Īmbōmbo Sya Batumịgwa 23

1Po papo Paulị alinkubalūlalila aba ndukomāno, alinkujoba alinkuti: Mwe bāmyitu, ndi gwa nyịbonelo īnụnụ ịtolo nkyenị mwa Kyala ukufịka kulilino kuno. 2Umwene lolị umpụ̄tị unkulūmba Ananịja alinkubalagila aba balyimịle pabupị̄pị nagwe, ukuti bankome niịpi kukanwa. 3Po papo Paulị alinkummbūla Ananịja alinkuti: Kyala ịsakukukoma gwe ịmato lya mpānya ugwe; gwe utūgēle pakundōnga une ukukōngana nululagilo, kangi kukịlanịa ululagilo apa kulagila ukuti ngomịgwege? 4Abāndu aba bālyimile papo balinkuti: Gwe gwāti untukege umpụ̄tị unkulūmba gwa Kyala? 5Umwene Paulị alinkuti: Mwe bāmyitu, ngālimmēnye ukuti mpụ̄tị nkulūmba. Namanga lisị̄mbị̄gwe ili lịkuti: Ungannjobaga ububị̄bị unndagilị gwa bāndu bako.

6Lelo Paulị bo asyagēnịe ukuti ikijabo kimo kyali kya Basatukaị, ikīngi kyali kya Bafalịsaị, alinkukōlela ndukomāno alinkuti: Mwe bāmyitu, une ndi Mfalịsaị, ndi mwana gwa Bafalịsaị. Une ndwalị̄gwe pabulōngelo ukuti ndōngịgwege panōngwa ja lusūbilo lwangu lwa kusyuka kwa bafwe. 7Lelo bo ajobịle lilīli, po papo lulinkutụpụka ulukānị nkāti Mbafalịsaị na Basatukaị, lōpe nulukomāno lulinkutapukana. 8Namanga Abasatukajị bịkuti kukajako ukusyuka, bope na bandumị bakajako, jope na Mbepo akajako. Lolị Abafalịsaị bo bịkusị̄tika syosa ịtatu. 9Po papo gulinkujapo unjwego gu mwịngị. Balinkusụmụka abamanyandagilo bamo abā kulubafụ lwa Bafalịsaị, balinkukānịka balinkuti: Uswe tukajagamo najimo īnōngwa mmụ̄ndu uju. Apēne lelo linga Mbepo ajobịle nagwe pamo ugwandumị po sya fịkị?

10Lelo ulukānị bo lukīndịle, unkulūmba gwa basịkali alinkutị̄la ukuti bangịsakunnyāfụlanịa Paulị. Po papo alinkubalagila abasịkali ukuti basụlụkege bakị̄ngile nkilūndilo kila bakansosyengepo Paulị kumaka pakāti pamyabo, nukuntwala nkāti mwịlị̄nga.

11Lelo ikilo kila UNTWA ālinsetukị̄le Paulị, alinkummbūla alinkuti: Kị̄baga ịtolo, namanga bo papo usịsịsịmikị̄sye une mụ Jelụsalemụ, bo fikuti ukāsisimikisyege bunobuno mope na mụ Loma.

Abajụ̄ta bịkwịtikana ukunngoga Paulị

12Lelo bo bukị̄le, Abajụ̄ta balinkwịtikana, balinkujị̄ganịka ulujīgo ukuti batịkulyaga ifị̄ndu nukunwa ukufịka papo bịkunngogaga Paulị. 13Abēne aba bājīgịle, bākīndịle pamalōngo mana ubwịngị. 14Bo balinkubūka kubapị̄tị abakulūmba na kubakulu balinkuti: Uswe tujīgịle ulujīgo ulukulūmba, ukuti tutịkulyaga ifị̄ndu ukufịka pāpo tụkunngogaga Paulị. 15Lilino lelo, umwe pamopēne nulukomāno lwa bakulu, mụmmbūle unkulūmba gwa basịkali, ukuti ansụlụsye Paulị antwale kumyịnụ, mụfwanege mụkulōnda ukusyaganịa bunụnụ īnōngwa syake. Lolị uswe twịtendekīsye ukunngoga, bo akāli nukusegelela.

16Lolị umwana unndumyana gwa ịlūmbu gwa Paulị, bo apilị̄ke isya kuntegelela kwabo, alinkubūka nukwakwịngila nkāti mwịlị̄nga, alinkumpāngila Paulị. 17Po papo Paulị alinkummbilikila unsịkali unkulūmba jumo, alinkummbūla alinkuti; Kammbīke unndumyana uju kunkulūmba gwa basịkali, po ali nasyo sịmo isya kummbūla. 18Umwene unsịkali unkulūmba alinkummwega unndumyana jula alinkubūka nagwe kunkulūmba gwa basịkali, alinkwakummbūla ukuti: Umpịnyịgwa jula Paulị āmbilikị̄le nukūsūma, ukuti nuntwale unndumyana uju kumyako papo ali nasyo sịmo isị ịkulōnda ukukubūla. 19Po papo unkulūmba gwa basịkali alinkunkola ikiboko, alinkwepukapo, nukwakwịjēkela nagwe, alinkunndālūsya alinkuti: Syo sịliku isị uli nasyo isya kumbūla? 20Umwene alinkuti Abajụ̄ta bị̄tikēne ukukusūma ugwe kilābo, ukuti untwalege Paulị kulukomāno, ko kuti bafwanege bịkulōnda ukunndālūsya bunụnụ īnōngwa syake. 21Loli ugwe ungabị̄tikaga. Namanga abāndu aba bakīndịle na pamalōngo mana bansịgị̄le, bajīgịle ulujīgo ukuti batịkulyaga kangi batịkunwaga, ukufịka papo bịkunngogaga Paulị. Lilino lelo bịtendekị̄sye bịkugụ̄lila ukubịtikisya kwako. 22Po papo unkulūmba gwa basịkali alinkunndekesya unndumyana ukuti abūkege, alinkunkānịsya ukuti: Ungajakummbūlaga najumo umụ̄ndu ukuti ūmmbūlịle sịsịsị.

Paulị ịkutumigwa kwa Felịkị unndindilila kị̄su

23Po papo unkulūmba gwa basịkali alinkubabilikila abasịkali abakulūmba bāke babili, alinkubabūla alinkuti: Amụbasale abasịkali bāmịa babili abā kubūka mụ Kesalịja, naba pafalasị amalōngo mahāno na mabili, nabakolelangwego bāmịa babili. Basụmụkege pakabalilo ka butatu pakilo. 24Syope nifalāsị sya kunkwesyapo Paulị mụsịsalile ngānịla. Ukuti mụkamfịkisyege kanụnụ ịtolo kwa Felịkị unndindilila kị̄su. 25Po papo unkulūmba gwa basịkali alinkusị̄mba kalata uju ịkuti.

26Jo une ne Kilautịja Lịsịa nịkukusị̄mbịla gwe nndindilila kị̄su, gwe mwimikịgwa Felịkị, nịkukuponịa.

27Umụ̄ndu uju ākolị̄gwe na Bajụ̄ta, balōndaga ukunngoga; po papo ndinkubūka nikilūndilo kya basịkali ndinkumpoka, bo nsyagēnịe ukuti Nndōma. 28Lelo bo ngulōnda ukusyaganịa isị bampēlelaga īnōngwa, po papo ndinkuntwala kulukomāno lwabo. 29Ndinkwakwaga ukuti isị bantwalị̄le pabulōngị syo sya lukānị lwa lulagilo lwabo, lolị jikālipo najimo īnōngwa ija kuti agogịgwege pamo ukupịnyịgwa. 30Lelo bo mbūlị̄gwe ukuti Abajụ̄ta bị̄tikēne ukunngoga umụ̄ndu uju, po apa nakalīnga ịtolo nuntumịle kumyako, bope naba nōngwa jake, mbalagị̄le ukuti bị̄se bajobēge nkyenị mmyako īnōngwa iji bịkuntwalila pabulōngị.

31Po papo abasịkali bala balinkummwega Paulị bo mụmo balagilị̄gwe, balinkwenda nagwe pakilo balinkwakufịka nagwe mwa Antịpatelị. 32Nulubūnju balinkubalekela abā pafalasị, bo balinkubūka nagwe. Abēne balinkugomoka ukubūka mwịlị̄nga lyabo. 33Abēne bala bo balinkwakufịka nagwe mụ Kesalịja, bo bampēle kalata unndindililakị̄su, balinkummbīka Paulị mmaboko gāke. 34Umwene Felịkị bo abalịle kalata, po papo alinkunndālūsya Paulị ikị̄su kuno āfụmịle. Lelo ābūlị̄gwe ukuti gwa mụ Kịlịkịja, 35po papo alinkuti: Ānịkupilikisyaga īnongwa jako bo aba bakutwele pabulōngị bị̄sịle. Po papo alinkulagila ukuti Paulị alindililịgwege mụnyụ̄mba ja bulindililakị̄su ja Helotị.

Currently Selected:

Īmbōmbo Sya Batumịgwa 23: NYB96

Highlight

Copy