Īmbōmbo Sya Batumịgwa 18

Paulị mụ Kolịntị

1Pānyụma pali sịsịsị, po Paulị alinkusōkamo mwa Atenị, alinkubūka mụ Kolịntị. 2Mo alinkwakummwaga Unjụ̄ta jumo uju āli jo Akwila īngamụ, uju apāpilị̄gwe mụ Pontị. Jo āfịkaga ịtolo ukufụma mụ Ịtalịja pamopēne nunkasị gwake Pịlịsịla, papo Kesalị Kilautịja ālagị̄le ukuti Abajụ̄ta bōsa basōkemo mụ Loma. Umwene Paulị alinkubūka kukubakēta, 3papo īmbōmbo jabo ija kusona īhēma jali bo ji ja Paulị, po apa alinkutūgala nabo, balinkubōmba īmbōmbo pamopēne. 4Bwịla pị̄sịku lya sabāti ājobaga nabo nnyụ̄mba ja kwịpụ̄tilamo, alinkugela ukubakwaba Abajụ̄ta na Bagịlịkị.

5Lelo bo Sịla na Tịmotị bị̄sịle ukufụma Mụmaketonịja, po papo Paulị alinkwịkolānịa fị̄jo nukulūmbilila; alinkubasịsịmikisya Abajụ̄ta ukuti: Jesụ jo Kilisịtị. 6Lelo bo bịkumpīnga nukuntuka amahēlụ, po papo alinkukụng'ụ̄nda imyenda gyake alinkubabūla alinkuti: Linga mụsobịle nōngwa jīnụ jujumwe, une ndi mwelụ ịtolo, ukwanda lilino nịkulabilaga kubāpānja. 7Po papo alinkusōkapo pāpo, alinkwịngila nnyụ̄mba ja mụ̄ndu jumo uju āli jo Tịtị Jụsịtị, uju antị̄laga Kyala uju īnyụ̄mba jake japalamēne ninyụ̄mba ja kwịpụ̄tilamo. 8Lolị Kilisịpị unkulūmba gwa nyụ̄mba ja kwịpụ̄tilamo, alinkummwịtika UNTWA ninyụ̄mba jake jōsa; bope na Bakolịntị ba bị̄ngị bo bapilike, balinkwịtika nukōsịgwa.

9Po papo UNTWA alinkummbūla Paulị nkisetuka pakilo alinkuti: Ungatị̄laga, lūmbililaga ịtolo ungabatamaga; 10namanga une ndi nanụngwe; najumo atịsakulwaga nanụngwe nukūkūfụlasya, buno ndi nabāndu ba bị̄ngị nkāja mụno. 11Po papo Paulị alinkugona mụmo ikyinja nimyesị ntandatu, alinkumanyịsya ilịsyu lya Kyala mmyabo.

12Lolị bo Galịo akolịle ubulindililị bwa mwa Ākāja, po papo Abajụ̄ta balinkummotokela Paulị, balinkuntwala pabulōngelo, 13balinkuti: Tụkụnsịtaka umụ̄ndu uju papo ịkubasōnga abāndu ukuti bīpụ̄tege kwa Kyala ukukīndana nululagilo. 14Umwene Paulị bo ịkuti nāndege ukujoba po papo Galịo alinkubabūla abajụ̄ta alinkuti: Mwe Bajụ̄ta umwe, linga umụ̄ndu uju abōmbịle īmbị̄bị sịmo īngulūmba, pamo ubukomụ bumo ububị̄bị, po nābagị̄le ukupilikisya īnōngwa jīnụ. 15Lolị papo nāgịle lukānị ịtolo ulwa masyu, ningamụ, nululagilo lwinụ, po amụsịkētege jujumwe mụtụmụlege. Une ngịgana ukuja gwa kusịlōnga sịsịsị. 16Po papo alinkubakagapo pabulōngelo. 17Po papo bōsa balinkunkola Sosịtenị, unkulūmba gwa nyụ̄mba ja kwịpūtilamo, balinkunkoma palapala pabulōngelo, umwene Galịo alinkusịta nukusịbīkilako umōjo sịsịsị.

Paulị ịkugomokela kangi ku Antyokịja

18Pānyụma pali sịsịsị, Paulị alinkugonapo amasịku mị̄ngị, lelo po papo alinkwenda nukulagana na bāmyabo. Alinkuloboka ukubūka mụ Sịlịja, balinkubūka nagwe ba Pịlịsịla na Akwila. Mụ Kenkịlịja mo alinkumwa īnywịlị syake, namanga syali sya lujīganịko. 19Balinkufịka mụ Efesị, mo alinkubaleka abanịne; umwene lolị alinkwịngila nnyụ̄mba ja kwịpụ̄tilamo, alinkukānịkana na Bajụ̄ta. 20Abēne balinkunsūma ukuti agonepo akabalilo akatalị, alinkukāna. 21Loli bo ịkulagana nabo alinkuti: Ngwakwịsaga kangi kumyinụ linga Kyala ị̄tị̄ke. Po papo alinkwịpaka mụngalaba ukufụma mụ Efesị, alinkubūka.

22Lelo bo afịkịle mụ Kesalịja, alinkufyuka, alinkwakukiponịa ikipānga. Po papo alinkwakusụlụka ukubūka ku Antyokịja. 23Lelo bo agonịlepo panāndi, alinkusụmụka ukubūka, alinkwakwenda nkisu kya Galatịja nikya Fịlịgịja mụmo fịkōnganị̄le, alinkubakasya abafụ̄ndịgwa bōsa.

Apolo ịkulūmbilila mụ Efesị na mụ Kolịntị

24Lelo po papo alinkwịsa mụ Efesị Unjụ̄ta jumo uju āli jo Apolo īngamụ, uju āpāpilị̄gwe mwa Alịkịsandalịja, umwengo ịtolo ukujoba īnōngwa kangi uju abamēnye fị̄jo bakalata. 25Jo āmanyịsị̄gwe injila ja NTWA, kangi papo īmbepo ampyaga fịjo mụ̄nda, alinkugolosya ịtolo ukujoba nukumanyịsya isya Jesụ; napapo ālumēnye lwene lu lōsyo lwa Johanị. 26Pịlịsịkịla na Akwila bo bampilị̄ke ịkusịjoba ịtolo nubukịfụ nnyụ̄mba ja kwịpụ̄tilamo, balinkummwega balinkubūka nagwe kumyabo, balinkukīndapo ukogolosya balinkummanyịsya injila ja Kyala. 27Lelo bo Apolo atụmwịle ukuloboka ukubūka mwa Ākāja, po papo abāmyabo balinkunkasya, balinkubasị̄mbila kalata abafụ̄ndịgwa ukuti bammwambililege. Lelo bo afịkịle alinkubatūla fị̄jo abāmyabo aba bāli bị̄tikị mwịpyana. 28Namanga umwene ābatobesyaga fị̄jo Abajụ̄ta pabwelụ ịtolo, alinkubanāngisya ukufụma mwa bākalata ukuti Jesụ jo Kilisịtị.

Currently Selected:

Īmbōmbo Sya Batumịgwa 18: NYB96

Highlight

Copy