Īmbōmbo Sya Batumịgwa 12

Ikipānga kikōngelapo ukufwimịgwa

1Po papo lelo kifụkị nakabalilo kalakala, umalafyale Helotị alinkwanda ukubabōmbela ububị̄bị bamo aba nkipānga. 2Alinkunngoga nulūbo Jakobụ ugwamyabo gwa Johanị. 3Lelo bo āgịle sịbakyelị̄le Abajụ̄ta, alinkōngelapo, alinkunkola Petelị. 4Lelo bo ankolịle, alinkwenda nukummbīka mụnnyololo, alinkufịpa ifịbụgụtila fya basịkali fịna ifyakunndindilila, ukuti bo Pasaka akīndịle po bansōsyege pakunndōnga. 5Petelị bo ịgalilị̄gwe nnyụ̄mba ja bannyololo buno buno; lolị ikipānga kyalịjūmị̄ke fị̄jo ukummwịpụ̄tila kwa Kyala.

Ugwandumị ịkunsōsya Petelị mụnnyololo

6Lelo Helotị bo ịkuja pakunsōsya, ikilo kikyo Petelị āgonịle utulo pakāti pabasịkali babili, āpịnyị̄gwe nimịnyololo mịbili; pope pakifịgo bālipo abalindililị aba balindililaga īnyụ̄mba ja bannyololo. 7Nakalīnga ịtolo ugwandumị gwa NTWA alinkutụpụka, ulumụlị lulinkumụlika nnyụ̄mba. Alinkunkoma Petelị palubafụ, alinkundēmbusya alinkuti: Sụmụkaga mbibimbibi. 8Po papo imịnyololo gilinkulagala mmaboko. Po papo ugwandumị alinkummbūla alinkuti: Ịpịnye mụnsana, ufwalege ifịlato fyako; umwene alinkubōmba bo bunobuno. Po papo alinkummbūla alinkuti: Fwalaga umwenda gwako, ūngōngege. 9Po papo Petelị alinkunkōnga, alinkusōka nagwe pānja. Umwene akāsịmēnye ukuti syanalolị isị syabōmbịgwaga, lolị alinkwịnogona ukuti ịkukibona ikisetuka mụnjosị. 10Bo bakīndịle ubulindililị bwa kwanda nubwa bubili, balinkufịka pakifịgo ikya kyela ikya kusōkela ukwịngila nkāja, kyo kilinkwịguka kyene ịtolo. Po papo balinkusōka, balinkukīnda umpūlo gumo, nakalīnga ugwandumị alinkwenda nukunndeka. 11Umwene Petelị bo ị̄jagēnịe alinkuti: Lilino po Mmēnye nalolị ukuti UNTWA antumịle ugwandumị gwake, ambokịle mmaboko ga Helotị na mụli isị Abajụ̄ta bāgụ̄lilaga.

12Bo asyagēnịe sịsịsị, alinkubūka kunyụ̄mba ja Malịja unna gwa Johanị, uju ijīngi āli jo Malika; mụno bābūngēne ba bị̄ngị bị̄pụ̄taga. 13Lelo bo akụng'ụndịle palwịgị lwa kifịgo, po papo unndīndwana jumo ummbōmbị, uju ali jo Londa īngamụ, alinkubūka pakupilikisya. 14Bo alimēnye ilịsyu lya Petelị, panōngwa ja Lusekelo, alinkwakubabūla ukuti Petelị īmịle pakifịgo. 15Abēne balinkummbūla unndīndwana jula balinkuti: Ulinikigili. Umwene lolị alinkūmīlisya fị̄jo ukuti nalolị bo sịli. Abēne balinkuti: Utigi gwandumị gwake. 16Umwene Petelị alinkūmīlisya ukukụng'ūnda. Lelo bo bị̄gwịleko, balinkumnbona, balinkuswịga fị̄jo. 17Umwene alinkubabatamịsya nikiboko, alinkubapāngila mụmo UNTWA ālinsōkị̄sye nnyụ̄mba ja bannyololo, alinkubabūla alinkuti: Mukammbūlege Jakobụ na bāmyitu īnōngwa sịsịsị. Po papo alinkusōka alinkubūka kubūngi.

18Lelo bo bukị̄le, po papo ulutēnde ulukulūmba lulinkubāga abasịkali, kulinkusoba kulinkuleka, ukuti sịmmwagịle sya fịkị Petelị. 19Umwene Helotị bo anndōndịle atolị̄gwe, alinkubānịa fịjo abasịkali aba banndindililaga; po papo alinkusōsya ululagilo ukuti bagogịgwege. Umwene alinkusōkamo mụ Jụtaị alinkusụlụka mụ Kesalịja, mo alinkwakugonapo.

Ukufwa kwa Helotị

20Umwene Helotị alinkubakalalila fịjo abāndu ba mụ Tịlị na mụ Sịtonị; lolị abene balinkwịsa kumyako nindụmbụla jimojene, balinkutala tāsị ukumanyana na Bulasịtị uju āli nndindililị nkulụmba gwa nnyụ̄mba ja Malafyale, na po balinkubūka kwa Helotị kukusūma ulutēngano; namanga ikị̄su kyabo kyasūbilaga ifị̄ndu ifị fyafụmaga nkị̄su kya Malafyale. 21Lelo pị̄sịku limo ilị̄salịgwa, Helotị alinkufwala imyenda gyake gya butwa, alinkutugala pakikota kya butwa, alinkubabūla abāndu īnōngwa. 22Po papo abāndu balinkukōlela nulusekelo balinkuti: Ilịsyu ili lya Kyala, likaja lya mụ̄ndu. 23Po papo nakalīnga ịtolo ugwandumị gwa NTWA alinkunkoma Helotị papo akampaga ubukulūmba Kyala. Īfwịngịlị sịlinkundya, alinkufwa. 24Ịlyene lolị ilịsyu lya NTWA, lilinkukula lilinkubāla. 25Po papo Balịnaba na Saulị bo bamalịle īmbōmbo jabo, balinkugomoka ukufụma ku Jelụsalemụ; balinkummwega na Johanị uju bātigi jo Malika.

Currently Selected:

Īmbōmbo Sya Batumịgwa 12: NYB96

Highlight

Copy