Īmbōmbo Sya Batumịgwa 21

Paulị ịkubūka mụ Jelụsalemụ

1Lelo bo tulagēne nabo, po papo tulinkwịpaka mụngalaba, tulinkugoloka ịtolo ukubūka mụ Kosị. Ulwa kilābo tulinkufịka mụ Loto, ukufụma mụmo tulinkwakufịka mụ Patala. 2Mo tulinkwakujaga īngalaba iji jabūkaga mụ Fenịke; tulinkwịpaka tulinkubūka. 3Lelo bo tufịkịle pabujo apa lwabonekaga ulusūngo lwa Saịpụlasị, po papo tulinkululeka kukị̄mama, tulinkubūka mụ Sịlịja, tulinkufịka mụ Tịlị; namanga mo īngalaba jasụlụsyaga ifịtwalo. 4Lelo bo tubalōndịle abị̄tikị tubagị̄le, tulinkugonamo mụmo amasịku mahāno na mabili. Abị̄tikị bala balinkummbūlila mwa Mbepo Paulị ukuti angafyukaga ukubūka mụ Jelụsalemụ. 5Lelo bo gamalị̄ke amasịku gītu, po papo tulinkusụmụka tulinkubūka. Abēne bōsa pamopēne na bakasị bābo na bānābo, balinkutusịndikila ukusōka nkāja. Bo tufịkịle kūmbali kunyanja po papo tulinkufugama pāsi tulinkwịpụ̄ta. 6Po papo tulinkulagana nabo, uswe tulinkwịpaka mụngalaba, abēne balinkugomoka ukubūka kumyabo.

7Uswe tulinkwendelela ninjila jītu ukufụma mụ Tịlị, tulinkwakufịka mụ Tolemai, mo tulinkubaponịa abāmyitu, tulinkugona nabo ilị̄sịku limo. 8Ulwa kilābo tulinkusụmụka, tulinkwakufịka mụ Kesalịja, tulinkwakwịngila nnyụ̄mba ja Fịlịpụ unndumbililị gwa Ịbāngilị, uju jo jumo mụli bala bahāno na babili aba bāsalị̄gwe mụ Jelụsalemụ. Po papo tulinkugona mmyake. 9Jo āli nabāna abalindwana bāna abasịtakwegịgwa; aba bākụ̄ngụlụkaga. 10Lelo bo tugonịlepo amasịku gamo pāpo, po papo alinkusụlụka unkụ̄ngụlụka jumo ukufụma mụ Jụtaị, uju ali jo Agabu īngamụ. 11Bo ịsịle apa twalịpo, po papo alinkwega umpāngo gwa Paulị, alinkwịpịnya amalūndi gāke na maboko alinkuti: Bo ịkuja bunobuno Mbepo Mwịkemo ịkuti: Umwenempāngo gugūgu bo bịsakumpịnyaga bunobuno Abajụ̄ta ba mụ Jelụsalemụ, nukummbīka mmaboko ga bāpānja. 12Lelo bo tupilị̄ke sịsịsị, uswe na bāndu ba mụmo tulinkumpyelesya ukuti angafyukaga ukubūka ku Jelụsalemụ. 13Umwene Paulị alinkwamụla alinkuti: Mụkubōmba sya fịkị apa mụkulila? Mụkulōnda ukūnyogonyola īndụmbụla jangu? Mụngātigi nịjalị̄le ku kupịnyịgwa kwene mụ Jelụsalemụ, himma, lolị na ku kufwīla panōngwa ja ngamụ ja NTWA Jesụ. 14Lelo bo tutolị̄gwe ukuntēngulila, po papo tulinkunndeka tulinkuti: Ubwịgane bwa NTWA bo bubōmbịgwege.

15Bo tugonịlepo amasịku gamo, po papo tulinkupịnya ifịtwalo fyitu, tulinkufyuka ukubūka ku Jelụsalemụ. 16Tulinkubūka nabo bope bamo abafụ̄ndịgwa ba mụ Kesalịja, bo balinkwakutubīka kwa Mụnasonị uju twabūkaga kukutūgala nagwe kukabalilo akapị̄mba. Mụnasonị āli mụ Sakịbelị āli mwịtikị gwa masịku mị̄ngị.

17Lelo bo tufịkịle mụ Jelụsalemụ, po papo abāmyitu balinkutwambilila nulusekelo ulukulūmba. 18Ulwa kilābo, Paulị alinkubūka kukumponịa Jakobụ pamopēne nanụswe; bōsa na bakulu bākipānga balinkujapo. 19Lelo bo abaponị̄sye, po papo alinkubapāngila syosa mụno syajīlị̄le. Isị Kyala āpelịle mbāpānja mbubōmbelị bwake. 20Abēne bo bapilị̄ke, balinkuntụ̄fya Kyala, balinkummbūla Paulị balinkuti: Kēta gwamyitu, mụmo bajīlị̄le Abajụ̄ta baelufụ ba bị̄ngị aba bị̄tị̄ke; bōsa ịtolo bịkukola numōjo gōsa ululagilo lwa Mose. 21Abēne bābūlị̄gwe īnōngwa syako, ukuti kubamanyịsya Abajụ̄ta bōsa aba bali mbāpānja ukuti bangalutị̄laga ululagilo lwa Mose, kangi nukuti bangababụ̄taga ububụ̄tịgwa abānābo nukuti bangasịkōngaga īnyị̄ho sya Bajụ̄ta. 22Kali po tutigi fịkị? Sịli pabwelụ ịtolo bōsa bịsakupilikaga ukuti gwịsịle. 23Lilino lelo ubōmbēge isị tụkukubūlaga. Tuli nabo abāndu bāna aba bị̄pịnyịle ndujīgo, 24bo ubēgege bababa ukị̄jelusyege nabo ubahōmbelege jujugwe ukuti bammwege īnywịlị syabo. Po abāndu bōsa bịsakusyaganịaga ukuti īnōngwa syako syosa isị bābūlịgwaga sya ịtolo; lolị bakwage nanụngwe kwenda ndulagilo lwa Mose, nukulukōnga. 25Isyene lolị isya bāpānja aba bị̄tị̄ke, syo tubasị̄mbị̄le kalata isị tutụmwịle ukuti: Bangālyaga nafịmo ifị fisōsịgwe kufịfwanị ukuja ịkemo, banganwaga ilịlopa bangālyaga īnyama ja kinyamāna iki kipị̄tị̄gwe kummịlo, kangi bịjēpusyengeko na kubulogwe. 26Po papo Paulị ulwa kilābo alinkubēga abanyāmbala bala, alinkwịjēlusya nabo, alinkwịngila nnyụ̄mba ja NTWA, alinkufụmụsya mụno gājaga pakumalikila amasịku ga kwelusịgwa niịkemo lya kwịkemēsya ilya jumojumo ili lyajaga pakutwalịgwa.

Paulị ikukolịgwa nnyụ̄mba ja kwịpụ̄tilamo

27Lelo bo gịkuja pakumalika amasịku mahāno na mabili gala, po papo Abajụ̄ta aba bāfụmịle mwa Asịja, bo bammbwene Paulị nnyụ̄mba ja kwịpụ̄tilamo, balinkukisāmbulanịa ikilūndilo kya bāndu kyosa, balinkunkola, 28balinkujwega balinkuti: Mwe bāndu ba Ịsịlaelị, ịsaga mụtutūle! Umụ̄ndu uju jo uju ịkumanyịsya mōsa ịtolo isị sịkīndēne nikikolo kyitu, isị sịkulupīnga ululagilo lwa Mose na pabujo ubwịkemo ubu. Pamwanya pali sịsịsị, abị̄ngị̄sye Abagịlịkị nnyụ̄mba ja kwịpụ̄tilamo, abunyasị̄sye ubujo ubwịkemo ubu. 29Namanga bālimmbwene Tịlofịmụ Umwefesị bo ịkwenda nagwe nkāja, balinkwịnogona ukuti kīngamo Paulị ālintwēle nnyụ̄mba ja kwịpụ̄tilamo. 30Po papo akāja kōsa kalinkusāmbuka, abāndu balinkubūngāna mbibimbibi, balinkunkola Paulị, balinkunkwaba nukunsōsyamo nnyụ̄mba ja kwịpụ̄tilamo. Nakalīnga ịtolo ifịfịgo fịlinkwịgalịgwa. 31Lelo bo bịkuti tunngoge, po papo īndumị jilinkummwaga unkulūmba gwa basịkali, ukuti akāja ka Jelụsalemụ kasalambanị̄ke. 32Nakalīnga ịtolo alinkubēga abasịkali nabalōngosị bābo, alinkubopa ukusụlụka kukilūndilo kya bāndu aba apa bālipo. Abēne bo bammbwene unkulūmba gwa basịkali na basịkali bāke, balinkuleka ukunkoma Paulị. 33Po papo unkulūmba gwa basịkali alinkusegelela alinkunkola, alinkulagila ukuti apịnyịgwege nimịnyololo mịbili. Po alinkulālūsya alinkuti: Kali umụ̄ndu jujuju jwanị? Kangi abōmbị̄le sya fịkị? 34Po papo abāndu bamo nkilūndilo kila balinkujwega isị̄ngị, abāngi isị̄ngị. Umwene lelo bo atolị̄gwe ukusyaganịa bunụnụ isya nalolị panōngwa ja njwego, alinkubalagila abāndu bāke ukuti bakammbīke Paulị nkāti mwịlị̄nga. 35Lelo bo Paulị afịkịle pantandalilo gwa pakifịgo, po papo alinkupīmbịgwa ịtolo na basịkali panōngwa ja bukāli bwa kilūndilo kya bāndu. 36Namanga ikilūndilo kya bāndu kyakōngaga kilinkujwega kilinkuti: Nsōsyepo ujo.

Paulị ịkujoba isya kwịnokesya

37Lelo bo ịkuja pakwịngisịgwa mwịlị̄nga, po papo Paulị alinkujoba nunkulūmba gwa basịkali alinkuti: Ngusūma ukujoba nanụngwe. Umwene alinkuti: o, umēnye ukujoba Ikigịlịkị? 38Ngīmba ukaja gwe Mwegịpịtị, uju mbupị̄pị ịtolo abasāmbulenịe abāndu abagogị baelufụ bāna (4,000), alinkubūka nabo ndungalāngala? 39Umwene Paulị alinkwamụla alinkuti: Une ndi Njụ̄ta gwa mụ Talịsị nkị̄su kya Kịlịkịja; ndi mwenekāja gwa kāja akafụmụke. Nikukusūma ukuti njobe nabo abāndu aba. 40Lelo bo ammwịtikị̄sye, po papo Paulị alinkwima pantandalilo gwa pakifịgo, alinkubabatamịsya abāndu nikiboko. Bo kuli mye ịtolo, po papo alinkujoba nabo mụnjobelo ja Kihịbụlị alinkuti.

Currently Selected:

Īmbōmbo Sya Batumịgwa 21: NYB96

Highlight

Copy