Īmbōmbo Sya Batumịgwa 16

Tịmotị ịkwịlūnga pamopēne na Paulị na Sịla

1Po papo Paulị alinkwakufịka mope na mụ Ndelịbe na mụ Lịsịtịla, mụno ālịmo umfụ̄ndịgwa jumo uju āli jo Tịmotị īngamụ, umwana gwa nkị̄kulu Unjụ̄ta uju āli mwịtikị, 2lolị ugwịse ali Ngịlịkị. Jo balinkunnjoba ubunụnụ, abāmyabo ba mụ Lịsịtịla na mụ Ịkonịja. 3Umwene Paulị alinkulōnda ukubūka nagwe Tịmotị, po papo alinkummbụ̄ta ububụ̄tịgwa papo bālimo Abajụ̄ta ntwaja tula, namanga bōsa bāmēnye ukuti ugwịse āli Ngịlịkị. 4Lelo bo bịkukīsanịa ntwaja, balinkubapa abāndu īndagilo isị bālitikēne abatumịgwa na bakulu ba mụ Jelụsalemụ ukuti basịkōngege. 5Po papo ifịpānga fịlinkukaka ndwịtiko, abị̄tikị balinkōngelapo kukuti ịsịku.

Paulị kịkummbonekela ikisetuka mụ Tịloja

6Po papo balinkukisanịa nkị̄su kya Fịlịgịja nikya Galatịja, namanga bākānịsị̄gwe na Mbepo Mwịkemo ukulūmbilila ilịsyu mwa Asịja. 7Lelo bo bịkuja pakufịka mụ Mịsịja, balinkugela ukwịngila mụ Bịsịnịja, lolị Mbepo gwa Jesụ alinkusịta nukubịtikisya. 8Abēne balinkwenda mụ Mịsịja, balinkusụlụka ukubuka mụ Tịloja. 9Po papo ikisetuka kilinkummbonekela Paulị pakilo; alinkwaga umụ̄ndu jumo ugwa Mụmaketonịja īmịle ịkupyelesya kumyake ịkuti: Loboka gwịsege Mụmaketonịja ututūle. 10Lelo bo Paulị akibwene ikisetuka, nakalīnga ịtolo tulinkwịtendekesya ukubūka Mụmaketonịja, tulinkumanya ukuti Kyala atubilikị̄le kukubabūla īndumị īnụnụ.

Ukupīnduka kwa Lịtịja mụ Fịlịpị

11Po papo tulinkwịpaka mụngalaba ukufụma mụ Tịloja, tulinkugoloka ukubūka mụ Samatịlake. Ulwa kilābo tulinkwakufịka mụ Nịjapolị. 12Ukufụma papo tulinkwenda tulinkwakufịka mụ Fịlịpị, aka ko kāja akakulūmba nkị̄su kya Maketonịja, aka kangi kāli mbulagilị bwa Balōma. Tulinkugonamo mụmo amasịku manāndi. 13Lelo pịsịku lya sabāti, tulinkusōka pānja ukufụma nkāja, tulinkubūka pāmbali palwisi, apa twịnogonaga ukuti po pabujo bwa kwịpūtilamo. Tulinkutūgala, tulinkujoba na bakị̄kulu aba bābūngēne pāpo. 14Po papo unkị̄kulu jumo uju āli jo Lịtịa īngamụ umūlisị gwa myenda imị̄lāngali (imịfụbīfụ), Ugwa nkāja ka Tyatịla, uju antị̄laga Kyala, jo alinkupilikisya jo uju UNTWA ālimmwịgwịle īndụmbụla ukusịpilikisya isị ājobaga Paulị. 15Umwene lelo unkị̄kulu jula bo ōsị̄gwe na bannyụ̄mba jake bōsa, po papo alinkupyelesya alinkuti: Linga mụmmbwene ukuti nummwịtị̄ke UNTWA nalolị, po mụlị̄saga mụnyụ̄mba jangu mo mụgonege. Alinkutufịmbilisya fị̄jo.

Paulị na Sịla bali mụnnyololo mụ Fịlịpị

16Pị̄sịku limo bo tukubūka pabwịpụ̄tilo, po papo tulinkwaganịla nunndīndwana jumo untumwa, uju āli niīmbepo ja malago, uju ābakabilaga ikyuma ikị̄ngị fị̄jo abenenagwe nubulagusị bwake. 17Jo alinkunkōnga Paulị nanụswe, alinkukōlela alinkuti: Abāndu aba bo babōmbị ba Kyala unkīnde, bịkubafụmụkisya īnjila ja bupokị. 18Syo alinkubōmba amasịku mị̄ngị sịsịsị, po papo Paulị alinkukalala, alinkunsanụkila, alinkujibūla īmbepo alinkuti: Ngukulagilila mụngamụ ja Jesụ Kilisịtị, ukuti usōkemo nkāti mmyake. Po papo jilinkusōka pakabalilo kāko ịtolo.

19Lelo bo abenenagwe bāgịle kasōkịle aka bāsūbilaga ukukabilamo, po papo balinkunkola Paulị na Sịla balinkubalụ̄sila pāsokonị nkyenị mmbalagilị. 20Bo babatwele nkyenị mmbalongi, balinkubasịtaka balinkuti: Abāndu aba bịkupalaganịa akāja kītu, namanga Bajụ̄ta; 21kangi bịkumanyịsya īnyị̄ho isị sịli mwịko kuli twe Balōma ukusị̄tika nukusịbōmba. 22Po papo ikilūndilo kyosa kilinkōngana nabo kilinkubālukila, abēne abalōngị balinkubafụ̄la imyenda, balinkulagila ukuti bakomịgwege nifịkotị. 23Lelo bo babakomịle ifịkotị fịfị̄ngị ịtolo, balinkubị̄galila nnyụ̄mba ja bannyololo, balinkunndagila unndindilila nyụ̄mba ja bannyololo ukuti abakētelelege fị̄jo. 24Umwene bo āmbilị̄le ululagilo lulūlu, po papo alinkubabīka nkyụmba kya nkāti fị̄jo, amalūndi gābo alinkubafyātila mfịkị̄ngị.

25Lelo pakilo pakāti, Paulị na Sịla balinkwịpụ̄ta nukwimba inyimbo sya kuntụ̄fya Kyala, abēne aba nnyololo abāngi balinkubapilikisya. 26Po papo balinkunyomoka kịkuboneka akasenyenda akakulūmba, syope ninhyālo sya nyụ̄mba ja bannyololo sịlinkusụkānịka; nakalīnga ịtolo īnyị̄gị syosa sịlinkwịguka, nimmbīngu sya bōsa silinkulagala pāsi. 27Po papo unndindilila nyụ̄mba ja bannyololo alinkwaga īnyị̄gị sị̄gwịke, alinkukwaba ulūbo lwake alinkuti nị̄goge, namanga ị̄nogonaga ịkuti abannyololo bajōngịle. 28Umwene lolị Paulị alinkukōlela ilịsyu ilị̄kulumba alinkuti; Ūngịbōmbelaga nasịmo īmbị̄bị, buno twesa tulịmo. 29Lelo bo akōlị̄le ukuti batwale īnyāle, po papo alinkubopela nkāti, alinkwịngila nnyụ̄mba, alinkutetema nukwịtāga nkyenị mwa Paulị na Sịla. 30Po papo alinkubasōsya pānja alinkuti: Mwe bakulūmba, mbōmbe fịkị ukuti mbokịgwege? 31Abēne balinkummwamụla balinkuti: Ummwịtikege UNTWA Jesụ, po kupokịgwaga ugwe na bannyụ̄mba jako bōsa. 32Po papo balinkulūmbilila kumyake ilịsyu lya NTWA pamopēne na bannyụ̄mba jake bōsa. 33Umwene alinkubēga pakabalilo kāko pakilo, alinkubasụka ifịfụlalo fyabo. Po papo nakalīnga ịtolo alinkōsịgwa jūjo na bannyụ̄mba jake bōsa. 34Bo afyukịle nabo kunyụ̄mba jake, po papo alinkubategelekesya ifị̄ndu, alinkusekela fị̄jo pamopēne na bannyụ̄mba jake bōsa; papo ālimmwịtị̄ke Kyala.

35Ulwa kilābo kyake nulubūnju, po papo abalōngị balinkubatuma abasịkali bābo balinkuti: Mukabābulege abāndu bala. 36Po papo unndindilila nyụ̄mba ja banyololo alinkumpāngila Paulị alinkuti: Abalōngị batutumịle kukubābula, amụsōke lelo mụbūkege nulutēngāno. 37Lolị Paulị ābabūlịle ātịle: Batukomịle bo bịkukēta bōsa, bo tukatula najimo, twe Balōma, batwịgalị̄le nnyụ̄mba ja bannyololo; bo aba kangi batusōsyege kubutị̄tu! Nakamo! Bị̄se batusōsye bābo. 38Po papo abasịkali balinkwakubābūla abalōngị amasyu gagaga. Abēne lolị balinkutị̄la bo bapilị̄ke ukuti Balōma. 39Balinkubābula nukwakubatēngulila; po papo balinkubasōsya, balinkubasūma ukuti basōkemo nkāja. 40Po papo Paulị na Sịla, balinkusōka nnyụ̄mba ja bannyololo, balinkwakwịngila nnyụ̄mba ja Lịtịa balinkubakēta abāmyabo nukubakasya, balinkubūka.

Currently Selected:

Īmbōmbo Sya Batumịgwa 16: NYB96

Highlight

Copy