Īmbōmbo Sya Batumịgwa 13

Balịnaba na Saulị bịkusalịgwa nukutumịgwa

1Lelo nkipānga kya Antyokịja bālimo abāndu abāngi aba bali bakụ̄ngụlụka na bamayị̄sị, Balịnaba na Sịmyonị uju āli jo Ntị̄tu īmbēgwa, na Lukịo ugwa mụ Kịlene, Manenị, uju ākulanị̄le numalafyale Helotị, na Saulị. 2Lelo bo bali pakwịpụ̄ta ku NTWA nukufịpīka ifị̄ndu, Mbepo Mwịkemo alinkubabūla alinkuti: Amụsūngulilege Balịnaba na Saulị kumbombo iji mbabilikilịle. 3Lelo bo bafịpīkịle ifị̄ndu nukwịpụ̄ta, balinkubabīkapo amaboko, balinkubasụmụsya.

Balịnaba na Saulị bịkulūmbilila mụ Saịpụlasị

4Abene lelo bo batumị̄gwe na Mbepo Mwịkemo, balinkusụlụka ukubuka mụ Seloịkịja, ukufụma mụmo balinkuloboka inyanja ukubuka mụ Saịpụlasị. 5Bo bafịkịle mụ Salamị, balinkulūmbilila ilịsyu lya Kyala nnyụ̄mba sya kwịpūtilamo sya Bajụ̄ta. Jope Johanị (Malika) balinkuja nagwe, alinkuja ntūlị gwabo. 6Lelo bo bēndịle ulusūngo lōsa bajịlekufịka mụ Pafụ, balinkummwaga umụ̄ndu jumo ummbombamanjele, unkụ̄ngụlụka gwa butūngulu, unjụ̄ta, uju īngamụ jake ali jo Balịjesu. 7Jo ali pamopēne na Selịgị Paulị, undindililakịsu, umụ̄ndu gwa mahala uju ābabilikị̄le ba Balịnaba na Saulị, ukuti apilikege ilịsyu lya Kyala. 8Umwene Elima ugwa mānjele jula (namanga mo mụno jịkusanukisịgwa īngamụ jake) Nkigịlịkị alinkubapinga, alinkulōnda ukunngomola undindilila kịsu ukuti angapindukilaga kulwịtiko lwa bukilisịtị. 9Po papo umwene Saulị uju ijīngi āli jo Paulị, alinkwịsula Mbepo Mwịkemo alinnkundulalila umbombamanjele jula, 10alinkujoba nagwe alinkuti: Gwe nnya Setano ugwe, gwe gwịswịle ubusyobị nubukomụ bōsa, gwe nndufụ gwa bugolofụ bōsa; ngīmba utịkulekaga ukusịnịongasya injila īngolofụ sya NTWA? 11Lelo lilino ikiboko kya NTWA kịkukufundaga, kujaga mfwamaso, kịkukindāngapo akabalilo bo utịkulibona niịsuba. Nakalīnga ịtolo ulụfunịenịe ningị̄sị fịlinkungwila, alinkupūsanịka, alinkulōnda umụ̄ndu gwa kunkola ikiboko nukunndongosya. 12Lelo bo undindililakịsu asịbwene isị syabonị̄ke, alinkwenda nukwịtika, alinkuswịga fịjo ulumanyịsyo lwa NTWA ulu āpilị̄ke.

Balịnaba na Paulị mwa Antyokịja nkisu kya Pịsịtịja

13Po papo Paulị nabanịne balinkwịpaka kangi mwịbōtị ukufụma mụ Pafụ, balinkwakufịka mụ Pelịge nkisu kya Pamfịlịja. Umwene Johanị (Malika) alinkubaleka, alinkugomoka ukubuka ku Jelụsalemụ. 14Lolị abene balinkwenda ukufụma mụ Pelịge, balinkwakufịka mwa Antyokịja, nkisu kya Pịsịtịja. Pịsịku lya sabāti balinkwịngila nnyụ̄mba ja kwịpūtilamo, balinkutūgasya.

15Lelo bo gabalịgwe amasyu ga lulagilo lwa Mose nagā bakụngụlụka, po papo abakulūmba ba nnyụ̄mba ja kwịpūtilamo balinkubatumila īndumị balinkuti: Mwe bāmyitu, linga muli nalyo limo ilịsyu lya kubakasya abāndu aba amujobēge. 16Po papo Paulị alinkwima, alinkubabatamịsya nikiboko alinkuti: Mwe bāndu ba Ịsịlaelị na mwe mụkuntịla Kyala, amụpilikisyege. 17Kyala gwa bāndu aba abany'Ịsịlaelị, abasalịle abīsukulu bītu, alinkubapela ukuja kikolo ikikulumba bo bali mbuhēsya nkisu kya Egịpịtị; kangi alinkubasōsya mụmo namaka gāke amakulūmba. 18Kufyịnja amalōngo mana alinkuti lyambepa kuli bābo nndungalāngala. 19Lelo bo afịpyụtịle ifịkolo fịhāno nafịbili nkị̄su kya Kanānị, ābapēle ikị̄su kyabo ukuja kilīngo, kufyịnja ifị fyali pị̄pị ukuja bāmịa bāna na malōngo mahāno (450). 20Pānyụma alinkubapa abalagilị aba kubalōngosya ukwịsakufịka pankụ̄ngụlụka Samwelị. 21Po papo balinkusūma umalafyale, umwene Kyala alinkubapa Saulị unnya Kịsị, umụ̄ndu gwa nkikolo kya Benjamịnị, ku fyinja amalōngo mana. 22Lelo bo ansōṣịsyepo Saulị, po papo Kyala alinkubīmịkila Ndabitị ukuja Malafyale gwabo. Jo alinkunsịsịmikisya alinkuti: Nummwagịle Ndabitị unnya Jese; umụ̄ndu uju īndụmbụla jangu jịkyelịle nagwe; jo uju ịsakubōmbaga ubwịgane bwangu bōsa. 23Ndujụ̄ngụ lwa mụ̄ndu jujuju, Kyala ansụmụkị̄sye Ịsịlaelị umpokị uju jo Jesụ, bo mụmo afị̄ngịle. 24Uju bo akāli nukwịsa, Johanị alinkutala ukulūmbilila kubany'Ịsịlaelị bōsa isya lōsyo lwa lupīnduko. 25Umwene Johanị bo ịkumalisya īndumị jake, alinkubabūla abāndu alinkuti: Mụkwịnogona ukuti une ne anị? Mụno mụkunyịnogonela ukuti mo njīlị̄le, mo ngajīla. Lolị ịkwịsa pānyụma pamyangu uju ifịlato fyake ngabagila nukufụndula.

26Mwe bāmyitu, mwe bāna ba nkikolo kya Abụlahamụ na mwe mụkuntị̄la Kyala, ilịsyu lya bupokị ubu, litumị̄gwe kumyinụ. 27Namanga abenekāja ka Jelụsalemụ na bakulūmba bābo, bakālimmēnye umwe ukuja jo mpokị, gōpe namasyu ga bakụ̄ngụlụka aga gabalịgwaga bwịla pa sabāti bakagāgēnịe. Lelo balinkugapela amasyu ga bakụngụlụka ukuti mo gị̄silege apa balinkunndōnga Jesụ ukuti afwege. 28Napāpo bakājagịle īnōngwa najimo ija kunngogelamo, balinkunsūma Pịlāti ukuti agogịgwege. 29Lelo bo basịmalisịsye syosa isị sịkunnjoba mwa kalata, balinkunsụlụsya pampịkị balinkummbīka mwịpūmba. 30Lolị Kyala alinkunsyusya mbafwe. 31Alinkubasetukila amasịku ga mịngị aba bāfyukịle nagwe mụ Jelụsalemụ ukufụma mụ Galịlaị, aba lilino bo bakētị bāke kubāndu. 32Nanụswe twịsịle apa tụkubafụmụkisya īnōngwa inụnụ isya lufị̄ngo ulu kyala abafingīle mbukūlu bītu, 33tụkuti Kyala asịmalīkịsye mụli uswe twe bị̄sukulu bābo, apa ansyusyaga Jesụ, bo lilyo lisị̄mbị̄gwe musabulị ulwimbo lwabubili ili lịkuti:

Ugwe uli mwanāngu

ngupāpịle umụsyugu.

34Loli isya kuti ansyusị̄sye mbafwe,

unsitakugomokelako kūko kukubola,

Kyala ājobịle ātịle:

Nisakukupaga ulusajo ulwịkemo,

ulwa nalolị,

ulu nālimfị̄ngị̄le Ndabitị.

35Fyobēne musabulị ijịngị ịkuti:

Utịsakunndeka Umwịkemo gwako ukuti abolege.

36Umwene Ndabitị lolị bo abōmbịle isya bwịgane bwa Kyala pakabalilo kāke, po papo alinkwenda nukufwa, alinkusyilịgwa pamopēne na bāgwịse, jo ummbili gwake gulinkubola. 37Lolị umwene uju Kyala ālinsyusị̄sye mbafwe akābolịlemo sịku. 38Mwe bāmyitu, amụsịmanyege ukuti mụli jujuju mo mụno ubuswe bwa mbị̄bị bụkulūmbililịgwa kumyinụ; 39kangi nukuti gwesa uju linga ịkummwịtika Jesụ Kilisịtị, ịkuswegịgwa īmbị̄bị syosa po mo ịkubwagila ubugolofụ, isị akābagị̄le ukubwagilamo ubugolofụ mụngomēlesyo sya Mose. 40Mwandege lelo ukuti sịngabị̄silaga isị syajobị̄gwe na bakụ̄ngụlụka ukuti:

41Amụpilikisyege mwe bā lōbelo, mụswịgege ịtolo kangi mụfwege!

Namanga ngubōmba īmbōmbo mmasiku gīnụ,

īmbōmbo iji mụtịsakujị̄tikamo sịku, nalinga umụ̄ndu jumo ịkubabūla.

42Lelo Paulị na Balịnaba bo bịkusōka pānja ukufụma nnyụ̄mba ja kwịpụ̄tilamo, po papo abāndu bala balinkubapyelesya, ukuti bịsebababūlege kangi amasyu gagaga pị̄sịku ilīngi ilya sabāti. 43Lelo bo babalanị̄le ukufụma nnyụ̄mba ja kwịpụ̄tilamo, po Abajụ̄ta ba bị̄ngị naba bāpīndukị̄le Mbujụ̄ta, na batị̄la Kyala, balinkunkōnga Paulị na Balịnaba, aba bo bịkujoba nabo, balinkubakasya ukuti būmīlilege mwịpyana lya Kyala.

44Lelo pị̄sịku lya sabāti ili lyakōngile, abāndu bị̄ngị, ko kuja akāja kōsa, balinkubūngāna kukupilikisya ilịsyu lya Kyala. 45Lolị bo Abajụ̄ta bafịbwene ifịlūndilo, po papo kalinkubāga akabịnị, balinkusịpīnga syosa isị Paulị ājobaga, balinkuntuka amahēlu. 46Po papo Paulị na Balịnaba balinkujoba ịtolo nubukịfụ balinkuti: Umwe jo umwe libabagị̄le ilịsyu lya Kyala lijobịgwege tāsị kumyinụ; lelo papo mụkulikāna, kangi mukwịbona mwịbēne ukuti mụkabagila kubūmi bwa bwịla, lilino po tụkusanukilaga kubapānja. 47Namanga UNTWA atulagị̄le ātịle:

Ngubīkị̄le ugwe ukuja lumụlị lwa bāpānja,

ukuti ujege gwa kutwala ubupokị,

ukufịka kuno kimalikị̄le ikị̄su.

48Lelo bo abāpānja basịpilị̄ke sịsịsị, balinkusekela balinkulitụ̄fya ilịsyu lya NTWA. Po papo bōsa aba bāsūngulilị̄gwe kubūmị bwa bwịla balinkwịtika. 49Ilyene ilịsyu lya NTWA lilinkubalanịla nkị̄su kyosa. 50Lolị Abajụ̄ta balinkubasāmbulanịa abakị̄kulu abafụmụke abatị̄la Kyala, na bakulūmba bankāja, balinkubasōnga abāndu ukubafwima ba Paulị na Balịnaba, balinkubakagamo nkị̄su kyabo. 51Lolị abēne balinkubakụng'ūndila ulufụ̄mbi lwa mmalūndi gābo, balinkubūka mwịkoni. 52Abēne abafụ̄ndịgwa balinkwịsula nulusekelo na Mbepo Mwịkemo.

Currently Selected:

Īmbōmbo Sya Batumịgwa 13: NYB96

Highlight

Copy