Īmbōmbo Sya Batumịgwa 19

Paulị ịkulūmbilila mụ Efesị

1Lelo bo Apolo ali mụ Kolịntị, po papo Paulị alinkwenda nkị̄su kya kulūlu, alinkwakufịka mụ Efesị. Mo alinkwakubāga bamo abafụ̄ndịgwa. 2Alinkubalālūsya alinkuti: Kali mwalyambilị̄le īmbepo Mwịkemo bo mụkupīnduka? Bālyamwịle bātịle: Mma, tukapilikamo sịku nukuti alịko Mbepo Mwịkemo. 3Kangi alinkubalalusya alinkuti: Po mwalyosị̄gwe lōsyo lukị? Abēne balinkummwamụla balinkuti: Ulōsyo lwa Johanị. 4Jope Paulị alinkujoba alinkuti: Johanị ōsyaga ulōsyo lwa lupīnduko. Alinkubabūla abāndu ukuti ba mmwitikege uju ịkwịsa mụ̄nyụma mmyake, ju Jesụ. 5Lelo bo bapilị̄ke sịsịsị, po papo balinkōsịgwa mụ̄ngamụ ja Jesụ UNTWA. 6Umwene Paulị bo ababīkịlepo amaboko, po papo Mbepo Mwịkemo alinkubasololokela, balinkwanda ukujobela mụndimị īmbya, balinkukụ̄ngụlụka. 7Bōsa pamopēne bāli abanyāmbala kalōngo na babili.

8Po papo kukabalilo akā myesị mịtatu Paulị ābūkaga nnyụ̄mba ja kwịpụ̄tilamo, alinkujoba nubukịfụ, alinkulālūsania nabo nukubakwaba na masyu amanụnụ agā kitāngālala kya Kyala. 9Lolị bamo balinkuja nulukānị, balinkusịta nukwịtika, balinkujijoba ububị̄bị injila ja NTWA nkyenị nkilūndilo, po papo Paulị alinkusōkapo alinkubaleka, alinkubapāgula abafụ̄ndịgwa, bwịla alinkumanyịsya nnyụ̄mba ja kumanyịkisyamo ija Tilanị. 10Bo balinkubōmba bunobuno kukabalilo ka fyinja fịbili. Po apa bōsa abāndu aba bali mwa Asịja Abajụ̄ta na Bagịlịkị balinkwenda nukupilika ilịsyu lya NTWA.

Abāna ba Sịkeba abalumyana

11Umwene Kyala alinkupela ifị̄ka ifịpala ifya kuswịgisya mmaboko ga Paulị; 12abāndu bēgaga ifịtambāla nimyenda igīngi igya mbōmbo igi Paulị āgibōmbelaga bo gibīkịgwepo pababịne. Balinkwenda nukupona īmbūngo syabo; bope na bala bāli niīmbepo īnyalị sịlinkusōkamo nkāti mmyabo. 13Lolị Abajụ̄ta bamo abēmbēsị abasōsyaīmbepo īnyalị, balinkugela bope ukujijoba īngamụ ja NTWA Jesụ kuli bala bali niīmbepo īnyalị, balinkuti: Nịkubakagila mụngamụ ja Jesụ uju ịkunnjoba Paulị. 14Abēne lolị aba bābōmbaga sịsịsị, bāli bāna ba Sịkeba umpụ̄tị unkulūmba gwa Bajụ̄ta, bāli bahāno na babili. 15Po papo īmbepo īnyalị jilinkubāmụla jilinkuti: Jesụ jo nummēnye nalolị, jope na Paulị nummwag ni e; lolị umwe mwe bānị? 16Lelo po papo umụ̄ndu uju āli niīmbepo īnyalị alinkubanyẹ̄lela alinkubatola nukubagwisya, alinkubafụ̄nda bōsa, balinkubopa bo bakafwala nakamo ukusōka nnyụ̄mba jila kangi bo bali nifịfụlalo. 17Syo sịlinkufụmụka ku Bajụ̄ta na Bagịlịkị bōsa aba bali mwa Efesị, bōsa lulinkubāga ulutēnde lu lwịngị. Ijēne īngamụ ja Jesụ jilinkwimikịgwa. 18Po papo bị̄ngị aba bālị̄tị̄ke balinkwịsa, balinkwịlāta pabwelụ nukusịjoba syosa isị bābōmbịle. 19Abāngi ba bị̄ngị aba bābōmbaga isya mānjele, balinkubabūngānịa bakalata bābo, balinkubakosya mmōto bo bịkukēta bōsa. Lelo bo bịkubala untēngo gwabo, balinkwaga gufịkịle pandalama sya fesa baelufụ amalōngo mahāno (50,000). 20Bo lilinkuja bunobuno ilịsyu lya NTWA, lilinkukula nukukaba amaka.

Unjwego mwa Efesị

21Lelo bo sịmalīke sịsịsị, po papo Paulị alinkwịnogonela mmōjo gwake ukuti ịkwendaga ija Mụmaketonịja na mwa Ākāja ukubūka mụ Jelụsalemụ. Alinkuti: Bo ngonịlemo mụmo, ānịkubūkaga kukukakēta akāja ka Loma kōpe. 22Lelo bo abatumịle Mụmaketonịja ababōmbị bāke babili, Tịmotị na Elasịtị, alinkugonapo panāndi mwa Asịja.

23Lelo pakabalilo kāko gulinkuboneka unjwego unkulūmba kula ku Efesị panōngwa ja njila ja NTWA. 24Namanga āliko umụ̄ndu jumo umpōsị gwa fesa, uju ali jo Ndemetelịo īngamụ, uju āpōndaga ifịfwanị fya nnyụ̄mba ja fesa ija Kyala unkị̄kulu uju bạ̄tigi jo Atemị, ābatwalilaga ubukabị bu bwịngị abafūndị bāke. 25Ndemetelịo alinkubabūngānịa ababōmbambōmbo bababa pamopēne nabāngi bōsa abā mbōmbo jijiji, alinkubabūla alinkuti: Mwe bị̄nāngu, nanụmwe mụmēnye ukuti ubukabị bwitu bụkufụma mụmbōmbo jītu iji, 26kangi mụsịbwene nukupilika ukuti mụkaja mo mwa Efesị mwene, lolị nkị̄su kyosa kya Asịja, umụ̄ndu uju Paulị abasōngịle nukubasyụtụla abāndu ba bị̄ngị ịkuti: Bakaja bo bakyala napanāndi aba bịkutendekesịgwa namaboko ga bāndu. 27Mụngātigi ubupalapala bububu ubwa kusyokelịgwa īmbōmbo jītu buli ku kumyitu kwene, himma, lolị buli na ku kūnyụma ja kyala gwitu unkị̄kulu unkulūmba Atemị, uju ịsakwịpelaga gwa ịtolo, jope ịsakusụlụsịgwagwa ubukulūmba bwake, uju bōsa aba mwa Asịja na nkị̄su kyosa bịkwịpụ̄ta kumyake.

28Lelo bo bapilị̄ke sịsịsị, po papo balinkukalala fị̄jo, balinkujwega balinkuti: Nkulūmba uju Atemị gwa Baefesị! 29Po papo akāja kōsa kalinkwịsula nunjwego, balinkwaluka pamopēne, balinkubūka kunyụ̄mba ja kukētelamo utusụmo tōsa, balinkubakola ba Gajị na Alisịtalịkị abanịne ba Paulị aba Mụmaketonịja aba bālyendịle nagwe. 30Umwene Paulị alinkuti mbūke mụmo bākomēne abāndu, lolị abafụ̄ndịgwa bāke balinkunngomola. 31Bope nabakulūmba bamo aba mwa Asịja aba bamanyēne nagwe, balinkuntumila īndumị Paulị ukunsūma ukuti, angasụlwa ukwịtụpika nnyụ̄mba ja tusụmo. 32Lolị bamo balinkujwega isị̄ngị, bope abāngi isị̄ngị, namanga ulukomāno lula lwafụlụnganị̄ke, ba bị̄ngị balinkusịta nukusịmanya isị bābūngānị̄le. 33Po papo balinkunsụmụsya Alịkịsanda ukufụma nkilūndilo, uju Abajụ̄ta bālị̄mbịkịle nkyenị. Umwene Alịkịsanda alinkubabatamịsya nikiboko bo ịkuti njobēge nabo abāndu nịkanilege nkyenị mmyabo. 34Lolị bo basyagēnị̄e ukuti Njụ̄ta, po papo balinkujwega bōsa pamopēne ilịsyu limolyene, balinkujwega utubalilo tubili kisịtakutūsỵa balinkuti: Nkulūmba ju Atemị gwa Baefesị.

35Pānyụma unsị̄mbị gwa kāja kāko alinkubabatamịsya abāndu alinkubabūla alinkuti: Mwe bāndu ba mwa Efesị, jwanị uju akasyaganịa ukuti akāja ka'Efesị ko aka kịkujilindilila īnyụ̄mba ja kyala Atemị unkulūmba, nikifwanị iki kyatụnywịke ukufụma kumwanya? 36Buno sịsịsị syo najumo atịkusịkāna, po fịkuti mụjege jōnjolo ịtolo, mụngakūjaga pakubōmba sịmo bo mụkị̄līngānịa. 37Namanga mụbatwele abāndu aba, aba bakahījamo ifya nnyụ̄mba ja kyala gwinụ, kangi bakanhēlụlamo sịku kyala gwinụ unkị̄kulu. 38Lelo linga Ndemetelịjo na bafụ̄ndị aba bāli nagwe bāli nōngwa numụ̄ndu, pabulōngelo palịpo, na balindililakāja balịpo, po balitwalanaga abānōngwa. 39Lolị linga mụli nasyo isị̄ngị isị mụkulōnda syo sịsakulōngịgwaga ndukomāno ulwimikịgwa. 40Buno tuli mbupalapala bwa kulōngịgwa kunōngwa ja kulūndukana kwa mụ̄syugu; namanga sịkajako nasịmo isya kwịnokesya panōngwa ja njwego gugūgu. 41Lelo bo ajobịle sịsịsị, po papo alinkulubalanịa ulukomāno.

Currently Selected:

Īmbōmbo Sya Batumịgwa 19: NYB96

Highlight

Copy