalilo tōsa.

17Bo ndugēle kubutalị ifyinja fị fị̄ngị, ndịkugomoka ku Jelụsalemụ ukuti mbatwalilege abā kikolo kyangu ifyabusūsilwa nifyakwịkemēsya. 18Po apa balinkunyāga mụnyụ̄mba ja kwịpụ̄tilamo bo nịjēlwịsye kisịta kilūndilo kya bāndu, kangi kisịta njwego nagumo. 19Lolị bālipo Abajụ̄ta bamo abā mwa Asịja aba bālinyāgịle, bo aba babagị̄le ukujapo papapa nkyenị mmyako, nukundwala pabulōngị kuli sịmo isị linga bali nasyo kumyangu. 20Nalīnga bo bababa, balījobaga ububị̄bị ubu babwagị̄le mmyangu bo nīmịle nkyenị ndukomāno. 21Pamo lyene ilịsyu lila ndātege bo bīmịle ndukomāno ili nạ̄tigi: Umụsyugu ngulōngịgwa nkyenị mmyinụ panōngwa ja kusyuka kwa bafwe.

22Umwene Felịkị bo asịmēnye bunụnụ īnōngwa sya njila jijiji, po papo alinkubīmịka tāsị alinkuti: Linga asụlwịkeko Lịsịja, unsịkali unkulūmba, po nịsakusịmalisyaga īnōngwa syinụ. 23Po papo lelo alinkusōsya īndagilo ukuti abīkịgwege mụnnyololo, lolị ajege mwabuke panāndi, kangi mbamanyānị bāke najumo angakanịsịgwaga ukuntūla mụli fịmo ifị ịkulōnda.

Paulị nkyenị mwa Felịkị na Ndụlụsịla

24Lelo bo gakīndịle amasịku manāndi, po papo alinkwịsa Felịkị nunkasị gwake Ndụlụsịla, uju āli Njụ̄ta, alinkutuma īndumị ija kummbilikila Paulị, alinkumpilikisya bo ịkujoba isya lwịtiko lwa mwa Kilisịtị Jesụ. 25Lelo bo ịkusịjoba isya bugolofụ, nisya kwịfị̄mbilisya, nisya kulōngịgwa uku kukwịsaga, po papo Felịkị alinkutetema, alinkwamụla alinkuti: Lilino būkaga tāsị, ngukubilikilaga kangi bo nkāgịle akabalilo akanụnụ. 26Kulubafụ lumo āsūbilaga ukuti pamo Paulị ịkunhōmbaga īndalama. Po apa alinkumbilikila kabili kabili ukwangala nagwe. 27Lelo bo fịkīndịle ifyinja fịbili, po papo Polịkị Fesịtị alinkupyanịlapo pa Felịkị. Umwene Felịkị bo ịkuti mbasekēsye Abajụ̄ta, po papo alinkundeka Paulị mụnnyololo.

Currently Selected:

Īmbōmbo Sya Batumịgwa 24: NYB96

Highlight

Copy