Īmbōmbo Sya Batumịgwa 22

1Mwe bāmyitu na mwe bātāta, amụpilikisyege isị ngujoba isya kwịnokesya lilino nkyenị mmyinụ. 2Abēne bo bāgịle ukuti ịkujobela mụnjobelo ja Kihịbụlị, balinkōngelapo ukuja mye. Po papo Paulị alinkujoba alinkuti: 3Une ndi Njụ̄ta, nāpāpị̄gwe mụ Talịsị nkisu kya mụ Kịlịkịja. Nākulīle nkāja kakakā ka Jelụsalemụ mmalūndi ga Gamalyelị. Namanyịsīgwe fījo ukulukōnga ululagilo lwa ba mbukūlu bītu. Nabikilepo fị̄jo umōjo pambōmbo ja Kyala, bo mụmo mụkubōmbela nanụmwe lilino. 4Ndikubafwima aba bākōngaga injila jijiji, kōpe nukubagoga ndinkubagoga. Ndinkubapịnya abanyāmbala na bakị̄kulu, ndinkubị̄galila mụnyụ̄mba ja bannyololo, 5bo apa umpụ̄tị unkulūmba nulukomāno lōsa lwa bakulu bābagị̄le ukusịsịmịkisya. Bo aba bālīmbēle bakalata ba kubatwalila abāmyitu Abajụ̄ta aba bāli mụ Ndamasịka. Ndikubūka mụ Ndamasịka ukuti ngabapị̄nyege abāndu bōsa aba bāli mụmo, nukubatwala mụ Jelụsalemụ ukuti mo bakafụ̄ndịgwege.

Paulị ịkujoba isya lupīnduko lwake

(Batu. 9:1-19; 26:12-18)

6Lelo bo nịkwenda, nsegelị̄le mụ Ndamasịka, bo ilị̄suba lili pantu, nakalīnga ịtolo ndinkwaga ulumụlị ulukulūmba lụkufụma kumwanya, lulinkumụlika īmbafụ syosa apa nālipo. 7Po papo ndịkugwa pāsi, ndinkupilika ilịsyu lịkujoba nanịne lịkuti: Gwe Saulị, gwe Saulị, kūfwima fịkị? 8Po papo une ndinkwamụla ndinkuti: Gwanị, Malafyale? Umwene alinkummbūla alinkuti: Jo une ne Jesụ gwa mụ Nasaletị ne kūfwima. 9Abēne aba nāli nabo balinkulubona ulumụlị, lolị bakālipilị̄ke ilịsyu lya uju ājobaga nanịne. 10Po papo ndinkunndālūsya ndikuti: Mbōmbēge fịkị lelo gwe NTWA? Umwene UNTWA alinkummbūla alinkuti: Sụmụkaga ubūkege mụ Ndamasịka, mo kwakubūlịgwaga syosa isị sịlagilị̄gwe ukuti syo usịbōmbēge. 11Panōngwa ja lumụlị ulukali lula, ndinkwaga ndịkukēta, po papo abị̄nāngu bala nāli nabo balinkūngola ikiboko mpaka ndinkwakufịka mụ Ndamasịka.

12Lelo ālimo mụmo umụ̄ndu jumo uju āli jo Ananịja īngamụ, uju antị̄laga Kyala, nululagilo lwitu, uju īmikịgwaga fị̄jo na Bajụ̄ta bōsa aba bālimo mụ Ndamasịka. 13Jo alinkwịsa kumyangu kukūngēta, alinkwima pabupị̄pị nanịne, alinkummbūla alinkuti: Gwamyitu Saulị, kētaga kangi! Po papo pakabalilo kalakala ndinkwenda nukukēta kangi, ndinkummbona. 14Po papo Ananịja alinkummbūla alinkuti: Kyala gwa bị̄sukulu bītu akusalịle ukuti ubumanyege ubwịgane bwake, nukummbona Ummbōmbị gwake unngolofụ, kangi nukupilika ilịsyu lyake jūjo bo ịkujoba. 15Namanga kwịsakujaga nkētị gwake kubāndu bōsa, kwịsakusịsịmikisyaga isị usịbwene naisị usịpilị̄ke. 16Lilino lelo kukābila fịkị? Sụmụka gōsịgwege, usụkịgwege īnōngwa syako, bo kujijoba īngamụ jake.

Ulubilikilo lwa Paulị kukubalūmbilila abapānja

17Po papo ndinkugomokelamo kangi mụ Jelụsalemụ, lelo bo ngwịpụ̄ta nnyụ̄mba ja kwịpụ̄tilamo, ndinkukomwa. 18Ndinkummbona UNTWA ịkūmbūla ịkuti: Endelelaga usōkemo mbibimbibi mụ Jelụsalemụ, namanga abāndu ba mụmo batịsakusyambililaga isị kūsịsịmikisya une. 19Une ndinkummwamula ndinkuti: Gwe NTWA, kēta abēne bāmēnye ukuti jo une nāsyungūtilaga nnyụ̄mba sya kwịpụ̄tilamo syosa nābakolaga nukubị̄galila nnyụ̄mba sya bannyololo, kangi nābakomaga bōsa aba bākwịtikaga ugwe. 20Pope na pala lyonekaga ilịlopa lya Sịtefanị unkētị bo ịkugogịgwa, na jujune nālyimịle papo ndinkuti bajị̄le, ndinkulindilila imyenda gyabo bābo banngogaga umwene. 21Po papo umwene UNTWA alinkummbūla alinkuti: Būka, namanga nịkukutumaga kubutalị kubāpānja.

22Abēne bo bịkumpilikisya ukwịsakufịka pị̄syu lilīli, po papo balinkwịnula amasyu gābo balinkuti: Nsōsyope umụ̄ndu bo jujuju pakị̄su apa; namanga kukammbagila ukuti ajēngeko kubūmị. 23Lelo bo bịkujwega, bịkutāga imyenda gyabo nukusopa ulufụ̄mbi kumwanya, 24po papo unkulūmba gwa basịkali alinkulagila ukuti bammwịngisyege mwịlị̄nga, kangi alinkuti alālūsịgwege bo ịkukomịgwa nifịkotị ukuti basịmanyege isị banjwegelelaga Abajụ̄ta bunobuno. 25Abēne lelo bo bampịnyịle ukuti bankomege nifịkotị, po papo Paulị alinkunndālūsya uju ālyimịle pāpo alinkuti: Kali sị̄tikisị̄gwe umwe ukunnkoma Unndōmo bo akalōngịgwa? 26Umwene unndōngosi jula bo apilị̄ke lilīli, alinkubūka kunkulūmba gwa basịkali alinkwakummbūla alinkuti: Kulōnda ukubōmba sya fịkị? Buno umụ̄ndu uju Ndōma. 27Po papo unkulūmba gwa basịkali ainkummbūkila Paulị, alinkunndālūsya alinkuti: Ūmbūle bule uli Nndōma? Umwene Paulị alinkuti: Ena, 28Po papo unkulūmba gwa basịkali alinkummwamụla alinkuti: Une mbukabịle Ubulōma nindalama sị nyịngị fị̄jo. Umwene Paulị alinkwamụla alinkuti: Loli une nāpāpị̄gwe ndi Nndōma. 29Abēne aba bālōndaga ukunndālūsya balinkwepukapo nakalīnga ịtolo, jope nunkulūmba gwa basịkali alinkutetema bo asyagēnịe ukuti Paulị Nndōma, kangi panōngwa ja kuti ālimpịnyịle.

30Ulwa kilābo unkulūmba gwa basịkali alinkulōnda ukujaganịa bunụnụ īnōngwa iji jabapelịle Abajụ̄ta ukuti banndōngege Paulị. Po papo alinkummwabula Paulị imịnyololo, alinkulagila ukuti abapụ̄tị abakulūmba pamopēne nabā lukomāno bōsa babūngānege; po papo alinkuntwala Paulị, alinkummbīka nkyenị mmyabo.

Currently Selected:

Īmbōmbo Sya Batumịgwa 22: NYB96

Highlight

Copy