LEVÍTICO 6
6
1Señor Diosmi Moisesta nirqan: 2—Pipas runamasinta q'otun ima hap'ichikusqanpipas mañaykusqanpipas chayqa, ñoqa contran huchallikun. Pipas runamasinmanta suwakunpas alqochanpas chayqa, ñoqa contran huchallikun. 3Pipas chinkasqata tarikuspa mananchakun, llullakuspapas juran, runakunaq huchallikusqanta hinapas huchallikun chayqa, ñoqa contran huchallikun. 4-5Chay hinata huchallikuqqa huchachasqa kasqan p'unchaypin kutichipunqa suwakusqanta, qechusqanta, ima hap'ichikuy hap'isqanta, chinkasqata tarikusqanta, imamantapas llullakuspa jurasqantapas. Chaytan mana imanasqallata chay kaqniyoq runamasinman qopunqa, chaymantaq phisqamanta hukninta yapaykunqa. 6Kutichipuna ofrendapaqtaq huk mana imanasqa anejotapas orqo cabratapas ñoqaman apamunqa, allin chaninchasqata. 7Sacerdotetaq ñawpaqeypi chayta haywanqa chay runaq huchan pampachaypaq, hinan pampachasqa kapunqa mayqenkaqpichus huchallikusqanmanta, nispa.
Ruphachina sacrificiokunapaq kamachisqakuna
8Señor Diosmi Moisesta nirqan: 9—Aaronta churinkunatawan kamachimuy: Kaymi ruphachina sacrificiopaq kamachikuy simiqa: Ruphachina sacrificioqa tutantinmi altar patapi kashanqa, altar ninan chaypi rawrashallanqapuni. 10Sacerdoteqa lino p'achantan churakunqa, lino calzoncillotan ukhunmanpas churakunqa. Ruphachina sacrificiota nina ruphapuqtintaqmi payqa altarmanta usphata hoqarispan altar qayllaman churaykunqa. 11Chaymantataq p'achanta ch'utikuspa wak p'achawan churakunqa, hinaspan karpa-karpa hawaman usphata apanqa mana qhelliyoq cheqasman.
12Altar patapi hap'ichisqa ninaqa aman wañunqachu, aswanpas sapa tutamantan sacerdoteqa chayman llant'ata churanqa, chay patamantaq ruphachina sacrificiota churaykunqa, hinaspanmi chay patapi ruphachinqa sumaq kawsay ofrenda wirata. 13Altarpi ninaqa rawrashallanqapunin. Aman wañunqachu.
Ruru ofrendakunapaq kamachisqakuna
14Kaymi ruru ofrendapaq kamachikuy simiqa: Aaronpa churinkunan chayta Señor Diospa ñawpaqenpi haywanqaku, altarpa chimpanpi. 15Hinaspan ruru ofrendamanta hapt'ay ñut'u hak'uta hoqarinqa aceitentawan llapa inciensontawan. Chaytan altar patapi ruphachinqa llapallanta Señor Diosman apamusqa kasqanta rikuchinapaq, q'apaynintaq Señor Diospa sonqonman chayanqa. 16-17Ofrendamanta puchuqtataq Aaronqa churinkunapiwan karpaq ch'uya kanchanpi mikhunqaku. Mana qonchuyoq chayachisqata Dioswan Tupana Karpa kanchapi mikhunqaku. Paykunamanmi chayta qoni mikhuna ofrendaykunamanta tupaqninkuta. Chayqa ancha ch'uyan, hucha pampachaypaq ofrenda hina, kutichipuna ofrenda hina. 18Aaronpa mayqen churinpas chaytaqa mikhullanmanmi. Chayqa Señor Diospaq mikhuna ofrendakuna Aaronpa mirayninman tupaqllapuni kashanqa. Pipas chaykunata tupaykuqqa ch'uyan kapunqa, nispayki, nispa.
Sacerdotekunaq ruru ofrenda haywanan
19Señor Diosmi Moisesta nirqan: 20—Kay ruru ofrendatan Aaronpas churinkunapas ñoqaman haywawanqaku hawisqa kasqanku p'unchaypi. Huk kilo ñut'u hak'utan apamunqaku sapa p'unchay ruru ofrendata apamusqankuta hina. Tutamanta kuskanta haywawanqaku, ch'isintataq huk kuskanta. 21Pata sartenpin ruwanqaku aceitewan allin q'apisqata, hinaspan p'akirqarisqata ruru ofrendata hina ñoqaman haywawanqaku, q'apayninpas sonqoymanmi chayanqa. 22Taytan Aaronpa rantinpi hawisqa sacerdotepas chay hina ofrendallatataq haywawanqa. Chayqa chaskinaypaq tupaqllapunin, llapallanmi chayqa ruphachisqa kanqa. 23Sacerdoteq ima ruru ofrendanpas llapachallanmi ruphachisqa kanqa, manan chaytaqa pipas mikhunqachu, nispa.
Hucha pampachaypaq sacrificiokunapaq kamachisqakuna
24Señor Diosmi Moisesta nirqan: 25—Aarontawan churinkunatawan nimuy: Kaymi hucha pampachaypaq sacrificio haywanapaq kamachikuy simiqa: Mayneqpichus ruphachina sacrificio nak'akun chaypin hucha pampachay ofrendaqa Señor Diospa ñawpaqenpi nak'akullanqataq. Chay ofrendaqa ancha ch'uyan. 26Haywaq sacerdoten Dioswan Tupana Karpapi chayta mikhunqa, chay kanchaqa ch'uyan. 27Imapas ofrenda aychata tupaykuqqa ch'uyan kanqa. Yawarnintaqchus p'achanman ch'allaykunqa chayqa, chay p'achatan karpaq ch'uya kanchanpi t'aqsanqaku. 28Wayk'usqa kasqan t'uru mankataqmi p'akisqa kanqa, bronce mankapitaqchus wayk'usqa karqan chayqa, qhetuspa unuwan maqchisqan kanqa. 29Mayqen sacerdoteq churinpas chaytaqa mikhullanmanmi. Chay ofrendaqa ancha ch'uyan. 30Hucha pampachaypaq ofrendaq yawarnintan ichaqa Dioswan Tupana Karpaman apaykunqa. Ch'uya Cheqaspi hucha pampachaypaq haywananpaqmi chayqa, manan chay ofrendataqa mikhunqachu, ninapi ruphachisqan kanqa.
Currently Selected:
LEVÍTICO 6: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
