Īmbōmbo Sya Batumịgwa 11

Petelị ịkulīngānịa kukipānga mụ Jelụsalemụ īmbōmbo syake

1Po papo abatumịgwa pamopēne na bāmyabo, aba bali mụ Jụtaị, balinkupilika ukuti abāpānja balyambilịle ilịsyu lya Kyala. 2Lelo bo Petelị āfyukịle mụ Jelụsalemụ, Abajụ̄ta abị̄tikị aba bāliganịle ukuti abāndu abā fịkolo ifị̄ngị babụ̄tịgwege, balinkummūmanịla balinkuti: 3Ugwe ubūkịle ujịlekwịngịla nukutūgasanịa na bāndu abasịtakubụ̄tịgwa, ulinkulya nabo. 4Po papo Petelị alinkwanda ukubalingānịa mụno syakōnganị̄le, alinkuti: 5Une nāli nkāja ka Jope nị̄pụ̄taga, po papo ndinkukomwa ndinkukibona ikisetuka, ndinkwaga akāndu kịkusụlụka kifwene nikilūndo ikinywamụ kịkusololosịgwa mfịpeto fịna ukufụma kumwanya, kilinkwịsa apa nālipo. 6Po papo ndinkukenēsya fị̄jo, ndinkufịbona nkāti ifya malūndi mana ifịnyamāna fya nkisu, nifya ndị̄su, nifị fikwendela īnyānda, ninjunị sya mụmpālānga. 7Kangi ndinkupilika ilịsyu lịkummbūla lịkuti: Sụmụka Petelị, bōlaga ulyege. 8Lolị une ndinkuti: Nemma gwe NTWA, buno ifị fịli mwịko nifịnyalị fịkịngilamo sịku nkanwa mmyangu. 9Po papo ilịsyu lilinkwamụla ulwa bubili ukufụma kumwanya lilinkuti: Ifị linga ēlwịsye Kyala, komma ukuti fịli mwịko. 10Sịsịsị sịlinkwandisanịa ukuboneka katatu, po papo fyosa fịlịnkukwabịgwa kangi ukubūka ku kumwanya. 11Po papo pakabalilo kalakala, balinkufịka abāndu batatu panyụ̄mba iji twalịmo, aba bātumị̄gwe kumyangu ukufụma mụ Kesalịja. 12Po papo Mbepo alinkummbūla alinkuti: Būkaga nabo kisịtakwịlāmwa. Abāmyitu ntandatu aba balinkwenda pamopēne nanịne, tulinkwakwịngila nnyụ̄mba ja mụ̄ndu jula. 13Umwene Kolịnelị alinkutupāngila mụno ālimmbōmbị̄le ugwandumị īmịle nnyụ̄mba jake, ịkummbūla ịkuti: Tumaga īndumị ku Jope, ukammwege Sịmonị uju bịkuti jo Petelị. 14Jo ịsakukubūlaga amasyu aga kukupoka ugwe naba nnyụ̄mba jako. 15Lelo bo ngwanda ukujoba, po papo Mbepo Mwịkemo alinkubasololokela, bo apa ātusololokị̄le nanụswe kubwandilo. 16Po papo ndinkulikumbuka ilịsyu ili ājobịle UNTWA ili ạ̄tigi: Umwene Johanị jo ōkesyaga namīsi, umwe lolị mwịsakokesịgwaga na Mbepo Mwịkemo. 17Lelo linga Kyala ābapēle bope ikikūngilwa bo mụmo ātupēlị̄le nanụswe, twe tummwịtīke UNTWA Jesụ Kilisịtị, nāli ne anị ne nābagị̄le ukumpīnga Kyala? 18Lelo bo bapilị̄ke sịsịsị, po papo balinkuja mye ịtolo, balinkuntụ̄fya Kyala balinkuti: Po ngīmba Kyala abapēle na bāpānja ulupīnduko, ulu lụkutwala ubūmị.

Ịkipānga kya Antyokịja

19Panōngwa ja ngubilo isị syabonị̄ke pakabalilo aka Sịtefanị āgogị̄gwe, abị̄tikị bābalanị̄le. Bamo babukịle mụ Fenịke, abāngi mụ Saịpụlasị, na mwa Antyokịja, balinkusịta nukummbūla najumo ilịsyu, lolị bēne ba Bajụ̄ta. 20Lelo bālịmo abị̄tikị bamo mmyabo aba bāfụmịle mụ Saịpụlasị na mụ Kịlene, aba bo bafịkịle mwa Antyokịja, balinkujoba na Bagịlịkị, balinkubalūmbilila īnōngwa īnụnụ isya NTWA Jesụ. 21Amaka ga NTWA, galinkuja pamopēne nabo; abāndu ba bị̄ngị balinkwịtika, balinkugomokela ku NTWA. 22Īnōngwa syabo sịsịsị, sịlinkufịka mụmbulukutu sya ba nkịpānga kya mụ Jelụsalemụ. Po papo balinkuntuma Balịnaba ukubūka mwa Antyokịja. 23Uju bo afịkịle nukulibona ilị̄pyana lya Kyala, alinkusekela alinkubakasya sya bōsa ukuti bammūmililege UNTWA Nindụmbụla isya lwịfịmbilisyo. 24Namanga Balịnaba ali mụ̄ndu nnụnụ, āliswịle Mbepo Mwịkemo nulwịtiko. Po papo ikilūndilo ikikulūmba kilinkongelapo kulubafụ lwa NTWA. 25Po papo Balịnaba alinkubūka ku Talịsị kukunndōnda Saulị. 26Lelo bo ammwagịle alinkuntwala ku Antyokịja. Po papo bōsa bo babīli balinkuja pamopēne balinkutūgasya nikipānga kila ikyinja kyosa, balinkukimanyịsya ikilūndilo kya bāndu ikikulūmba. Mo mwa Antyokịja mụno abafụ̄ndịgwa bālyandị̄le ukubilikilịgwa ija Bakilisịtị.

27Loli mmasịku galagala, po abakụ̄ngụlụka bamo balinkufụma mụ Jelụsalemụ, balinkusụlụka ukwịsa mwa Antyokịja. 28Po papo umwịnābo jumo uju āli jo Agabu īngamụ, alinkwima, alinkukụ̄ngụlụkila ngānị mwa Mbepo, ukuti jịkuja pakugwa īnjala īngulumba pakị̄su kyosa; jo jagwịle pakabalilo ka bulagilị bwa Kilautịja. 29Po papo abatumịgwa balinkwịtikana ukubatumila ubutūlị abāmyabo aba bāli mụ Jụtaị, balinkutuma umụ̄ndụ gwesa bo mụmo bwajīlị̄le ubukabị bwake. 30Balinkubōmba bo bunobuno, balinkubatumila abakulu ba kipānga ukwendela mmaboko ga Balịnaba na Saulị.

Currently Selected:

Īmbōmbo Sya Batumịgwa 11: NYB96

Highlight

Copy