Īmbōmbo Sya Batumịgwa 10

Petelị na Kolịnelị

1Lelo ālimo umụ̄ndụ jumo mụ Kesalịja, uju īngamụ jake āli jo Kolịnelị, unndōngosị gwa kilūndilo kya basịkali iki bạ̄tigi kya B'Ịtalịja. 2Āli mụ̄ndu unngolofụ, kangi antị̄laga Kyala ninyụ̄mba jake jōsa, ābapaga abāndu ba bị̄ngị ifya busūsilwa, alinkwịpụ̄ta kwa Kyala bwịla. 3Ilị̄sịku limo, pakabalilo ka buhāno na buna, alinkummbona pabwelụ ugwandumị gwa Kyala ịkunsetukila, ịkwịsa kumyake ịkummbūla ịkuti: Gwe Kolịnelị! 4Po papo Kolịnelị alinkunndūlalila ugwandumị nulutēnde alinkuti: Kuti fịkị gwe NTWA? Umwene alinkummbūla alinkuti: Ịnyịpụto syako nifya busūsilwa fyako fịfyukịle kumwanya, fị̄pelịle ukuja fya kukukumbukila Kyala. 5Linino lelo tumaga abāndu ku Jope, bakammwege umụ̄ndu jumo, Sịmonị uju bịkuti jo Petelị, 6uju ịkugona pamụ̄ndu jumo Sịmonị umfụgụtangubo, uju īnyụ̄mba jake jili kūmbali kunyanja. 7Lelo bo abūkịle ugwandumị uju ājobaga nagwe, po papo alinkubakōlela ababōmbị bāke babili nunsịkali jumo uju antị̄laga Kyala, ukufụma mụli aba bammbōmbelaga; 8lelo bo abalingēnịe syosa isị syabonị̄ke, po papo alinkubatuma ku Jope.

9Ulwa kilābo, bo abāndu batatu bala bali mụnjila bịkusegelela nkāja, po papo Petelị alinkukwela pamwanya pānyụ̄mba pakwịpụ̄ta, pāli po pakabalilo ka ntandatu pamụ̄sị. 10Po papo īnjala jilinkunnduma, alinkulōnda ukulya; lelo bo bali pakutendekekesya ifị̄ndu, alinkwenda nukukomwa. 11Po papo kumwanya kulinkwịguka, alinkukabona akāndu kịkusụlụka, kafwene bo ikilūndo ikinywamụ kịkusololosịgwa pāsi mfịpeto fịna. 12Nkāti nkilūndo mo fyalịmo fyosa ifịnyamāna ifya malūndi mana, nīfị fịkwendela īnyānda, ninjunị sya kumwanya. 13Po papo alinkupilika ilịsyu ilị̄kulūmba lịkuti: Sụmụkaga Petelị, ubōlege ulyege. 14Lolị Petelị alinkuti: Nemma gwe NTWA, buno ngalyamo sịku ifị fịli mwịko nifịnyalị. 15Po papo ilịsyu lilinkwandisya kangi lilinkuti: Ịfị linga ēlwịsye Kyala, komma ukuti fịli mwịko. 16Sịsịsị sịlinkwandisanịa ukuboneka katatu, nakalīnga ịtolo akāndu kala kalinkufyuka kangi kumwanya.

17Lelo bo Petelị ịkwalangana mụ̄nda mmyake ukuti ikisetuka iki akibwene kyanāngisyaga sya fịkị, nakalīnga abāndu aba bātumị̄gwe na Kolịnelị, bo balalusịsye īnyụ̄mba ja Sịmonị, balinkwima pakifịgo, 18balinkukōlela, balinkulālūsya balinkuti linga bule ālimo Sịmonị uju bạ̄tigi jo Petelị. 19Umwene Petelị bo ākāli ịkwịnogona isya kisetuka, Mbepo mwịkemo alinkummbūla alinkuti: Abāndu batatu bịkukulōnda. 20Sụmụka lelo, gwịkege ubūkege nabo kisịtakwịlāmwa, buno mbatumịle jujune. 21Po papo Petelị alinkwịka, alinkubūka apa abāndu balịpo, alinkubalālūsya alinkuti: Jo une mụkūndōnda mụbīngilịle sya fịkị? 22Abēne balinkuti: Unsịkali unkulūmba Kolịnelị, umụ̄ndu unngolofụ untị̄la Kyala, unnụnụ bịkunnjoba ubunụnụ aba nkikolo kyosa kya Bajụ̄ta, abūlịgwe nugwandumị umwịkemo ukutuma īndumị kumyako, ukuti gwịsege nnyụ̄mba jake, nukuti asipilikege isị uli nasyo. 23Po papo Petelị alinkubị̄ngisya nnyụ̄mba, balinkugona.

Po papo ulwa kilābo alinkusụmụka, alinkubūka nabo, bope nabanịne bamo aba mụ Jope balinkubūka nagwe. 24Ulwa kilābo balinkwakufịka mụ Kesalịja. Umwene Kolịnelị ābagụ̄lilaga, ababūngēnịe abakamụ na bamanyānị bāke. 25Lelo bo Petelị ịkwịngila, Kolịnelị alinkummwambilila, alinkungwila mmalūndi, alinkummbụngụlụkila. 26Umwene lolị Petelị alinkunsụmụsya alinkuti: Sụmụka buno nanịne ndi mụ̄ndu ịtolo. 27Bo akāli ị̄kujoba nagwe alinkwịngila, alinkwaga abāndu ba bị̄ngị babūngēne. 28Po papo alinkubabūla alinkuti: Syo nanụmwe mụsịmēnye ukuti mwịko Unjụ̄ta ukōngāna pamo ukubūka kuli jumo ugwa kikolo ikīngi; lolị une Kyala ānāngịsye ukuti nangannjobaga najumo umụ̄ndu ukuja mwịko, nukuja nnyalị. 29Fyobene mbilikilị̄gwe, nịsịle kisịta kukāna. Lilino lelo po nịkulalūsya isị mụmbilikilị̄le. 30Po papo Kolịnelị alinkujoba alinkuti: Amasịku mana aga gakīndịle, pakabalilo bo kakakā aka buhāno na buna, nị̄pụ̄taga nnyụ̄mba jangu; ndinkwaga īmịle nkyenị mmyangu umụ̄ndụ uju afwele imyenda igi gịkung'alịka, 31ịkujoba ịkuti: Kolịnelị, ulwịpụ̄to lwako lupilikị̄gwe, nifya busūsilwa fyako fịkumbukị̄gwe nkyenị mwa Kyala. 32Lilino lelo tumaga īndumị mụ Jope, ukammbilikilege Sịmonị uju bịkuti Petelị, uju ịkugona nnyụ̄mba ja Sịmonị umfụgutangubo, kūmbali kunyanja. 33Nakalīnga ndinkukutumila īndumị, ubōmbịle kanụnụ apa gwịsịle. Lilino lelo uswe tulịpo apa nkyenị mwa Kyala, ukuti tupilikisyege syosa isị ulagilị̄gwe nu NTWA.

Amasyu ga Petelị

34Umwene Petelị alinkwanda ukujoba alinkuti: Mbwanalolị nsyagēnịe ukuti Kyala atịkunsalila umụ̄ndụ mbūndu bwake. 35Lolị umụ̄ndu gwesa ugwa mfịkolo fyosa, uju ịkuntị̄la Kyala nukubōmba īngolofụ, jo uju umwene ịkummwambilila. 36Umwe mụlimēnye ilịsyu ili ābatumilaga abany'Ịsịlaelị ilya kufụmụsya īnōngwa inụnụ isya lutēngāno mwa Jesụ Kilisịtị uju jo NTWA gwa bōsa. 37Ilịsyu ili likwilịle mōsa mụ Jụtaị, lyandịle mụ Galịlaị, bo Johanị afụmịle pakulūmbilila ulōsyo. 38Mụmēnye na mụno Kyala ālinsalị̄le Jesụ gwa mụ Nasaletị apa alinkummōnelela Mbepo Mwịkemo namaka, uju āsyungūtilaga nkubōmba īnụnụ, nukubabūmbulusya bōsa aba bālāmbikị̄gwe na Setano; namanga Kyala āli nagwe. 39Nanụswe tuli bakētị ba syosa isị ābōmbaga nkị̄su kya Bajụ̄ta, aba mụ Jelụsalemụ. Uju balinkunngoga kunjila ja kunkomela pakikohekano. 40Jo uju Kyala alinkunsyusya pị̄sịku lya butatu, alinkumpelela ukuti abonekege ịtolo pabwelụ, 41komma kubāndu bōsa, lolị kubakētị aba Kyala ābasalị̄le ngānị, jo jujuswe, twe twālyaga nagwe ifị̄ndu nukunwa amīsi bo afumịle pakusyuka mbafwe. 42Alinkutulagila ukulūmbilila kubāndu īnōngwa īnụnụ nukusịsịmikisya ukuti, uju jo uju īmikị̄gwe na Kyala ukuja jo nndōngị gwa būmị nabafwe. 43Jo uju abakụ̄ngụlụka bōsa bansịsịmịkisyaga, ukuti bōsa aba bịkummwịtika, bịkwambililaga ubuswe bwa nōngwa mụ̄ngamụ jake.

Abāpānja bịkwambilila Mbepo Mwịkemo

44Lelo bo Petelị akāli ịkujoba, po papo Mbepo Mwikemo alinkubasololokela bōsa aba bālipikaga ilịsyu lilīli. 45Abēne abị̄tikị ababụ̄tịgwa, aba bl̄ịsịle na Petelị, balinkuswịga papo ikikūngilwa kya Mbepo Mwịkemo kyababonekelaga na bāpānja; 46namanga bābapilikaga bo bịkujobela mụ̄ndimị isị̄ngị nukuntụ̄fya Kyala. 47Po papo Petelị alinkwamụla alinkuti: Kali po jwanị abagị̄le ukukānịsya amīsi ukuti aba bangōsịgwaga bo jujuswe? 48Po papo alinkulagila ukuti bōsịgwege mụ̄ngamụ ja Jesụ Kilisịtị. Abēne lelo balinkunsūma ukuti agonepo nabo amasịku amanāndi.

Currently Selected:

Īmbōmbo Sya Batumịgwa 10: NYB96

Highlight

Copy