Īmbōmbo Sya Batumịgwa 14

Paulị na Balịnaba mw'Ịkonịja

1Lelo kōpe kula ku Ịkonịja Paulị na Balịnaba balinkwịngila nnyụ̄mba ja kwịpụ̄tilamo ija Bajụ̄ta, balinkusịjoba fị̄jo īnōngwa, po papo ikilūndilo kya bāndu ikikulūmba ikya Bajụ̄ta na Bagịlịkị kilinkwịtika. 2Abēne lolị Abajụ̄ta abasịtakwịtika, balinkubasāmbulanịa abāpānja, balinkusyonānga īnyịnogono syabo, ukuti babakalalilege abāmyabo.

3Paulị na Balịnaba balinkugonapo akabalilo akatalị, balinkujoba pabwelụ ịtolo isya NTWA, uju ālisịsịmikisyaga ilịsyu lyake ilya ịpyana, mfị̄ka na mfị̄swigu ifị āpelaga mmaboko gābo. 4Lolị abēne abāndu ba nkāja balinkutapukana; bamo balinkuja kulubafụ lwa Bajụ̄ta, abāngi balinkuja kulubafụ lwa batumịgwa.

5Po papo lelo abāpānja bamo na Bajụ̄ta pamopēne na balagilị bo bịkuti tubāngalile abatumịgwa nukubatịka na mabwe, 6abēne abatumịgwa balinkusịpilika, balinkujōngela mụ Lịsịtịla na mụ Ndelịbe utwaja twa Lịkaonija, na nkị̄su kya mụmbali; 7mo balinkulūmbilila īnōngwa īnụnụ.

Paulị na Balịnaba mụ Lịsịtịla na mụ Ndelịbe

8Lelo ālimo mụmo mụ Lịsịtịla umụ̄ndu jumo umōnywa amalūndi, uju ālemēle ukufụma mụ̄nda mụnna, jo akālyendịlemo sịku. 9Alinkupilika isị ājobaga Paulị; umwene Paulị alinkunndūlalila. Lelo bo ammbwene ukuti ali nalo ulwịtiko ulwa kuti ịkubumbulusịgwaga, 10alinwkịnula ilịsyu lyake alinkummbūla alinkuti: Sụmụkaga gwimege namalūndi gāko, ugolokege. Po papo alinkwima nakalīnga ịtolo, alinkwenda. 11Po papo lelo ifịlūndilo fya bāndu bo basịbwene isị ābōmbịle Paulị, balinkwịnula amasyu balinkujobela Nkikaonịja balinkuti: Ba kyala basụlwịke bị̄sịle kumyitu nkifwanị kya bāndu. 12Balịnaba balinkumpa ija Selụ, umwene Paulị balinkumpa ija Helime, papo īnōngwa syosa āsịjobaga jūjo. 13Po papo umpụ̄tị gwa Selụ, uju īnyụ̄mba jake ja kwịpụ̄tilamo jali nkyenị nkāja, alinkutwala īngāmbaku ningata ja bulenge, alinkufịtwala pakifịgo kya kāja, alinkulōnda ukwịkemēsya kubatumịgwa, jūjo pamopēne nifịlūndilo fya bāndu. 14Lolị abēne abatumịgwa ba Balịnaba na Paulị bo bāsịpilị̄ke sịsịsị, balinkunyafụlanịa imyenda gyabo, balinkubopa nukwakwịngila nkilūndilo kya bāndu, balinkukōlela balinkuti: 15Mwe tunya, syo mụkubōmba sya fịkị sịsịsị? Buno nanụswe tuli bāndu ịtolo bo jujumwe. Uswe tulịpo apa ukuti tubafụmụkisyege īndumị īnụnụ ija kuti mụfịlekege ifịfwanị fya ịtolo ifị, mụpīndukilege kwa Kyala umūmị, uju āpelịle kumwanya nikị̄su, ninyanja na fyosa ifị fịlimo mụmo. 16Ịjolo Kyala āfịlekịle ifịkolo fyosa ukuti fyendege mụnjila syabo bābo. 17Pope umwene Kyala alinkusịta nukuleka ukwịbonesya mụmbōmbo īnụnụ isị ikubabōmbela, ịkubapa īfụla ukufụma kumwanya, nutubalilo twa mboto, ịkubapa ifị̄ndu nukubịsukisya ulusekelo mụndụmbụla syinụ. 18Napapo bajobị̄le bo sịsịsị, kukāli, kupepe ukubasịgila abāndu bala, ukuti bangị̄kemēsyaga kumyabo.

19Lelo po papo balinkwịsa Abajụ̄ta aba bāfụmịle mwa Antyokịja na mụ Ịkonịja, balinkufịsōnga ifịlūndilo fya bāndu, balinkuntịka Paulị namabwe, balinkunkwaba bụkunsōsya pānja ukufụma nkāja, balinkuti afwịle. 20Lelo bo abị̄tikị babūngēne nukunsyungūtila, po papo alinkusụ̄mụka, alinkwakwịngila nkāja, Ulwa kilābo, alinkusōka ukubūka ku Ndelịbe pamopēne na Balịnaba.

Paulị na Balịnaba bịkugomokela mwa Antyokịja mụ Sịlịja

21Lelo bo balūmbilị̄le īndumị īnụnụ nkāja kala ka Ndelịbe, nukubapela bafụ̄ndịgwa abāndu ba bị̄ngị ịtolo, po papo balinkugomoka ukubūka mụ Lịsịtịla na mụ Ịkonịja, na mwa Antyokịja; 22balinkugikasya imyojo gya bị̄tikị nukubasụkānịa ukuti bajege mụ ndwịtiko, kangi balinkubabūla balinkuti: Uswe twesa tụkwendaga mbutolwe ubwịngị fị̄jo ukwịngila nkitāngālala kya Kyala. 23Bo babasalịle abakulu mfịpānga fyosa ifya bị̄tikị, balinkwịpụ̄ta nukufịpīka ifị̄ndu, balinkubabīka mmaboko ga NTWA uju bālimmwịtị̄ke.

24Bo bakīsēnịe mụ Pịsịtịja, po papo balinkwakufịka mụ Pamfịlịja. 25Lelo bo balūmbịlị̄le ilịsyu mụ Pelịge, po balinkubūka mụ Atalịja. 26Ukufụma mụ Atalịja, balinkubūka mwa Antyokịja mụno ịjolo bābīkị̄gwe mbulindililị bwa ịpyana lya Kyala kumbōmbo iji bājimalisịsye.

27Lelo bo bafịkịle, po papo balinkubōmba ulukomāno lwakipānga, balinkupānga syosa isị Kyala ābōmbịle nabo, nukuti abị̄gulile abapānja ikifịgo kya lwịtiko. 28Po papo balinkugonapo na bị̄tikị akabalilo akatalị.

Currently Selected:

Īmbōmbo Sya Batumịgwa 14: NYB96

Highlight

Copy