Īmbōmbo Sya Batumịgwa 15

Ulukomāno lwa kipānga mụ Jelụsalemụ

1Po papo abāndu bamo balinkusụlụka ukufụma mụ Jụtaị, balinkwịsa mwa Antyokịja, balinkubamanyịsya abāmyabo balinkuti: Linga mụtịkubụ̄tịgwako ukukōngana nulwịho lwa lugalilo lwa Mose mụkabagila ukupokịgwa. 2Lelo bo Paulị na Balịnaba balūndukēne nabo nukukānịkana fị̄jo nabo, abị̄nābo balinkubasụmụsya ba Paulị na Balịnaba nabāngi bamo ukufyuka ku Jelụsalemụ kubatumịgwa na kubakulu, panōngwa ja lukānị lulūlu. 3Po papo ikipānga kilinkubalaga, lelo bo bịkukīsanịa mụ Fenịke na mụ Samalịja, balinkubapāngila abāndu mụno abāpānja bāpīndukị̄le ukummwịtika Kyala. Īnōngwa sịsịsị syabahobwịle fịjo abị̄tikị bōsa. 4Lelo bo bafịkịle mụ Jelụsalemụ, po papo balinkwambililịgwa nikipānga, na batumịgwa, na bakulu; abēne balinkubapāngila syosa isi Kyala ābōmbịle nabo. 5Po papo balinkusụmụka bamo aba nkibụgụtila kya Bafalịsaị, aba bāli bị̄tikị, balinkujoba balinkuti: Abāpānja mpaka babụ̄tịgwe, kangi baligalịgwe ukulukōnga ululagilo lwa Mose.

6Po papo abatumịgwa na bakulu balinkubūngāna, ukuti bajikētege īnōngwa jijiji. 7Lelo bo bakānịkēne fījo, po papo Petelị alinkusụmụka alinkubabūla alinkuti: Mwe bāmyitu, mụmēnye ukuti ịjolo Kyala ālīsalị̄le une nkilūndilo kyinụ ukuti abāpānja mo balipilikilege ilịsyu lya Ịbāngilị nukulị̄tika bo ngulūmbilila une. 8Umwene Kyala ummanyandụmbụla sya bāndu, jo ābasịsịmikị̄sye bo ịkubapa Mbepo Mwịkemo, bo papo ātupaga nanụswe. 9Kangi alinkusịta nukubikapo ubukīndane nabumo pakāti pamyitu nabābo, alinkubēlusya īndụmbụla syabo ndwịtiko. 10Lilino lelo, po fịkị mụkūnngela Kyala, apa mụkubatwika ikitwalo abị̄tikị, iki abā mmbị̄sukulu bītu na jujuswe twatolị̄gwe ukukipīmba? 11Himma bo sịngajaga, lolị twịtikege, ukuti uswe kifwene bo bābo, tụkupokịgwaga mwịpyana lya NTWA Jesụ.

12Lelo ikilūndilo kyosa kilinkuja mye ịtolo, kilinkubapilikisya ba Balịnaba na Paulị bo bịkubapāngila isya fị̄ka nifị̄swigu, ifị Kyala ābapelelaga abāpānja mmaboko gābo. 13Abēne bo bamalịle ukujoba, po papo Jakobụ alinkwamụla alinkuti: Mwe bāmyitu amụpilikisyege kumyangu. 14Sịmyonị atubūlịle mụno Kyala ātalịle ukubakētela abāpānja, apa alinkubasalamo bamo ukuja bāndu bāke. 15Isị sịkwịtikana namasyu ga bakụ̄ngụlụka, bo apa gasị̄mbị̄gwe aga gịkuti:

16Pānyụma pali sịsịsị,

nịsakugomokaga kangi,

po nịsakujijēngaga kangi īnyụ̄mba ja Ndabitị iji jagwịle,

nịsakugitendekesyaga imịsyalila gyake,

nukujijēnga kangi;

17ukuti abāndu bōsa aba bāsyele banndōndege UNTWA

Nabapānja bōsa aba īngamụ jangu jijobị̄gwe

kumyabo.

18Bo ịkujoba UNTWA,

uju āsịnāngị̄sye sịsịsị ukufụma liịjolo.

19Po apa ulutụmụlilo lwangu lo ulu.

Tungabatamyaga abāpānja aba bikupindukila kwa Kyala. 20Lolị tubasị̄mbilege ukuti basōkengeko kubunyalị bwa fịfwanị, na kubulogwe, na kufịnyamāna ifị fịpị̄tị̄gwe kummịlo, kangi banganwaga ilịlopa. 21Namanga kukabalilo akatalị amasyu ga Mose gịkulūmbililịgwa ntwaja tōsa nukubalịgwa nnyụ̄mba sya kwịpụ̄tilamo, kukuti ịsịku lya sabāti.

Kalata ịkutumịgwa kubị̄tikị abafụma mbwapānja

22Po papo abatumịgwa, nabakulu, nikipānga kyosa balinkutụmụla ukubasalamo abāndu nkilūndilo kyabo nukubatuma ku Antyokịja pamopēne na Paulị na Balịnaba. Balinkunsala Jụ̄ta uju bạ̄tigi Balisaba na Sịla aba bāli bāndu balōngosi mbāmyabo, 23balinkubapa kalata uju āsị̄mbị̄gwe ukuti:

Jo uswe twe batumịgwa na bakūlụ,

twe bāmyinụ,

tụkubaponịa mwe bāmyitu mwe ba mwa Antyokịja,

na mụ Sịlịja,

na mụ Kịlịkịja mwe mụfụmịle mbāpānja.

24Papo tupilị̄ke ukuti abāmyitu bamo ukufụma

kumyitu babatamị̄sye namasyu,

nukugipalaganịa imyojo gyinụ,

tukaja jo uswe twabalagị̄le.

25Bo twịtikēne,

twagịle nụnụ ukubasala abāndu bamo abā

kubatuma kumyinụ,

pamopēne na bakūndwe bītu ba Balịnaba na

Paulị;

26aba ubūmị bwabo baponịle ukubupēsya panōngwa

ja ngamụ ja NTWA gwitu Jesụ Kilisịtị.

27Po apa tubatumịle Jụ̄ta na Sịla,

bo bịkubabūlaga syosa sịsịsị nimịlomo gyabo.

28Namanga Mbepo Mwịkemo nanụswe,

twagịle syo nụnụ ukuti tungabōngelāngapo

ukubatwika ikitwalo ikisịto ukukīnda isị

sịkulōndịgwa isya kuti:

29Mụngālyaga ifị̄ndu ifị bị̄kemēsịsye kufịfwanị;

mụnganwaga ilịlopa,

mụngālyaga īnyama ja kinyamāna iki kipị̄tị̄gwe

kummịlo,

mwịjēpusyege na kubulogwe.

Linga mụkwịjēpusya kuli fịfịfị,

bo mụnosịsye.

Mụgonege.

30Lelo bo balagị̄gwe, balinkusụlụka ukubūka mwa Antyokịja; balinkubabūnganịa abị̄tikị bōsa, po papo balinkubapa kalata. 31Lelo bo babalịle, balinkusekela panōngwa ja lusūbisyo ulu lwalịmo. 32Po papo Jụ̄ta na Sịla aba bope bāli bakụ̄ngụlụka, balinkubasūbisya abāmyabo na masyu ga mị̄ngị, balinkubakasya. 33Lelo bo bagonịlepo, abāmyabo ba mwa Antyokịja balinkubalaga nulutēngāno. Po papo balinkugomoka ukubūka kuli aba babatumịle. [ 34Lolị Sịla ātụmwịle ukusyala mụmo.]

35Umwene lolị Paulị na Balịnaba balinkuja mụ mwa Antyokịja kukabalilo ịtolo, balinkumanyịsya nukulūmbilila ilịsyu lya NTWA pamopēne na bāngi bā bị̄ngị.

Paulị na Balịnaba bịkupāgukana

36Lelo bo gakīndịlepo amasịku manāndi, po papo Paulị alinkummbūla Balịnaba alinkuti: Nduko tugomokeleko kukubakēta abāmyitu mụno bajīlị̄le, ntwaja tōsa mụno twalūmbililaga ilịsyu lya NTWA. 37Umwene Balịnaba ālōndaga ukuti bammwege Johanị, uju bạ̄tigi Malika ukubūka nagwe. 38Lolị Paulị akāliganịle ukuti bammwege Malika nukubūka nagwe, papo ulutasị ābajōngịle mụ Pamfịlịja, kangi ākānịle ukubūka nabo kumbōmbo. 39Po papo lulinkutụpụka ulukānị ulukulūmba, lo lulinkubapelela ukutapukana, Balịnaba alinkummwega Malika, balinkwịpaka mụngalaba, balinkubūka mụ Saịpụlasị. 40Lolị umwene Paulị alinkunsala Sịla, alinkubūka nagwe, bo abāmyabo, bammbīkịle mbulindililị bwa ịpyana lya NTWA, alinkusụmụka. 41Po papo alinkukīsanịa mụ Sịlịja na mụ Kịlịkịja, bo ịkwenda alinkufịkasya ifịpānga.

Currently Selected:

Īmbōmbo Sya Batumịgwa 15: NYB96

Highlight

Copy