Īmbōmbo Sya Batumịgwa 17

Mụ Tesalonịkị

1Po papo balinkukisanịa mwa Amfipoli na mwa Apolonija, balinkwakufịka mụ Tesalonịkị, mụno jālịmo īnyụ̄mba ija kwịpūtilamo ja Bajụ̄ta. 2Umwene Paulị alinkwịngịla mụno bālimo, bo mụmo ābōmbelaga bwịla, alinkujoba nabo isya mwa kalata bāsabāti batatu. 3Alinkubị̄gulila nukubamanyịsya isya kuti: Kilisịtị fịkuti akubilwege nukusyuka mbafwe. Nukuti Jesụ jujuju, uju ngubafụmụkisya umwe, jo ju Kilisịtị. 4Po papo bamo sịlinkubakola, balinkuja pamopēne na Paulị na Sịla, na Bagịlịkị aba bantị̄laga Kyala bā bị̄ngị fị̄jo, na bakị̄kulu abalōngosị bā bị̄ngị.

5Lolị Abajụ̄ta kalinkubāga akabịnị, balinkubēga bamo abāndu abā mwalo ịtolo aba mụ̄sokonị, balinkubabūngānịa ukuja kilūndilo balinkukasāmbulanịa akāja balinkujisịganịla īnyụ̄mba ja Jasonị balinkusūbila ukubāgamo ba Paulị na Sịla ukuti babatwalege nkyenị mbāndu. 6Lelo bo bakabāgamo nnyụ̄mba, po papo balinkunkwaba Jasonị pamopēne na bāmyabo bamo, balinkubatwala nkyenị mbakulūmba ba kāja, balinkukōlela balinkuti: Abāndu aba bakisāmbulenịe ikị̄su kyosa, bị̄sịle kōpe nakuno, 7bo aba Jasonị ābāmbilị̄le. Bōsa bababa bịkubōmba isị sịkīndēne nindagilo sya Kesalị, ukuti alịko umalafyale ujūngi, uju bịkuti jo Jesụ. 8Po papo abāndu bōsa pamopēne na bakulūmba ba nkāja, bo bapilị̄ke sịsịsị balinkunyomoka fị̄jo. 9Abēne ba Jasonị nabanịne bo basōsịsye ifya nkole, po papo balinkubalekesya.

Mụ Beleja

10Po papo nakalīnga ịtolo abāmyabo balinkubasụmụsya ba Paulị na Sịla pakilo kubūka mụ Beleja abēne bo bafịkịle kula, balinkwakwịngila nnyụ̄mba ja kwịpūtilamo ija Bajụ̄ta. 11Lolị abēne abāndu ba mụ Beleja bāli namahala ukubakīnda abāndu ba mụ Tesalonịkị; namanga balyambililaga ilịsyu nindụmbụla jōsa, bwịla ịtolo balinkubēnēsya bakalata, ukuti basịmanyege linga sya nalolị isị bịkujoba ba Paulị na Sịla. 12Lelo bā bị̄ngị balinkwịtika, na bakị̄kulu Abagịlịkị abīmikịgwa, na banyāmbala bā bị̄ngị. 13Lolị Abajụ̄ta aba mụ Tesalonịkị, bo bapilị̄ke ukuti Paulị ịkulūmbilila ilịsyu lya Kyala na mụ Beleja, po papo bope balinkubūka, balinkwakubōnānga īnyịnogono nukufịsāmbulania ifịlūndilo fya bāndu. 14Po papo abāmyabo balinkunsụmụsya Paulị nakalīnga ukubūka kunyanja. Lolị Sịla na Tịmotị balinkusyala mụmo. 15Abēne aba bansịndikilaga Paulị balinkwakummbīka mwa Atenị. Po papo balinkugomoka nululagilo ulu lwafụmịle kwa Paulị ukuti Sịla na Tịmotị bankōngege nakalīnga.

Paulị ịkujoba na bāndu ba mụ Atenị

16Umwene Paulị bo ịkubagụ̄lila ba Sịla na Tịmotị mụ Atenị, umōjo gwake gulinkukalala fị̄jo bo āgịle akāja kị̄swile nifịfwanị. 17Po papo alinkukānịkana na Bajụ̄ta na batị̄la Kyala nnyụ̄mba ja kwịpụ̄tilamo, naba āganịlaga nabo bwịla mụ̄sokonị. 18Po papo balinkwaganịla nagwe bope abaganamahala ga Epịkụlị na ga Sịtoịkị balinkukanịkana nagwe. Bamo balinkujoba balinkuti: Ịkulōnda ukujoba sya fịkị unndweti uju? Abāngi balinkuti: Alīti mfụmụsya ba kyala abahēsya. Papo Paulị ālūmbililaga isya Jesụ nisya kusyuka. 19Po papo balinkummwega Paulị balinkubūka nagwe pa Alyopagi balinkuti: Kali ubagị̄le ukutulingania ulumanyịsyo ulupya ulu kufụmụsya? 20Buno hēsya ịtolo isị utwele mụmbulukutu syitu; fyobēne tukulōnda ukusịmanya mụno sịjīlị̄le. 21Namanga bōsa abenekāja ka Atenị na bahēsya aba bājaga mụmo, bakālōndaga nasịmo isị̄ngị isya kwịjangakisya lolị syene isya kujoba nukupilikisya isya tūndu utupya.

22Po papo Paulị alinkwima pakāti pa Alyopagi alinkujoba alinkuti: Mwe bāndu ba Atenị, mụli syosa isị ngētịle, nāgịle ukuti mụkīndilị̄le ukubatị̄la bakyala. 23Papo bo ngusyungūtila nukutukēta utūndu twinụ twa mmbujo bwinụ bwa kwịpūtilamo, nkyagịle kyope nikigemo iki kisị̄mbị̄gwepo isya kuti: Kwa Kyala uju akamanyịgwa. Lelo uju mụkwịpụ̄tako kisịta kummanya, jo uju ngubafụmụkisya. 24Kyala umpelị gwa kị̄su na ifị fịlịmo mụmo, jo NTWA gwa kumwanya na pāsi; umwene atịkutūgala nnyụ̄mba sya kwịpụ̄tilamo isị sịjēngị̄gwe na bāndu. 25Kangi atịkubōmbelịgwa na maboko ga bāndu, ukuti afwanege āgị̄lwe fịmo; buno umwene jo uju ịkubapa ubūmị abāndu bōsa, numūjị, na fyosa ịtolo. 26Umwene ifịkolo fyosa fya bāndu āfịpelịle ukufụma mmụ̄ndu jumojwene, ukuti fịjēngege mōsa nị̄kulu, alinkufịbīkila ngānị utubalilo twabo, nimịpaka gya bujēngo bwabo; 27ukuti ifịkolo ifyo fị̄nndōndege Kyala, kifwene bo ukupalamāsya Palamasya ịtolo fyendege nukummwaga. Loli pope umwene Kyala akaja kubutalị nanụswe. 28Bo apa ājobịle jumo ātịle:

Namanga mụ mmyake jūjo tuli būmị,

tụkwenda kangi tulịko;

bo apa bope abāgula nyīmbo bīnụ bamo bājobịle

bātịle:

Buno nanụswe tuli ba lujụ̄ngụ lwake.

29Lelo apa uswe tuli bāna ba Kyala, tungịnogonaga ukuti ubwa Kyala bufwene na sahabu pamo na fesa, pamo nịbwe, ifị fịsongolị̄gwe nubumang'anyị pamo ninyịnogono sya bāndu. 30Utwene utubalilo twa busịtakumanya, to Kyala ātulekịle ịtolo, āfwanaga atịkukēta, lolị lilino ịkubalagila abāndu bōsa, mōsamōsa ukuti bị̄lātege. 31Namanga ālyimikị̄le ngānị ilị̄sịku lya kwịsakukilōngelapo ikị̄su mbugolofụ, umụ̄ndu uju ālimmwimikị̄le nganị. Sịsịsị syo āsịsịsịmikị̄sye kubāndu bōsa apa ansyusyaga mbafwe.

32Abēne lelo bo bapilị̄ke isya kusyuka mbafwe, bamo balinkummōbela, lolị abāngi balinkuti: Syo twịsakukupilikisyaga kangi pabūngi sịsịsị. 33Po papo Paulị alinkusōkamo nkilūndilo kyabo, alinkubūka. 34Lolị abāndu bamo balinkuja pamopēne nagwe, balinkwịtika. Mụli bābo jumo āli jo Ndyonisi ugwa pa Alyopagi, nunkị̄kulu jumo uju āli jo Ndamali īngamụ nabāngi aba bāli nabo pamopēne.

Currently Selected:

Īmbōmbo Sya Batumịgwa 17: NYB96

Highlight

Copy