Īmbōmbo Sya Batumịgwa 20

Paulị ịkubūka kangi ku Maketonịja na nkị̄su kya Bagịlịkị

1Lelo bo unjwego gumalị̄ke, po papo Paulị alinkubabilikila pamopēne abị̄tikị, alinkubakasya nukulagana nabo, po papo alinkusụmụka ukubūka ku Maketonịja. 2Umwene bo ēndịle mfị̄su fịla ābakasị̄sye namasyu ga mị̄ngị, alinkwakufịka nkị̄su kya Bagịlịkị; 3mo alinkugona imyesị mịtatu. Lelo bo ịkuti nị̄pake mụngalaba ịkubūka mụ Sịlịja, Abajụ̄ta balinkwịtikana ukuntegelela; umwene alinkutụmụla ukugomoka ukwendela ija Mụmaketonịja. 4Abēne aba bāli nagwe bāli bo ba Sopatelị ugwa mụ Beloja unnya Pili, na Alisịtalịkị na Sekụndị abā mụ Tesalonịkị, na Gajị ugwa mụ Ndelịbe. Na Tịmotị, na Tịkịka na Tịlofịmụ aba mwa Asịja. 5Bo balinkutala nkyenị, balinkwakutugụ̄lila mụ Toloja. 6Loli uswe tulinkwịpaka mụngalaba ukufụma mụ Fịlịpị, bo gakīndịle amasịku ga kyaka kya fịsyesye ifịsịtankese. Tulinkwakubāga mụ Toloja bo gakīndịle amasịku mahāno, mo tulinkugonamo amasịku mahāno na mabili.

Paulị ikubabūkila abị̄tikị ba mụ Toloja ulwa bumalīkisyo

7Pị̄sịku ilịtasị ilya nndūngu, bo tubūngēne pakumenyanịa ikisyesye, po papo Paulị uju ạ̄tigi nịkulābilaga kilābo, alinkujoba nabo, alinkukābisya fị̄jo ukujoba ukufịka pakilo pakāti. 8Lelo nnyụ̄mba ja kwịjulu mụno twakomēne, mo syalịmo īnyāle sị nyịngị. 9Unndumyana jumo uju āli jo Jụtika īngamụ ātūgēle pị̄lịlịsya. Po papo tulinkunkola utulo utusịto bo Paulị ịkwendelela ukujoba, lelo bo atolị̄gwe nutulo, po papo alinkutụnyụka ukufụma kwịjulu lya butatu; balinkummwịnula umfwe ịtolo. 10Po papo Paulị alinkwịka, alinkwịnama, alinkumpagata, alinkuti: Mụngajwegaga ubūmị bwake bukāli bulimo. 11Lelo bo afyukịle kangi, alinkumenya ikisyesye, alinkulya. Umwene alinkwendelela ukubabūla īnōngwa sị nyịngị, alinkufịka nabo kubukye, po papo alinkusụmụka alinkubūka. 12Abāndu bala balinkummwega unndumyana jula bo mūmị ịtolo; balinkuhoboka fị̄jo.

Ukwenda injila ukufụma mụ Toloja ukubūka mụ Mịletị

13Po papo uswe tulinkutalapo ukubūka kūngalaba, tulinkwịpaka ukubūka mụ Aso, mo twajịlekumpakila Paulị. Namanga mo mụmo ālagị̄le, papo umwene ālōndaga ukwenda ija pị̄sīlya. 14Lelo bo āganị̄le nanụswe mụ Aso, tulinkumpakila, tulinkwakufịka mụ Mịtịlene. 15Po papo tulinkusụmụka ukufụma pāpo, ulwa kilābo tulinkunịngana nikya mụ Kịja ulwa kilābo ikīngi tulinkufịka mụ Samu, pị̄sịku ilịkongelesị tulinkwakufịka mụ Mịletị. 16Namanga Paulị ātịle tụkukīndaga ịtolo mụ Efesị, papo akāliganịle ukukābila mwa Asịja. Ākūjaga ukuti linga sịbagị̄le, akajege mụ Jelụsalemụ pị̄sịku lya Pentekosịtị.

Ukulagana kwa Paulị na bakulu ba kipānga kya Efesị

17Ukufụma mụ Mịletị, Paulị alinkutuma īndumị mwa Efesị ija kubabilikila abakulu ba kipānga. 18Lelo bo bị̄sịle kumyake, po papo alinkubabūla alinkuti: Umwe mụsịmēnye mụno nājīlị̄le nanụmwe akabalilo kōsa, ukufụma pị̄sịku lya kwanda ili nāfịkilaga mwa Asịja. 19Mụmēnye mụno nammbōmbelaga UNTWA nulwịjị̄syo lōsa, namāsosị, nīngelo isị syalinyāgịle bo bịkundegelela Abajụ̄ta. 20Mụmēnye ukuti ngāsyongānịkaga napanāndi pakubalūmbilila isị syali sya kubatūla, ndinkubamanyịsya pabwelụ ịtolo, mope na nnyụ̄mba syinụ. 21Mo Ndinkusịsịmikisya ku Bajụ̄ta na ku Bagịlịkị, ukuti bapīndukilege kwa Kyala, nisya kuti bammwịtikege UNTWA gwitu Jesụ Kilisịtị. 22Lilino pilikisyaga, une ngubūka ku Jelụsalemụ ne mpịnyịgwa ịtolo mụīmbepo, ngasịmanya isị sịkwakūnyịsilaga kūko. 23Lolị isị nsịmēnye syene syo sya kuti Mbepo Mwịkemo ịkūsịsịmikisya kumyangu ntwaja tōsa, ukuti imịnyololo nubutolwe fịkūngụ̄lila une. 24Lolị ndịkubabīkilako umōjo ubūmị bwangu, ukuti kāndu ka ntēngo, kwene ku kumalisya injila jangu, nububōmbelị ubu nālyambilị̄le ku NTWA Jesụ, ubwa kusịsịmikisya īndumị īnụnụ ija ịpyana lya Kyala.

25Une nēmbēlịle uko na uko mmyinụ bo ngulūmbilila isya kitāngālala kya Kyala. Kēta, lilino Mmēnye ukuti mwesa mụtịsakwandisyamo ukūmbona mmāso. 26Fyobēne nikusịsịmikisya kumyinụ gu mụ̄syugu, ukuti une ndi mwelụ ịtolo kuli uju linga ịkusoba. 27Namanga une ngāsyongānịkepo napanāndi pakubafụmụkisya syosa isị Kyala ālinogwịne. 28Mwandege lelo, mwịkētege bunụnụ, mụgukētege gōpe nuntị̄mo gōsa ugu Mbepo Mwịkemo ababīkịle ukuja mwe balindililị, ba kukitị̄ma ikipānga kya Kyala iki akikabịle niịlopa lyake jūjo. 29Une Mmēnye ukuti bo mbūkịle ifịnyamāna ifịkali fịsakubị̄silaga, fyofịtịsakugupakisyaga untị̄mo. 30Mope na mụ mmyinụ jujumwe bịsakutụpụkaga abāndu aba bịsakujobaga isyabutūngulu isya kubasofanịa, bịsakubakwabaga abafụ̄ndịgwa ukuti babakōngege bābo. 31Ko kuno nịkuti amụjege māso, mụkūmbukege ukuti kufyịnja fitatu, pamụ̄si na pakilo, ngālekịlemo sịku ukubamanyịsya mwesa namāsosị. 32Lilino lelo nịkubabīka mbulindililị bwa Kyala, na mwịsyu lya ịpyana lyake, ili libagị̄le ukubajēnga īsajo sya Kyala isị ababīkị̄le abāndu bāke. 33Une nganyonywamo sịku fesa, pamo sahabu, pamo imyenda gya jumo. 34Umwe mụmēnye ukuti ifị nālōndaga une nāba nāli nabo, gakābaga ga maboko gangu gagaga. 35Syosa sịsịsị mbanāngị̄sye ukuti, fịkuti bo mwịjūlege bunobuno ukubatūla abōnywa, bo mụkukūmbuka amasyu ga NTWA Jesụ, aga ạ̄tigi: Ukupa nukwambilila, kusangalufụ ku kupa.

36Lelo bo ajobịle sịsịsị, po papo alinkufụgama pāsi pamopēne nabo bōsa, alinkwịpụ̄ta. 37Po papo bōsa ịtolo balinkulila fị̄jo, balinkunngwila Paulị mmakosị, balinkumfịpa. 38Balinkukīndilila ukusụlụmanịa panōngwa ja ịsyu ili ājobaga ạ̄tigi: Mụtịsakwandisyamo ukūmbona mmāso. Po papo balinkwakunsịndikila kūngalaba.

Currently Selected:

Īmbōmbo Sya Batumịgwa 20: NYB96

Highlight

Copy