LEVÍTICO 7
7
Kutichipuna ofrendakunapaq kamachisqakuna
1Kaytaqmi kutichipuna ofrendamanta kamachikuy simiqa. Chay ofrendaqa ancha ch'uyan. 2Mayneqpichus ruphachina sacrificio nak'akun chaypin kutichipuna ofrendata nak'anqa, yawarnintataq altar muyuriq qhataman hich'aykunqa. 3Chay ofrendaq wirantataq llapanta haywanqa, chupata, wiksa llika wirata, 4iskaynin rurunta, chaykuna qayllapi ñañu wasa wirata, sullk'a k'ipchantawan. 5Hinaspan sacerdoteqa chaykunata altar patapi ruphachinqa, Señor Diospaq mikhuna ofrendata. Chayqa kutichipuna ofrendan. 6Sacerdoteq mayqen churinpas chaytaqa mikhullanmanmi, karpaq ch'uya kanchanpin mikhunqaku. Chay ofrendaqa ancha ch'uyan.
7Imaynan hucha pampachaypaq sacrificio, ahinallataqmi kutichipuna ofrendapaqpas, kaqkama kamachikuy simillan iskayninpaqpas kanqa. Hucha pampachachiq sacerdotepaqmi chay animalpa aychanqa kanqa. 8Piqpa ruphachina sacrificiontapas haywaq sacerdoteqa chay animalpa qarantan hap'ikapunqa. 9Hinallataqmi hornopi chayasqa ima ruru ofrendapas, pata sartenpi chayasqa ruru ofrendapas, llatapi theqtisqa hak'u ofrendapas haywaq sacerdotepaqmi kanqa. 10Aceiteyoq chapusqapas mana aceiteyoqpas llapa hanku ruru ofrendaqa Aaronpa llapa churinkunapaqmi kanqa, sapankapaqpas kaqkamalla.
Sumaq kawsay ofrendakunapaq kamachisqakuna
11Señor Diosman haywana sumaq kawsay ofrendapaq kamachikuy simiqa kaymi:
12Señor Diosta agradecekuspachus sumaq kawsay ofrendata haywanqa chayqa, animaltawanmi haywanqa aceitewan chapuspa mana qonchuyoq t'antakunata, aceitewan llusisqa mana qonchuyoq llaphllallaña t'antakunata, aceiteyoq allin q'apisqa ñut'u hak'u tortakunatawan. 13Qonchuyoq t'antakunatawanmi chay agradecekuy ofrendantapas haywallanqataq. 14Sapanka rikch'aq t'antamantan huktakama Señor Diospaq t'aqanqa, chay t'aqasqatataq ofrendaq yawarninta hich'aykuq sacerdoteman qopunqa. 15Chay ofrendaq aychantataq haywasqa kasqan p'unchaypi mikhunqaku, manan imatapas qhepantin p'unchaypaqqa saqenqakuchu.
16Pipas sumaq kawsay ofrendata apamunqa prometekusqanta hunt'aspa otaq payllamanta qospa chayqa, sacrificionta haywasqan p'unchaypin mikhunqaku, chaymanta puchuqtataq qhepantin p'unchay mikhunqaku. 17Chaymantapas kinsakaq p'unchaykama puchuqtataq ruphachipunqaku. 18Sumaq kawsaypaq sacrificasqa aychatachus kinsakaq p'unchaypi mikhunqa chayqa, haywaqtaqa manan Diosqa chaskinqachu, manan haywaqpaqpas allinninpaqchu kanqa. Aswanpas qhelli aychan kanqa, pipas chayta mikhuqqa muchuchisqan kanqa. 19Ima qhelliqpas tupaykusqan aychataqa aman mikhunqakuchu, aswanpas ruphachisqan kanqa.
Pipas ch'uya kashaqmi aychataqa mikhunman. 20Pipas qhelli kashaspa Señor Diosman haywasqa sumaq kawsay ofrenda aychata mikhunqa chayqa, llaqtan ukhumantan qarqosqa kanqa. 21Pipas runaq ima qhellintapas, qhelli animaltapas, ima millay qhellitapas tupaykuspa, Señor Diosman haywasqa sumaq kawsay ofrenda aychata mikhunqa chayqa, llaqtan ukhumantan qarqosqa kanqa, nispayki, nispa.
Wirapaqwan yawarpaqwan kamachisqakuna
22Señor Diosmi Moisesta nirqan: 23—Israel runakunata nimuy: Aman waka wiratapas, borrego wiratapas, cabra wiratapas mikhunkichischu. 24Wañusqa animalpa wiranqa, phiña animalpa llik'irqarisqan animalpa wiranpiwanqa imapaqpas kapuchun, ichaqa aman chaytaqa mikhunkichischu. 25Pipas Señor Diosman mikhuna ofrendata hayway atina animalpa wiranta mikhunqa chayqa, llaqtan ukhumantan qarqosqa kanqa. 26Chaymantapas, amallataqmi may tiyasqaykichispipas ima yawartapas mikhunkichischu, phalaq animalkunaqtapas uywakunaqtapas. 27Pipas ima yawartapas mikhunqa chayqa, llaqtan ukhumantan qarqosqa kanqa, nispayki, nispa.
Sacerdotepaq t'aqasqa mikhuna
28Señor Diosmi Moisesta nirqan: 29—Israel runakunata nimuy: Pipas sumaq kawsay ofrendata Señor Diosman haywanqa chayqa, chay ofrendanmantan wakinta Señor Diosman sumaq sonqota hina haywanqa. 30Makinwanpunin apamunqa Señor Diospaq mikhuna ofrendakunata. Wiratan pechontawan apamunqa, pechontaqa Señor Diospaq allinnin sumaq sonqota hinan t'aqanqa. 31Wirataqa altarpin sacerdote ruphachinqa, pechontaqmi Aaronpaq churinkunapaqwan kanqa. 32Sacerdotemanmi qollankichistaq sumaq kawsay ofrendaq paña chakanta payllapaq qosqata hina. 33Mayqen sacerdotepas sumaq kawsay ofrendaq yawarninta wirantawan haywaqqa paña chakantan hap'ikunqa. 34Israel runakunaq sumaq kawsay ofrendankunamantan Señor Diosqa sumaq sonqo qosqa pechonta chakantawan t'aqaspa, Aaronman churinkunamanwan qorqan Israel runakunamanta chaskishanallankupaq, nispayki, nispa.
35Chaykunatan Señor Diospaq mikhuna ofrendakunamanta Aaronman churinkunamanwan tupaqta qorqanku, Señor Diospa sacerdoten kanankupaq churasqanku p'unchaypi. 36Chay hawisqanku p'unchaypin Señor Diosqa Israel runakunata kamachirqan chaykunata qonankupaq. Chaykunataqa mirayninkunapaq qoshallanqakupunin.
37Chaykunan kamachikuy simikunaqa ruphachina ofrendapaq, hucha pampachay ofrendapaq, kutichipuna ofrendapaq, sacerdote churana ofrendapaq, sumaq kawsay ofrendapaqwan. 38Chaykunatan Señor Diosqa Sinaí orqopi Moisesman kamachirqan Señor Diosman ofrendakunata haywanankupaq, Israel runakunata Sinaí ch'inneqpi kamachisqan p'unchay.
Currently Selected:
LEVÍTICO 7: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
